Yakul Ku Yipul Yen

◼ Ov, chiwapin kufund malejan makwisambinau ku Shikol ya Mudimu wa Uteokras ni kuyangenam antu akwau?

Chiwapin kusal mwamu mulong wa kuyisadil kusu kud yidi ya dijuku ni arund akemp a piswimp. Pakwez, malejan mud minam chifanyidinap kumwangenam muntu mwin mwawonsu ap kumalandish, mulong kusal mwamu kudi kubwambwil mbil ya in kufund.​—⁠Rome 13:⁠1.

Mulong wa minsamb yimwing ya ku Shikol ya Mudimu wa Uteokras, aletining kusu mutu wa mulong; kakatap kulejan referans mudioshinau malejan. Ov, chikwikal cha ukwash anch muntu arijeka dipang dia mareferans ap kufund kudioshinau malejan makusadilau antu atambwila minsamb mud yiney ya kusal ku shikol? Bwat. Chikwikalap kand chiwamp kuyifundin antu akwau yakul ku yipul ya Dichirikin dia Shikol ya Mudimu wa Uteokras, mulong chinech chikutwishap kuyikwash kulam milong ya usey mu manangu. An a shikol afanyidin muntu ni muntu kwikimbinap amwinend. Chinech chawiy chikunku cha usey cha mafundish mapaninay Yehova kusutil ku shikol chakwel kutukwash kulond nich “rudim ra antu afundishinau.”​—⁠Isa. 50:​4, NW.