Kangal Widjidjek Kutakel Dilejan dia Bibil!
1. Ov, mutapu ik tufanyidinap kulik ‘kusal kuwap’?
1 Mu kulejan nich mushiku rusangu ruwamp ra Want wa Nzamb, tukutwishap kulik ‘kusal kuwap’ kudi antu adia mu materitwar metu matwinkishinau. (Jinsw. 3:27) Kwikil uruu uwamp nakash wa kuyilej antu kupandakanamu uruu ulejena yisu yiwamp yezina mwishin mwa winyikel wa Nzamb. Ap anch ukutwish kulejan pakad choy ruchingej ra Want kusutil ku kupan uman wa kukashimwish ap kupan mikand, ov, ukutwishap kusal anch kutakel dilejan dia Bibil kwikala rutong rey, anch kand kal usambisha kusal mwamu?
2. Ov, yom ik yikutwisha kutukangesh kusambish dilejan dia Bibil?
2 Yisu yimwing, pakach pa yikangesh yijim nakash ya kutakel dilejan dia Bibil kuding yovil yetu piur pa mulong winou. Antu amwing akat kwidjidjek kutakel dilejan dia Bibil mulong wa kuburen ruchingej ap mulong akwet midimu yivud. Yiyul yilondwilaku ey yikutwish kwikal ya ukwash kudi ey mulong wa kulik kwidjidjek mu kusal mudimu wa kutakel dilejan dia Bibil.—Mat. 28:19; Midimu 20:20.
3. Mulong wak tudi awanyishinau mulong wa kulejan Bibil?
3 Kuburen Ruchingej: Pamwing ap wilejap nakash ap mulong wa mayingish makwau uburedin ruchingej mu ukaliweny wey wa kutakel dilejan dia Bibil. Atushalapol in Kristu a mu chitot cha mivu cha kusambish adinga asadina mudimu nawamp kadingap “antu ileja ku shikol, adi mudi antu awonsu.” Ov, chom ik chayikwasha kuyilej antu akwau uyakin? “Ading nend Yesu.” (Midimu 4:13) Ilejina kudiay Mulej Mujim, Yesu, malejan mend ni mitapu yend ya kulejan ayifunda mulong wetwetu mu Bibil. Ap anch kiwilejap nakash, ukat kutambul malejan ma mu spiritu mapandikena malejan makwau.—Is. 50:4; 2 Kor. 3:5.
4. Ov, yik tukutwisha kwilej kusutil ku chilakej cha Amos?
4 Yisu yimwing Yehova wasadila aprofet mulong wa kuyibabesh antakel ayimp ap antu akwau ading pa ndond ya piur. Amwing, mudi Amos, kadingap pa ndond ya piur. Amos walonda anch: “Am kinidiap muruu wa Nzamb wa machuku mawonsu. Ap mwan a muruu. Pakwez am nidi kafung wa annam. Nikat kulam kand yir ya mitond ya nfung.” (Amos 7:14) Ap mwamu, Amos kalikap kupan uruu wa dirumburish dia Yehova kudi mwin kupesh Amasia wading mwin kwifukwil a ngomb. (Amos 7:16, 17) Tufanyidin kuvurik chisu chawonsu anch tusadil mudimu wa Nzamb ni ndiy ukez kutuwanyish mu mutapu ufanyidina chakwel tusala nawamp mudimu watwinkishay.—2 Tim. 3:17.
5. Mulong wak tufanyidin kwikasikesh kusambish dilejan dia Bibil ap anch tukwet midimu yivud ya kusal?
5 Midimu Yivud: Ap anch ukwet midimu yivud, watekin kal pamwing ap chisu cha kwipan mu mudimu wa kulejan chisu chawonsu. Kutakel dilejan dia Bibil kukutwish kwikal mulad umwing usangareshina nakash mu mudimu wa kulejan. Chidi chisend chimwing chikash anch twaman mutapu ukarumwina Dizu dia Yehova mwom wa muntu. (Heb. 4:12) Yehova usanger pitukata kwipan ayinetu mulong wa kuyikwash antu akwau “kwez kwijik uyakin.” (1 Tim. 2:4) Ap angel ni yawiy akat kusangerang pakatay kukarumuk muntu ni kulik yaku yend ya pasak ni payilay kurutu mu spiritu.—Luka 15:10.
6. Ov, tukwet mudimu ik wa usey pitusadina rusot ra Nzamb?
6 Nzamb “usotil kuyipandish antu awonsu ni kwez kwijik uyakin.” (1 Tim. 2:4) Tukwet mudimu wa pakampwil mudi ik wa kusal kwambatan nich rusot ra Nzamb, tukutwishap kudjidjek kutakel malejan ma Bibil!