Sadilany Bibil Nich Nkeu

1. Mulong wak Bibil udi wa ukwash nakash?

¹ Kusadil nich nkeu Dizu diapepilay Nzamb kututwishishining kukun dizu ni kulejan uyakin patok ni kusaul kand malejan ma makasu ni yishankur ya antu.—2 Tim. 2:15; 1 Pita 3:15.

2. Chom ik chikutwisha kutukwash kukimb mifund nich nkeu yikash?

² Ijik Bibil Nawamp: Mudi mudinga kusadil chamu cha mudimu, nkeu jikat kwez ku kwijik nawamp chamu chiusadidila. Kumutang Bibil kusambish kwisambishil djat ni kwisudiel ku kukutwishish wijika yom yidiamu. Chikukutwishish kand kuvurik swa mifund ni kuyikimb swa-swa. Anch wijik nawamp Mifund, ukutwish kusambish kulond nich mushiku nakash ni kashinsh kawonsu piuyilejina antu akwau mu mutapu wakad kuchingejin ap anch udi mu mudimu wa kulejan.—1 Tes. 1:5.

3, 4. (a) Jinjil ik jimwing jitukutwisha kusadil mulong wa kumwijik nawamp Bibil? (b) Ov, ukat kusadilany jinjil jikwau chakwel wijikany nawamp Mifund?

³ Itekina rutong ra kukimbijol mu Bibil wey ni kumuburil ni kumutang pa chisu chiudia ku yikumangan ya chikumangen. Piwilejina amwiney ni piurijekina yikumangan ya chikumangen, kimb Mifund yawonsu yijimbwilau ni tongijokin pa mutapu wa kuyisadil. Antu avud amening anch kumutang kamu Bibil amwinend kupandakenamu kulemp kumutangin ku ordinater ni kwawiy kukat kuswapesh kuyitan mifund pa chisu uyikimbina anch uyiswiridin mu mudimu wa kulejan.—Yoh. 14:26.

⁴ Majuku mamwing mitenchikidina kal chisu cha kulam maverse ma Bibil mu mutu. Ukutwishany kusal mwamu nich kusadil tumapaper piufundinany mifund mutambu umwing ni verse amwinend ku mutambu ukwau. Akat kusal muntu ni muntu pa chisu chend chakwel akwau amana anch akutwish kujimbul mufund ap kujingunik ndond yikutwishau kutan mazu minam. Kwiyijidish minsamb ya kusadil mu mudimu wa kulejan ni mutapu wa kwakul chikangesh ap chipul nich kusadil Bibil nikwawiy kukat kukudish nkeu.

5. Mulong wak tusotina kukudish nkeu yetu ya kwijik Bibil?

⁵ Kwikil buku ap umwing ukutwisha kwilikan ni Bibil. Mu Bibil mudi mifund yitumbila yikutwisha ‘kuyidimwish antu ku dipandish.’ (2 Tim. 3:15) Antu avud adia mu teritwar wen kijap kwau nawamp katok ka usey kadia mu Bibil, chawiy tuyingin nich kukudish nkeu yetu ya kuyilej yom yidia mu Bibil yikutwishau niyau kwijik.—Jinsw. 2:1-5.