Mutapu wa Kuyifumb Antu Asu Chakwel Alejan
1. Ov, mutapu ik wiyova pa chisu cha kusambish wiyandjika mu mudimu wa kulejan?
1 Ov, uvurikin chisu cha kusambish wiyandjika mu mudimu wa ku chikumbu ni chikumbu? Pakad ntad, wadinga wovili wom. Anch usadil ni mulej wey wa Bibil ap mwin kulejan mukwau, ukwikalap nich ntad ja kutan ukwash wend. Pakwez, katat ukwet uman mudi mwin kulejan, udi mu mwikadil wa kukwash antu asu chakwel ni yawiy alejan.
2. Ov, in kulejan asu aswiridin chom ik cha kwilej?
2 In kulejan asu aswiridin kwilej mutapu wa kusambish mambamb ni mwin chikumbu, kusadil Bibil ku chis ni chis, kuyichirikin antu ambambilau nau, kusambish ni kutakel malejan ma Bibil. Afanyidin kand kwilej mutapu ukutwishau kulejan mu mikombil yishalijadina, mudi jindond ja midimu ya kwisak. Ukutwish kuyikwash chakwel irijeka mu jindond jau kusutil ku chilakej chey ni yitongijok yey.
3. Ov, mutapu ik tukutwisha kuyikwash antu akwau kusutil ku chilakej chetu?
3 Lejan kusutil ku chilakej: Yesu wayileja in kwilej end mutapu wa kulejan. (Luka 8:1; 1 Pita 2:21) Pa chisu chiwirijekina kusal mudimu ni mwin kulejan musu, rijek chakumenaku chiswapela chikutwishay mwin kulejan musu kwimburij, pamwingap ukutwish wasadil chilakej chiwatana mu umwing wa mikand yetu. Chikwau, pa chisu ulondina ku chis cha kusambish ap chakaad chifanyidin mwin kulejan musu atesha yom yiulondila. Pakach pa yis, ufanyidin kumwipul mwin kulejan piur pa kutal kwend kwa manangu kwatalayikal mu chakumenaku chey. Kusal mwamu kukez kumukwash kuman usey wa kusal nau antu akwau mudimu wa kulejan ni chikez kwikal chiswapela kwitiyij yitongijok yawonsu ukeza kumwinkish kupwa kwa kusal chakumenaku chend.
4. Ov, mutapu ik tukutwisha kukwash mwin kulejan musu kupwa kwa kutesh chakumenaku chend?
4 Let Yitongijok: Yesu wayinkisha kand in kwilej end yany piur pa mutapu wa kulejan. (Mat. 10:5-14) Ukutwish wamukwash mwin kulejan musu mu mutapu umwing ou. Pa chisu chilondilay, mutesha nawamp. Chikwau, Kupwa kwa kudiokal ku chis, mekesh musangar wa pakampwil ni mujikitisha nakash, chisu chivud anch umen mikadil ya chakumenaku chend yiswiridin kukasikan. Kurutu kwa kumwinkish chitongijok, ukutwish watond chom chifanyidinay kurijek kusal mu mutapu uwamp ku chis chikwau. Pamwingap wadi kamu ujimena. Ijik kand nawamp anch in kulejan awonsu kakwetap ukaliweny umwing, ni chisu chivud akat kusal chom kanang mu mutapu uwanyidina.—1 Kor. 12:4-7.
5. Ov, chom ik tukutwisha kulond pa chisu tukwatina mupak wa kumwinkish mwin kulejan musu yitongijok?
5 Pa yisu yimwing mwin kulejan musu ukukwit yiyul. Pakwez, anch kakwetap, kwat mupak wa kumukwash. Ov, mutapu ik chikutwisha kusadik ni manangu? In kulejan amwing akweta uman ipwil anch: “Ov, nikutwish nakwinkishanyaku chitongijok?” ap anch “Ov, mutapu ik utongina pa mulong winou?” Mutapu ukwau udi wa kulond anch: “Pa chisu nadinga mwin kulejan musu, nadinga ni chikokujol chakwel . . . , pakwez natana ukwash winou. . . .” Pa yisu yimwing chidi cha usey kushinshikin pamwing buku Comment raisonner. Pa chinech, chifanyidinap kumwovish wom, mwinkisha yitongijok yitadina ching mwikadil wa chakumenaku chend.
6. Ov, mutapu ik ‘utad ukata kusaul utad’ nich kalimish mu mudimu wa kulejan?
6 Utad ukat kuusaul utad: Timote, umwing wa in kulejan akweta uman, amukasikesha kudiay Paul chakwel adandamen kusadil amwinend malejan ni kuya kurutu. (1 Tim. 4:13, 15) Chawiy, yikutwish kwikal mwamu anch wasutish mivu mu yisu yey ya kusambish mu mudimu wa kulejan, ufanyidinap kulik kwiyijidish ukaliweny wey. Kwilej ni in kulejan nau antu ulejena, chisu chivud antu akweta uman ukemp mu mudimu wa kulejan, ni kuyibabesh chakwel ayikwasha antu akwau nich musangar, pakampwil antu asu, chakwel ikala in kulejan a mushiku a rusangu ruwamp.—Jinsw. 27:17.