Tukudishany Ukaliweny Wetu mu Mudimu wa Kulejan—Kwikal Mbay wa Mudimu Ukwashininga

Chidia cha Usey: Yesu wading wij usey wa kulejan pamwing ni mbay wa mudimu mukwau. Chawiy lel, chisu chayitumay in kwilejend 70 chakwel aya nend mu mudimu wa kulejan, ndiy wayituma aad aad. (Luka 10:1) Mbay wa mudimu ukutwish kupan ukwash uswiridina kudi mbay nend mwin kulejan utanina mwikadil ukash ap kadiap nich kashinsh ka kwakul ku chipul cha mwin chikumbu. (Mul. 4:9, 10) Ndiy ukutwish kulet uman wend ni kupan pa yisu yimwing chitongijok chikutwisha kumukwash muntu ulejenay nend chakwel ikala mwin kuleja chifuvu. (Jinsw. 27:17) Ndiy ukutwish kand kupan ukwash kusutil ku minsamb yikasikeshina kurutu kwa kushik ku chis chikwau.—Fil. 4:8.

Mutapu wa Kusadil:

Tang matu chisu chipaninay mbay ney wa mudimu uman. (Jak. 1:19) Londul piswimp kamu mu Bibil wey chisu chawonsu chikutangau verse. Chinech chikez kukutek mu mwikadil uwamp chakwel upana ukwash anch chitwishikin.
Sadil chitongijok chiwamp chakwel ukwata mupak anch ufanyidin ap kwiyandjik mu minsamb. (Jinsw. 25:11) Anch umutwadinaku mwin kulejan mukwau ku dilejan dia Bibil, kurumburil kwey kwa pachipatu kukez kwikal chakin kamu kwa usey. Pakwez, chisu chiudianya mu mudimu wa kulejan wa ku chikumb ni ku chikumbu, mbay ney wa mudimu ukusot chakwel umulikidil alonda anch chidi chisu chend cha kulond. Chakin kamu, anch udi mwin kulejan musu ap anch uburedin kashinsh ka kwakul ku chipul kanang ap ku chikangesh minsamb, chakin kamu ndiy ukez kusanger ukwash wey. Pakwez, anch umutwadin mwin kulejan mu mudimu wa kulejan wa kuchikumb ni chikumbu, mu kuyichirikin antu ap kutakel dilejan dia Bibil, kangal kwimik minsambu, kulond nakash ap kuswimp mutu wa mulong.
Lejan uman wey. Anch watan mutapu, ukutwish kumwinkish mwin kulejan ulejena nend pamwing chiyul chakwel chimukwasha kwikal chifuvu mu mudimu wa kulejan, kangal widjidjek kumulej uman. (Jinsw. 3:27) Pa chisu chifanyidina, ukusambish ni kulond anch: “Ov, mutapu ik utongina pa mulong winou?” ap anch “Ov, nikutwish nakwinkishaku chitongijok?” ap “Wawiy mutapu unikata kusal.” Vurik anch in kulejan akwau pasangaredinau kutambul chiyul kanang, yisu yimwing akez kuziy anch wadandamen kupwitin jinkeu pa yilim yau.

Pakish Kusal Mwamu pa Ngond:

Kupwa kwa kusal mudimu wa kulejan pamwing ni mbay ney mwin kulejan, mwipula chitongijok chend ap alonda chom chamukwasha kwikal mbay wa mudimu ukwashininga.