Mukwash Mbay Wey Ulejena Nend
1. Ov, mutapu ik tukutwisha kwimburij mwikadil wadingay nich kambuy Paul chisu tusadininga pamwing ni in kulejan akwau mudimu wa kulejan?
1 Kambuy Paul wamana chisu chasutishangay pamwing ni ambay nend akaritiy mudi yisu ya ‘kukwashijany.’ (Rom 1:12) Chisu usadininga pamwing ni mwin kulejan mukwau mu mudimu wa kulejan, ov, witekidining chisu chinech chakwel umukasikesha ni umukwasha? Pa ndond pa kwikal mbay wa mudimu wakad kulond, ov, mulong wak ukutwishap kumulej mbay ney ulejena nend yom ya kukwash kwikal mwin kulejan chifuvu?
2. Ov, chom ik tukutwish kusal chakwel tudiosha kuburen ruchingej ra mbay netu tudia nend mu mudimu wa chingand, mulong wak chidia cha usey?
2 Kasikesh Ruchingej: In kulejan amwing ashadishining ruchingej, rikutwish kumekena mu mutapu wau wa kutal ap wa kulond. Tukutwish kudiosh kuburen ruchingej rau kusutil ku kuyijikish kwakin. Ov, mitapu ik yimwing yikwau ya kukasikeshin ruchingej? Kalam umwing mwin kwendangan wamuleja patok mbay nend walejena nend piur pa wom wend ni mutapu walembilangay chisu ni chisu chakwel apandakana chikokujol chinech. Mukadivar umwing walejana piur pa chom cha mukwasha kwikal nich ruchingej anch: “Nasambisha nich masip. Yisu yimwing nalembilanga chakwel nitana ukwash wa kulond mu mutapu uswapela.” Ov, kudi chom kanang cha kukwasha nakash chakwel wikala nich ruchingej mu mudimu wa kulejan? Mulejach mbay ney wa mu mudimu wa chingand.
3. Ov, yom ik tukutwisha kumulej mbay netu tulejan nend chakwel yimukwasha ikala chifuvu mu mudimu wend wa kulejan?
3 Lejan Milad: Ov, wataninap kal mutapu uswapela wa kusambish minsamb ap wa kwipul, pamwing ap chom kanang piur pa chinship cha pol pen chidia chiwamp kusambish nich minsamb? Ov, wataninap kal yibudikin yiwamp yidiokidila ku kuwej chom kanang chisangareshina ku chakumenaku cha sampul? Mulejach mbay ney ulejena nend. (Jinsw. 27:17) Piumuchirikidina muntu, ukutwish kumulej mbay ney ulejena nend rutong ra kumuchirikin muntu winou ni mutapu watenchikina chakwel usala mwamu. Kupwa kwa dilejan dia Bibil, ukutwish kumulej mulong watondina dinans kanang, verse kanang, ap mulad kanang wa kulejan chakwel wisambina maswir ma mwin kwilej.
4. Ov, mulong wak tufanyidina kusanger kuyikwash ambay netu in kulejan?
4 In kulejan a mu mivu chitot ya kusambish kasangeridingap kusu kuyikwash ambay akad ritiy. Pakwez, awiy ijika kand usey wa kuyinkish akwau usu ni kuyikasikesh. (Mid. 11:23; 15:32) Kambuy Paul wamwijidisha nsand Timote ni kupwa wamukasikesha chakwel alejana yom yilejay kudi antu akwau. (2 Tim. 2:2) Anch tuvuramedinap kuyisadil ambay netu in Kristu yom yiwamp chisu tudia mu mudimu wa kulejan, tukutwishap ching kusu kujimbish musangar wau ni kuyikadish ayifuvu pakwez tukutwish kand kumusangaresh Tatukwetu wa mwiur.—Heb. 13:15, 16.