Ikal Mwin Kukwash Muwamp mu Mudimu wa ku Chis ni Chis
1. Yibudikin ik yidingaku mu kusal pamwing ni mbay netu mu mudimu wa kulejan?
1 Chisu chimwing, Yesu wayituma in kwilej end 70 chakwel aya alejan, ni “wayitum aad aad.” (Luka 10:1) Pakad ntaad, ditenchik dined diayikwasha in kwilej end ni diakasikesha muntu ni muntu chakwel alejan. Pa chisu tuyila ni mbay netu mu mudimu wa kulejan, mutapu ik tukutwisha kwikal nkwash kudiay?
2. Pa chisu chilondilay mbay ney, mutapu ik ni mulong wak tufanyidina kumutesh?
2 Mu kuteshang: Chidi chiwamp kumutesh mbay netu pa chisu chilondilay. (Yak. 1:19) Anch kudi mufund wa kutang, ulondula nawamp mu Bibil wey. Mutala muntu ulondila, ikala mbay ney ap mwin chikumbu. Anch wamutesh nawamp chisu chilondilay, chikumukasikesh mwin chikumbu ni yend kusal mwamu.
3. Chisu ik chikutwishay mbay netu kwikal mwin kulond muwamp?
3 Kujingunin pa Chisu Tulondila: Pa chisu tudia ni muntu kanang upanina uman, tukat kumulimish chakwel atakela yom yilondilay. (Rome 12:10) Tufanyidinap kumukatul ku mazu pa chisu chilondilay. Anch mbay netu washadish mazu mafidinay kulond ap mwin chikumbu walet chikangesh kanang ap wapan chipul, tufanyidin kumukwash mbay netu chakwel tumuwejinaku mazu ma kulond pamwing ni kuswimp mutu wa mulong windjing. (Jinsw. 16:23; Mul. 3:1, 7) Anch tukat kulond, mazu metu mafanyidin kwikal makwatikena nich uman utukata kulejan.—1 Kor. 14:8.
4. Mutapu ik tukutwisha kukasikesh musangar wetu ni mazang metu mu mudimu wa kulejan?
4 Pa chisu chapwishau in kwilej end 70 mudimu wa kulejan, awiy “achirika nich musangar.” (Luka 10:17) Ni yetu kand tukwet musangar ni mazang mu mudimu wa kulejan mudi tukata kutesh ni kujingunin pa chisu tulondininga chakwel tuyikwasha ambay netu tuyilinga nau mu mudimu wa ku chis ni ku chis.