Mukand Udiokila ku Chisak Chitakedila

Atushalapol Akwau Akatish:

Musangar mud ik tukweta wa kukufundinany kwinsambishil kwa muvu winou wa pakampwil! Kushik kwisudiel kwa muvu wa 2014, tukez kuwanyish mivu chitot kudiosh pasambishay Mwant wetu Yesu Kristu kuyikel pakach pa akankuny nend.​—Kus. 110:1, 2.

Kusambishin mu muvu winou wa mudimu, chitentam cha pa muvu cha Watch Tower Bible and Tract Society of Pennsylvania, Komite wa Traduction du monde nouveau wabudishin Traduction du monde nouveau révisée, dichap dia dikarumun diwamp dia Bibil didiaku mulong wa antu. Yehova wasadina mwanend kapokal mulong wa kupan ukwash wa kukarumun kwa Traduction du monde nouveau wa kusambish. (Rom 8:15, 16) Chinech chimekeshin kamu anch dikarumun dined didi dia pakampwil, ov, kimwawiyap?

Pasutil kal mivu yivud, Komite wa Kufund wa Chisak Chitadila wateka dikarumun dia Bibil pa ndond ya kusambish. Nlel unou, Traduction du monde nouveau udiaku mwawonsu ap mu chikunku mu jindim 121. Tukukasikeshinany chakwel umumekeshany Yehova mu mutapu usangaredinanya nakash Bibil ukwetanya. Mutangany ni tongijokinany pa mifund yidiamu pichuku-pichuku. Chawiy, ukez kwikalany piswim ni Mwin Kufundish Bibil, Yehova Nzamb.​—Jak. 4:8.

Tudi apukwinau ku michim pitukata kutesh yoziu yirishiningau nich akadivar ni anambaz netu akatish. Chimeken patok anch, yisu yimwing chiyikasikedining kutan chisu cha kusangar pamwing ni akadivar nau. Chilakej, dijuku dimwing dia mu Asi, mashakamin mau maswimpa kapamp kamwing mulong wa mayej ma kalip mamushikena makwau. Chikasiken kurumburil, amingang akanganya mutapu wa kwok mayej mend. Chid cha ushon mud ik! Katat nfumwend umulamining mukajend uchuku ni muten. Mwan nau ikundj ni anau amband aad akwet mwikadil uwamp mudi wa in Kristu kusutil ku kuyikwash anvaj nich rukat. Dijuku dined dikweta mwikadil uwamp mudi wa en awonsu upandekenany kurish nich yoziu kushalijan, ukutwishany kutan musangar udiokila ku kujijam mu kupak kwa ritiy ren. (Jak. 1:2-4) Yehova uyikasikeshin atushalapol end azizidilau many ni amikoku akwau anch etu awonsu tukez kutan musangar anch twadandamen kujijaman yoziu mulong akez kutuyukish nich difut dia mwom wa chikupu!​—Jak. 1:12.

Muvu wasutinap ou, antu uvud wa 19 241 252 akumangana ku Chivurikish. Musangar mud ik pa kuman antu avud mudi inay amutumbishina Yehova ni Yesu Kristu kusutil ku kumangan ku chikumangan chipandakena usey cha pa muvu cha antu a Nzamb! Pa chisu cha Chivurikish, kushiman kujim kwaya kudi Nzamb mulong mamiliyon ma in kulejan asala mudi ayibol ankwash pa Rish ni Ndol. Chisangareshin mud ik! Ov, ukwetanyap musangar pa kutesh anch in kulejan inay ipana mu kusal mudi ayibol ankwash pa chisu chezay kalam wa munyingumuku, atwisha kusangar kukumangan ku chikumangan chawonsu cha ayibol chatakelay kalam winou, ap anch kwez kwend kwadingap pa ngond wa Rish ni Ndol? In kulejan a manangu a muspirtu ijika usey wa kudandamen kwipan mu mudimu wa kulejan ni mu mijikit ya chikumangen. Kwikal akwatiken nakash kutukwashining kwikal ashinshamena ni kwiman daang, kwimik yikangej ya Djabul yikutwisha kuziyish ritiy retu ni kutudiosh mwi njil ya mwom.​—1 Kor. 15:58.

Chisangareshin mud ik pa kwijik anch mu muvu wa mudimu wasutina ou, antu uvud wa 277 344 amekesha kwipan kwau kusutil ku kubabatishiu ni adi katat mwi njil ya mwom pamwing ni akadivar nau a pa mangand mawonsu! (Mat. 7:13, 14) Atushalapol inay asu aswiridin ukwash wetu chakwel ‘ikasikesha mu ritiy.’ (Kol. 2:7) Tudandamenany kwikasikesh umwing ni mukwau chakwel tujijamana djat ni kwinsudiel. (Mat. 24:13) “Yikasikeshany akweta wom, yikwashany aziyila, shimpishany michim kudi antu awonsu.” (1 Tes. 5:14) Kupwa, el ambok etu awonsu pakach petu ‘tulembilany pakad kulik’ ni tulondany anch: ‘El Want wey weza.’​—1 Tes. 5:17; Mat. 6:10.

Sangerany amboku Annuaire winou ni ijikany anch tukukatinany umwing ni mukwau pakach pen en akatinau kudi Yehova!

Akadivar nen,

Chisak Chitakedila cha Atuman a Yehova