Yir Yidi Yitok Mulong wa Kwangul
1. Ov, mudimu ik wa usey uyila kurutu katat?
1 Kupwa kwa kumulej mband wa mu Samaria uman, Yesu wayileja in kwilej end anch: “zambulany mes, utalany pa yingand, yawiy yatokang kal pa kwangul.” (Yoh. 4:35, 36; TMK) Kwangul kwa muspiritu kwadinga kuyil kurutu, ni Yesu wisambina kujimb kwa mudimu winou mu mangand mawonsu. Kusutil kwi ndond yend yidiay nich mwiur, Yesu ukat kuvurik ni kwimayin nakash pa mudimu wa kwangul. (Mat. 28:19, 20) Ov, yom ik yimekeshina anch mudimu winou ukudandamen chakwel uya kurutu swa ap anch udi piswimp ni kushik kwinsudiel?
2. Ov, yinship ik yimekeshina anch mudimu wa kwangul wa mu mangand mawonsu udi ujim?
2 Kwangul Kwa mu Mangand Mawonsu: Mu muvu wa mudimu wa 2009, kwadinga uvud wa in kulejan 3,2 pa chitot wiwejinaku mu mangand mawonsu. Mu jingand jadingau ajidikin mudimu wa kulejan mwabudika uvud wa in kulejan 14 pa chitot wiwejinaku. Uvud wa malejan ma Bibil ma ku chikumbu wapanau kwingond wadinga upandakenamu 7 619 000—uvud upandaken kuvul wa in kulejan wadinga piswimp ni chikunku cha katikit kupandakan uvud wa malejan ma Bibil matakelau mu muvu wa mudimu. Mudi muyila mudimu kurutu nakash mu jingand jivud, in kulejan avud ayifumba mu shikol ya umishoner ku Gilead. Jingand jilondiningau rudim ra wingendj jaleta yibudikin yivud mwi ngand ni yikwau. Chimeken anch Yehova uswapejina mudimu pa chisu cha kwinsudiel kwa kwangul. (Isay 60:22) Ov, ukwetany chitongijok chiwamp piur pa “yir” yen?
3. Ov, chom ik chikutwishau antu amwing kulond piur pa mudimu wa kwangul wa pol pau?
3 Kwangul Kwa Pol Pen: Antu amwing akutwish kulond anch: “Teritwar wam kasonginap mabuj nakash.” Chidi chakin anch materitwar mamwing masonginap mabuj mudi musongininga materitwar makwau ap mudi mwasonganga ma pasak. Atuman amwing akutwish kulond anch kwangul kwashiken kal mu materitwar minam ni katat ak mudimu wau awukepish kal chakwel anona yashala kal yikemp. Ov, chidi chakin mutapu winou?
4. Ov, mwikadil ik uwamp utwadila mudimu wetu kurutu tufanyidina kukudish, ni mulong wak?
4 Kudiokal kwisambishil djat ni kwinsudiel, chisu cha kwangul chidi chisu cha mudimu ukash. Talany mutapu wakasikeshay Yesu chakwel kusal yom swa pa mulong winou: “yir yivudil, pakwez in kwangul akepil. Chawiy ulembilany Mwant wa yir chakwel ayituma in kwangul mu yir.” (Mat. 9:37, 38) Yehova, Mwant wa kwangul ndiy ukweta chisend cha kutenchik ndond ni chisu kukwangwilau. (Yoh. 6:44; 1 Kor. 3:6-8) Ov, chisend ik tukweta? Bibil wakwil anch: “Kunany jimbut jen mu chisu cha pamanch, kunany kand jikwau chisu cha urel.” (Mul. 11:4-6) Chawiy lel, chisu chashikina kwangul kwinsudiel chidiap chisu cha kulik chikas chetu kupim!
5. Ov, mulong wak tufanyidin kudandamen kulejan nich mushiku mu teritwar mwakad kusongang mabuj?
5 Dandamenany mu Mudimu wa Kwangul: Ap anch teritwar wetu amusala kal chisu ni chisu ni wamekan anch kasonginap mabuj, didi diyingish diwamp dia kusal mudimu nich mushiku ni chitongijok cha kuswakal. (2 Tim. 4:2) Kanvundangesh kapandakena mu yom ya mangand kashikijining antu ku kuswimp mwikadil wau ni kutongijok nakash piur pa machuku ma kurutu. Mudi chisu chipaminingau ansand, akutwish kwov maswir ma kutan diking ni chisambu mu michim. Kujijaman kwetu kukutwish kukasikesh kand antu akwau. Chawiy, antu akad kutesh mu mivu ya pasak akutwish kutesh mu machuku madia kurutu. Ap anch kudi antu alika kutesh uruu wetu tufanyidin kuyibabesh.—Ezek. 2:4, 5; 3:19.
6. Anch teritwar wetu ukwet yikokujol, ov chom ik chikutwisha kutukwash kulam mushiku?
6 Anch teritwar wetu ukwet yikokujol, ov, chom ik chikez kutukwash kulam mushiku? Pamwingap tukutwish kuwejinaku mudimu wa kulejan wa ku chikumbu ni ku chikumbu nich mitapu yikwau ya mudimu wa kulejan, mudi mwindond ya mudimu wa kwisak ap kulejan uman ku telefon. Ap tukutwish kuswimp chakumenaku chetu chakwel twikal ni minsamb yiwamp. Tukutwish kuswimp program wetu ni kusambish mudimu wa kulejan urel ap pa yisu yikwau yidinga antu ku yikumbu. Pamwingap tukutwish kudandamen kwilej rudim risu mulong wa kuyilej antu avud rusangu ruwamp. Tufanyidin kutanduril mudimu wetu wa kulejan kusutil ku mudimu wa uchibol wa rawonsu. Ap tukutwish kuya mwindond mudia in mudimu wa kwangul akemp. Anch tukwet mwikadil uwamp wa kuya kurutu ni kwangul, tukez kwiyijidish mudi mwin kwangan wakashinsh mudi chifanyidina mu mudimu winou wa usey.
7. Ov, djat ni chisu ik tufanyidina kudandamen mu mudimu wa kwangul?
7 Andim akwet chisu chikemp cha kwangul mbut, pakwez kakuswejap ap kuchirik kunyim djat ni pakupwila mudimu. Chawiy, chifanyidin kuswakej mulong kwangul kwa muspiritu ni kwawiy kudi mutapu umwing ou. Ov, djat ni chisu ik tufanyidina kudandamen mu mudimu wa kwangul? Kusutil ‘kwisudiel kwa mangand djat ni kwisudiel’ (Mat. 24:14; 28:20) Mudi kashalapol wa pakampwil wa Yehova, tusotin niyetu kupwish mudimu watwinkishau. (Yoh. 4:34; 17:4) Chawiy lel, el tudandamenany kusal nawamp mudimu wetu wa kulejan ni mushiku, musangar, ni mwikadil uwamp djat ni kwisudiel. (Mat. 24:13) Kwangul kupwilap!
[Dizu dirumburila chipich chidia pa paj wa 2]
Kudiokal kwisambishil djat ni kwinsudiel, chisu cha kwangul chidi chisu cha mudimu ukash