El Tumekeshany Kujikitish Kwetu Chivurikish Chikusadik pa Ndol 17
1. Ov, chom ik chiwanyidina cha pa kampwil chovilay nfund a kuseng chisu chinech cha chivurikish?
1 Chakwel antu avud ajikitisha chisal cha ranaken ni dipandish cha Yehova, nfund a kuseng walonda anch: “Ov, yom ik yinikutwisha kumuchirishin [Yehova] ku yom yawonsu yiwamp yansadilay?” (Kus. 116:12) Nlel unou, atushalapol a Nzamb akwet diyingish dipandakena usey mulong wa kumekesh kujikitish kwinoku. Kupwa kwa yitot ya mivu yafundau dizu diapepilau, Yehova winkisha mangand chipan chijim—difut. Mudi twirijekina chakwel tusal chivurikish cha rufu ra Kristu pa Ndol 17, tukwet diyingish diwamp dia kumekesh ayinetu kujikitish kupandakena.—Kol. 3:15.
2. Yiyingish ik yimwing tusangaredininga mu difut?
2 Yiyukish ya Difut: Kusutil ku difut, tufanyidin kutambul “dilikishil dia yitil yetu.” (kol. 1:13, 14, TMK) Chinech chitwitin kumwifukwil Yehova nich kom katok. (Heb. 9:13, 14) Tukutwish kusangar kwiyov apipela kulond ni Yehova chisu tusejininga kudiay mu malembil. (Heb. 4:14-16) Antu atekininga ritiy mu difut akwet richingej rijim ra mwom wa chikupu!—Yoh. 3:16.
3. Ov, mutapu ik tukutwisha kumekesh kujikitish kwetu kudiay Yehova piur pa difut?
3 Mekeshany Kujikitish: Njil yimwing ya kumekeshin kujikitish kwetu yidi kushinshikin chikunku ni chikunku cha mifund ya mu Bibil yisambidina Chivurikish ni kutongijokinap. Mutu wa mulong wa Chinong cha Kalam cha Kasan 1, 2011, ulondin anch: “Êtes-vous prêt pour le jour le plus important de l’année ?” autonda chakwel utukwasha kusal mwamu. Tukutwish kand kulond ni Yehova kusutil ku malembil ma mu muchim mutapu tumeninga difut ni usey. (1 Tes. 5:17, 18) Kwikalaku kwetu pa chisu cha chivurikish kumekeshin mutapu tuziyidila mbil ya Yesu ya kumekesh kujikitish. (1 Kor. 11:24, 25) Chikwau, tukutwish kwimburij rukat ripandakena ra Yehova ni kutazuk antu avud anch chitwishikin chakwel eza akumangan netu.—Isay 55:1-3.
4. Ov, chom ik chifanyidina kwikal ruchingej retu?
4 Atushalapol akin a Yehova kakezap kumekesh Chivurikish mudi kamu chikumangan chikwau. Pakwez, chidi chikumangan chipandakena usey cha pa muvu! Mudi musejina chisu cha Chivurikish, pamwingap ruchingej retu ridi mudi ra nfund a kuseng pafunday anch: “Muchim wam, umutumbisha [Yehova], kangal wavuramen yisalijok yend yawonsu yiwamp.”—Kus. 103:2.