Ov, Ukutwish ‘Kwez ku Masedon’?
1. Ov, chom ik chamubachika Paul ni arund nend chakwel aya ku Masedon?
1 Mu muvu wa 49 C.C., kambuy Paul wadiokala mu Antiosh wa ku Siria mulong wa kuya mu weny wend wa kaad wa umishoner. Rutong rend rading ra kuya kwendil mu Efes ni misumb yikwau ya mu Aziy Mukemp. Pakwez, ndiy wamana kusutil ku spiritu utumbila chishimushimu cha diladikij dia ‘kuya ku Masedon’ pa ndond pa kuyendil misumb yikwau. Ndiy ni arund nend itiyija nich musangar, ni ading nich chisend cha kwimik chikumangen cha kusambish mwi ngand yiniya. (Mid. 16:9, 10; 17:1, 2, 4) Nlel unou, yikunku yimwing ya mudimu wa chingand wa mangand mawonsu yikwet kuswir kwakin kamu kwa in mudimu wa kwangul avud. (Mat. 9:37, 38) Ov, udiany mu mwikadil wa kukwashan?a
2. Ov, mulong wak antu amwing kashinshikidiningap kuya mwingand ya wingendj?
2 Pamwing ap ukwetany chitongijok cha kwikal mishoner mudi Paul pakwez kand kal ushinshikinany nawamp kuya mwi ngand ya wingendj. Chikutwish kwikal, pamwing ap mulong wa kuburen mutapu wa kuya ku shikol ya Gilead, ap mulong wa mivu, ni mulong udi nambaz mujich ap ukwet an achidia anikanch. Pamwing ap kandikal ushinshikinap kuya mwi ngand ya wingendj mulong ukwetap ruchingej anch ukutwish kwilej rudim rikwau. Ap ukutwish kwikal ngendj mwin ngand ushicha katat ni mulong wa milong ya nfalang widjidjekin kuya kwindond yindjing. Kupwa kwa kushinshikin mu malembil, ukutwish kutan anch mashakamin minam mafanyidinap kukukangesh kuya mwingand ya wingendj mudia maswir.
3. Ov, mulong wak diyiy dia umishoner didiap chom chitinau chakwel wikala mwin kulejan muwamp mwi ngand ya wingendj?
3 Ov, Diyiy dia Umishoner Didi Chom Chitinau? Ov, chom ik chamukwasha Paul ni arund nend chakwel apandakana? Awiy achingejina mudi Yehova ni spiritu wend utumbila. (2 Kor. 3:1-5) Chawiy, ap anch mashakamin mey makukangeshin kutambul diyiy dia pakampwil, ukutwish kand kulejan nawamp mwingand yayen. Vurikany kand anch utambwilany diyiy didandamedina kusutil ku Shikol ya Mudimu wa Uteokras ni ku Chikumangan cha Mudimu. Ni anch ukwet rutong ra kuya ku Gilead ap ku shikol ya chilik chimwing, chibachikin chey cha kuya mwi ngand yikwau chakwel usala mudimu wa umishoner chikez kukwinkish uman wa usey ukutwisha kusadil kwinyim anch akwitiyija mulong wa kukufumb kakwau.
4. Ov, mulong wak amakurump kafanyidinap kulond anch kakutwishap kuya kulejan mwingand ya wingendj?
4 Amakurump: Amakurump apamina kal muspiritu akweta ukash wa mujimbu uwamp akutwish kusal mudimu upandikena kujimb mu jingand jikweta maswir. Ov, ukutwish kulik mudimu wey wa ku mujimbu? Antu amwing atambula pansio uwanyidina afanyidin kusadil nawamp nfalang jau mu kufutin yom yau mu jingand jiyila kurutu, kuwejinamu usey wa mutapu uwamp wa kwokan, yom yikweta usey ukemp mudi ya mwin ngand yau yidiokilau.
5. Isambina uman wa mukadivar umwing waya mwingand ya wingendj.
5 Mukadivar umwing wadiokala mwin ngand yilondiningau Inglish, wading mukurump ni chibol, waya mwin ndond ya in kutalijol ku mutambu wa kurul ni kwingangel kwa Aziy chakwel akwasha chisak cha in kulejan chinan alondininga Inglish. Chisak chinech cha in kulejan chalejana kudi angendj 30000 ading ashicha mwi ndond yiney. Pasuta mivu yaad antu 50 eza kukumangan ku yikumangan. Mukadivar wafunda anch: “Kuya kwinikwa kwanletina musangar ni yiyukish yivud nakash. Natana musangar uvud!”
6. Isambina uman umwing wa nambaz mujich waya mwingand yimwing ya maswir majim.
6 Anambaz Ajich: Yehova wasadila anambaz mu mitapu kushalijan chakwel alejan rusangu ruwamp mu jingand mudia maswir majim. (Kus. 68:11) Changadim umwing mujich wading ni rutong ra kwipan mu mudimu wend wa kulejan mwingand ya wingendj, pakwez anvaj end atesha maswir mend nawamp win. Chawiy, ndiy watonda ngand yimwing yadinga nich milong ya chipolitik ni milong ya nfalang yiwanyidina, wafundina biro wa mutiy, ni watambula ukwash, ni jinsangu ja pakampwil. Washakama mwingand yin ya mivu musamban, ni wasangara nich yiyukish yivud. Ndiy walonda anch: “Nadinga ni yisu yikemp ya kutakel malejan ma Bibil ku chikumbu. Pakwez, kusadil kwindond kudia maswir majim kwankwasha kutakel malejan mavud ni kukudish chakin kamu ukaliweny wam wa kulejan.”
7. Isambina uman umwing wa dijuku diaya mwingand ya wingendj.
7 Majuku: Anch ukwet an, ov, chidi cha usey utenchik mutapu wa kuya kwingand ya wingendj mulong wa kulejan rusangu ruwamp? Dijuku dimwing dikweta an aad, umwing ukwet mivu chinan ni mukwau ukwet mivu dikum, diakwata mupak wa kusal mwamu. Maku umwing wafunda piur pa uman wau anch: “Tukwet musangar nakash mulong twatwisha kuyilil anetu kwin kwa ni ading mu urund pamwing ni ayibol a pakampwil ni amishoner. Mwom wetu wikadil kal uwamp mulong wa kusadil kwin ndond kwadinga maswir majim.”
8. Ov, chiswapel kusadil mwingand ya wingendj pakad kwilej rudim rikwau? Rumburil.
8 Milong Yitadina Rudim: Ov, chitongijok cha kwilej rudim ra wingendj chikukangeshin kuya mwingand yikwau? Rudim rey arilondin chakin kamu mu jingand jikwau mudia maswir ma in kulejan a Want avud. Ambay a uruu amwing alondininga Inglish aya mwingand mulondiningau Espagnol mwadinga angendj a chisiken chimwing chilondininga Inglish. Kupwa kwa kutambul rusangu radiokila ku biro wa mutiy piur pa yikumangen ya Inglish yadinga nich maswir, awiy atonda muntu umwing chakwel ayendila. Awiy achirika ku yikumbu, akepisha mutapu wau wa kusadil nfalang jau pa ngond, ni alama nfalang ja muvu wa kabuj. Pa chisu chikalau tayad ni kuya, akadivar a mu teritwar win wa ayinkwasha kutan chikumbu chifanyidina.
9, 10. Ov, chom ik chikutwishau kutongin in kubuk adiokila mwin ngand yau, ni mulong wak?
9 In Kubuk: Ov, wadiokalap kal mwingand yen chakwel wikal kal mwin kubuk mwingand kanang, pamwing ap kurutu kwa kwilej uyakin? Chikutwish kwikal maswir majim ma in mudimu wa kwangul mwingand yey ya chivadik. Ov, ukutwish kushinshikin kuchirik kwin kwa chakwel upana ukwash? Chikez kwikal mudi chiswapela kuudia ey kutan mudimu ni chikumbu mulong wa muntu kanang udia mwingand yikwau. Pamwing ap ukutwish kwikal tayad kulond rudim ra mwingand uyila. Chikwau, antu akutwish kusanger kutesh nakash rusangu ra Want riulejena kusut muntu kanang umekena mudi ngendj.
10 Ikundj umwing wadiokila ku Albanie ni waya ku Italie mudi mwin kuchin, watana mudimu uwamp, ni watumina dijuku diend nfalang ku Albanie. Kupwa kwa kwandam mu uyakin, ndiy wasambish kulejan rudim ra in Albanie ku chisak cha ayibol a pakampwil a ku Italie aya kwin kwa kusal kwindond kwadinga maswir majim. Mukadivar wafunda anch: “Awiy aya ku teritwar kunadiokala. Awiy kadiap ija rudim ni kwindond kwadingau ni kuya. Rudim ram ni yishankur yam yading ya in Albanie. Ov, chom ik nadinga ni kusal mu Italie?” Mukadivar wakwata mupak wa kuchirik ku Albanie chakwel akwasha kupalangesh rusangu ruwamp. Ndiy walonda anch: “Ov, nikat kwinan piur pa mutapu nalika kukimb mudimu wa nfalang mu Italie? Pakad kusut minit ap umwing! Natana mudimu wakin mu Albanie. Nitongin amwinam, chakin kamu mudimu winou wa usey ni uletining musangar ukulaba udi mudimu wa kumusadil Yehova nich yom yawonsu ukweta!”
11, 12. Ov, antu ashinshikidin kuya mwingand ya wingendj afanyidin kusal chom ik?
11 Mutapu wa Kuchisadil: Kurutu kwa kuya ku Masedon, Paul ni arund nend asota kuya kurand, pakwez ‘spiritu utumbila wayikangesha,’ chawiy achirika kwindum. (Mid. 16:6) Chisu chadingau piswimp ni kushik ku Bitiniy, Yesu wayikangesha. (Mid. 16:7) Yehova, kusutil kudi Yesu udandamedin kutakel mudimu wa kulejan. (Mat. 28:20) Chawiy, anch washinshikidin kuya mwingand ya wingendj, kimb kusutil mu malembil umutakel wa Yehova.—Luka 14:28-30; Jak. 1:5; tal mu mushet “Mutapu wa Kwijik Anch Ngand Yiushinsikidina Yikwet Maswir.”
12 Ita yirumburik yiwamp kudi amakurump ni in Kristu aswila. (Jinsw. 11:14; 15:22) Tang amboku malejan tupalangeshina piur pa kusadil mwingand ya wingendj ni kukimbijol kand jingand jikwau jiushinshikidina. Ov, ukutwish kwendil ngand yikusangareshina kuya, pamwing ap mulong wa machuku makemp kusu? Anch ushinshikidin nawamp chakwel uya mwingand yikwau, ukutwish kufund biro wa mutiy mwingand yiniya mulong wa kutambul jinsangu jivud, ukusadil maadres madia mu Annuaire musu. Pakwez, pa ndond pakutum mukand wey kapamp kamwing ku biro wa mutiy, pan mukand winou kudi amakurump a pol pen, akez kuwejinaku jinsangu jau kurutu kwa kuutum.—Tal buku Atenchikinau Chakwel Kusal Rusot ra Yehova, paj wa 111, 112.
13. Ov, mutapu ik biro wa mutiy ukezay kukukwash, ni chisend ik chiukweta pa mulong winou?
13 Biro wa mutiy ukez kukutumin jinsangu ja ukwash piur pa ngand yiney chakwel jikukwasha kukwat mipak, pakwez udiap mwikadil uwamp chakwel utambula ukwash wa mikand ya kushakam nich mwingand ya wingendj, viza, ap mafomu makwau mambatena nich chijil cha Sezar ap kutambul jinsangu ja kufutin chikumbu chey. Yawiy yom yikezau kukwit chakwel uyishinshikina kurutu kwa kuya. Chikwau, ukez kwikal nich chisend cha kwovijan ni in kwiyikej chakwel utambula jinsangu piur pa viza witinau ni mudimu ufanyidina kusal. Antu ayila mwingand ya wingendj afanyidin kwikal nich ukash wa kuwanyish maswir mau ni yom yitinau.—Gal. 6:5.
14. Ov, yibabesh ik yidiaku pa chisu cha kuya kwendil ap kubuk kuya mwingand yadingau ajidikin mudimu?
14 Mu Jingand Jadingau Ajidikin Mudimu: Mu jingand jimwing akadivar ni anambaz amwin mwa afanyidin kwikal ababela nakash mu mudimu wau. (Mat. 10:16) In kulejan ayila kwendil ap akata kubuk afanyidin kushinshikin nawamp mulong wa mudimu wau ni kangal ayiteka akadivar nau a kwin kwa mu ubaj. Anch ushinshikidin kuya mwingand ya wingendj mudi yiney, yifundina amboku biro wa mutiy wey kusutil ku chisak chen cha amakurump kurutu kwa kuya mu weny.
15. Ov, mutapu ik antu aburedina mikadil ya kuya ukutwishau kutanduril mudimu wau wa kulejan pol pau?
15 Anch Ukutwishap Kuya: Anch udiap mu mashakamin makutwisha kusal chakwel uya mwingand yikwau, kangal waziy. Pamwing ap chisu chikwau “cha kusal mudimu ujim” chawanyin kal kudi ey. (1 Kor. 16:8, 9) Kalam wen wa munyingumuku ukutwish kwijik maswir masutina kulemp ni kwol kwen. Pamwing ap ukutwish kukukwash mu kwikal piswimp ni chikumangen ap chisak cha rudim ra wingendj. Ap ukutwish kutanduril mudimu wey wa kulejan mu chikumangen chey cha katat. Chikalap nchik mashakamin mey, chom cha usey chidi kwifukwil nich muchim wey wawonsu.—Kol. 3:23.
16. Ov, mutapu ik tukutwisha kuyisadil antu asotina kuya mwingand ya wingendj?
16 Ov, umwij mwin Kristu waswila kal muspiritu ukweta rutong ra kusadil mwingand ya wingendj? Mwinkisha kand amboku ukwash ni dikasikesh! Chisu chadiokalay Paul mu Antiosh wa ku Siria, wading ul ujim wa kasatu mu Want wawonsu wa in Rom (kupwa Rom ni Alekizandria). Nich teritwar mujim mudi winou, chikumangen cha Antiosh chading chakin kamu nich maswir mulong wa ukwash wa Paul ni amushadisha nakash padiokalay. Chikwau, Bibil kalejenap anch akadivar a kwin kwa kamukasikeshap Paul chakwel adiokala. Chimeken anch pa ndond pa kwikal nich chitongijok chitentamina, awiy avurika anch “chir yawiy ngand.”—Mat. 13:38.
17. Ov, yiyingish ik yidiaku tukutwisha kushinshikin mulong wa ‘kwez ku Masedon’?
17 Paul ni arund nend atambula yiyukish yivud mulong akula ku diladikij dia kwez ku Masedon. Padingau mu ul wa Masedon wa mu Filip, awiy atana Lidi, ni “[Yehova] wamwanzurila muchim mulong wa kutesh nich kashinsh ka yom yalonday Paul.” (Mid. 16:14) Tongin bil musangar wovay Paul ni arund nend amishoner chisu chatambulay Lidi ni in chikumbu chend dibabatish! Mu jingand jivud, mudi antu akweta michim yiwamp mudi Lidi kandikal ateshap uruw wa Want. Anch ‘wez ku Masedon’ ukutwish kumekesh musangar wa kuyitan ni kuyikwash antu akwau.
[Dizu didia kwishin kwa paj]
a Yany ni yikasikesh ya mutu wa mulong winou akutwish kuyisadil nawamp kudi akadivar aswila muspiritu mu Congo akutwisha kushinshikin kuya mu materitwar ap mu misumb ya jingand jau ja chivadikin. Kudi kuswir kujim kwa in mudimu wa kwangul mu materitwar mavud madia mu Congo. In kulejan amwing achivadikin adiokila mu misumb yikwau akutwish kuchirik chakwel apana ukwash. In kulejan akwau akutwish kulond rudim ra pol pau risadidinau mu materitwar mudia kuswir kwa akadivar aswila muspiritu. Mu misumb yiney, mukutwish kwikal maswir majim mu munyingumuku wa piswimp.
[Kamushet kadia pa paj wa 5]
Mutapu wa Kwijik Anch Ngand Yiushinsikidina Yikwet Maswir
• Talany mu Annuaire wa katat. Teshany amboku nawamp rapor wa in kulejan wambatena nich uvud wa antu.
• Sadilany amboku Index mulong wa kukimbijol mitu ya milong ni yamanau mwingand.
• Yilejany amboku in kulejan aya mu weny mwingand yikwau ap ashakamina mwin mwa.
• Anch ushinshikidin ngand yiukutwisha kuya kulejan mu rudim rey ra chivadikin, tal mu misul ya ku mujimbu, mudi Internet, chakwel uman mutapu ulondinau antu avud rudim rey.