“Ov nifanyidin kushemunik?”

¹ Chakwel kwakul kwi mbil ya Yesu ya kwel anch “Yangany . . . ku michid yawonsu uyikadishany in kwilej,” atushalapol avud a Yehova ahamidin ndond yidia ni kuswir kujim. (Mat. 28:​19, TMK) Amwilikejin Paul, witiya pamutazukau anch: “Ez ku Masedon mulong wa kutukwash!” (Midimu 16:⁠9) Ov mutapu ik tukutwisha kuchisal mwi njil yimwing yifanyidina?

² Sambel rizau ra kusambish pa chisu: Ov chikumangen chen chikwet teritwar umwing mukatau kulejan pa chipatu pa chipatu? Anch mwawiy, ufanyidin kukungin usu wey pa teritwar winiwa. Kurutu kwa kukwat chiyul cha kuya ndond yikwau, ambamb nau amakurump chakwel kutal anch atongin anch uwanyishin yawonsu yifanyidina chakwel kushemunikin ndond yikwau. Ukutwish kand kumwipul kalam wa munyimuku wen anch wij chikumangen chidia piswimp muukutwisha kutanduril mudimu wey. Pakwez, kupwa kuchind nawamp usey wa kushemunik, ukutwish kusot katat kutongin kupan ukwash ku mutambu ukwau wa ngand ap mwi ngand yikwau. Anch mwamu usotina, ey pamwing ni chisak cha amakurump uwapidilany kufundin biro wa mutiy mukand wa kwijikish ndond usotina kuya ni kusadin, ni kwijikish jinsangu jey jasuta kal mu midimu ya uteokras. Chikwikal cha manangu kuya bil ni kutal ndond yin kurutu kwa kukwat chiyul cha kuhaminaku rawonsu.

³ Babal kurutu kwa kushemunikin mwi ngand yikwau: Akadivar avud akat kushemunikin mwi ngand jikwau mulong wa kukimb mwom umwing uwamp ap kuchin mar. Amwing akat kuyidimb kud antu amwing ayimp akata kuyikan kuyikwash kuman ndond ya kushakam mwi ngand yisu, pakwez akat kusu kuyisend nfalang jau ni kupwa ayichin. Yisu yikwau, antu ababela inay apakishining ap kuyitek antu ashemunikidina mwi ngand yikwau mu uswik wa winsotan (kusambish kuyisadil mu winsotan). Anch alik, akat kuyisha pakad ndond ya kwengamin mwi ngand yandaminau. Mu mutapu winou mwikadil wa antu ayila kushakam mwi ngand yikwau yikat kwikal yiyimp kupandakan mutapu wadingau mwi ngand yau. Yisu yimwing akutwish ap kuswir kuyit akadivar chikumbu cha kushakam ni mitapu yikwau chakwel ayikwasha, ni kutwik chisend pa majuku ma Akristu akwau achirishina niyau ni milong yau. Yid ya majuku mamwing yashikedin ku kwaurik, ni majuku mashikedin ku kuziok muspiritu mulong wa kushemunik kwinoku kwakad manangu.​—⁠1 Tim. 6:​8-11.

⁴ Anch usotin kushemunik mulong wa kushakam nawamp, kangal wavuramen anch yikalap nchik ndond ukushakama, kudi ni kwawiy milong ya kurish nich. Chiswapel kupwish milong ndond wija kal rudim ni mwikadil, kupandakanamu kusambish kwikal musu mwi ndond wakad kwijik nawamp.