Tudi in Kulejan Chisu Chawonsu
1. Ov, mutapu ik twija anch in kulejan a chitot cha mivu ya kusambish imana ayinau in kulejan chisu chawonsu?
1 In kulejan a mushiku a mu chitot cha mivu ya kusambish alejana rusangu ruwamp “pakad kulik” kwawonsu kwadingau ni kutan antu. (Mid. 5:42, NW) Chawiy, tukutwishap kutongin anch chisu chadingau ni kuya ku chikumbu ni ku chikumbu ayisutanga antu mwinjil pakad kuyilej ni yawiy rusangu. Kavuramenap kwikal nich chisu cha kupan uman wa kukashimwish padingau ni kulandish yom mu chiku kupwa kwa mudimu wa chingand. Mudi Yesu, awiy imana ayinau in kulejan chisu chawonsu.—Mar. 6:31-34.
2. Ov, kushakam kwambatijan nich dijin dietu kwitin ik?
2 Twikalany Tayad Chisu Chawonsu: Dijin dietu, Atuman a Yehova, dimekeshinap kusu chom tusadina; pakwez dimekeshin chitudia. (Isay 43:10-12) Chawiy, chisu chawonsu tudi tayad chakwel tuchidija ruchingej retu, ap pa chisu tusadiningap mudimu wa ku chikumbu ni chikumbu. (1 Pita 3:15) Ov, utonginap kurutu mikadil yikutwisha kukukwash chakwel ulejana uman wa kukashimwish ni kutongin piur pa yom yiukutwisha kulond? (Jinsw. 21:5) Ov, ukat kulejan ching ku chikumbu ni ku chikumbu bil anch ukat kupalangesh kand rusangu ruwamp kudi antu ashichinga mu jindond jikwau anch chitwishikin?
3. Ov, mulong wak dizu “mitapu yikwau” dipandakenap kuwap mulong wa kujimbul mudimu wa kulejan mu mikombil ni mu jindond ja kwimikin miotak, mu jindond ja kwiswedishin, jindond ja kwisakin, ni mu jindond jikwau jikwau?
3 Pakad “Mitapu Yikwau” Ya Kulejan: Pasak, yisu yimwing twasadina dizu “mitapu yikwau” mulong wa kwisambin kulejan mu mikombil ni mu jindond ja kwimikin miotak, mu jindond ja kwiswedishin, jindond ja kwisakin, ni mu jindond jikwau jikwau. Pakwez dizu “mitapu yikwau” dikutwish kumekesh anch chitin kusal mausu minam ma pakampwil, ap kusut ma mu machuku mawonsu. Kambuy Paul walonda anch ndiy walejana “patok” ni ku chikumbu ni chikumbu. (Mid. 20:20, TMK) Chawiy, kulejan uman “patok” wawiy mutapu uwanyidina kupandakanamu “mitapu yikwau” ya kulejan. Chidi chakin anch mudimu wa kulejan ku chikumbu ni chikumbu udandamedin kwikal mulad wetu wa kusambish ni upandakena usey mulong wa kuyilej antu uruu wa Want. Pakwez, in kulejan a mu chitot cha mivu ya kusambish asina jinkeu padi antu, pakad ku yikumbu. Awiy asadila chisu chiwanyidina mulong wa kwisambin uyakin—patok, mu chikashimwish, ni ku chikumbu ni chikumbu. Tukutwish niyetu kwasin jinkeu padi antu chakwel tuwanyisha nawamp mudimu wetu wa kulejan.—2 Tim. 4:5.