Irijekany Katat Chakwel Utandurilany Mudimu Wen wa Kulejan
1. Ov, chom ik chimwing chidia cha usey pa chirung cha chivurikish, ni mutapu ik tukutwisha kwirijek pa mulong winou?
1 Chirung ni chirung cha Chivurikish chitwinkishining yisu yiwamp ya ‘kumujikitish Yehova nakash.’ (Kus. 109:30) Ov, ukez kutanduril mudimu wey wa kulejan pa Rish mudi njil yimwing ya kumekesh kujikikitish kwey kudiay Mwin Kupan chakupesh? Katat chawiy chisu cha kusambish kwirijek.—Jinsw. 21:5.
2. Ov, mutapu ik wakula ey ni antu akwau ku ditenchik dined diakepishau asaa itiningau ayibol nkwash mwi ngond wa Ndol wa muvu washalap kal ou?
2 Mudimu wa Uchibol Nkwash: Muvu washalap kal ou, yikumangen yasangara nakash chisu chateshau anch chadinga chitwishikin kusal mudimu wa uchibol pa Ndol ni kupan asaa akemp mwinshin mwa asaa itiningau. Mukadivar umwing wafunda anch: “Nasutishin kal mivu yivud ku shikol ya piur, ni kand kal chinswapelap kusal mudimu wa uchibol wa rawonsu. Pakwez nikupakish kusal uchibol wa asaa 30 ni kusal usu wa kuwanyish asaa 50 pa Ndol.” Nambaz usadininga mudimu wa chisu chawonsu wafunda anch: “Asaa makum masatu—chiswapel kamu kuyiwanyish!” Chisu chijikishau ditenchik dined, chibol umwing wa pasak, ukweta katat mivu piur pa 80, walonda anch: “Chinech chawiy chisu chinadinga nichingedina! Yehova wij anch mudimu wa uchibol wadinga chisu chipandakena kuwap mu mwom wam!” Antu akwau akad ni mutapu wa kusal mudimu wa uchibol nkwash itekidining jintong ja kusal nakash mu mudimu wa kulejan.
3. Ov, yiyingish ik yidiaku ya kushinshikin pa mudimu wa uchibol nkwash pa Rish, Ndol, ni Ndol-Mem?
3 Ngond wa Rish ukez kwikal ngond upandakena kuwap wa kusal mudimu wa uchibol mulong tukez kwikal kand ni chisu cha kuwanyish asaa itinau 30 ap 50. Chikwau kand, kusambishin pa Diampos dia pa Rish 17, tukez kwipan mu kampany wa pakampwil wa kuyitazuk antu akwau chakwel inunga netu pa chisu chinech cha Chivurikish cha pa Ndol 5. Antu avud akez kusangar nakash kutanduril mudimu wau wa kulejan pakezau kusot kwikal ayibol nkwash pa Ndol ni pa Ndol-Mem kand, ni kuwanyish asaa itinau 50.
4. Ov, mutapu ik tukutwisha kutanduril mudimu wetu wa kulejan, ni ukwikal nich chibudikin ik?
4 Pa chisu chikwau cha urel wen wa Kwifukwil mu Dijuku, ov, mulong wak ukwisambinanyap mutapu ukutwishay chid ni chid cha dijuku kutanduril mudimu wend wa kulejan pa chirung cha Chivurikish? (Jinsw. 15:22) Mwita Yehova chakwel ayukish mausu mey. (1 Yoh. 3:22) Piutandurila mudimu wey wa kulejan, chidiap kusu mulong ukez kumushiman Yehova pakwez ukez kand kukudish musangar wey.—2 Kor. 9:6.