Kampany wa Kwijikish Chivurikish Ukusambish pa Rish 17
1. Ov, kampany ik ukeza kusambish pa Rish 17?
1 Kukumangan ku Chivurikish cha muvu ni muvu kutukwashining tulejan rufu ra Yesu. (1 Kor. 11:26) Chawiy, tusotin antu akwau eza akumangan netu ni atesha yom yikwisambinau piur pa chipan cha chakupesh cha rukat cha Yehova. (Yoh. 3:16) Muvu winou kampany wetu wa kuyitazuk antu chakwel eza ku Chivurikish ukez kusambish Diampos, Rish 17. Ov, washinshikidin kal kurutu chakwel usala nakash mudi muukutwisha pa chisu chinech cha kampany?
2. Ov, ik tukutwisha kulond pitukupana diladikij?
2 Yitukutwisha Kulond: Chipandaken kuwap kulond mu wiswimp. Tukutwish kulond anch: “Wajingany. Tudi pinap mulong wa kwinkish dijuku diey diladikij dined dia chikumangan cha usey ujim cha pa muvu chikezau kusal pa mangand mawonsu pa Ndol 5. Akez kusal diskur dia mu Bibil dikeza kurumburil chawanyisha rufu ra Yesu ni chisadinay katat. Diladikij dined dimekeshin ndond ni chisu kukusadikina chikumangan pol petu.” Anch tupanin maladikij pa kupwa kwa mbing, tufanyidin kand kupan magazet mudi chitwishikin.
3. Ov, mutapu ik tukutwisha kuyitazuk antu avud anch chitwishikin?
3 Kuyitazuk Antu Avud Anch Chitwishikin: Rutong retu ridi ra kuyitazuk antu avud anch chitwishikin. Chawiy, chifanyidin kwikal nich kashinsh ka kuyitazuk in kwilej en a Bibil, antu uchirikidininganya, anamakwen a kumujimbu, ambay a mudimu, ambay a shikol, amutej ney, ni antu akwau wijikijadinany nau. Amakurump a pol pen akez kutakel mutapu wa kuwanyish teritwar wen. Kampany wetu wa pa muvu wa kuyitazuk antu ku Chivurish usongining mabuj. Chisu chashikay mband umwing kwindond ya kukumangen muvu washalap kal ou, in kukumangan amukwasha kutan mwin kulejan wamutazuka. Pakwez, mband walonda anch kand kal ijikap muntu ap umwing pinap ni watambula diladikij diend kudiay mwin kulejan umwing wadinga ni kuya mu mudimu wa ku chikumbu ni chikumbu kwasut kal machuku makemp.
4. Ov, yiyingish ik yidiaku ya kwipan nich mushiku mu kampany wa kwangan diladikij dia Chivurikish?
4 Pamwing ap muntu kanang ukez kukumangan nen ku Chivurikish mulong wa diladikij wamushilanya. Ap anch muntu kanang witiyijin ap bwat, usu wen ukash usadilanya ukez kupan uman. Maladikij ukupananya makez kulejan anch Yesu udi katat Mwant wa usu. Kwipan kwen kwa mushiku kukez kumekan kudi antu awonsu—antu a mu teritwar, ambay in kulejan, ni kukez kwikal kand kwa usey uvud kudiay Yehova—anch usangaredinany nakash chipan cha chakupesh.—Kol. 3:15.