Lamany Manangu Men

1. Ov, wisu mutu wa mulong wa program wa chitentam cha munyingumuku cha muvu wa mudimu wa 2013, ni program winou ukwet rutong ik?

¹ Yesu wayileja in kwilejend chakwel amukata Yehova nich muchim wau wawonsu, mupim ni manangu mau. (Mat. 22:37, 38) Yitentam ya distrikt, ya munyingumuku ni ya pakampwil ya muvu winou ayitenchika mulong wa kukasikesh untu wetu wa mukach. Piukeza kuvurik, mutu wa mulong wa chitentam chetu cha distrikt ulondin anch: ‘Kasikeshany Michim Yen!’ Program wa chitentam cha pakampwil cha dichuku dimwing cha muvu wa mudimu wa 2013 ukwet mutu wa mulong ulondina anch: ‘Lamany Kom Ken.’ Ni yitentam yikwau ya munyingumuku yikusambisha pa angond ezenap yikez kwikal ni mitu ya milong yilondina anch: ‘Lamany Manangu Men,’ yengamidin pa Mateu 22:37. Program winou amutenchika mulong wa kumukwash muntu ni muntu pakach petu chakwel tushinshikina pa yitongijok yetu ni kusal usu wa kumusangaresh Yehova.

2. Ov, pa chisu cha program tufanyidin kushinshikin pa yakul ku yipul ik?

² Kutesh Yom Yikeza Kusadik: Pitukutesha program wa chitentam cha munyingumuku, tufanyidin kushinshikin pa yakul ku yipul yiney, yimekeshina manans majim:

• Ov, mutapu ik tukutwisha kwipuk kutongin pa ‘yitongijok ya antu’?

• Ov, mutapu ik akutwisha kutukwash tudiosha chitambal chibwikina manangu makad kwitiyij?

• Ov, yitongijok ik tusotina kwikal nich?

• Ov, yiyukish ik yimwing ya kutongijikin kufanyidina?

• Ov, mutapu ik tukutwisha kumulikidil Yehova awapisha yitongijok yetu?

• Ov, mutapu ik ukutwishau angatan, amband, anvaj ni an kulet musangar mu dijuku?

• Ov, mutapu ik tukutwisha kwikal tayad mulong wa dichuku dia Yehova?

• Ov, chom ik chirumburikina kutenchik manangu metu mulong wa mijikit?

• Ov, chiyukish ik chiyishikedininga antu asadidilinga yom yilejinau?

3. Ov, mulong wak chidia cha usey kukumangan mu machuku mawonsu maad, kuta matu, ni kusadil yom yitukwileja?

³ Satan wasidining jinkeu jend pa yitongijok yetu ni ukimbining kuyiyipish. (2 Kor. 11:3) Chawiy lel, tufanyidin kulam manangu metu ni kuyikel yitongijok yetu. Tuswirdin kudandamen kumekesh manangu ma Kristu ni kurish nich mikadil yakad kulimish chijil yidia mu mangand minam. (1 Kor. 2:16) Chawiy, irijekany mulong wa kukumangan mu machuku mawonsu maad ma chitentam cha munyingumuku. Kuta matu. Kusadin jinsangu ja usey jikezau kulejan kukez kutukwash tutenchika manangu metu mulong wa mushiku wa mudimu wa Want.—1 Pita 1:13.