Sadilany Milad Yiwanyidina
1. Ov, chom ik tukutwisha kwilej kusutil ku milad kushalijan ya in Kristu a kusambish?
1 In Kristu a kusambish alejan rusangu ruwamp kudi antu a mikadil kushalijan ni marelijon. (Kol. 1:23) Ap anch uruu wading wisambidin pa chom chimwing—Want wa Nzamb—pakwez asadilanga milad yambatena ni in kutesh. Chilakej, chisu chisambangay Pita nau in Yuda adinga ni kulimish nakash Mifund, ndiy wasambishanga kumujimbul profet Jowel. (Mid. 2:14-17) Ku mutambu ukwau, tutalany bil mutapu wisambangay Paul ni in Grek mudi mulejenau mu Midimu 17:22-31. Nlel unou, antu adia mu materitwar kanang alimishining Mifund, ni tukutwish kwisamb nau pituyilinga mu mudimu wa kulejan wa ku chikumbu ni chikumbu. Pakwez, tufanyidin kwikal adimukina nakash chisu twisambininga ni antu akad kumekeshang musangar mu Bibil ni mu relijon ap adia mu marelijon makad kwikal ma Ukristu.
2. Ov, mutapu ik tukutwisha kusadil mikand ya kupan mulong wa kuyikwash antu asangaredina Bibil ap akad kusangar?
2 Sadilany Nawamp Win Kamu Mikand ya Kupan: Kupan kwa mikand mu muvu wa mudimu winou kukez kuswimp kupwa kwa angond aad ni ku kukasikeshin pa magazet, matrakt, ni mabroshir. Ap anch antu adia mu teritwar wetu yisu yivud kamekeshiningap musangar mu Bibil, tukez kudandamen kuyilej chom kanang chikuyisangaresha. Tufanyidinap kutang verse umwing kapamp ka kusambish ka kumanijan ni muntu ap kwisambin kapamp kamwing mu Bibil, anch muntu wamekesh musangar tukutwish kumuchirikin nich rutong ra kumukwash mwin chikumbu chakwel akudisha ritiy rend mudiay Sakatang ni mu Dizu diend diapepilau. Chikwau kand, anch tulejen mwindond yidia antu asangaredininga Bibil, tukutwish twasadin mikand ni milad kwambatan nich mashakamin. Chakin kamu, tukutwish kupan buku Chifundishinay Bibil ap mabroshir Mutesha Nzamb ni Mutesha Nzamb ni Ikal ni Mwom wa Chikupu pa chisu chin chawonsu, kwambatan nich mikand ya kupan pa ngond. Chom cha usey chidi cha kusadil milad yiwanyidina.
3. Ov, mu mutapu ik michim ya antu adia mu teritwar wetu yidia mudi divu?
3 Rijekany Divu: Muchim wa muntu udi mudi divu. (Luka 8:15) Mavu kushalijan maswiridining kumarijek nawamp kamu kurutu kwa kukun uyakin wa Bibil ukutwish kuminy ni kukul. In kulejan a mu mivu chitot ya kusambish atwisha kukun mu mavu kushalijan, ni chinech chayiletina musangar ni mazang. (Mid. 13:48, 52) Tukutwish niyetu chilik chimwing kusutil ku kushinshikin nakash pa milad yetu.