Ov, Ukutwish Kutaninamu ku Kwikal Nich Teritwar Wey?
1. Ov, teritwar wa muntu ipend chom ik?
1 Ov, teritwar wa muntu ipend chom ik? Mu yikumangen yikweta materitwar mavud, pamwing ap ukutwish kwikal ni teritwar wey amwiney udia piswimp ni ndond yiushicha. Buku Utenchikinau pa paj wa 103, ulejen anch: “Kwikal nich teritwar wey udia pa ndond yifanyidina kukez kukutwishish kusadil nawamp chisu chawonsu usotila kusutish mu mudimu wa chingand. Chikwau kand, ukutwish kumwit mwin kulejan mukwau kusal ney pamwing mu teritwar wey.”
2. Ov, mutapu ik ukutwishau kusadil teritwar wa muntu ipend mulong wa kukwash chisak cha kupan uman?
2 Kukwash Chisak cha Kupan Uman: Anch watambul teritwar wey amwiney udia piswimp ni ndond yey ya mudimu, ukutwish kwipan mu mudimu wa kulejan pa chisu cha midi ap kurutu kwa kuchirik ku chikumbu, pamwing ap ni mwin kulejan mukwau usadil nend piswimp. Anch watambul teritwar udia piswimp ni ku chikumbu chey, ukutwish ey ni dijuku diey mu mutapu uwanyidina kumusadin mulong wa kupan uman wa urel. Chakin kamu, anch ukumangenap ku chikumangan cha mudimu wa chingand, chiwapining kwit umutakel wa Yehova mu malembil kurutu kwa kusambish mudimu wa kulejan. (Fil. 4:6) Chikwau kand, ufanyidin kwisikesh chisu usutishina mu teritwar wey nich chisu cha kukwash yitenchik ya chisak cha kupan uman cha chikumangen. Yisu yivud chiwapining nakash kukwash chisak cha mudimu wa chingand, pakampwil kwinsudiel kwa mbing, chisu chikumangeningau antu avud ku mudimu wa chingand.
3. Ov, yisu yiyukish yimwing ya kwikal nich teritwar wa muntu ipend?
3 Yiyukish: Anch ukwet teritwar wey, ukwet ndond yiukutwisha kulejan chisu chin chawonsu kwambatan nich program wey. Ukutwish kusutish asaa avud mu mudimu wa kulejan ni kwikal nich chisu chikemp cha kuya mu weny. Kutenchik kwinoku kuyikwashining ayibol ankwash ni ayibol a rawonsu amwing. Mulong in chikumbu amekeshining musangar adia mwindond yiushicha, chiswapeling kuyichirikin chakwel ukudisha musangar wau ni kutakel malejan ma Bibil. In kulejan avud amening anch kulejan mu teritwar wa muntu ipend kuyikwashining kwijikijan nawamp ni in chikumbu ni kuyikwashining kukudish ruchingej rau, pakampwil anch teritwar akutwish kumusadil tupamp tuvud kurutu kwa kumuchirikin chakwel antu akwau atwisha kumwit. Ov, kusal mu teritwar wey kukukwashining ey ni dijuku diey kuwanyish nawamp mudimu wey wa kulejan?—2 Tim. 4:5.