Mutapu wa Kusadil Broshir Rusangu Ruwamp Ridiokila Kudi Nzamb!
Broshir Musu Udiaku Mulong wa Kutukwash Kuyichirikin Antu ni Kusambish Malejan ma Bibil
1. Ov, broshir musu ik wabudishau ku chitentam cha distrikt chikweta mutu wa mulong ulondina anch “Kasikeshany Michim Yen!” ukutukwash kuyichirikin antu ni kusambish malejan ma Bibil?
1 Pa chisu cha Chitentam cha Distrikt chikweta mutu wa mulong ulondina anch “Kasikeshany Michim Yen,” twasangera kutambul broshir musu chakwel atukwasha kuyichirikin antu ni kusambish malejan ma Bibil. Rusangu Ruwamp Ridiokila Kudi Nzamb! udi broshir wa chilik chimwing ni broshir Nzamb Witin, umuswinken nich malejan maswapela. Broshir winou utukwashining kumusadil nawamp mulong wa malejan ma Bibil ma ku chis. Chisu chisambinay broshir Nzamb Witin pa ngikadil jitinau ja Ukristu jatwisha kuyikasiken in kwilej asu chakwel itiyija, pakwez broshir musu winou wimedin pa rusangu ruwamp ridia mu Bibil.—Mid. 15:35.
2. Ov, mulong wak wabudishau broshir Rusangu Ruwamp?
2 Ov, mulong wak abudisha broshir winou? Akadivar adia mu mangand mawonsu itanga chakwel kwikala chom chimwing chiswapela kutesh chikutwish kuyipwitin antu mu uyakin ni kuyitakel mu buku Chifundishinay Bibil, chom cha mudimu chetu chakusambish mulong wa malejan ma Bibil. Yisu yivud antu ovilinga wom wa kutambul buku kapamp kamwing akusot kwilej Bibil kusutil ku kusadil broshir winou. Chikwau kand, broshir winou uswapeling nakash kumukarumun mu jindim jivud.
3. Ov, mutapu ik broshir winou ushalijadina nich mikand yikwau ya kwilej?
3 Mutapu Umufundinau: Mikand yivud yetu ya kwilej ayifunda chakwel muntu kanang atwisha kuyitang ni kutesh uyakin pakad ukwash ap umwing. Broshir winou ushalijadin. Amufundin mudi ntakel wa kutakel nich dilejan dia Bibil kudi mwin kutakel. Chawiy, chisu tupanina broshir winou kudi muntu kanang, chiwapina kwisambin paragraf umwing ap aad. Maparagraf miswipin, chawiy lel akutwish kumatang ku chis cha muntu ap kwindond yend ya mudimu. Ap anch dilejan dia 1 diawiy didia diwamp kusambishin nich, tukutwish kusambish nich dilejan din diawonsu didia mu broshir.
4. Ov, mutapu ik utukwashina broshir winou kufundish kapamp kamwing malejan madiokila mu Bibil?
4 Mu mikand yetu yivud, ukutwish kutan yakul ku yipul yifundinau mu maparagraf. Pakwez, mu broshir winou, ukutwish kutan yakul ching kusu mu Bibil. Antu avud asotining kwilej Bibil pa ndond pa kwilej kusutil ku mikand yetu. Chawiy lel, ukutang ching kusu verse umwing pa maverse majimbwilau. In kwilej akwitangin ayinau maverse mu Bibil. Kutang kwinoku kukuyikwash chakwel amana anch yom yilejenau yidiokil kudi Nzamb.—Isay 54:13.
5. Ov, mulong wak chidia cha usey kudi mwin kutakel kwikal wirijekina nawamp pa chisu chawonsu cha kwilej?
5 Broshir karumburilap mifund yawonsu. Ov, mulong wak? Udiaku mulong wa kuyikasikesh in kwilej chakwel ipula yipul ni kumukwash mwi kutakel chakwel asadila ukaliweny wend wa kulejan. Pakwez, chidi cha usey kudi mwin kutakel kwikal wirijekina nawamp pa chisu chawonsu cha kwilej. Chiyul: Kangal walonda yom yivud. Tukatining kurumburil mifund. Pakwez, yisu yivud tuwanyishining yivud pitumwitininga mwin kwilej chakwel arumburil chitongijok chikwetay piur pa mufund. Kusutil ku kusadil yipul nich nkeu, tukutwish kumukwash chakwel atongina pa kurumburik kwa mufund ni mufund.—Mid. 17:2.
6. Ov, mutapu ik tukutwisha kusadil broshir winou: (a) mwindond yidia antu akata kwidjidjek piur pa Nzamb ni Bibil? (b) chisu tuyilinga mu mudimu wa kulejan wa ku chikumbu ni chikumbu? (c) chisu tusambishina kapamp kamwing malejan ma Bibil pa kumushejin muntu? (d) chisu tuyichirikidina antu amekeshininga musangar?
6 Mudi mikand yikwau yikwashininga kutakel nich malejan, tukutwish kupan broshir winou chisu chin chawonsu, kwambatan nich mikand ya kupan pa ngond. Antu avud akez kusangar kumusadil mulong wa kusambish nich malejan ma kumushejin muntu kapamp kamwing ku chis. Chikwau kand, mudi mwalejenau ku chitentam cha distrikt, kusadil broshir winou pa chisu cha kuyichirikin antu amekesha musangar “kukutwish chakin kamu kukukwash kuyichirikin!”—Tal mishet yidia pa paj wa 5-7.
7. Ov, mutapu ik ukutwisha kutakel dilejan dia Bibil kusutil ku kusadil broshir winou?
7 Mutapu wa Kutakel Dilejan: Tukutwish kusambish minsamb kusutil ku kutang uvud wa yipul yifundinau mu ulombu ujal. Tukutang kand paragraf ni mifund yalalela. Tukusadil yipul nich nkeu mulong wa kumukwash mwin chikumbu chakwel atesha kurumburik kwa mifund. Kupwa, kurutu kwa kusut ku chikunku chikwau, tukumwit mwin chikumbu chakwel akula ku chipul chifundinau mu ulombu ujal ni kushinshikin anch uteshin yom tumulejina. Pa kapamp ka kusambish ka kumuchirikin muntu, chikutwish kwikal chiwamp nakash kushinshikin kamu chimwing cha ku yipul yifundinau mu ulombu ujal. Chisu chikwau chitukeza kumuchirikin, pamwing ap tukutwish kulepish minsamb mulong wa kwilej dilejan dia kabuj.
8. Ov, mutapu ik tufanyidina kujimbul mifund ni mulong wak?
8 Maverse ma Bibil masambishina nich dizu “tang” mawiy kamu makwakula nakash ku chipul chifundinau mu ulombu ujal. Chisu tukimbina kujimbul mufund, tukwipuk kulond anch: “kambuy Paul wafunda” ap “Jeremiy wabwaka.” Mwin chikumbu ukutong anch tutangining mazu ma antu kusu. Chikutwish kwikal chiwamp nakash kulond anch: “Dizu dia Nzamb dilondin anch” ap “Tal yabwakay Bibil.”
9. Ov, tufanyidin kutang maverse mawonsu mafundinau chisu cha dilejan?
9 Ov, tufanyidin kutang maverse mawonsu mafundinau ap ching kusu verse umwing wa ku maverse masambishina nich dizu “tang”? Tufanyidin kutang kwambatan nich mikadil. Kwikil verse ap umwing pakach pa maverse majimbwilau mu Bibil pinap makad diyingish. Verse ni verse ukwet rusangu ra usey risambidinay. Pakwez mu yisu yimwing, kuburen chisu, musangar ap ukaliweny wa kutang kwa mwin kwilej, kukutwish kwatukwash tujingunina kutang kusu maverse masambishina nich dizu “tang.”
10. Ov, chisu ik tukutwisha kuswimp dilejan mulong wa kwilej buku Chifundishinay Bibil?
10 Chisu Chifanyidina Kuswimp Mulong wa Kwilej Buku Chifundishinay Bibil: Kupwa kwa minsamb yivud ni kwa kwikal ni chaku chiwamp, tukutwish kuswimp mulong wa kwilej buku Chifundishinay Bibil ap kudandamen nich broshir Rusangu Ruwamp Ridiokila Kudi Nzamb! djat ni pitukumupwisha. In kulejan akutwish kusadil manangu mau chakwel akwata mupak wa chisu chikutwishau kuswimp. Anch twaswimp kapamp kamwing mu buku Chifundishinay Bibil, ov, tufanyidin kusambishin kamu kwinsambishil? Kwikil yijil pa mulong winou. Muntu ni muntu ushalijadin. Pakwez, in kwilej avud akez kutaninamu kusutil ku kushinshikin kand nakash mitu ya milong ya chilik chimwing pa kachom ni kachom mu buku Chifundishinay Bibil.
11. Ov, mulong wak tufanyidina kusadil nawamp broshir musu winou?
11 Tukwet chisend chijim cha kulejan uruu uwamp nakash mu mangand maburedina rusangu ruwamp—anch Want wa Nzamb ukat kuyikel ni ukez piswimp ap kutenchik ngand yisu mwawiy mukeza kwikal kutentam! (Mat. 24:14; 2 Pita 3:13) Tukwet ruchingej anch antu avud ateshina uruu winou akez kulond mazu minam mapepidilau anch: “Chidi chom chiwamp nakash kumuman muruu ukat kwez, usutidil pa mikandu. Uletil rusangu ruwamp, rawiy kamu rusangu ra chisambu! Ulondil ya dipandish kudi in Sion anch: ‘Nzamb wen udi Mwant!’” (Isay 52:7) El tusadilany broshir winou musu chakwel tuyileja antu adia ni impu ya rusangu ruwamp ridiokila kudi Nzamb mu teritwar wetu!
[Kamushet kadia pa paj wa 5]
Mwindond Yidia Antu Akata Kwidjidjek Piur pa Nzamb ni Bibil:
● Mu jindond jimwing, in kulejan alondining anch mazu mudi “Nzamb” ap “Bibil” yidi yom yikangeshininga minsamb. Chawiy nlel, kapamp ka kusambish ka kumwendil muntu, chikutwish kwikal chiwamp nakash kwisambin mitu ya milong yitadin milong ya pol pen, mudi maswir piur pa guvernema muwamp, kwisu kukutwishau majuku kutambul ukwash uwamp ni ruchingej ik ridiaku mu machuku ma kurutu. Pamwing ap tukutwisha kumulej muntu broshir Rusangu Ruwamp Ridiokila Kudi Nzamb! kupwa kwa kwisamb nend yom yivud tushinshikidininga mutapu twija anch Nzamb udiaku ni mulong wak Bibil udi mukand wa kuchingejin.
[Kamushet kadia pa paj wa 6]
Chisu Tuyilinga mu Mudimu wa Kulejan wa ku Chikumbu ni Chikumbu:
● “Nezin kukutal chakwel nikuleja mutapu uswapela ukutwisha kwijik chom chitonginay Nzamb piur pa machuku ma kurutu ma antu. Ov, wiyipulap kal anch Nzamb ukez kutukol mu mar? [Mulika akula.] Broshir winou ulejen ndond mu Bibil yiukutwisha kutan chakul ku chipul chinech. [Mwinkisha broshir ni tang nend paragraf wa kusambish mu dilejan 1, kupwa tang Jeremiy 29:11.] Kusutil ku yom yiney, ov, utongin anch Nzamb usotin etu twikala nich mashakamin mawamp mu machuku ma kururut? [Mulika akula.] Anch usotin, ukutwish kutambul broshir winou. Chisu chikwau, tukutwish kushinshikin paragraf wa kaad chakwel tutana chakul cha Bibil ku chipul chinech, ‘Ov, mutapu ik ukezay Nzamb kutukol mu mar?’” Anch mwin chikumbu umeken anch ukwet chisu chivud kapamp ka kusambish kumanijan nend, ukutwish kutang ni kwisambin paragraf wa kaad ni kutang maverse masatu mu Bibil. Irijeka chakwel umuchirikina mulong wa kwisamb nend chipul cha kaad cha dilejan dined.
● “Antu asotining kulembil, pakampwil chisu chikwetau milong. Ov, ukata kulembilang yisu yimwing? [Mulika akula.] Ov, utongin anch Nzamb uteshining malembil mawonsu bil anch kudi mamwing makad kumusangaresh? [Mulika akula.] Nikwet pinap broshir ulejena mutapu wa kutan chakul cha mu Bibil ku yipul yiney. [Mwinkisha broshir, ni shinshikinany pamwing paragraf wa kusambish wa dilejan dia 12 ni maverse masambishina nich dizu “tang”.] Ov, chisangareshinap anch Nzamb usotining kututesh? Chakwel tutaninamu nakash mu malembil, tuswiridin kumwijik nawamp kamu Nzamb. [Buril dilejan dia 2 ni muleja tumitu twa milong.] Anch usotin, nikutwish kukushil broshir winou, ni chisu chikwau tukutwish kutang pamwing yakul ya mu Bibil ku yipul yiney yisangareshina.”
● “Nidi pinap mulong antu ashinshikidining piur pa mutapu utakedilau mangand minam. Ov, utongin anch mikadil yiney yikezap kuswimp? [Mulika akula.] Antu avud ashimokining pilejiningau anch Bibil ukwet rusangu ruwamp rukutwisha kuyinkish ruchingej. Yiney yawiy yipul yimwing yakwilay Bibil.” Mwinkisha broshir ni mwita chakwel atonda chipul chimwing chidia kwinsudiel kwa chibur chimusangareshina nakash. Kupwa buril pa paj padia dilejan ni muleja mutapu wa kwilej. Irijeka chakwel umuchirikina ni kushinshikin nend chipul chikwau chidia mu dilejan dined.
[Kamushet kadia pa paj wa 7]
Pakish Kumushejin Muntu Kapamp Kamwing:
● “Nidi pinap mulong wa kwilej ney dilejan disu dia Bibil. Broshir winou ukweta malejan 15 ulejen ndond mu Bibil yiukutwisha kutan yakul ku yipul ya usey. [Muleja chibur cha kusambish ni cha nsudiel.] Ov, wapakishinap kal kutesh Bibil? [Mulika akula.] El amboku nikulejan mutapu uswimpela kutesh malejan minam. [Shinshikin paragraf wa kusambish wa cha chipul cha 3 chidia mu dilejan dia 3 ni tang Kujingunik 21:4, 5. Anch chitwishikin, shinshikin paragraf mukwau ni maverse masambishina nich dizu “tang.”] Anch usotin, nikutwish kukushil broshir winou. Tukwitin chakwel upakisha kwilej Bibil pa chisu chikwau. Anch usotin broshir winou, ukutwish kudandamen kwilej. Chisu chikwau, tukutwish kushinshikin dilejan dia kusambish. Tal anch dilejan dined dikwet kusu paj umwing.”
[Kamushet kadia pa paj wa 7]
Lejan Mutapu wa Kusadil Broshir Chisu Ukumuchirikina Muntu:
● Chisu tukumuchirikina muntu wamekesha musangar, tukutwish kulond anch: “Nikwet musangar wa kutanijan ney kand kwau. Nakuletin kal broshir winou ukweta chakul cha Bibil chakwila ku yipul yivud yisangareshina. [Mwinkisha broshir, ni mwita chakwel atala pa chibur cha nsudiel.] Ov, yisu mitu ya milong yiusangaredina? [Mulika akula. Kupwa buril pa paj padia dilejan ditondinay.] El amboku nikuleja mutapu ukutwisha kusadil broshir winou chakwel utana chakul cha Bibil.” Muleja mutapu wa kusambish dilejan kusutil ku kwisambin paragraf umwing ap aad ni maverse masambishina nich dizu “tang.” Wasambish kal kamu dilejan dia Bibil mu mutapu uswapela! Mwinkisha mwin chikumbu broshir ni irijeka chakwel umuchikina. Piukupwisha dilejan diawonsu, ukutwish kwisambin kand dilejan dikwau dikutonday mwin chikumbu ap ukusambish kwinsambishin kwa broshir winou.