Tambulany Chilik cha Aprofet—Ozey
1. Ov, chipul ik ukutwisha kwiyipul amwiney?
1 ‘Ov, yom ik nisotininga kusal mulong wa Yehova?’ Pamwing ap ukat kwiyipulang amwiney chipul mudi chinech chisu utongijokininga pa kujimb kwa kuwap kwend ni kwa riy rend. (Kus. 103:2-4; 116:12) Ozey wasala kwa kwisotil yom yawonsu yamulejau kudi Yehova, ap anch chidinga chitin kwipan kwa muntu panrend. Ov, mutapu ik tukutwisha kumwimburij Ozey?
2. Ov, mutapu ik tukutwisha kwimburij chilakej chiwamp cha Ozey cha kujijamen mu mudimu wa kulejan?
2 Lejan mu Chirung Chiyimp: Uruu wa Ozey aupana chakusambish mulong wa michid dikum ya want wa Isarel, chisu chimikau difukwil diakin. Mwant Jerobowam II wasala yom yiyimp ku mes kwa Yehova ni wadandamena kwipan mu difukwil dia musamb a ngomb mudi mwasalangay Jerobowam I. (2 Ant 14:23, 24) Ant aswinkanijana adandamena kutek michid dikum ya want kulemp ni Nzamb djat ni payisheshau mu muvu wa 740 K.C.C. Chikwau kand, chikalap nchik kudandamen kwa difukwil dia makasu, Ozey wasala mu mutapu ushinshamena mudi muprofet mu mivu piswimp 59. Ov, niyetu tudi akwatina chilik chimwing mupak wa kulejan kupwa kwa muvu ni muvu, ap anch turishin nich kulik kusanger ap rupompat?—2 Tim. 4:2.
3. Ov, mutapu ik mashakamin ma Ozey mamekesha riy ra Yehova?
3 Shinshikin pa Riy ra Yehova: Yehova wamuleja Ozey chakwel ata “mband wimikina dis.” (Ozey 1:2) Ap anch mukajend, Gomer, wavala nend mwan, chimeken anch kupwa Gomer wavala an aad a mu masandj. Rusot ra Ozey ra kumulimish mukajend ramekesha mutapu wadinga riy rijim ra Yehova pantaliken nich yisal yiyimp ya in Isarel chisu chakarumukau. (Ozey 3:1; Rom 9:22-26) Ov, tusotin kudjibul kulemp maswir metu ayinetu chakwel twijikisha riy ra Yehova kudi antu awonsu?—1 Kor. 9:19-23.
4. Ov, mitapu ik yimwing ya kwipan tukutwisha kusal mulong wa Yehova?
4 Atushalapol amwing a Yehova alika kwikal nich midimu ya nfalang jivud chakwel asutisha asaa avud mu mudimu wa kulejan. Atushalapol akwau asota kwikal ajich ap akad an chakwel akimba yisakin ya Want. Chisu tutongijokininga pa mashakamin ma Ozey, tukutwish kwitongin ayinetu anch, ‘nifanyidinap kusal mudi mwasalay.’ Pakwez, anch twakudish musangar wetu mulong wa ranaken ramushena ra Yehova ni twit usu wa spiritu wend utumbila, tukutwish kwikal asadidilay mu mitapu twakada kutongin ap anch chitwishikin, mudi mwadingay kamu Ozey.—Mat. 19:26; Fil. 2:13.