Endany Pamwing ni Nzamb, ni Angulany Yom Yiwamp

“Anch wakunany rinkind, ukez kangulany chinzwij!”—OZEY 8:7.

1. Ov, mutapu ik tukutwisha kwend pamwing ni Nzamb?

WENY mu teritwar wa ubaj uding wa diking ching anch ntakel udimukina ndiy utakedila njil. Chikwikal cha manangu kwend ni ntakel mud winou pa ndond pa kwiyil ayinetu. Mu mitapu yimwing, chinech chifanikeshin mwikadil tudia nich. Chakin kamu, Yehova, wipana kal mulong wa kututakel mwi mpay yijim ya mangand minam mayimp. Chidi cha manangu kud etu kwend nend pamwing pa ndond pa kutakel nzau jetu ayinetu. Ov, mutapu ik tukutwisha kwend pamwing ni Nzamb? Chidi kusutil ku kulondul umutakel uletinay mu Dizu diend.

2. Chom ik chikwisambinau mu mutu wa mulong winou?

² Mutu wa mulong wasambelang wisambidin rusangu ra chifanikesh ridia mu Ozey shapitre wa 1 kushik ku shapitre wa 5. Mud mutwamena, rusangu riner rikwet malejan makutwisha kutukwash kwend pamwing ni Nzamb. El katat twisambina manans mamwing majim ma shapitre wa 6 kushik ku shapitre wa 9. Chikwikal cha ukwash kusambish kushinshikin mu wiswimp mashapitre minam manying.

Kushinshikin mu Wiswimp

3. Shimunin mu wiswimp yom yidia mu Ozey shapitre wa 6 kushik ku shapitre wa 9.

³ Yehova wamutuma Ozey kubwak cha kusambish ku want wa michid dikum wa Isarel wa kwindum. Muchid winou, wijikana kand anch Efirayim kupwa kwa dijin dia muchid wau wadinga ni kuyikel, wamulika Nzamb. Ozey shapitre wa 6 kushik ku shapitre wa 9 ulejen anch antu aburena kushinshaman pajirilau manswik ma Yehova ni kusalijok yom yiyimp. (Ozey 6:7) Awiy achingejina manswik ma mangand pa ndond pa kukarumukin kudiay Yehova. Mulong adandamena kukun yom yiyimp, awiy ela kwangul yom yiyimp. Mu kulond kukwau, dirumburish dia kufish nich diadinga ni kwez. Pakwez uprofet wa Ozey ukwet kand uruu usangareshina muchim. Antu adinga nich kashinsh anch akutwish kuchirik kud Yehova ni akuyanaken anch amekesh muchim wa kukarumuk.

4. Malejan ik ma usey madia mu uprofet wa Ozey tukushinshikina?

⁴ Ku mashapitre minam manying ma uprofet wa Ozey, tukutwish kutaninaku umutakel ufanyidina ukutukwasha kwend pamwing ni Nzamb. Tushinshikinany malejan manying ma usey: (1) Kukarumuk kwakin kukat kumeken ku yisal, kichidiap ku mazu kusu; (2) yakupesh ayinay yikatap kumusangaresh Nzamb; (3) Yehova ukat kwov kusansan ku muchim anch in kumwifukwil end adiokal kudiay ndiy; ni (4) chakwel kwangul yom yiwamp, tufanyidin kukun yom yiwamp.

Mutapu wa Kumekesh Kukarumuk Kwakin

5. Let chitongijok chijim cha yom yilondilau mu Ozey 6:1-3.

⁵ Uprofet wa Ozey utufundishin etu yivud piur pa kukarumuk ni ranaken. Mu Ozey 6:1-3, tutangin anch: “Antu akat kulond anch: ‘Ezany tuchirikany, kudi [Yehova]. Ndiy watusupwola, pakwez ukutwok, watutapola, pakwez ukutukas yitat. Mu machuku maad ap masatu ukutupizurish, chad tukushakam nend pamwing. Tupakishany kwetu kumwijik [Yehova]. Chakin, ndiy ukwez kudi etu, mudi mutwija kand anch, ruvul ukat kunak pa chirung chend.”

6-8. Uyimp ik wadinga ku kukarumuk kwa Isarel?

⁶ Ov, nany ulondila mazu madia mu maverse minam? Amwing akat kupan mazu minam kudiau in Isarel akad kushishaman ni alondil anch antu in kubwambwil adinga kuyambish kukarumuk ni kuchingejin pa ranaken ra Nzamb. Pakwez, akwau, alondil anch muprofet Ozey ndiy wadinga ulondila, wayilembila antu chakwel achirik kudiay Yehova. Chikalap nchik ndiy walonda mazu minam, chipul chijim chidi anch, Ov, antu awonsu a want wa Isarel wa michid dikum achirika kudiay Yehova, amekesha kukarumuk kwakin? Chakul chidi anch bwat. Yehova ulondidin kudiay Ozey anch: “En, in Isarel, ni in Yuda, ov, chom ik chinikukusalany? Rukat ren kud am rikat kupwa swa mudi mbundu ja pamanch, ridi kand mudi maum makata kupwa swa pamanch.” (Ozey 6:4) Uman mud ik wa mwikadil wa spiritu ufila wa antu a Nzamb! Rukat ridimukina, ap anch rukat rishinshamena, rashadika rawonsu—mud mbundu ja pamanch piukata kukaninik muten. Ap anch antu ayambisha kukarumuk, Yehova kamanap diyingish dia kuyanaken. Wisu wadinga mulong?

⁷ Kukarumuk kwa in Isarel kwadingap kudiokila ku muchim. Ozey 7:14 ulondil chinech piur pa mulong wayikisinay Yehova antwend: “Kanlembilap nich michim ya kashinsh, pakwez iyasolanga pansh ni kudilol.” Verse wa 16 uwejidin anch: “Akat kudandamen kwingomb nyim, ni kuya kudi mukish wakad usu”—charumburik anch, “chidiap ku mulad wa difukwil dia piur.” (Not) Antu kadingap asotina kuchirikin ku kushiman difukwil dia Yehova kusutil ku kukarumuk mu mutapu chiswirikedina chakwel kuchirish urund wau nend ndiy. Chakin, kasotap kamu kwend pamwing ni Nzamb.

⁸ Kwadinga mulong ukwau wa kumekesh kukarumuk kwa Isarel. Antu adandamena kusal chitil—chakin kamu, yitil yivud kushalijan, pamwing nich kadimb-a-dimb, kujipan, kwiy, difukwil dia akish, ni kusuk manswik mayimp ni michid yikwau. Ku Ozey 7:4, ayifanikeshin antu mud “kasu kadia mu ruteng,” ap mud dijuku dia kasu dia mwin kwosh mabot, chidi mulong wa impu yiyimp yadinga yiyemina mukach mwau. Pa kuman ngikadil yiney yiyimp ya muspiritu, ov, antu inay afanyina ranaken? Bwat chakin kamu! Ozey uyilejin antu ambwambol inay anch Yehova ukez “kavurik yitil yau” ni “ukez kayilej kadimu.” (Ozey 9:9) Kwikil kuyanaken!

9. Mazu ma Ozey matufundishin chom ik piur pa kukarumuk ni ranaken?

⁹ Mud mututangina mazu ma Ozey, chom ik twilejina piur pa kukarumuk ni ranaken? Chilakej cha dibabesh cha kuburen ritiy kwa in Isarel chitufundishin etu anch chakwel kwisakin chiyukish cha ranaken ra Yehova, tufanyidin kumekesh kukarumuk kwa kashinsh. Mutapu ik tukutwisha kumekesh kukarumuk kwinoku? Chitwishikinap kumudimb Yehova nich mansoj ap nich mazu ma chamwamu. Kukarumuk kwakin kukata kumeken ku yisal. Chakwel kutan ranaken, muntu muyimp ufanyidin kulik kamu njil yend ya chitil ni kushakam kwambatan nich yijil ya piur ya difukwil dia piur dia Yehova.

Yakupesh Ayinay Yikatap Kumusangaresh Yehova

10, 11. Mud muchilejenau patok pa mulong wa Isarel, ov mulong wak yakupesh ayinay yikatap kumusangaresh Yehova?

¹⁰ Katat twisambinany dilejan dia kaad dikutwisha kutukwash kwend pamwing ni Yehova. Diawiy ed: Yakupesh ayinay yikatap kumusangaresh Nzamb. Ozey 6:6 ulondil anch: “Am [Yehova] nisotin en winkatany nich rukat ren rudimukina chakwel ruswinkana pa ndond ya yakupesh yen ya annam. Nisotil antwam angijik am kupandakan kwingoshil yakupesh.” Shinshikin anch Yehova usangaredin rukat rudimukina, ap anch rukat rishinshamena—ngikadil ya muchim—ni mu ronganyin Rend. Pakwez ukutwish wiyipul anch: ‘Ov, mulong wak verse winou ulondil anch Yehova kakatap kusanger “yakupesh” ni mu “yakupesh [ya kwosh]”? Ov, kadingap ayitina mu Chijil cha Moses?’

¹¹ Yakupesh ni milambu adinga ayitil mu Chijil, pakwez kwadinga mulong ujim kud antu ashakama pa chirung cha Ozey. Chimeken patok anch, kwadinga in Isarel adinga kusal yawonsu yadinga yiswirikena kupan milambu mu mutapu wa kumekesh kwipan kwau kud Nzamb. Pa chisu chawiy chimwing, adinga nikusal chitil. Ku ngikadil yau ya chitil awiy amekesha anch michim yau yiburedin rukat rishinshamena. Amekesha kand anch adjibwila kulemp ronganyin ra Nzamb, mulong kashakamap kand kwambatan nich ronganyin ra Nzamb. Anch antu aburena kwikal nich mwikadil uwamp wa muchim ni alika kulondul njil ya mwom utentamina, ov yakupesh yau yadinga nich usey ik? Yakupesh yau yadinga ya kumuzangil nich Yehova Nzamb.

12. Dibabesh ik didia mu Ozey 6:6 mulong wa antu adiaku ilel?

¹² Mazu ma Ozey makwet dibabesh kud antu avud ayila ilel ku yikumbu ya Nzamb. Akat kumwinkish Nzamb milambu mud in kusadil relijon. Pakwez difukwil diau dikwet usu ukemp, ap bwat, pa yisalijok yau ya pichuku-pichuku. Ov, chakin kamu antu inay akat kumusangaresh Nzamb anch michim yau yikatap kuyibachik kwak ronganyin ra Nzamb ni kurisadil kusutil ku kudiokal ku yisal ya chitil? Kangal muntu ap umwing watong anch midimu ya relijon ayinay yimusangareshin Nzamb. Yehova kakatap kuyisanger antu asotina kutan kwitiyik kwend kusutil ku difukwil dia ku mes pa ndond pa kushakam kwambatan nich Dizu diend.—2 Timote 3:5.

13. Yakupesh ya mulad ik yitukata kupesh, pakwez chitong ik chifanyidina kwikal mu manangu piur pa usey way?

¹³ Mud in Kristu akin, twij mu manangu anch yakupesh ayinay yikatap kumusangaresh Nzamb. Chidi chakin anch kitukatap kumupesh Yehova yakupesh ya annam. Ap mwamu, tukat “kupesh yakupesh ya kushiman kudiay Nzamb . . ., charumburik anch, mabuj ma ku milamu yikata kwitiyij ku dijin diend.” (Hebereu 13:15) Chidi cha usey anch kangal twikal mud in Isarel akayitil a pa dichuku dia Ozey, nich kutong anch tukutwish kupwish yisal yiyimp kusutil ku kupan yakupesh yiney ya muspiritu kudiay Nzamb. Shinshikin chilakej cha changadim umwing wasala mu ujindj masandj. Weza kwitiyij anch: “Nasala nakash mu mudimu wam wa chingand, natonga anch kusal mwamu kukez mwi njil yimwing ap yikwau kubwik uyimp.” Chinech chadinga chilik chimwing ni chasalau in Isarel. Pakwez, chakupesh chetu cha kushiman chikwitiyik kudiay Yehova ching anch chiyil pamwing nich chibachikin chiwamp cha muchim ni kwiyendish kwa winzamb.

Yehova Ukat Kwov Kusansan Anch in Kumwifukwil end Adiokal Kudiay Ndiy

14. Uprofet wa Ozey ulejen chom ik piur pa yovil ya Nzamb?

¹⁴ Dilejan dia kasatu twilejidina ku Ozey shapitre wa 6 djat wa 9 didi piur pa mutapu ukat kwovay Yehova pakatau kumulik in kumwifukwil end. Nzamb ukweting yovil ya usu ni ya riy. Ndiy ukwet yovil ya riy ya musangar ni ranaken pantaliken nau antu akarumukina kudiokal ku yitil yau. Chad, anch antwend alik kukarumuk, ukat kukwat chiyul, cha kusal chisal chikash. Mulong Nzamb ukat kubangin nakash kuwap kwetu, ndiy ukat kusangar pitukata kwend nend mu kushinshaman. Kuseng 149:9 ulondil anch: “Nsalejetu wova musangar mu antwend.” Ov, mutapu ik wovilingay Nzamb anch atushalapol end aburen kushinshaman?

15. Kwambatan nich Ozey 6:7, mutapu ik wadingau kusal in Isarel amwing?

¹⁵ Pisambidinay in Isarel akad kushinshaman, Yehova ulondil anch: “Pakwez mudi Adam, awiy ajipa manswik minasuka nau. [Pawiy pasalau nich makasu].” (Ozey 6:7) Dizu dia Uhebereu diakarumunau ‘kusal nich makasu’ dirumburikin kand “kusal nich kadimb-a-dimb, (kusal) pakad kushinshaman.” Ku Malakiy 2:10-16, dizu diawiy dimwing dia Uhebereu adisadidil mulong wa kurumburil kwend kwakad kushinshaman kwa in Isarel alika kushinshaman kud ambay nau a uruw. Piur pa kusadil dizu dined ku Ozey 6:7, referans umwing ulondil anch “chilakej cha uruw chikasikeshidin ngikadil ya urund wa chiuntu . . . Mwikadil udi wa muntu wajipa urund wa rukat.”

16, 17. (a) Mutapu ik wasalay Isarel nich kalimish pa manswik ma Nzamb ni muchid winou? (b) Chom ik tufanyidina kuvurik pantaliken ni yisal yetu?

¹⁶ Yehova wamumana Isarel mud mukajend wa chifanikesh mulong wa manswik masukay ni muchid winou. Komb pajirilau antwend yijil ya manswik minam, chadinga mud imika dis. Nzamb wadinga mud ngatan mwin kushinshaman, pakwez antwend amuchina ndiy!

¹⁷ Chidi nchik kud etu? Nzamb ukat kubangin kuman nany wendina nend pamwing ap bwat. Chikwikal chiwamp anch twavurik anch “Nzamb udi rukat” ni anch yisal yetu yikat kumwovish musangar ap ushon. (1 Yohan 4:16) Ang twadandamen mu mwom uyimp, tukumunenganesh Yehova ni chakin kamu tukumwovish kuyip. Kulam kwetu chitong chinech mu manangu kukutwish kwikal diking dia usu pantaliken nich kuwil mu choziu.

Mutapu Tukutwisha Kwangul Yom Yiwamp

18, 19. Chijil ik tutanina mu Ozey 8:7, ni mutapu ik chasala chijil chinech kudiau in Isarel?

¹⁸ Tushinshikinany dilejan dia kanying dia uprofet wa Ozey—mutapu tukutwisha kwangul yom yiwamp. Piur pa in Isarel ni pa usup ni mwom wau wa chamwamu wakad ritiy, Ozey ufundil anch: “Anch wakunany rinkind, ukez kangulany chinzwij!” (Ozey 8:7) Pinap tutanin chijil chitufanyidina kulam nawamp mu manangu: Kudi kwambatan pakach pa yitusadila katat ni yikeza kutushiken kurutu. Ov, chijil chinech chidi chakin mutapu ik ku mutambu wa in Isarel akad kushinshaman?

¹⁹ Ku kusal chitil, in Isarel inay adinga ni kukun yom yiyimp. Ov, ela kudandamen kusal mwamu pakad kwangul yibudikin yiyimp? Chakin kamu kelap kwiyep kadimu kakash. Ozey 8:13 ulondil anch: “Nikuvurik [Yehova] yitil yau, chad nikez kayilej kadimu [mulong wa yitil yau].” Ni ku Ozey 9:17, tutangin anch: “Nzamb wam ukez kayilik antwend mulong awiy kamuteshap ndiy. Akez katambitamb mukach mwa michid yikwau.” Yehova wasota kuyisal in Isarel kadimu mulong wa yitil yau. Mulong akuna yom yiyimp, adinga afanyidin kwangul yom yiyimp. Dirumburish dia Nzamb pad awiy dieza mu muvu wa 740 K.C.C., pezau in Asir kuwish want wa michid dikum ya Isarel ni kuyitwal antu mu uswik.

20. Uman wa in Isarel utulejin etu chom ik?

²⁰ Uman wa in Isarel inay utulejin uyakin wa pa dishin: Tukat kwangul yitukata kukun. Dizu dia Nzamb ditubabeshin anch: “Kangal kwidimbany; Nzamb kakumusengenangip; mulong chawonsu chikukunay muntu, chawiy chikez kapolay kand.” (Galatia 6:7) Anch twakun yom yiyimp, tukez kwangul yom yiyimp. Chilakej, antu akweta mwom wa kwimik dis akez kwangul yibudikin yiyimp. Kukez kwikal chibudikin chiyimp kud mwin kusal uyimp wakad kukarumuk.

21. Ov, mutapu ik tukutwisha kwangul yom yiwamp?

²¹ Ov, mutapu ik lel tukutwisha kwangul yom yiwamp? Chipul chinech chitwishikin kuchakul nich chilakej chiswapela. Anch ndim usotil kwangul tidiku, ov, ukukun masangu? Bwat chakin kamu! Chimufanyidin kukun chisotilay kwangul. Chawiy chimwing, anch tusotil kwangul yom yiwamp, tufanyidin kukun yom yiwamp. Ov, usotil kudandamen kwangul yom yiwamp—mwom usangareshina katat nich ruchingej ra mwom wa chikupu mu mangand masu ma Nzamb? Anch mwamu, ufanyidin kukun yom yiwamp kusutil ku kwend pamwing ni Nzamb ni kushakam kwambatan nich yijil yend yitentamina.

22. Malejan ik twilejinaku kal ku Ozey shapitre wa 6 djat wa 9?

²² Ku Ozey shapitre wa 6 djat wa 9, twilejinaku kal malejan manying makutwisha kutukwash etu kwend pamwing ni Nzamb: (1) Kukarumuk kwakin kukat kumeken ku yisal; (2) yakupesh ayinay yikatap kumusangaresh Nzamb; (3) Yehova ukat kwov kusansan ku muchim anch in kumwifukwil end adiokal kudiay ndiy; ni (4) chakwel kwangul yom yiwamp, tufanyidin kukun yom yiwamp. Ov, mutapu ik makutwisha mashapitre matan ma nsudiel ma buku winou wa Bibil kutukwash kwend pamwing ni Nzamb?

Ov, Mutapu ik Ukwakula?

• Mutapu ik umekening kukarumuk kwakin?

• Ov, mulong wak yakupesh ayinay yikatap kumusangaresh Tatukwetu wa mwiur?

• Mutapu ik wovilingay Nzamb anch in kumwifukwil end adiokal kudiay ndiy?

• Yom ik tufanyidina kukun anch tusotil kwangul yom yiwamp?

[Chipich chidia pa paj wa 15]

Ov, mulong wak Yehova walika yakupesh ya antwend?

[Chipich chidia pa paj wa 16]

Chakwel kwangul yom yiwamp, tufanyidin kukun yom yiwamp