Kudishany Chaku cha Kushik Kurutu kwa Chisu
1. Ov, chilakej ik chiletinay Yehova piur pa kushik kurutu kwa chisu?
1 Yehova uding chisu chawonsu tayad. Chilakej, ndiy uyikinshining atushapol end ‘ukwash pa chisu chifanyidina.’ (Heb. 4:16) Ndiy upanining kand ‘yakudia ya muspiritu pa chisu chiwanyidina.’ (Mat. 24:45) Chawiy lel, tukutwish kwikal nich kashinsh anch kwez kwa dichuku dia ujim wend kukezap “kulab.” (Aba. 2:3) Ukwash mud ik tutanidiningamu kusutil ku kushik pa chisu kwa Yehova! (Kus. 70:5) Pakwez, pitudia antu aburedina kuwanyin ni akwetikena, kulimish chisu kukutwish kwikal chakin kamu chikokujul kudi etu. Ov, mulong wak tufanyidina kukudish chaku cha kushik kurutu kwa chisu?
2. Ov, mulong wak kushik kurutu kwa chisu kumutumbishining Yehova?
2 Kushik kurutu kwa chisu kwikal kal chikokujul mu machuku minam ma nsudiel kudi antu avud in kwikat ayinau ni akad kwikand. (2 Tim. 3:1-3) Chawiy, chisu chishikiningau in Kristu pa chisu ku mudimu, ku kutal antu akanijadina nau ni ku yikumangen, antu akwau ashinshikidining pa mulong winou ni chinech chimutumbishining Yehova. (1 Pita 2:12) Yisu yawonsu tushikining pa chisu ku midumu yetu ya kumujimbu, pakwez mulong wak yisu yimwing tulambining pa kushik ku yinship ya uteokras? Kulimish chisu mulong wa yikumangan ya Ukristu, kuwejaku muminy wa nsambishil ni malembil, kumekeshining maswir ma kumwimburij nawamp Tatukwetu wa mwiur.—1 Kor. 14:33, 40.
3. Ov, mulong wak kushik kurutu kwa chisu kumekeshining kalimish kudi antu akwau?
3 Kushik kurutu kwa chisu kumekeshining kand kalimish mulong wa antu akwau. (Fil. 2:3, 4) Chilakej, pitushikininga kurutu kwa chisu mulong wa yikumangan ya Ukristu, kuwejaku yikumangan ya mudimu wa chingand, ambay netu akaritiy kakutwishap kwikal azuwodina. Ku mutambu ukwau, anch tukwet chaku cha kulab, chikutwish kumekesh kudi antu akwau anch tushinshikidining nakash chisu chetu kupandakanamu chisu chau. Kushik kurutu kwa chisu kumekeshining ukinakin, mushiku ni ukashinsh—ngikadil jisangarediningau kudi antu atunyingumukininga.
4. Anch yisu yimwing tulabining, ov, mutapu ik tukutwisha kurijik mulong winou?
4 Anch yisu yimwing ulabining, tongin pa mulong winou. Irijeka amwiney kusutil ku kushinshikin program ukutwisha kukukwash kuwanyish yisend yey pa chisu chiwanyidina. (Mul. 3:1; Fil 1:10) Mwita Yehova chakwel akukwasha. (1 Yohan 5:14) Kushik kurutu kwa chisu udi mulad umwing umekeshininga kujikitish piur pa yijil yijim yaad yidia mu Yijil—kumukata Nzamb ni kuyikat amutej netu.—Mat. 22:37-39.