“Ayipaka Bil Pakusambish”—Mutapu Ik?
1 Nich kujimb kwa dirijek dia Yehova kuchiyila kurutu, kudi kuswir kwakad nsudel kwa akadivar afanyidina chakwel kusadin mud ankwash’a midimu. Akadivar avud akad kal kutondiu, pamwing nau ansand a dikum dia mivu, akweting rusot ra kusadil mu chikumangen. Chisu chiyinkinau midimu yikwau, akat kwiyov anch akwet ukwash ni akweta yitongijok ya kuya kurutu. Kurutu kwau awiy kwikal ni yisend yijim chifanyidin ikala antu amwing ‘apakinau bil pakusambish.’ (1 Tim. 3:10) Ov mutapu ik ukatau kuchisal?
2 Mudimu wa Amakurump: Mu kushinshikin mukadivar anch uwanyishin yitinau mu Mifund mulong wa ankwash’a midimu, mud chiyifundinau mu 1 Timote 3:8-13, amakurump awapidil kand kupak ukaliweny wend chakwel kutal anch ukutwish kwitwik chisend. Akutwish kumwinkish midimu ya kukwash mud kwangan magazet ni mikand, kukwat mamikro, kulam kwinang kwa Chot cha Want, ni yom yikwau. Amakurump akutal mutapu usadilay midimu yimwinkinau. Akez kukimb kuman ngikadil yifanyidina, kwikal kwend tayad, mushiku, kwikepish, spiritu wa kusot kusal midimu, ni ukaliweny wa kutwish kovijan ni akwau. (Filp. 2:20) Ov ukwet chilikej chiwamp mu milong yitadila mutapu wa kudjal ni kwirijek mujimbu? Ov wovil dirumburik dia kwikal ni chisend? Amakurump asotin kuman mu “yisalijok yend yiwamp yidiokila ku kwitudish ni manangu.” (Jak. 3:13) Ov ukatin chakin kupan ukwash wend ku chikumangen? Ov ulondwil mbil ya Yesu ya “kwikalish in kwilej” kusutin kubudikin mu mudimu wa chingand nich mushiku?—Mat. 28:19; tal Tour de Garde wa Mwinses 1, 1990, paj 18-28.
3 Ap anch kwikil kuvul kwa mivu kanang ya kushiken chakwel muntu ikala nkwash a midimu, Baibel wisambidin akadivar inay mud “amakundj akata kusal mudimu.” Chikasiken kutongin anch dizu “amakundj” dikala ni dirumburik dia an a dikum dia mivu ap ansand achikweta dikum dia mivu, mulong chitwishikin kwikal ni mband ni an. (1 Tim. 3:12, 13) Amakundj inay kafanyidinap kwikal aziyidila ku “maku ma usand” pakwez afanyidin kwikal ayinau ni ngikadil yiwamp, ajikishina nawamp ni kom katok kurutu kwa Nzamb ni antu.—2 Tim. 2:22.
4 Ap anch ukaliweny wa chivadik udi wa ukwash, cha usey chidi kwikal ni mwikadil muwamp wa manangu. Ov udi muntu usotina nich kwikepish kumushiman Nzamb ni kuyisadin akadivar nend? Chakin, Yehova ukez kuyukish usu usadilay chakwel kuya kurutu mu chikumangen.