Mutapu wa Kuyikwash Antu Akad Kutang Nawamp

1. Kulejan Bibil kudi antu akad kwijik kutang nawamp, ov, mulong wak chidinga chikokujol?

¹ In yikumbu akad kwijik kutang nawamp akutwish kusanger yom ya muspiritu, pakwez, akutwish kwov wom wa Bibil ap wa mikand yikwau. Kuyinkish antu inay buku mudi Chifundishinay Bibil, kapamp ka kusambish ka kumanijan nau, kukutwishap kwikal nich chibudikin chiwamp. Ov, mutapu ik tukutwisha kuyikwash antu inay muspiritu? Twayipula in kulejan ayifuvu a mu jingand kushalijan 20 ni kusut piur pa yom yasalau. Yiyul yau yasadilau yawiy ey.

2. Ov, yom ik ya mudimu yikweta chibudikin chiwamp mu kumukwash muntu kanang wakad kwijik kutang nawamp?

² Anch mwin kwilej ukwet mupak wa kutang ap kakwetap ukaliweny wa kutang, ukutwish kusambish nich mabroshir am Mutesha Nzamb ap Mutesha Nzamb ni Ikal ni Mwom Chikupu. Chibol umwing wa mu États-Unis wamuleja muntu kanang mabroshir minam maad ni wamwipula wisu umwing umusangareshina nakash. Biro wa mutiy wa mu Kenya wafunda anch yom yiney ya mudimu yikwet yibudikin yiwamp mulong antu a mu chisak cha mu Afrik, akweting chaku cha kwisambin piur pa jinsangu pa ndond pa minsamb ya yikunku ya yipul ni yakul. Chitwishikin kudi muntu wileja kwitiy kutang ap kumwipul yipul, pakwez mulad winou ukutwishap kwikal uswapela kudi muntu wileja pakemp. Anch mwin kwilej ukwet ukaliweny kanang wa kutang, in kulejan avud akusot kusambishin nich mabroshir am Rusangu Ruwamp Ridiokila Kudi Nzamb! ap Ukutwish Kwikal Murund Nend Nzamb!, pamwing ap Recueil d’histoires bibliques.

3. Ov, jingunin ik ja usey jitadina antu akad kwijik kutang jikeza kutukwash twikala ayifuvu mu kuyilej?

³ Yijikitisha: Antu akad kwilej kutang akutwish kwiyov nayimp ni avud au imening mudi kakwetap usey. Kuyikwash iyova anch akwet usey yisu yivud wawiy mulad wa kusambish wa kuyifundish uyakin. Antu avud akad kwijik kutang akweting manangu ni ukash wa kwilej. Yinkisha kalimish kayiwanyidina ni kuyisadin nich kalimish. (1 Pita 3:15) Akez kwikal abachikinau chakwel adandamena kwilej anch iyova anch usu wau usadiningau udiap wa chamwamu ni ayiling kurutu muspiritu. Chawiy ikal mwin kuyijikitish nich muchim wawonsu.

4. Ov, mutapu ik tukutwisha kuyikasikesh in kwilej akweta mupak kanang wa kutang nich ukaliweny chakwel irijeka mulong wa dilejan?

⁴ Ap anch mwin kwilej ukwet mupak wa kutang nich ukaliweny, mukasikesha chakwel arijeka dilejan diend. In kulejan amwing a mu Afrik wa Kurul ayikasikeshining in kwilej au chakwel ita chid cha dijuku diau ap murund nau ukutwisha kutang nawamp chakwel ayikwasha in kwilej. Mwin kulejan umwing wa mu Grande-Bretagne wayikasikesha in kulejan end chakwel irijeka kusutil ku kuyilikidil asadina buku wend mulong wa kwisambin kusu maparagraf makemp pa chisu cha dilejan chakwel atwisha kuman mutapu chiswapelinga kutan yakul yitekinau kashony. Mukadivar umwing wa mu Inde uyikasikeshining in kwilej end chakwel ashinshikina yipich yidia mu dilejan mulong wa rubing rikwezap ni kutongijokin pa yipich yiney kurutu.

5. Ov, mutapu ik tukutwisha kumekesh kushimpish muchim chisu tutakedininga dilejan?

⁵ Ikal Mwin Kushimpish Muchim: Chikalap nchik mukand usadidina, shinshikin pa manans majim ni mukwasha mwin kwilej wey ijika nawamp manans minam. Kwisambishil, chiwapining kusambish nich minsamb ya mu aminit 10 ap 15. Kangal wapakish kupwish malejan mavud nakash, pamwing ap kwilej kusu maparagraf makemp mu chikunku ni chikunku cha dilejan. Ikal mwin kushimpish muchim anch mwin kwilej utangin pakemp-pakemp. Ukez chakin kamu kuwapish ukaliweny wend wa kutang payilay ni kukudish musangar wend mulong wa Yehova. Chakwel umukwasha mwin kwilej wey kusal mwamu, chidi chiwamp kumutazuk chakwel akumangan ku yikumangan kudiosh kwisambishil.

6. Ov, mutapu ik tukutwisha kuyikwash antu kwilej mutapu wa kutang?

⁶ Anch in kwilej a Bibil ilejin mutapu wa kutang, akez kuya kurutu muspiritu pakad kulab. (Kus. 1:1-3) In kulejan avud ayikwashin kal in kwilej au kusutil ku kusadil mukand Iyijidisha Kutang ni Kufund mu aminit akemp kwinsudiel kwa dilejan ni dilejan. Anch mwin kwilej wasambish kuziy, pamwing ap ukutwish kukudish ruchingej rend kusutil ku kujimbul yom kanang yamukwasha kwilej chakwel asala mwamu. Mukasikesha anch Yehova ukez kuyukish usu wend ni mukasikesha kand chakwel alembil mulong atana ukwash. (Jinsw. 16:3; 1 Yoh. 5:14, 15) In kulejan amwing a mu Grande-Bretagne ayikasikeshining in kwilej au chakwel itekina jintong jisikena ja kuya kurutu​—pamwing ap kusambish kwilej ma alufabe, kujingunin ni kutang mifund yatondau, kupwa kutang mikand yiswapela kutang yengamidina mu Bibil. Kuyikwash antu kwilej mutapu wa kutang yisu yivud kwitining kuyibachik chakwel ikala nich rusot ra kusal mwamu, pakad ching kusu kuyifundish mutapu wa kutang.

7. Ov, mulong wak tufanyidinap kuziy kwandjik uyakin mudi antu inay akad kwijik kutang nawamp?

⁷ Yehova kayipipejiningap antu ileja pakemp malejan ma ku mujimbu. (Job 34:19) Yehova ushinshikidining pa muchim wa muntu. (1 Jnsg. 28:9) Chawiy, kangal waziy kwandjik uyakin mudi antu inay akad kwijik kutang nawamp. Ukwet yom ya mudimu yiwamp nakash yiukutwisha kusambish nich. Kupwa, ukutwish kusambish dilejan nich buku Chifundishinay Bibil ni ukez kumuwejin ronganyin rikash ra mu Bibil.