Mutapu wa Kuyishik Antu Tufundishina ku Michim
1. Mafundish ma Yesu mading nich usu ik ku michim ya antu amatesha?
1 Yesu washikang ku michim ya antu amuteshang. Mu chisu chimwing, michim ya in kwilej end ‘yaswana’ payirumburilay nawamp Mifund. (Luka 24:32) Komb, kumuziyil Nzamb kufanyidin kudiokal ku muchim, chadi mutapu ik tukutwisha kuyikwash antu tukata kufundish chakwel aswimpa swa mashakamin ma mwom yau?—Rom 6:17.
2. Manangu ni kujingunin yikwet mudimu ik mu kushik ku muchim kwa muntu?
2 Sadin Manangu ni Kujingunin: Mulong antu avud anch wayilej yom yidia yiwamp ni yidia yiyimp yikutwishap kuyibachik ku chisal. Chawiy, anch twayilond yom yivud piur pa yitiyij ya ma relijon mau nich maverse, akutwish kutuchin. Chakwel tumubachika muntu ku chisal, tufanyidin chakusambish kujingunin mulong wak witiyijin ni kusadin yijay. Kutond yipul nich manangu, kukumubachik muntu alonda yidia mu muchim wend. (Jinsw. 20:5) Ching mu Dizu dia Nzamb mwawiy tukutwisha kutond jinsangu jikutwisha kumushik ku muchim wend. Komb, tufanyidin kumusanger ni kwishimpish. (Jinsw. 25:15) Vurik anch antu akat kupam muspiritu mu mitapu kushalijan. Lik pasuta chisu mulong wa mwiku utumbila wa Yehova asadisha yitongijok ni yisal yend.—Mar. 4:26-29.
3. Mutapu ik tukutwisha kuyikwash antu tukata kufundish kukudish mikadil yiwamp?
3 Yikwasha Akudisha Mikadil Yiwamp: Maverse ma Bibil malejena muchim uwamp wa Yehova ni rukat rend makutwish kuyikwash antu tufundishina chakwel akudisha mikadil yiwamp. Tukutwish kusadin maverse mudi Kuseng 139:1-4 ap Luka 12:6, 7 mulong wa kumekesh chilik cha untu wa Nzamb utukata kusanger. Anch antu amekesh musangar wau mulong wa ranaken ra Nzamb, rukat rau ni kwipan kwau kukutwish kuya kurutu. (Rom 5:6-8; 1 Yoh. 4:19) Chikwau kand, pakwilejau anch mwikadil wau ukwet chibachikin pa untu wa Yehova, akutwish kusal usu wa kwikasikesh kusal yom yikutwisha kumusangaresh ni kumutumbish Yehova.—Kus. 78:40, 41; Jinsw. 23:15.
4. Pituyifundishininga antu mu mudimu wetu wa kulejan, mutapu ik tukutwisha kuyilimish antu akweta want ipau wa kutond?
4 Yehova kakumushindinangap muntu chakwel aziyila yijil yend. Pakwez, ukat kuyit antu chakwel amekesha manangu mu kulondul yiyul yend. (Isay 48:17, 18) Tukumwimburij Yehova chisu tukuyifundisha antu mutapu wa kuyikwash amana yom yikutwishau kusal ayinau. Anch antu ayinau itiyij anch afanyidin kuswimp mwom yau, yibudikin yikwikal ya chikupu. (Rom 12:2) Chikwau kand akutwish kushej kudi Yehova ukata “kupak michim”.—Jinsw. 17:3.