Yikwasha Antu Akwau Kwikal “in Kuziyil Nich Muchim”
1. Yom ik yitinay Nzamb kud in kumwifukwil?
1 Kuziyil kudi kwa usey chakwel kumwifukwil Yehova mutapu witiyijinay. (Kuv. 12:28; 1 Pi. 1:14-16) Katat kamu ak, dirumburish dia Yehova dikwez padi “awiy akad kumwijik Nzamb, ni kudi awiy akad kuziyil ku katumb kawamp.” (2 Tes. 1:8) Mutapu ik tukutwisha kuyikwash antu akwau kwikal “in kuziyil nich muchim” ku malejan ma Dizu dia Nzamb?—Rom 6:17.
2. Mulong wak chidi cha usey kuyikwash antu akwau kukudish ritiy rikash?
2 Kusutil ku Kasikesh Ritiy ni Rukat: Mu Bibil, kuziyil akukasidin kamu nakash pamwing nich ritiy. Kambuy Paul wisambina piur pa ‘yijidik ya Nzamb wa chikupu chakwel kukasikesh kuziyil ku ritiy.’ (Rom 16:26) Hebereu mwimbu wa 11 ujimbwil yilakej yivud ya ritiy, yivud ya yilakej yiney yikwatijadin nich yisal yambatena nich rusot ra Yehova rilejenau. (Heb. 11:7, 8, 17) Ku mutambu ukwau, kulik kuziyil akat kukwambatanish nich kuburen kwa ritiy. (Yohan 3:36; Heb. 3:18, 19) Tuswiridin kukudish ukaliweny mu kusadil kwa Dizu dia Nzamb mulong wa kuyikwash antu akwau kukudish mulad wa ritiy ukata kubudish kuziyil.—2 Tim. 2:15; Jak. 2:14, 17.
3. (a) Kuziyil akunungining nchik nich rukat? (b) Mutapu ik tukutwisha kuyikwash antu twilejina nau Bibil kukudish rukat mulong wa Yehova?
3 Kuziyil akunungining kand pamwing nich rukat mulong wa Nzamb. (Kuv. 5:10; 11:1, 22; 30:16) Mukand wa 1 Yohan 5:3 ulondil anch: “Mulong rukat ra Nzamb rawiy er, chakwel tukulam yijidik yend; ni yijidik yend kiyikutukasikenip.” Mutapu ik tukutwisha kuyikwash antu twilejina nau Bibil kukudish rukat mulong wa Yehova? Kimb chisu piwilejinany chakwel kuvudish kujikitish mulong wa ngikadil ya Yehova. Mekesh yovil yey ya kujikitish kujim kud Nzamb. Mukwasha muntu wilejinany nend kutongin mutapu wa kukudish urund wend ni Yehova. Chipandakenamu yawonsu, rukat mulong wa Yehova rikez kuyibachik antu akwau—ni kutubachik kand ayinetu—kumuziyil Nzamb nich muchim.—Mat. 22:37.
4. (a) Ov, mulong wak chilakej chetu chidi cha usey? (b) Yom ik tufanyidina kusal chakwel kukudish “muchim wa kuziyil”?
4 Kusutil ku Chilakej Chetu: Mutapu umwing ukweta usu ukututwishisha kuyikasikesh antu akwau kuziyil ku rusangu ruwamp chidi chilakej chetu. Pakwez, tufanyidin kudandamen kwikasikesh chakwel kukudish “muchim wa kuziyil.” (1 Ant 3:9; Jinsw. 4:23) Ov, chinech chirumburikin ik? Dish muchim wey kusutil ku dilejan dia Bibil diakad kujing ni kukumangan ku yikumangan. (Kus. 1, 2; Heb. 10:24, 25) Kimb kuta urund nau antu akweta michim yinungina mu uumwing mu difukwil diakin. (Jinsw. 13:20) Sal mudimu wa chingand pakad kujing, nich muchim utok wa kusot kuyikwash antu adia mu teritwar wey. Lembil chakwel kutambul ukwash wa Yehova mulong akutakela mu kukudish muchim uwamp. (Kus. 86:11) Ipuk yom yikutwisha kujondish muchim wey, mud kwipuwangesh kwa masandj ap kwa chisum. Londul yom yikushejishina piswimp ni Nzamb ni yom yikasikeshina urund wey ni ndiy.—Jak. 4:7, 8.
5. Mutapu ik uyiyukishinau antu in kuziyil?
5 Yehova wayileja nich kashinsh antwend a pasak anch akez kutambul yiyukish anch atesh dizu diend. (Kuv. 28:1, 2) Chawiy chimwing, ilel, Yehova ukat kuyiyukish kamu nakash ‘antu amuziyidila mud mwant.’ (Midimu 5:32) Chawiy lel, kusutil ku kufundish ni ku chilakej chetu, el tuyikwashany antu akwau kwikal in kuziyil nich muchim.