Kumuziyil Kwey Yehova Kudi Kwa Usey

“Mwanam ikundj, ikal mwin manangu chakwel wez usangarish muchim wam.”—JINSWIR 27:11.

1. Mwiku ik upalangena mu antu ilel?

SPIRITU wa want ipau ni wa kubwambwil upalangen mu mangand ilel. Kambuy Paul warumburila mu mukand wend kudi in Kristu a ku Efes anch: “En walondulanya yaku yiyimp ya in mangand. En wamuziyilanya mwin kutakel wa ayilembil ushicha pakach pa diur ni divu, ndiy kamu mwiku uyikedila antu akata kumubwambwil Nzamb.” (Efes 2:1, 2, MM) Inge, ukutwish walondany anch, Satan Djabul, “mwin kutakel wa ayilembil ushicha pakach pa diur ni divu,” ukwet chakin kamu usu, mangand mawonsu mizwil nich mwiku wa kubwambwil. Mwamu mwadingay ni kusal mu mivu chitot ya kusambish, ni udandamedin kusal mwamu nich usu ukash kudiosh pamwopatau mwiur pa chisu cha Njit ja Mangand ja 1.—Kuburik 12:9.  

2, 3. Mayingishin ik mitukweta ma kumuziyil Yehova?

² Pakwez, chitudia in Kristu, twij anch tufanyidin kumuziyil Yehova Nzamb ni muchim wetu wawonsu mulong ndiy Sakatang wetu, Kalam wa mwom wetu, Mukaleng mwin rukat, ni Mupandish wetu. (Kuseng 148:5, 6; Midimu 4:24; Kolosay 1:13; Kuburik 4:11) In Isarel a chirung cha Moses adinga ij anch Yehova ndiy Wayinkisha Mwom ni ndiy Mupandish wau. Chawiy lel, Moses wayileja anch: “Babalany, ni kuyisadil mudi mwakulejanyay [Yehova] Nzamb wen!” (Kuvurik Yijil 5:32) Mwaning, ading afanyidin kamu kumuziyil Yehova. Pakwez, amubwambwila swa Nzamb wau.

³ Kumuziyil kwetu Sakatang wa mangand kukwet usey ik? Dichuku dimwing Nzamb wamwela muprofet Samwel kumulej Mwant Saul anch: “Kuziyil kupandakenamu yakupesh.” (1 Samwel 15:22, 23, NW) Ov, mutapu ik?

Mutapu “Kuziyil Kupandakenamu Yakupesh”

4. Mwi njil ik tukutwisha kumwinkish Yehova chom kanang?

⁴ Chidiay Sakatang, yom yawonsu yitukweta ya ku mujimbu yidi ya Yehova. Anch mwamu chidia, ov, kudi chom tukweta chitukutwisha kumwinkish? Inge, tukutwish kumwinkish chom chimwing cha usey nakash. Chom ik chinech? Tukutwish kutan chakul mu dibabesh dined: “Mwanam ikundj, ikal mwin manangu chakwel wez usangarish muchim wam, mwamu ni yam nikez katwish kumwakul muntu ukwinsala masal.” (Jinswir 27:11) Tukutwish kumuziyil Nzamb wetu. Ap anch tukwet ngikadil ni yishankur kushalijan, anch twaziyil, umwing ni umwing wetu ukutwish kwakul ku mazu ma makasu ma Satan Djabul malonday anch antu kakutwishap kushinshaman kudi Nzamb anch ayitek mu yoziu. Twitapidil dilau mudi ik!

5. Kubwambwil kukat kumunenganesh nchik Sakatang? Let chilakej.

⁵ Nzamb ukat kusanger mipak yitukwatininga. Anch twabwambwil, ukat kunenganan. Mutapu ik? Woviling runeng pa kumuman muntu kampand wasal yom yakad manangu. (Kuseng 78:40, 41) Chilakej anch muntu uyedila musong wa diabet wakangany kulondul mulad wa yakudia yimwitinau mulong wa ukash wa mujimbu wend ni wadandamen kudawol yakudia yin yawonsu. Ukash wa mujimbu wend ukwikal nchik? Tukutwish kwikal nich kashinsh anch Yehova woviling ushon pakatau antu kumubwambwil, mulong ndiy wij yibudikin ya kudiburil yijil yend ya mwom.

6. Chom ik chikutwisha kutukwash kumuziyil Nzamb?

⁶ Chom ik chikumukwasha umwing ni umwing wetu kuziyil? Chidi chiwamp kudi umwing ni umwing wetu kumwit Nzamb “muchim wa kuziyil,” mudi mwamwitay Mwant Salomon. Ndiy wita muchim wa mutapu winou chakwel atwisha “kwonganyin pakach pa kuwap ni kuyip” chakwel ayirumburish nawamp ambay nend in Isarel. (1 Ant 3:9, NW) Tuswiridin “muchim wa kuziyil” anch tusotil kwonganyin pakach pa kuwap ni kuyip mu mangand mupalangena mwiku wa kubwambwil. Nzamb watwinkisha kal Dizu diend, mikand ya kwilejin Bibil, yikumangan ya Ukristu, ni amakurump a chikumangen in kubangin chakwel tutwisha kukudish “muchim wa kuziyil.” Ov, tukat kusadil nawamp yitenchik yiney ya rukat?

7. Mulong wak Yehova ukasikeshidin nakash pa kuziyil kupandakanamu yakupesh?

⁷ Pa chinech, vurikany anch pasak Yehova wijikisha kudi antu end a pasak anch kuziyil kwading kupandakenamu nakash yakupesh yimwing ya annam. (Jinswir 21:3, 27; Ozey 6:6; Mateu 12:7) Ov, mulong wak chadinga mwamu, mulong Yehova ndiy wayileja antu end kupeshang yakupesh yiney? Mwaning, yik yimubachikina muntu kupan yakupesh? Ov, upanin yakupesh mulong wa kumusangaresh Nzamb? Ap ulondwil kwend chinshakur? Anch mwin kwifukwil usotil chakin kamu kumusangaresh Nzamb, ukuta muchim nakash pa kuziyil ku yijil yawonsu ya Nzamb. Nzamb kaswiridinap kand yakupesh ya annam, pakwez kuziyil kwetu chawiy chom cha usey tukutwisha kumwinkish mudi yakupesh.

Chilakej Chitubabeshina

8. Mulong wak Nzamb wamulika Saul mudi mwant?

⁸ Rusangu ra Mwant Saul ridia mu Bibil rikasikeshidin usey ujim wa kuziyil. Saul wasambisha mudi nyikel mwin kwikepish ni kwitudish, ‘mukemp nakash ku mes kwend amwinend.’ Pakwez, pa kusut kwa chisu, kwitutul ni yitongijok yiyimp yasambisha kutakel yiyul yend. (1 Samwel 10:21, 22; 15:17, NW) Dichuku dimwing, Saul wafanyidina kwas njit nau in Filistin. Samwel wamuleja mwant kumuchingel chakwel eza kupesh yakupesh kudi Yehova ni kumwinkish yiyul yikwau ya kulondul. Pakwez, Samwel kezap swa mudi mwadinga mumuchingejinau, ni antu asambisha kupalangan. Pamanay mwamu, Saul “wapesha yakupesh ya kwosh.” Yehova wakisa chom chinech. Pashikay Samwel, mwant Saul wita dilikishin mulong wa kubwambwil kwend, walond anch chidi mulong Samwel walaba, chawiy ndiy ‘wishindila’ kupesh yakupesh ya kwosh mulong wa kumutudish Yehova. Kudi Mwant Saul, chadinga cha usey kupesh yakupesh yiney kupandakanamu kuziyil ku umutakel wamwinkishau wa kumuchingel Samwel chakwel eza kupesh yakupesh. Samwel wamwela anch: “Wasalang cha usup. Walamangap mbil ya Yehova Nzamb wey yakwinkishay.” Kumubwambwil Yehova kwamushadishina Saul want wend.—1 Samwel 10:8; 13:5-13, NW.

9. Mutapu ik wimekeshay Saul kwikal chilakej cha kumubwambwil Nzamb?

⁹ Ov, mwant Saul wilejina dilejan ku chishiken chinech? Bwat! Kwinyim, Yehova wamwinkisha kand Saul mbil ya kujiyish muchid wa in Amalek, muchid wadinga kwisambishin ni kurish ni Isarel. Saul kafanyidinap kupandish ap yivam yau. Waziyila mu chilik cha “kumubul Amalek kudiosh ku Havila djat ku Shur.” Pezay Samwel kumusankan, mwant wadinga wazandwok lel musangar mulong wa kuwin kwend ni walonda anch: “Yehova akuyukish. Nawanyish kal dizu dia Yehova.” Pakwez, chinyim nich yijil ya patok yatambulau, Saul ni antu end amulama Mwant Agag mwom ni “yivam yiwamp ya amikoku ni angomb a many.” Mwant Saul wilondila pa kubwambwil kwend walond anch: “Antu ayovilang riy yivam yiwamp ya amikoku ni angomb, mulong eza ayipesh kudi Yehova Nzamb wey.”—1 Samwel 15:1-15, NW.

10. Dilejan ik diakanganyay Saul kwilej?

¹⁰ Pa dizu dined, Samwel wamwela Saul anch: “Ov, Yehova ukat kusanger milambu ni yakupesh ya kwosh kupandakanamu kuziyil ku dizu dia Yehova? Tesh! Kuziyil kupandakenamu yakupesh, kutesh kupandakenamu many ma amakwal a amikoku.” (1 Samwel 15:22, NW) Mulong Yehova walonda anch annam inay afanyidin kuyijiyish, kadingap itiyikina mulong wa kuyipesh.

Ziyilany mu Yom Yawonsu

11, 12. (a) Mutapu ik umeningay Yehova usu tusadininga mulong wa kumusangaresh mu kumwifukwil kwetu? (b) Mutapu ik ukutwishay muntu kwidimb nich yitongijok yend amwinend anch ang usadil rusot ra Yehova ukutwish kubwambwil?

¹¹ Yehova usangering kamu nakash pa kuyiman atushalapol end ashinshamena ashich ajijamena kwikalap nchik kuzengol, end alejan lel Want kwikalap nchik kuyidiburil, ni kukumangan ku yikumangan ya Ukristu ap anch arishin tutaku mulong wa kukimb yom ya mwom! Kuziyil kwetu mu milong yiney yijim ya mwom wa mu spiritu wetu kukat kusangaresh muchim wend! Usu wetu wa kumwifukwil Yehova udi wa usey kudi ndiy anch twausal nich rukat. Antu akutwish kudiburil mudimu ukash utusadila, pakwez Nzamb wij yakupesh ya muchim wetu ni ukat kuyivurik.—Mateu 6:4.

¹² Chakwel tumusangaresh Nzamb wetu muchifanyidina, tufanyidin kwikal in kuziyil mu mwom wetu wawonsu. Kangal twidimb nich kutongijok anch tukutwish kwisadil nich want ipetu pantaliken nich yijil ya Nzamb anch tukat kumwifukwil ku mitambu yikwau ya mwom. Chilakej, chitwishikin anch muntu idimba nich kutongijok anch ang ukat kumwifukwil kwa ku mes, ukwiyep dipup anch wasal masandj ap wasal yitil yikwau yijim. Kudi kurumbuk kujim mudi ik!—Galatia 6:7, 8.

13. Anch tudi kuns, mutapu ik ukutwishau kutek mu choziu kumuziyil kwetu Yehova?

¹³ Chawiy lel, tukutwish twiyipul anch, ‘Ov, nikat kumuziyil Yehova mu mijikit yam ya pichuku-pichuku, ap mu milong yimekena mudi yintadina amwinam?’ Yesu walonda anch: “Muntu ukweta kashinsh mu tuyom tukemp, ndiy kand ukweta kashinsh mu yom yivud; ni wakad kutentam mu tuyom tukemp, ndiy kand wakad kutentam mu yom yivud.” (Luka 16:10) Ov, ‘tukat kwend mu kushinshaman mu muchim wetu,’ ap ‘mukach mwa chikumbu chetu,’ kwakadiau antu akwau kutuman? (Kuseng 101:2) Mwaning, pa chisu tudia mu chikumbu chetu, kushinshaman kwetu akutwish kukutek mu choziu. Mu jingand jivud mudia majuku mavud makweta maoridinater, chiswapel nakash kutal yipich yijondila. Mu mivu yasutila kal ey, chading chikasiken kudi muntu kutal yipich mudi yiney ching anch waya mu jindond ja masengan ma masandj chad wayiman. Ov, tukutesh mu kuziyil mazu malonday Yesu anch: “Wawonsu ukutala padiay mband ni kumwovil upwepu, ndiy wasotan kal mu muchim wend”? Mwaning, ov, tukulik ap kutal ku yipich ya masandj? (Mateu 5:28; Yob 31:1, 9, 10; Kuseng 119:37; Jinswir 6:24, 25; Efes 5:3-5) Ov, chidi nchik piur pa maprogram ma televizion malejena chisum? Ov, tumwitiyijin Nzamb wetu, ‘uyikisila antu akatila kubwambul’? (Kuseng 11:5) Ap, chidi nchik piur pa kuna pakad kupep pa chopu kuns? Bibil ufishin nich kukwachik maar, pakwez uyibabeshin kand in Kristu kulik kwikal “aswik a maruvu.”—Titus 2:3; Luka 21:34, 35; 1 Timote 3:3.

14. Mu mitapu ik yikwau tukutwisha kumuziyil Nzamb pa milong ya nfalang?

¹⁴ Mutambu ukwau tufanyidina kubabel udi wa milong ya nfalang. Chilakej, ov, tukutwish kwiyandjik mu chisal cha wij cha kusot kupit swa-swa? Ov, tukat kusot kujiril yijil mulong wa kwiyep kuland yitad? Ap, tukat kuziyil nich muchim wawonsu kwi mbil ya kupan ‘ku yawonsu yau yikusotau: yitad kudi asotila yitad’?—Rom 13:7.

Kuziyil kwa Rukat

15. Ov, mulong wak ukat kuziyil ku yijil ya Yehova?

¹⁵ Kuziyil ku yijil ya Nzamb kuletining yiyukish. Chilakej, anch twalik kuna ruwand, anch twikal nich mashakamin mishitwila, ni kulimish kutumb kwa mash, tukutwish kwiyep ku misong kanang. Chikwau kand, anch twashakam kwambatan nich uyakin wa Bibil mu mitapu yikwau ya mwom, tukutwish kutaninamu mu kutenchik kwa milong ya nfalang, mu mashakamin ma mu chisak, ap ma mu dijuku. (Isay 48:17) Kutaninamu kwinoku kwawonsu kufanyidin kukuman mudi yiyukish yidiokila ku yijil yitentamina ya Nzamb. Pakwez, diyingishin dijim dia kumuziyil Yehova didi anch mulong tumukatin. Tukatap kumusadil Nzamb mulong wa mayingishin ma choy. (Yob 1:9-11; 2:4, 5) Nzamb watwinkisha ukaliweny wa kutond kumuziyil mwawonsu utukatina. Tutondin kumuziyil Yehova mulong tukatin kumusangaresh ni tusotil kusal yom yitentamina.—Rom 6:16, 17; 1 Yohan 5:3.

16, 17. (a) Mutapu ik wamekeshay Yesu anch umukatil Nzamb ni muchim wend wawonsu? (b) Mutapu ik tukutwisha kumwimburij Yesu?

¹⁶ Yesu washa chilakej chiwanyidina cha kumuziyil Yehova nich Kumukat ni muchim wawonsu. (Yohan 8:28, 29) Padingay pansh, Yesu “wileja kuziyil ku yom yikonkilay.” (Hebreu 5:8, 9) Mutapu ik? Yesu “wikepisha amwinend, wikala mwin kuziyil ku rufu, inge ku rufu ra [pa mutond wa mar].” (Filip 2:7, 8) Ap anch Yesu waziyila padingay mwiur, pezay pansh kuziyil kwend akupaka. Tukutwish kwikal nich kashinsh anch Yesu udi uwanyishinau nawamp mu yom yawonsu mulong wa kusadil mudi Mwin Kupesh wa pa Mutu mulong a anamakwend a mu spiritu pamwing ni antu akwau itiyijina.—Hebreu 4:15; 1 Yohan 2:1, 2.

¹⁷ Ov, chidi nchik ku mutambu wetu? Tukutwish kumwimburij Yesu anch twatek pa ndond ya kusambish kuziyil ku rusot ra Nzamb. (1 Pita 2:21) Tukutwish ayinetu kutan musangar anch rukat retu mulong wa Nzamb ratubachik kusal yitinay Yehova, ap pa yisu tudia mu mar ap anch tudi mu kupakiu kwa kusal yom yindjing. (Rom 7:18-20) Chom chinech chitin kand kusot kwetu kuziyil ku umutakel uletinau antu atakedila mu difukwil diakin, ap anch adi akayitil. (Hebreu 13:17) Kuziyil kwetu ku yijil ya Nzamb mu mwom wetu ayinetu kudi kwa usey ku mes kwa Yehova.

18, 19. Kumuziyil kwetu Nzamb ni muchim wawonsu kukwet chibudikin ik?

¹⁸ Ilel, kumuziyil kwetu Yehova kukutwish kwit kand kujijaman mu rupompat mulong wa kulam kushinshaman kwetu. (Midimu 5:29) Chikwau kand, kuziyil kwetu ku chijil cha Yehova cha kulejan kwitin anch tujijamana djat ni kwisudiel kwa ditenchik dined dia yom. (Mateu 24:13, 14; 28:19, 20) Tufanyidin kudandamen kukumangan pamwing ni akadivar netu, twakwachikap nchik nich yipwichik ya mangand minam. Nzamb wetu mwin rukat wij nawamp win kamu usu tusadila mulong wa kumuziyil mu milong yiney. Pakwez, chakwel anch tumuziyila muchifanyidina, tufanyidin kura tutaku nich mujimbu wetu wa yitil ni kukis uyimp ni kukudish rukat ra kusanger kuwap.—Rom 12:9.

¹⁹ Pitumusadidila Yehova nich rukat ni muchim usangera, ‘ndiy ukat kwikal kudi etu mwin kuyifut uruu awiy akata kumusot.’ (Hebreu 11:6) Yakupesh yifanyidina yidi ya usey ni yitiyikina, pakwez kuziyil kwa rukat mulong wa kumusangaresh Yehova mudi muchifanyidina kukat kumusangaresh kamu nakash.—Jinswir 3:1, 2.

Ukwakul Nchik?

• Ov, mulong wak tukutwisha kulond anch tukwet chom cha kumwinkish Yehova?

• Kurumbuk ik kwasalay Saul?

• Mutapu ik ukutwisha kumekesh anch witiyijin anch kuziyil kupandakenamu yakupesh?

• Chom ik chikubachikina kumuziyil Yehova?

[Chipich chidia pa paj wa 22]

Ov, ukat kuziyilang ku yijil ya Nzamb piudia kwa amwiney mu chikumbu chey?