Mareferans ma Mudimu ni Mashakamin ma In Kristu Mukand wa Chikumangan

NGOND WA 11 RUBING RA 4-10

YOM YA USEY YIDIA MU DIZU DIA NZAMB | 1 YOHAN 1-5

“Kangal Wakatany Mangand ap yom yau Yidiamu”

w05-F 1/1 p. 10 par. 13

Tulondulany Chilakej Chashay Yesu

¹³ Antu amwing akutwish kulond anch yom yawonsu yiyipinap kwau mu mangand. Ap mwamu, mangand ni yibachikin yidiamu yikutwish kulet kampuw mulong wa kumusadin Yehova. Kwikil kwau chom chidia mu mangand chikutwisha kutusejish piswimp ni Nzamb. Chawiy, anch twasambish kukat yom yidia mu mangand, ap yom yimekena anch yiyipinap kwau, twitekin mu ubaj. (1 Timote 6:9, 10) Chikwau kand, yom yivud yidia mu mangand yidi kamu yiyimp ni yikutwish kutudimb. Anch twatal mafilim ap maprogram ma televizion makasikeshina chisum, kukat yom ya ku mujimbu ap yom ya masandj, yom yiney yikutwish kumekan anch yiwapin kwau ni tukutwish kuyikat. Anch twabombakan nakash nau antu akatina kwau kuwapish mwom yau ap kwipan mu yom ya kwisak, tukutwish niyetu kutek yom yiney pa ndond ya kusambish.—Mateu 6:24; 1 Korint 15:33.

wp13 1/8 paj 27 par. 18

Tonginany pa Mutapu Ukutwisha Kwikal Untu Wen

¹⁸ Chom chikwau chikutwisha kutukwash kurish nich “yom . . . yidia mu mangand” chidi kulam mu manangu mazu minam ma Yohan mapepilau kudi Nzamb anch: “Mangand mayil ni kujiy pamwing ni yom yawonsu yikwetau nich antu ris, pakwez muntu mwawonsu ukata kusal rusot ra Nzamb ukez kupand chikupu.” (1 Yoh. 2:17) Ditenchik dia Satan dimeken mudi dikez kudandamen kwikalaku kamu ap anch didi diakin. Pakwez, dikez kusheshik dichuku dimwing. Kwikil chom chipaninau kudi mangand ma Satan chikutwisha kwikalaku chikupu. Kuvurik uyakin winou kukez kutukwash chakwel twipuka kuwil mu yoziu ya Djabul.   

Kukimbijol Mapit ma mu Spiritu

wp13 1/9 paj 10 par. 14

Yivurish ya Yehova Yidi Yakin

¹⁴ Mu Mifund ya Grek ya win Kristu mwizwil yivurish yitukwashina kumekesh rukat kudi umwing ni mukwau. Yesu walonda anch chijil chijim cha kaad chidi anch “Mukata mukwen mudi muwikatila ey amwiney.” (Mt. 22:39) Chilik chimwing, Jakobu mwanamakwend a Yesu watazuka rukat anch: “chijil cha mu Want wa Nzamb.” (Jk. 2:8) Chilik chimwing, kambuy Yohan wafunda anch: ‘Arund nam, kinikufundidilanyap chijil chisu, pakwez chidi chijil chikur chiwateshanya kal kudiokal ku disambishil.’ (1 Yoh. 2:7, 8) Ov, chom ik chisambinay Yohan anch “chijil chikur” ni ‘chijil chisu’? Ndiy wisambina piur pa chijil cha kukatijan. Chading “chikur” mulong Yesu wachipana pasutin kal makum ma mivu, ‘kudiosh kwinsambishil.’ Pakwez chikala ‘chisu’ mulong chita kwipan kwa rukat, kwadinga kuswiridinau in kwilej padingau ni kurish nich mikadil yisu. Mudi in kwilej a Yesu, ov, tufanyidinap kwetu kusanger kubabesh kutukwashina kwipuk kukudish chitongijok cha choy cha mangand minam, chikutwisha kushadish rukat retu kudi amutej netu?

it-2-F p. 491 par. 1

Dilikishin

Chiwapin kumwit Yehova mu malembil dilikishin mulong wa antu akwau, ap mulong wa chikumangen chakabuj. Mwawiy mwasalay Moses mulong wa muchid wa Isarel pamulejay Yehova chitil cha muchid wakabuj ni kumwit dilikishin diend, ni Yehova wamutesha nawamp. (Kuch 14:19, 20) Chilik chimwing, pa chisu cha kupan tempel, Salomon wamulembila Yehova anch ayilikishina in Isarel pakusalau chitil ni kuchirik kand kudiokal mwi njil yau yiyimp. (1Ant 8:30, 33-40, 46-52) Esidera wakwasha mulong wa kulejan patok yitil ya in Yuda ading mu jindond ja kulemp. Malembil mend madiokala ku muchim ni chiyul chend yayikwasha antu kukwat mipak mulong wa kwit dilikishin dia Yehova. (Esi 9:13–10:4, 10-19, 44) Jakobu wamukasikesha muntu uyedina mu spiritu kuyitazuk amakurump a chikumangen mulong wa kumulembil, ni wawejinaku anch “anch wasala yitil, akez kumulikishin.” (Jk 5:14-16) Pakwez, kuding “chitil chimwing chikata kushikijan ku rufu,” chidi chitil pantaliken ni spiritu utumbila, kwikal ni chaku cha kusal chitil kwa kwikatin chakad kulikishinau. Mwin Kristu kafanyidinap kulembil mulong wa antu asadina yitil mu mutapu winou.—1Yh 5:16; Mt 12:31; Heb 10:26, 27; tal ESPRIT; PÉCHÉ.

NGOND WA 11 RUBING RA 11-17

YOM YA USEY YIDIA MU DIZU DIA NZAMB | 2 YOHAN 1–JUD

“Tufanyidin Kurish Mulong wa Kushal mu Uyakin”

w04-F 15/9 p. 11-12 par. 8-9

“Dandamenany Kwikal ni Ukash mwi Nsalejetu”

⁸ Tuvuramedinap yom yitonginay Satan mulong Mifund yitulejin mipit yend ya pa dishin. (2 Korint 2:11) Kudi muntu utentamina Job, Djabul wamuletina milong yikash ya nfalang, rufu ra akatish nend, rupompat ra mu dijuku, mar ma ku mujimbu ni kunyinyit kuyimp kudiokila kudi arund a makasu. Job waziya nakash ni wamana anch Nzamb wamulik kal. (Job 10:1, 2) Ap anch Satan kakutwishap kutuletin niyetu milong mudi yiney nlel, yom mudi yiney yikash yikat kuyiziyish in Kristu avud ni Djabul ukutwish kuyisadin mulong wa uwamp wend.

⁹ Ubaj wa mu spiritu uvudin nakash machuku minam ma nsudiel. Tushich mu mangand mutekinau antu yom ya ku mujimbu pa ndond ya kusambish kusutamu ntong ja mu spiritu. Jinsangu ja ku matelevizion, ap mu majurnal jikat kumekesh kulalijan kwa antu akad kwatijan mudi kukwetap kwau mulong, kukwashin kwikal ni musangar. Antu avud ikadin kal “in kukat yom ya kwisangarish ayinau kupandakan kumukat Nzamb.” (2 Timote 3:1-5) Mutapu winou wa kutong ukat kutek mu ubaj kwisikan kwetu kwa mu spiritu, chawiy chitina komb ‘kurish nakash mulong wa ritiy.’—Jud 3.

Kukimbijol Mapit ma mu Spiritu

it-1-F p. 879 par. 1

Misambu ya Rukat

Bibil karumburilap kamu chadinga misambu yiney ya rukat ni kalejenap kamu mutapu wayasadikanga. (Jud 12) Nsalejetu Yesu kristu ap atwimbuy end kapanap mbil ya kusal misambu yiney, ni chimeken anch katushindidinap kuyisal ap kuyisal chisu chawonsu. Antu amwing akat kutong anch yading misambu yasalangau in Kristu ampich ni ayitazukang anamakwau atuzwendj. Awonsu pamwing, an anshon, adiaafu, ampich ni antu akad kwikal ni nfalang adiangang yakudia yiwamp mu ukadivar wau.

it-2-F p. 805 par. 3

Diyal

Dizu dikwau dia Grek, spi·lasʹ, adisadin kand mulong wa kurumburil diyal ap mayal madia kwinshin kwa mem. Jud wasadina chilakej chinech mulong wa kumekesh antu andama mu chikumangen cha win Kristu ni yibachikin yiyimp. Mudi mudia anch mayal madia kwinshin kwa mem mading ma ubaj mulong wa bato, chilik chimwing antu inay ading kamu a ubaj kudi antu akwau a mu chikumangen. Walonda piur pa amakundj inay anch: ‘Antu inay adi mudi mayal madia kwinshin kwa mem ku misambu yen ya rukat.’—Jud 12.

wp17.1 paj 12 par. 1

“Wamusangaresha Nzamb”

Wisu wading uprofet wa Enok? Wawiy ou: ‘Teshany, Yehova wezin nau angel end a mwiur atumbila tunan ni tunan. Chakwel ayirumburish antu awonsu, mulong wa kuyifish nich in kumubwambwil ndiy mulong wa yisalijok yau yiyimp, ni mulong wa mazu ma dichim wakad kalimish mamulondau ndiy!’ (Jud 14, 15) Enok wading ni ritiy rikash anch yom yiney yikusadik chakin. Kudi ndiy chading mudi Nzamb wasadin kal yom yilondinay mu uprofet winou. Chinech chawiy chilakej cha uprofet uvud walondulaku. Chitongijok chawiy ech: Muprofet ulondin chom chikusadika kamu chakin chadi uchilondin mudi chasadika kal pakur!—Isay 46:10.

wp17.1 paj 12 par. 3

“Wamusangaresha Nzamb”

Ritiy ra Enok rikutwish kutubachik kwiyipul ayinetu pitumena mangand tushicha mudi mumamenay Nzamb. Kubabesh kwalejanay Enok nich kutakaman kudandamedin; kulejan kubabesh kusadikin nlel mudi mukwasadika mu machuku ma Enok. Kukwatijan ni kubabesh kwa Enok, Yehova waleta Mabeb majim mulong wa mangand makad kumwijik Nzamb mu machuku ma Nowa. Pakwez kusheshik kwinoku kwasha chilakej mulong wa kusheshik kujim kukusadika kurutu oku. (Mateu 24:38, 39; 2 Pita 2:4-6) Nlel, wirijekin pamwing ni yisak yend ya angel atumbila mulong wa kuletish dirumburish ditentamina mulong wa mangand mayimp. Etu awonsu tufanyidin kutek kubabesh kwa Enok mu muchim ni kulejan kubabesh kwinoku kudi antu akwau. Antu a mu dijuku dietu ni arund netu akutwish kwikal kulemp niyetwetu. Tukutwish kwiyov anch tudi ayinetu mu yisu mudi yiney. Pakwez Yehova kamulikap Enok; kakutwishap kuyilik atushalapol end ashinshamena nlel!

NGOND WA 11 RUBING RA 18-24

YOM YA USEY YIDIA MU DIZU DIA NZAMB | KUJINGUNIK 1-3

“Nij Yisalijok yey Yawonsu”

wp12 1/10 paj 20 par. 8

Ov, Muchim wa Mutapu Ik Ukata Kumekeshany?

⁸ Chakwel twipuka mwiku winou, tukutwish kuvurik yalejanay Yesu mu Bibil anch wading ni “ukwatil atutumbu sambwad mu chikas chend cha katatuku.” “Atutumbu” arumburikin atulam azizidilau many ni atulam awonsu adia mu yikumangen. Yesu ukutwish kuyitakel “atutumbu” mu chikas chend mu mutapu wawonsu usotinay. (Kuj. 1:16, 20) Chawiy lel, mudi Mutu wa chikumangen cha in Kristu, Yesu uyitakedil yisak yawonsu ya amakurump. Anch muntu kanang mu chisak chinech uswiridin ukwash, Muntu ukweta “mes mazazin mudi kasu” ukez kuman ni kusal pa chisu chifanyidina ni mu mutapu Wend. (Kuj. 1:14) Chawiy lel, tufanyidin kuyilimish nakash antu atondau kudi spiritu utumbila, mulong Paul wafunda anch: “Ziyilany ni kwikepish kudi in kutakel en. Awiy akat kukulamany, chad awiy akez kulejan rusangu ra midimu yau kudi Nzamb. Yiziyilany chakwel asala midimu yau nich musangar, anch bwat, akwov ushon. Chad mwamu chikukukwashany chom ik?”—Heb. 13:17.

wp12 1/4 paj 30-31 par. 11

Yehova Utulamin Mulong wa Dipandish

¹¹ Mu chishimushimu chafundau mu Kujingunik shapitre wa 2 ni wa 3, Yesu Kristu watumbishau ukat kuyishinshikin yikumangan sambwad ya mu Aziy Mukemp. Chishimushimu chinech chimekeshin anch Kristu umen yom kangal kusu mu uvud way pakwez umen kand mikadil ya muntu ni muntu. Yisu yimwing, ndiy ukat kujimbul majin ma antu, kupwa upanin chiyul chifanyidina kudi muntu ni muntu. Ov, chinech chimekeshin ik? Mu kuwanyin kwa chishimushimu, yikumangen sambwad yimekeshin in Kristu azizidilau many kupwa kwa muvu wa 1914, ni chiyul chapanau ku yikumangen sambwad achifunda mulong wa yikumangen yawonsu ya antu a Nzamb yidiaku nlel unou pa mangand mawonsu. Chawiy lel, chitwishikin kulond anch Yehova ukat kuyitakel antwend kusutil Mwanend. Ov, mutapu ik tukutwisha kutaninamu mu umutakel winou?

w01-F 15/1 p. 20-21 par. 20

Twendany Pamwing ni Dirijek dia Yehova

²⁰ Mulong wa kudandamen kwend mu umwing ni dirijek dia Yehova diyila kurutu, chifanyidin kwijik chisend cha Yesu Kristu chamwinkau kudi Nzamb mudi ‘mutu wa chikumangen.’ (Efes 5:22, 23) Pakwez, tutalany kand yom yasambelau kulond kudi Yehova mu Isay 55:4, anch: ‘Tal kwa! Namupana kal mudi kaman ku yisak ya michid, mudi ntakel ni kalal ku yisak ya michid.’ Yesu wij kamu mutapu wa kutakel. Wij kand amikoku end ni yisalijok yau. Chawiy, pasopay yikumangen sambwad ya mu Aziy Mukemp, walonda tupamp tutan anch: “Nij yisalijok yey yawonsu.” (Kujingunik 2:2, 19; 3:1, 8, 15) Mudi Tatukwend Yehova, Yesu niyend wij maswir metu. Kurutu kwa kulet Malembil ma Chilakej, Yesu walonda anch: “Tatukwen wij kal yom yiuswiridinany piwakadiany kal kumwipulany.”—Mateu 6:8-13.

Kukimbijol Mapit ma mu Spiritu

kr paj 226-227 par. 10

Want wa Nzamb Uyisheshin Akankuny Au

¹⁰ Kulet Dirumburish. Akankuny a Want wa Nzamb awonsu akez kuyishindil chakwel amana ni mes mau yinship yikeza kupandikesh wom wau. Yesu walonda anch: “Akez kamuman Mwan wa muntu wezil mu madj nich ukash ujim ni uyaj.” (Mar. 13:26) Kumekan kwinoku kushimokishena kwa uyaj kukez kumekesh kwez kwa Yesu mulong wa kuyirumburish antu. Mu chikunku chikwau cha uprofet winou wisambidina piur pa machuku mansudiel, Yesu walejana kachom pa kachom piur pa dirumburish dikezay kulet pa chisu chinicha. Tutanin rusangu riner mu chishimu cha amikoku ni ampemb. (Tang Mateu 25:31-33, 46.) Antu ashinshamedina ku Want wa Nzamb akez kuyirumburish mudi “amikoku” ni akez ‘kuzambul mes [mau],’ mulong akwijik anch “dipandish [diau] diez kal piswimp.” (Luka 21:28) Pakwez, akankuny a Want akez kuyitek ku mutambu wa “ampemb” ni akez “kudil,” mulong akwijik anch ‘kusheshik kwa chikupu’ kuyichingedin.—Mat. 24:30; Kuj. 1:7.

wp09 1/1 paj 31 par. 1

Manans Majim ma Mukand wa Kujingunik—Chikunku cha 1

2:7—“Paradis wa Nzamb” chom ik? Mulong mazu minam ayilejinam in Kristu azizidilau many, komb paradis ulondilau pinap udi ndond ya mwiur yifanikeshinau nich paradis—ku mes kamu kwa Nzamb amwinend. Azizidilau many ashinshamena akutambul difut dia kudia “ku mutond wa mwom.” Akez kutambul mwom wakad kufang.—1 Kor. 15:53.

NGOND WA 11 RUBING RA 25–1 NGOND WA 12

YOM YA USEY YIDIA MU DIZU DIA NZAMB | KUJINGUNIK 4-6

“Kukandam kwa Antu Anying pa Atubar”

wp17.3-F p. 4 par. 3

In Kwendish Atubar adi Anany?

Nany udia mwin kwendish kabar mutok? Mulong wa kumwijik, chakul chidi mu mukand wa Bibil utazukinau anch Kujingunik, mulondinau anch mwin kwendish winou wa mwiur amutazukina kand anch “Dizu dia Nzamb.” (Kujingunik 19:11-13) Chijikeken chinech, chimutadin Yesu Kristu mulong ukat kusal mudi mwin kumulondin Nzamb. (Yohan 1:1, 14) Chikwau kand, mwin kwendish winou amutazukin anch “Mwant wa ant, ni Nsalejau wa ansalejau” ni amulejen anch udi ‘Ushinshamena ni Wakin.’ (Kujingunik 19:16) Chimeken patok anch, ukwet ulabu wa kusal mudi mwant mwin kurish, ni kakatap kusadin usu wend mu mutapu uyimp ap wa kuburen win kashinsh. Pakwez, chinech chilangwishin yipul yikwau.

wp17.3-F p. 4 par. 5

In Kwendish Atubar adi Anany?

Chisu ik chasambishau in kwendish atubar weny wau? Tal anch mwin kwendish kabar wa kusambish, Yesu, wasambisha weny wend patambulay chibangul. (Kujingunik 6:2) Chisu ik chamudjikau Yesu chibangul mudi Mwant mwiur? Chadingap chisu chachirikay mwiur kupwa kwa rufu rend. Bibil ulejen anch chisu cha kuchingel chasambisha chad. (Hebereu 10:12, 13) Yesu wayileja in kwilejend mutapu wa kujingunin disudiel dia chisu chinech cha kuchingel ni disambishil dia winyikel wend mwiur. Walonda anch kwinsambishil kwa winyikel wend, yom mu mangand yikuyip nakash. Kukez kwikal njit, kamungun ni yipupu ya mayej. (Mateu 24:3, 7; Luka 21:10, 11) Chisu chikemp kupwa kwa Njit ja 1 ja Mangand Mawonsu kusambish mu muvu wa 1914, chamekana kamu patok anch muchid wa an a antu wandama mu chirungu chimwing cha kanrumbangesh nakash chitazukinay Bibil anch “machuku ma kwinsudiel.”—2 Timote 3:1-5.

wp17.3-F p. 5 par. 2

In Kwendish Atubar adi Anany?

Kabar winou umekeshin njit. Tal anch udioshin chisambu pa divu diawonsu, kadiap ching kusu chisambu cha muchid kanang. Mu muvu wa 1914, kapamp ka kusambish mu rusangu ra antu, njit jasambisha pa mangand mawonsu. Kupwa jikwau ja pa mangand mawonsu niyau jasambisha, ni jashesha antu avud nakash. Kukimbijol kumwing kumekeshin anch antu afa kwi njit ni ku matend ma njit kudiosh muvu wa 1914 adi uvud wa antu mamiliyon 100 ni kusut! Chikwau kand, antu avud nakash ashala ni ulim mulong wa njit jinej.

wp17.3-F p. 5 par. 4-5

In Kwendish Atubar adi Anany?

“Natala, chad naman kabar mujal. Mwin kukandamap wading ukwet chilik cha kulim mu chikas chend. Natesha mudi dizu didiokil mukach mwa yitang yinying yikweta mwom, dialond anch: “Kilo umwing wa tidiku diawiy difut dia mudimu wa dichuku diakabuj, akilo asatu a masangu diawiy difut dia mudimu wa dichuku diakabuj. Chawiy kangal wayipish many ni maar ma nviny.’”—Kujingunik 6:5, 6.

Kabar winou umekeshin kamungun. Maverse minam maletin kovikesh kwa chifanakesh kwa kukep kwa yakudia pimalondina anch kilo umwing wa tidiku diawiy difut dia mudimu wa dichuku dia kabuj, mudi muchading mu mivu chitot ya kusambish! (Mateu 20:2) Nfalang jawiy jimwing jakwasha kand kuland akilo 3 a masangu, mulong tidiku wading muwamp kusutamu masangu. Mutapu ik wafanyinay muntu kudish dijuku diakabuj mu yishiken mudi yiney? Ayibabesha antu anch kwikal ni ushish wa kulam nfalang, ni mu yom yitadina yakudia ya dichuku diawonsu, yifanikeshinau pinap ni yakudia yadangangau pa chisu chinicha, mudi many ni maar ma nviny.

wp17.3-F p. 5 par. 8-10

In Kwendish Atubar adi Anany?

Mwin kwendish kabar wa kanying umekeshin rufu ridiokila ku yipupu ni ku yom yikwau. Chisu chikemp kupwa kwa muvu wa 1914, grippe espagnole wajipa makum ma miliyom ma antu. Chimeken anch antu mamiliyon 500 akwachika ni mayej minam, kwawiy kulond anch muntu 1 pa antu 3 pa chisu chinicha!

Pakwez grippe espagnole diading kwau disambishil. In kukimbijol amen anch mpalend wajipa antu yitot ya mamiliyon mu mivu yitot makum maad. Kushik ni nlel, antu avud akat kufa mulong wa sida, chimpim ni malaria ni yom yiney yidandamedin ap anch kukimbijol kwa chimwingang kudandamedin kuya kurutu.

Yibudikin yidi kwau ching yimwing, mulong yitwadin ching ku rufu—chikala kwi njit, kamungun ap ku yipupu. Nzay yikat kukumangej antu avud pakad kulet ruchingej.

Kukimbijol Mapit ma mu Spiritu

re-F p. 76-77 par. 8

Uyaj wa Ditand dia Mwiur dia Yehova

⁸ Yohan wading wij anch atondang in kupesh mulong wa kusal mu dizang dia pasak. Chawiy wakashimuka mulong wa yom yamanay parumburilay anch: “Ditand dined ading adinyingumukin kudi matand makwau makum maad ni manying, chad pa matand minam pading pashich amakurump makum maad ni anying. Ading adjit yidjal yitok, adjit kand yibangul ya utad wa or ku mitu yau.” (Kujingunik 4:4) Inge, pa ndond pa in kupesh wamana amakurump 24 ashich pa matand ni adjit yibangul mudi ant. Amakurump inay adi anany? Adi antu azizidilau many a mu chikumangen cha win Kristu, ayivumbula ni akwet ndond mwiur yayishilawamu kudi Yehova. Mutapu ik twija mwamu?

re-F p. 80 par. 19

Uyaj wa Ditand dia Mwiur dia Yehova

¹⁹ Yitang yiney yimekeshin ik? Chishimushimu cha muprofet mukwau, Ezekiel, chitukwashin kujingunin chom chinech. Ezekiel wamumana Yehova udi mu ditemb dia mwiur, ditemb dined ading adipwitin kudi yitang yikweta mwom, chad yitang yiney yifanaken ni yitang yamanay Yohan. (Ezekiel 1:5-11, 22-28) Kupwa, Ezekiel wamana kand ditemb dikwet yitang ni akat kudipwit kudi yitang yikweta mwom. Pakwez, pinap walonda anch yitang yikweta mwom yiney yidi mudi asherub. (Ezekiel 10:9-15) Yitang yinying yikweta mwom yamanay Yohan yifanyidin kumekesh asherub avud a Nzamb—yitang yikweta ndond ya piur mu dirijek diend dia angel. Yohan kafanyinap kukashimuk pakuman asherub inay adi kamu piswimp nakash ni Yehova amwinend, mulong mu dizang dia pakur mwading asherub aad a utad wa or atekau piur pa mufunyik wa mushet wa mansuk, wadinga umekeshina ditand dia Yehova. Pakach pa asherub inay pawiy padiokalang dizu dia Yehova mulong wa kupan yijil ku muchid.—Kubudik 25:22; Kuseng 80:1.

cf-F p. 36 par. 5-6

“Tal! Ntambu wa muchid wa Yuda”

⁵ Ntambu akat kumufanakesh yisu yivud ni kutakaman. Ov, wamumanap kal ikwal a ntambu mes ni mes? Anch chom chinech chakushikenap kal, pamwing ap chasadika chisu chadingay ntambu mu kachikumbu ka kumulamin. Ap mwamu, kumanijan ni ntambu kukutwish kulet wom. Chikasiken kutong anch nnam winou wa chidiany ukutwisha kukutal pakad kukudiosh mes, achin mulong wa chom chin chawonsu chikutwisha kumwovish wom. Bibil ulondin anch “ntambu ujijamem kuyipandakan annam akwau, kakuchirikangip chinshikanyim bwat.” (Jinswir 30:30) Kwawiy kwinoku kutakaman kukwetay Kristu.

⁶ Yesu wamekesha kutakaman mudi kwa ntambu mu mitapu yisatu: mu kwiman dang mulong wa uyakin, mu kukasikeshin kutentam ni kurish ni rupompat. Anch twashinshikin yom yiney, niyetu tukutwish kuman anch kusutil chilakej chend tukutwish kwikal ni kutakaman, twikala antu avadika ni mwikadil winou ap bwat.