Mareferans ma Mudimu ni Mashakamin ma In Kristu Mukand wa Chikumangan

NGOND WA 12 RUBING RA 2-8

YOM YA USEY YIDIA MU DIZU DIA NZAMB | KUJINGUNIK 7-9

“Yehova Uyukishin Chisak Chijim Chakad Kutwish Kuchind”

it-1-F p. 1014 par 2

Chisak Chijim

Chinech chilangwishin chipul ech: Anch mu “chisak chijim” mudi antu akupanda ni kushakam pa divu, chad mutapu mulondinau anch ‘iminy kurutu kwa ditand dia Nzamb ni kwa Mwan a Mukoku’? (Kuj 7:9) Mu Bibil, kulond anch muntu kanang ap chisak cha antu ‘chiminy kurutu’ kumekeshin kwikal witiyinau ni kwitapil dilau dia muntu wimanyidinay kurutu. (Kus 1:5; 5:5; Jnsw 22:29, Os; Lk 1:19) Chawiy, mu mashapitre ma kwinyim ma Kujingunik alondin anch ‘ant a pa mangand, ni in kutakel, ni atulal a njit, ni ampich, ni in dikand, pamwing ni antu akwau awonsu, aswik ap antu ipau,’ akat kusal usu wa kujingam “ku mes mendendiy ushicha pa ditand, ni ku ujim wa Mwan a Mukoku! Mulong dichuku dijim dia ujim wau diashikang kal, ov, nany ukutwisha kushal mwom?” (Kuj 6:15-17; ilikej ni Lk 21:36.) Komb, choviken anch “chisak chijim” chikwet antu apanda pa chisu chinacha cha ujim ni atwisha ‘kwiman’ kwawiy kulond anch ayitiya kudi Nzamb ni Mwan a Mukoku.

it-2-F p. 1104 par. 4

Mar

Mivu makum masatu kupwa kwa kusheshik kwa Yerusalem, kambuy Yohan palonday piur pa chisak chijim cha antu adiokila ku michid yawonsu, tubil twawonsu ni ku antu awonsu walonda anch: “Adi antu adiokila mu mar makash mapandakena.” (Kuj 7:13, 14) Mulong chisak chijim chinech ‘chidiokil ku mar makash’ chinech chimekeshin anch apanda. Chinech chikwatijadin ni kulond kufanikena kudia mu Midimu 7:9, 10: “Pakwez Nzamb wading nend [Josef], wamuchidija mu mar mend mawonsu.” Josef amupandisha ku mar mend mawonsu kadiap mulong watwisha kumajijamen pakwez wapanda ku yom yikash yamushikena.

it-1-F p. 1014 par. 1

Chisak Chijim

Kuyijingunin. Chom chikwashina kujingunin “chisak chijim” chidi mu yom yilondinau piur pach mu Kuningunik shapitre 7 ni mu maverse makwau mafanikena. Kujingunik 7:15-17 ulondin anch Nzamb ‘ukuyadin mwinkand wend,’ ni ukuyitwal ku “misul ya mem ma mwom,” ni Nzamb ukukusol “mansoj ku mes mau.” Mu Kujingunik 21:2-4 mudi mazu mamwing mafanikena: ‘Mwinkand wa Nzamb ukwikal ni antu,’ ‘ukukusol mansoj mawonsu ku mes mau’ ni ‘rufu kirikez kikalakup kand.’ Chishimushimu chinech chiyitadinap antu adia mwiur, mulong ‘Yerusalem Musu udiokil’ mwiur ni wezin pansh padia antu.

Kukimbijol Mapit ma mu Spiritu

re-F p. 115 par. 4

Kumutek Isarel wa Nzamb Chijingidij

⁴ Chakin kamu anch, angel inay anying amekeshin yisak yinying ya angel yikatay Yehova kusadin mulong wa kulam dirumburish kushik ni pa chisu chatekay kal. Anch angel inay alikaku rinkind wa ujim wa Nzamb chakwel apepa kwiyand, kurul, kwingangel ni kurand, disheshik dikwikal dikash. Disheshik dined dikufanakan ni dia pa chisu chasadinay Yehova rinkind munying mulong wa kuyipalangesh ni kuyishesh in Elam a pasak, pakwez mu chilik chijim nakash. (Jeremiy 49:36-38) Ukwikal rinkind mukash nakash usutinamu “rinkind” wasadinay Yehova mulong wa kushesh muchid wa in Amon. (Amos 1:13-15) Kwikil chikunku ap chimwing cha dirijek dia pansh dia Satan chikupanda pa dichuku dia ujim wa Yehova, pakumekeshay ukaleng wend mu mivu chikupu yilondwilaku.—Kuseng 83:15, 18; Isay 29:5, 6.

it-1-F p. 12

Abadon

Abadon, ap mwangel ulamina nfungul wa dibuku diakad musul—udi nany?

Pakwez, mu Kujingunik 9:11, dizu “Abadon” adisadidin mudi dijin dia “mwangel ulamina nfungul wa dibuku diakad musul.” Dizu dia mutapu umwing ni dined dia Grek didi Apolyon dirumburikin “Mwin kusheshan.” Mu mivu 1900, antu amwing asala usu wa kumekesh anch verse winou udi uprofet uyitadina antu amwing mudi Nyikel Vespasien, Mahomet, ap kand Napoléon, ni amana anch mwangel winou udi wa “satan.” Pakwez, chifanyidin kwijik anch Kujingunik 20:1-3 ulejen anch mwangel ukweta “nfungul wa dibuku diakad musul” amumekeshin mudi katum wa Nzamb udiokila mwiur, ni pa ndond pa kwikal mwangel wa “satan” ukat kumukas ni kumudjubwil Satan win mu dibuk diakad musul. Palondinay piur pa Kujingunik 9:11, The Interpreter’s Bible ulondin anch: “Abadon kadiap mwangel wa Satan pakwez wa Nzamb, uwanyishin mudimu wend wa kusheshan kukwatijan ni mbil ja Nzamb.”

Mu maverse ma mifund ya Hebereu twashinshikina kal kwiur oku, ʼavad·dohnʹ umekeshin chakin kamu Sheol ni rufu. Mu Kujingunik 1:18, Kristu Yesu ulondin anch: ‘Nidi mwom chikupu ni chikupu! Nikwet anfungul a rufu ni a Nzay.’ Usu ukwetay piur pa dibuku diakad musul aulejen mu Luka 8:31. Hebereu 2:14 ulejen anch ukwet usu wa kushesh, ni usu wa kumujiyish kand Satan, verse winou ulondin anch Yesu wikala muntu wa mujimbu ni wa mash chakwel “ku rufu rend ukumujiyish [Djabul] ukweta ukash wa kulet rufu.” Mu Kujingunik 19:11-16, Yesu amumekeshin patok mudi Mwin kusheshan watonday Nzamb ap mwin kuwanyish dirumburish dia Nzamb.—Tal APOLLYÔN.

NGOND WA 12 RUBING RA 9-15

YOM YA USEY YIDIA MU DIZU DIA NZAMB | KUJINGUNIK 10-12

“Atuman Aad” Ayijipa ni Ayichirisha Kand ku Mwom

w14-F 15/11 p. 30

Yipul ya in Kutang

Anany adia atuman aad alejenau mu Kujingunik shapitre 11?

Kujingunik 11:3 ulondin piur pa atuman aad afanyina kulond uprofet mu machuku 1260. Rusangu rilondin anch nnam wa chidiany wafanyina “kuyipandakan, chad ukez kuyijp.” Pakwez kupwa kwa “machuku masatu ni chikunku,” atuman inay aad afanyina kuvumbuk ni chom chinech chafanyina kuyishimokish antu awonsu in kutal.—Kuj 11:7, 11.

Atuman inay aad adi anany? Yom yisambidinau mu rusangu riner yitukwashin kuyijingunin. Chakusambish, atulejin anch ayifanakeshin ni “mitond ya mpach yaad ni mend yaad ya kasu.” (Kuj 11:4) Chinech chituvurishin mend ya kasu ni mitond ya mpach yaad yisambidinau mu Zakariy. Mitond yiney ya mpach yimekeshin ‘antu aad azizidilau many,’ charumburik anch Nyikel Zorobabel ni Mwin Kupesh Mujim Joshua, ‘adia kurutu kwa Nsalejetu wa divu diawonsu.’ (Zak. 4:1-3, 14) Chakaad, alejen anch atuman inay aad asadin yilay mudi yasalay Moses ni Eliya.—Ilikej Kujingunik 11:5, 6 ni Kuchind Michid 16:1-7, 28-35 ni 1 Ant 17:1; 18:41-45.

Chom ik chidia mu umwing pakach pa maverse ma Kujingunik ni ma Zakariy? Ku mitambu yawonsu, alejen piur pa antu azizidilany a Nzamb atakela mudimu wend pa chisu cha mar nakash. Chawiy mu kuwanyin kwa Kujingunik shapitre 11, antu alejana mu “yizanizan” mu mivu yisatu ni chikunku adi akadivar azizidilau many atakela mudimu pa chisu chimikau Want wa Nzamb mwiur mu muvu wa 1914.

Kupwa kwa kulejan mu yizanizan, azizidilau many inay ayijipa mu kulond kwa chifanikesh chisu chiyitekau mu rukan mu chisu chikemp, ap anch mu machuku masatu ni chikunku. Mu kuman kwa akankuny a antu a Nzamb, mudimu wau aujipa ni akankuny inay asangara nakash.—Kuj. 11:8-10.

Pakwez, kukwatijan ni mazu ma uprofet, atuman inay aad avumbuka kwinsudiel kwa machuku masatu ni chikunku. Azizidilau many ayibudisha mu rukan ni awonsu ading ashinshamena atambula chisend cha pakampwil kudi Nzamb kusutil Nsalejau, Yesu Kristu. Mu muvu wa 1919 ikala pakach pa antu atondau mulong wa kusal mudi ‘kashalapol ushinshamena ni kubabal’ chakwel awanyisha maswir ma mu spiritu ma antu a Nzamb mu machuku ma nsudiel.—Mat. 24:45-47; Kuj. 11:11, 12.

Chom chisangareshina nakash chidi anch Kujingunik 11:1, 2 ukwatikeshin yinship yiney ni chisu chapimau ap kusop tempel wa mu spiritu. Malakiy shapitre wa 3 ulondin niyend piur pa kusop mudi kwinoku kwa tempel wa mu spiritu kwambakedina ni chisu cha kutokish. (Mal. 3:1-4) Kusop ni kutokish kwinoku kwesenda mivu yinch? Kwasambisha mu muvu wa 1914 kushik kwinsambishil kwa muvu wa 1919. Chirung chinech chasala machuku 1260 (ap angond 42) ni machuku masatu ni chikunku yisambidinau mu Kujingunik shapitre 11.

Tukwet musangar nakash mulong Yehova watenchika mudimu winou wa kutokish mulong wa kuyishitwish antu end asadina midimu yiwamp! (Titus 2:14) Chikwau kand, tusangeridin nakash chilakej chatushilau atuman inay ashinshamena atakela mudimu wa Nzamb pa chisu cha mar nakash ni imekesha kwikal atuman aad a chifanakesh.

Kukimbijol Mapit ma mu Spiritu

it-2-F p. 821 par. 1

Muvungur

Kusadin kwa Chifanakesh. Dizu “muvungur” akat kudisadin tupamp tuvud mu mutapu wa chifanakesh mu Bibil. Ezekiel ni Zakariy amana muvungur umwing ufundinau mutambu ni mutambu. Mulong yisu yivud afundang kwau mutambu umwing, kufund mitambu yawonsu yaad kwading kumekeshin kulim, kujimb ni win kashinsh wa dirumburish difundinau mu mivungur yiney. (Eze 2:9–3:3; Zak 5:1-4) Mu chishimushimu chidia mu Kujingunik, muntu udia pa ditand wading ukwet mu chikas chend cha katatuku muvungur ukweta yijingidij sambwad yading yikangeshina kuman yom yifundilawamu kushik ni pakuburilay Mwan a Mukoku wa Nzamb. (Kuj 5:1, 12; 6:1, 12-14) Kupwa mu chishimushimu chinech, Yohan amwinend amwinkisha muvungur ni amuleja kuudia. Muvungur winou wading utadin kudi Yohan kupwa warila nakash. Mulong muvungur wading wa kuburil ni wakad kutek chijingidij, chimekeshin anch wading uswapel kuutesh. Wading ‘utadin’ kudi Yohan mulong wa uruu wadingamu pakwez wading ukwet yom yiridina yafanyinay kulejan, mudi mutapu wamulejau kusal mwamu. (Kuj 10:1-11) Ezekiel niyend wamana yom mudi yiney nich muvungur wamwinkishau ni mwading “madil, ni runeng, ni kwinan.”—Eze 2:10.

it-1-F p. 673 par. 4-6

Misong ya Kuval

Mu chishimushimu chidia mu Kujingunik, kambuy Yohan wamana mband wa mwiur udidina “misong ya kuval, mulong wading pa ruching ra kuval.” Mwan wavadika wading “mwan ikundj ukeza kuyikel mangand mawonsu nich mukombu wa utad ujal.” Ap anch iyazangomb wasala usu wa kumushesh, “mwan amukwesala, chad amutwal kudi Nzamb ni ku ditand diend.” (Kuj 12:1, 2, 4-6) Mulong mwan amukwesala kudi Nzamb chinech chimekeshin anch udi mwanend, chilik chimwing yishankur ya pasak yading yilejen anch chading chifanyidin kumulet bil mwan wavadika kal kudi tatukwend chakwel amwitiya. (Tal NAISSANCE.) Kupwa chijikana anch “mband” winou udi “mband” wa Nzamb, ap anch “Yerusalem wa Mwiur” udia ‘makwend’ a Kristu ni wa akadivar nend a mu spiritu.—Gal 4:26; Heb 2:11, 12, 17.

“Mband” wa mwiur wa Nzamb wafanyina kwikal uwanyidina ni wafanyina kuval pakad misong. Pakwez misong ya kuval yading yimekeshin kwau mu mutapu wa chifanakesh anch “mband” winou ukimbin kuval; wafanyina kwend kuchingel mu chisu chikemp.—Kuj 12:2.

Nany wafanyina kwikal “mwan ikundj” winou? Mwan winou wafanyina “kuyikel mangand mawonsu nich mukombu wa utad ujal.” Yawiy yiney yom yasambelay kulejan Kuseng 2:6-9 piur pa Mwant wa Umesia wa Nzamb. Pakwez Yohan wamana chishimushimu chinechi mivu yivud kupwa kwa Kristu kuvadik pa divu, kufa ni kuvumbuk. Chamekana komb anch chishimushimu chinech chading chimekeshin kuvadik kwa Want wa Umesia wamwinkau Yesu Kristu kudi Nzamb, ni kupwa kwa Yesu kuvumbuk, “washakama ku chikas cha katatuku cha Nzamb. Kwinikwa katat ndiy ukat kuchingel, djat ni pakumutekinau akankuny nend kwikal mudi kachipwan ka kwanzuk mend yend.”—Heb 10:12, 13; Kus 110:1; Kuj 12:10.

NGOND WA 12 RUBING RA 16-22

YOM YA USEY YIDIA MU DIZU DIA NZAMB | KUJINGUNIK 13-16

“Kangal Kwov Wom wa Annam Amayiyik”

w12 1/6 paj 10-11 par. 6

Yehova Ndiy “Ukata Kumekesh Yom Yijingamina”

⁶ Kwinsudiel kwa mivu chitot ya kusambish C.C., Yesu wavumbulau wamwinkisha kambuy Yohan yishimushimu yilondulijadina ni yamushena. (Kuj. 1:1) Mu chishimushimu chimwing, Yohan wamumana Djabul, amumekeshin mudi nnak mujim, wimanang kal ku mutambu wa karung kajim. (Tang Kujingunik 13:1, 2.) Yohan wamana kand nnam wamushena udiokila mu karung ni utambwil uyaj ukash kudi Djabul. Kapamp kakwau, mwangel wamuleja Yohan anch mitu sambwad ya nnam musuz, udia chirumbidij cha nnam udia mu Kujingunik 13:1, umekeshina “ant sambwad,” ap winyikel. (Kuj. 13:14, 15; 17:3, 9, 10) Pa chisu chafunday Yohan yom yiney, atan pakach pa mitu yiney adi awil kal, umwing wading ukat kuyikel, ni mukwau wading “kand kal eza.” Ov, misu majin ma mant minam, ap winyikel wa dikand wa mangand mawonsu? Shinshikinany amboku mutu ni mutu wa nnam ulejenau mu Kujingunik. Tukez kuman kand mitapu yawejinayaku Daniel yiletin ronganyin mu kachom ni kachom piur pa mant minam mavud, yisu yimwing kurutu kwa kwikalaku.

re-F p. 194 par. 26

Kurish nau Annam aad Ayidiany

²⁶ Want ik? Usu wa Mangand wa Angleter ni Amerik—umekeshina mutu wa sambwad wa nnam wa chidiany wa kusambish, pakwez ukwet mudimu wa pakampwil! Mulong mu chishimuchimu alejen anch amwauril ni nnam wa chidiany, chinech chitukwashin kwijik mutapu usadinay niyend amwinend panrend mu mangand. Nnam wa chidiany winou ukweta misengu yaad umekeshin mant maad ma chipolitik makwikalaku chisu chimwing, pakwez masadina panrau ni movijadina. Misengu yend yaad yidia “mudi mwan a mukoku” yimekeshin anch ukimbin kwimekesh mudi udutin ni udi wakad ubaj, ni anch ukwet guvernema muwamp mukutwishau antu awonsu kwez. Pakwez ulondin “mudi iyazangomb” kwawiy kulond anch ukat kusadin chisum ni kuswej anch mutapu wend wa kuyikel kawitiyinap. Kayikasikeshinap antu kuziyil ku Want wa Nzamb uyikedilau kudi Mwan a Mukoku wa Nzamb, pakwez ukat kukasikesh yibachikin ya Satan udia iyazangomb mujim. Ukat kukasikesh kand kwaurok ni rukis ra michid, yom yisadina anch antu amwifukwila nnam wa chidiany wa kusambish.

re-F p. 195-196 par. 30-31

Kurish nau Annam aad Ayidiany

³⁰ Rusangu rikwashin kujingunin chijingidij chinech mudi ditenchik dialetau, diakasikeshau ni kulondin kudi Grande-Bretagne ni États-Unis, ditenchik dined ading aditazukin anch Société des Nations. Kupwa, Kujingunik shapitre wa 17, ulejen anch ditenchik dined diaswimpa chijingidij mudi nnam wa chidiany musuz udia mwom, upimina ni wiyikedina amwinend. Ditenchik dined dia pa mangand mawonsu ‘dilondin,’ kwawiy kulond anch dikat kwibaz anch diawiy dikutwisha kulet chisambu ni diking kudi antu. Pakwez, mu win yakin diawiy dikata kukumangej jingand jivud mulong wa kusalijan. Dikat kukwat mipak ya kopat ap kujip muchid wawonsu ap muntu mwawonsu ulikina kuziyil ku winyikel wend. Société des Nations wopata kamu michid yawonsu yalika kwitiy yitongijok yend. Kwinsambishil kwa mar makash, “misengu” yidia mudi amasalay ya chijingidij cha nnam wa chidiany winou yikusal mudimu umwing wa kusheshan.—Kujingunik 7:14; 17:8, 16.

³¹ Kudiosh pa chisu cha Njit ja 2 ja pa Mangand Mawonsu, chijingidij cha nnam wa chidiany, chijikena katat mudi Organisation des Nations unies chajipin kal kamu antu. Chilakej, mu muvu wa 1950, amasalay a ONU iyandjika mwi njit jadinga pakach pa Corée du Nord ni Corée du Sud. Amasalay a ONU pamwing ni amasalay a Corée du Sud, chimeken anch ajipa antu 1420000 a mu Corée du Nord ni a mu Chine. Chilik chimwing, kusambish mu muvu wa 1960 kushik mu muvu wa 1964, amasalay a Nations unies eza mu Congo (Kinshasa). Chikwau kand, antakel a pa mangand, kuwejaku ni pap Paul VI ni Jean Paul II, adandamena kulond anch chijingidij chinech chawiy cha nsudiel ni chikulet ruchingej mulong wa chisambu. Kukwatijan ni awiy, anch antu alik kuyiziyil, muchid wa an a antu ukujiy awinau. Antakel inay akat kuyijip mu kulond kwa chifanakesh antu awonsu alikina kovijan ni chijingidij chinech ni kuchifukwil.—Kuvurik Yijil 5:8, 9.

wp09 1/2 paj 24 par. 2

Manans Majim ma Mukand wa Kujingunik—Chikunku cha 2

13:16, 17. Kwikalap nchik milong yikash yikutwisha yatushiken mulong wa kuwanyish midimu yetu ya dichuku din diawonsu, mudi ‘kuland ap kulandish,’ kangal twilikidil mu chilik cha kumushil ndond nnam winou atutakel mu mwom wetu. Kwitiyij ‘chijingidij cha nnam pa makas metu ap pa jimpal jetu’ kukez kumutwishish nnam chakwel atakela yisal ap ikala nich usu pa yitongijok yetu.

Kukimbijol Mapit ma mu Spiritu

wp09 1/2 paj 24 par. 5

Manans Majim ma Mukand wa Kujingunik—Chikunku cha 2

16:13-16. “Ayilembil ayimp” afanikeshin kampany wa Satan ukweta rutong ra kushinshikin anch ant a pansh kakwachikinap pichilau mabung sambwad ma ujim wa Nzamb pakwez ayisadishin chakwel amubwambwila Yehova.—Mat. 24:42, 44.

wp15 1/7 paj 18 par. 9

‘Dipandish Dien Didi Piswimp’!

⁹ Chisu cha mar makash chikwikalap chisu cha kulejan “rusangu ruwamp ra Want wa Nzamb.” Chisu cha kulejan rusangu chikwikal chasutin kal. Chikwikal chisu cha kwez kwa “disudiel”! (Mateu 24:14) Antu a Nzamb akez kulejan kamu uruu wa dirumburish dikash ukwikala nich usu padi antu awonsu. Uruu winou ulondin anch mangand mayimp ma Satan makusheshik kamu. Bibil ufanikeshin uruu winou nich ruvul wa mayal palondinay anch: ‘Mayal ma ruvul majim makweta kulim kwa akilo makum manying mayiwila antu. Chad antu amusaala Nzamb masaal, mulong wa chipupu cha mayal ma ruvul. Chipupu chinech chading chipandaken kuyip.’—Kujingunik 16:21.

NGOND WA 12 RUBING RA 23-29

YOM YA USEY YIDIA MU DIZU DIA NZAMB | KUJINGUNIK 17-19

“Njit ja Nzamb Jikupwish Njit Jawonsu”

w08-F 1/4 p. 8 par. 3-4

Harmagedon—Njit ja Nzamb Jikupwisha Njit Jawonsu

Pachidiau antu ayimp kwikal nich usu, antu atentamina kakwikalap mu chisambu ni mu diking. (Jinswir 29:2; Mulej 8:9) Mu win yakin, tukutwishap kwauril kukatul milamu ni uyimp wa antu asadina yom yiyimp. Mulong wa kwikal ni chisambu cha chikupu ni kutentam, chifanyidin kuyishesh antu in awonsu asadina uyimp. Salomon wafunda anch “muntu muyimp udi usey wa kumukwol nich mwin kutentam.”—Jinswir 21:18.

Mulong Nzamb ndiy udia Nzuj, chawiy tukutwish kwikal nich kashinsh anch milong yawonsu yirumburishinay pantaliken nau antu ayimp yikwikal yitentamina. Aburaham wipula anch: “Ov, nkalansambu wa mangand mawonsu kakusalap chitentamina?” Aburaham amwakula anch Yehova utentamin chisu chawonsu! (Disambishil 18:25) Chikwau kand, Bibil utwinkishin kashinsh anch Yehova kakatap kusanger rufu ra muntu muyimp; ukat kusal mwamu ching anch muntu winou kaswimpinap.—Ezekiel 18:32; 2 Pita 3:9.

it-1-F p. 439 par. 5

Kabar

Mu chishimushimu chamanay kambuy Yohan, Yesu Kristu utumbishinau amumekeshin mudi ukandamin pa kabar mutok ni amulondwil kudi chisak cha amasalay, awonsu akandamin niyau pa atubar atok. Yohan amuleja chishimushimu chinech mulong wa kumekesh anch Kristu ukuyirishikish akankuny nend njit jitentamina mu dijin dia Nzamb ni Tatukwend, Yehova. (Kuj 9:11, 14) Kurutu kwa yiney, yom yisadinay Kristu pikalay kal Mwant ayimekeshin kudi atubar kushalijan ni antu akandaminap.—Kuj 6:2-8.

re-F p. 286 par. 24

Mwant Mwin Kurish Njit Upandaken Njit ja Harmagedon

²⁴ Nnam wa chidiany ukweta mitu sambwad ni misengu dikum, udiokila mu karung ndiy umekeshina ditenchik dia politik dia Satan, amuvuramedin pamwing ni muprofet wa makasu ap usu wa sambwad wa pa mangand. (Kujingunik 13:1, 11-13; 16:13) Ap anch achid ‘aom’ kwawiy kulond anch achid kusal mu umwing mulong wa kuyipompat antu a Nzamb pa divu, ayidjubwidil mu “Dijiy dia Kasu.” Ov, dined didi kamu dijiy dia kasu diakin? Bwat, mulong ap nnam wa chidiany ni muprofet kadiap annam akin. Pakwez, dijiy dia kasu dined dimekeshin disheshik dia chikupu, ndond yakad muntu kutwish kuchirik kwinyim. Mwawiy mwinamwa mukudjubwilau rufu ni Nzay, pamwing ni Djabul amwinend. (Kujingunik 20:10, 14) Kadiap karung ka misiny ka chikupu mukuyisheshau antu ayimp, mulong chitongijok chinech cha kulond anch kudi ndond kanang ya kuyisheshin antu ayimp chimukisishin Yehova.—Jeremiy 19:5; 32:35; 1 Yohan 4:8, 16.

re-F p. 286 par. 25

Mwant Mwin Kurish Njit Upandaken Njit ja Harmagedon

²⁵ Antu awonsu akad kwikal a mu guvernema, pakwez adia akwashina mangand minam mayimp mu mutapu umwing ap ukwau “ayijipa nich mpak ya musamun yabudika mu kan mwendendiy ushicha pa kabar.” Yesu ukuyifish nich mulong wa kuyijip. Mulong kalondinap piur pau anch akuyidjubul mu dijiy dia kasu, mwamu chirumburikin anch akuvumbuk? Kwikil ndond yifundinau anch antu akurumburishau kudi Yehova pa chisu chinicha akuvumbuk. Mudi mwalonday Yesu amwinend, awonsu akad kwikal “amikoku” akuya ‘mu kasu ka chikupu kamurijekinau Djabul pamwing nau angel end,’ kwawiy kulond anch ‘rufu ra chikupu.’ (Mateu 25:33, 41, 46) Wawiy mutapu ukupwa “dichuku dikurumburishay Nzamb ni kuyishesh antu amubwambwidila ndiy.”—2 Pita 3:7; Nahum 1:2, 7-9; Malakiy 4:1.

Kukimbijol Mapit ma mu Spiritu

re-F p. 247-248 par. 5-6

Kujingunin Ujindj Wovishena wom

⁵ “Nnam wa chidiany . . . wading.” Chakin kamu, wadingaku kusambish machuku ma ngond 10 Ngond wa 1, 1920, mudi Société des Nations ni jingand 63 jabombakana nend chisu kanang. Pakwez, mu mutapu ulondulijadina, Japon, Alemany ni Itali amwiyepa, ni Union soviétique mukuru amwopata mu Société des Nations. Mwi Ngond wa 9, 1939 ntakel mwin dizaz wa Alemany Nazi walangwisha Njit ja 2 ja pa Mangand Mawonsu. Mulong katwishap kulam chisambu mu mangand Société des Nations wakanganya kusal. Mu muvu wa 1942 ditenchik dined diapalangana. Pawiy kamu pa chisu chinicha—kadiap kupwa ap kurutu—pawiy payikwashay Yehova antu end kutesh kamu nawamp kurumburik kwa chishimushimu chinech! Ku chitentam cha Uteokras cha Ngand Yisu, Nathan Knorr watwisha kulond kukwatijan ni uprofet anch “nnam wa chidiany . . . kadiakwap.” Kupwa wipula anch: “Ov, Société des Nations ukushal mu dibuk diakad musul?” Wajimbula Kujingunik 17:8, ni wakula anch: “Michid yikubombakan kand kapamp kakwau.” Ni yom yasadika kamu mutapu winou—mudi mutapu wading Mazu ma uprofet ma Yehova!

Ukat Kubudik mu Dibuk Diakad Musul

⁶ Nnam wa chidiany musuz wabudika mu dibuk diakad musul. Machuku mwa ngond 26, Ngond wa 6, muvu wa 1945 mu San Francisco, pamwing ni masok ma in karishish, jingand 50 jasinya kwitiy mukand wa Organisation des Nations unies. Ditenchik dined diadinga ni rutong ra “kulam chisambu ni diking pa mangand mawonsu.” Kwading yom yivud yifanakena pakach pa Société des Nations ni Organisation des Nations unies. Buku umwing (The World Book Encyclopedia) ulondin anch: “Mu mitapu yimwing, ONU wading ufanaken ni Société des Nations, wasalau kupwa kwa Njit ja 1 ja pa Mangand Mawonsu . . . Jingand jivud jabombakana mulong wa kusal ONU jawiy kand jabombakana mulong wa kusal Société des Nations. Mudi Société des Nations, ONU amusala mulong wa kulet chisambu pakach pa jingand kushalijan. Yom yivud yidia mu ONU yifanijadin ni yading mu Société des Nations.” ONU udi komb kuvuvurik kwa nnam wa chidiany musuz. Ukwet jingand 190 ni kusut jimukwashina, pakwez Société des Nations wading kwend ni jingand 63, ni ukwet kand yisend yivud kusutamu Société des Nations.

wp12 1/6 paj 20 par. 17

Yehova Ulejen “Yom Yisotila Kwez Kumekan Swa”

¹⁷ Pakwez, relijon wa makasu kezap kuziy. Mband wa kusochik ukez kudandamen kwikal ni usu, ni kusal usu chakwel ant alondula rusot rend djat ni pakezay Nzamb kutek chitongijok mu michim ya in kuyikel inay. (Tang Kujingunik 17:16, 17.) Piswimp ap Yehova ukez kusal anch winyikel wa chipolitik utazukinau anch Nations Unies, chakwel amasa marelijon ma makasu njit. Akez kushesh chibachikin ni mapit mend. Pasutin kal mivu dikum yinship yiney yamekana anch yikutwishap kusadik. Nlel unou, mband wa kusochik ushich pa nnam usunz. Ap mwamu, ndiy kakezap kubudik nawamp pa ndond pashakaminay. Kuwa kwend kukwikal kwa kapamp kamwing ni kukash.—Kuj. 18:7, 8, 15-19.

NGOND WA 12 RUBING RA 30–5 NGOND WA 1

YOM YA USEY YIDIA MU DIZU DIA NZAMB | KUJINGUNIK 20-22

“Tal! Katat Nikat Kusal Yom Yawonsu Yisu”

re-F p. 301 par. 2

Diur Disu ni Divu Disu

² Yitot ya mivu kurutu Yohan ikalaku, Yehova wamuleja Isay anch: “Mulong nikat kutang maur masu ni divu disu; ni yom ya pasak kakez kuyivurikap kand, ni yikez kachirikinap kand ku muchim.” (Isay 65:17; 66:22) Uprofet winou wawanyina kapamp ka kusambish chisu chachirikau in Yuda ashinshamena mu Yerusalem mu muvu wa 537 K.C.C. kupwa kwa kusal mivu 70 mu usuk mu Babilon. Pa chisu chinacha cha kuwapish yom, ikala muchid utokishinau ap anch “divu disu,” diading ditakedinau kudi want usu ap anch “maur masu.” Pakwez kambuy Pita walejana kuwanyin kwa uprofet winou mu mutapu ukwau anch: “Pakwez etu tukat kuchingej maur masu ni mangand masu mudi mwashilayimu Nzamb. Chad kwinikwa kwawiy kukeza kwikal kutentam.” (2 Pita 3:13) Yohan wamekesha pinap anch kushilamu kwinoku kwawanyina pa dichuku dia Nsalejetu. “Diur dikur ni divu dikur,” charumburik anch mutapu uyikedinay Satan ni guvernema wend utakedinay Satan amwinend ni ayilembil end yikujiy. “Karung” urumbangena wa antu ayimp ap anch in kubwambwil kakwikalakwap. Pa ndond yend, pakwikal “diur disu ni divu disu”—kwawiy kulond anch chisak cha antu aziyidina chikwikala mwinshin mwa umutakel wa Want wa Nzamb.—Ilikej Kujingunik 20:11.

wp13 1/12 paj 30 par. 2-4

“Talany! Am Nayikarumwish Kal Yom Yawonsu Kwikal Yisu”

“[Nzamb] ukez kuyikusol mansoj mawonsu ku mes mau.” (Kujingunik 21:4) Mansoj ma mutapu ik makezay kukuswol? Madiap mansoj ma musangar ap malamininga mes metu bwat. Pakwez kushilamu kwa Nzamb kwisambidin piur pa mansoj madiokila ku mar ni ku runeng. Nzamb kakezap ching kukusul mansoj, pakwez ukez kumaumish shitit ni kujiyish misul yawonsu yiletininga mansoj—mar ni runeng.

“Kukez kwikalap kand rufu.” (Kujingunik 21:4) Kudioshaku mukankuny wetu rufu, yom ik yikwau yikata kuletang mansoj makad kwisotin? Yehova ukuyikol antu amuziyidina ku uswik wa rufu. Mutapu ik? Pakudioshay musul wakin wa rufu: chitil chitwaswana kudi Adam. (Rom 5:12) Yehova ukuyinkish antu amuziyidina kuwanyin kusutil chakupesh cha difut dia Yesu. Kupwa mukankuny wansudiel “ukez kusheshay” udi rufu. (1 Korint 15:26) Antu ashinshamena akez kushakam mudi mwading rutong ra Nzamb piur pa mashakamin mau—chikupu nich ukash wa mujimbu uwanyidina.

“Kukez kwikalap kand . . . kusansan.” (Kujingunik 21:4) Kusansan kwa mutapu ik kukulika kwikalaku? Kusansan kwawonsu kwa mu manangu, kwa mu yovil, kwa kumujimbu kudiokila ku chitil ni kuburen kuwanyin ni kumeshina ma miliyon ma antu mar, kukwikalakup kand.

w03-F 1/8 p. 12-13 par. 14

Yehova udi Nzamb wa Uyakin

¹⁴ Tufanyidin kukwat nich usey nakash yom yitulejinay Yehova mu Dizu diend. Wij chidiay ni ukusal yom yisotinay kusal. Tukwet mayingishin mavud ma kumuchingejin kamu nakash. Tufanyidin kumwitiyij anch washilamu anch ‘ukulet dirumburish kudi antu akad kumwijik Nzamb ni akata kulik kuziyil ku rusangu ruwamp ra Nsalejetu Yesu.’ (2 Tesalonik 1:8) Tufanyidin kand kumuchingejin palondinay anch ukatining antu alondwila kutentam, palondinay anch ukuyinkish antu akweta ritiy mwom wa chikupu ni palondinay anch ukupwish kusansan, kudil ap kand rufu. Yehova wamekesh kashinsha ka kushilamu kwinoku pamulejay Yohan kufund anch: “Fund mazu minam, mulong madi makin, mafanyidina kumachingej.”—Kujingunik 21:4, 5; Jinswir 15:9; Yohan 3:36.

Kukimbijol Mapit ma mu Spiritu

it-2-F p. 1149 par. 6

Mwom

Mwi mbil yamwinkay Adam, Nzamb wamekesha anch ang Adam waziyin, kakufap. (Dis 2:17) Chidi kand mutapu umwing kudi antu aziyidina anch afa, mulong mukankuny wa nsudiel wa muntu akumushesh, chitil chikusalap kand mudimu mu mijimbu yau chakwel chiletisha rufu. Antu kakez kafap chikupu ni chikupu. (1Ko 15:26) Kusheshik kwinoku kwa rufu kukusadik kwinsudiel kwa winyikel wa Kristu wa mivu 1000, kukwatijan ni Kujingunik. Alondin anch antu akwikala ant ni in kupesh pamwing ni Kristu ‘avumbuka kwikal kand aom, chad ayikela mudi ant nend Kristu mu mivu kanan.’ “Afu akwau” akuvumbuka “ching anch mivu kanan yapwa” adi antu akwikala aom kwinsudiel kwa mivu kanan, pakwez kurutu kwa kumulikishaku Satan mu dibuku ni kurutu ayipaka antu kapamp ka nsudiel. Kwinsudiel kwa mivu kanan, antu a pa divu akwikal awanyidina ni akwikal mudi mwadingay Adam ni Ev kurutu asala chitil. Pawiy kamu pinapa pakwikalau ni mwom uwanyidina. Antu akupandakana choziu cha Satan pakumulishawaku mu dibuku mu ka chisu kakemp, akwikal ni mutapu wa kutambul mwom wa chikupu.—Kuj 20:4-10.

it-2-F p. 101 par. 5-7

Dijiy dia Kasu

Mazu minam madi kwau ching mu buku wa Kujingunik ni madi ma chifanakesh. Bibil ulejen kurumburik kwa mazu minam ma chifanakesh anch: “Dijiy dia Kasu rawiy rufu ra kapamp ka kaad.”—Kuj 20:14; 21:8.

Yom yisambidinau mu maverse majimbwilau dijiy dia kasu mu Kujingunik mamekeshin patok anch chidi chom cha chifanakesh. Afundin anch rufu akuridjubwil mu dijiy dined dia kasu. (Kuj 19:20; 20:14) Mu win yakin, rufu rikutwishap kamu kutem. Chikwau kand, Djabul udia chitang cha mu spiritu chakad kumekan, amudjibwidin mu dijiy dined. Mulong udi chitang cha mu spiritu, kasu kakin kakutwishap kumusal nayimp.—Kuj 20:10; ilikej Kub 3:2 ni Ank 13:20.

Mulong dijiy dia kasu dimekeshin “rufu ra kapamp ka kaad” ni mulong Kujingunik 20:14 ulondin anch ‘rufu ni Nzay’ akuyidjubwil mwinamwa, chinech choviken patok anch dijiy dia kasu dimekeshinap rufu raswanau antu kudi Adam (Ro 5:12), ap dirumburikinap Nzay (Sheol). Pakwez, dikutwish kurumburik rufu ra mutapu ukwau, rufu rakad kwikal ni divumbuk, mulong kwikil ndond yikwau yifundinau anch “dijiy dia kasu” dikutwish kubudish antu adiamu, mudi mutapu muchidia pantaliken ni rufu ra Adam ni Nzay (Sheol). (Kuj 20:13) Chawiy, antu akad kwikal ni majin mafundinau mu “mukand wa mwom,” adia in kubwambwil akad kukarumuk ku ukaleng wa Nzamb, akuyidjubwil mu dijiy dia kasu, charumburik anch akuyishesh chikupu, akufa kapamp ka kaad.—Kuj 20:15.