Mareferans ma Mudimu ni Mashakamin ma Mukand wa Chikumangan
© 2025 Watch Tower Bible and Tract Society of Pennsylvania
RUBING RA 1-7 NGOND WA 9
YOM YA USEY YIDA MU DIZU DA NZAMB JINSWIR 29
Ipuk Yitiyij ni Yaku Yakad Kumusangaresh Yehova
w16.11 paj 5, mushet
Yishimushimu Ya Antu Akad Kumekan Mwiur
Mudi antu a rukan akasinau moj, ma miliyon ma antu itiyijining anch ayitakedining kudi ayilembil yawiy yisadina anch ova ayilembil wom. Akat kusal mwon wa nkau, ni akat kusal maji mulong wa kwichidij. Ey ufanyidinap kusal mwamu. Bibil utukasikeshin nich kashinsh anch: “Mulong [Yehova] wendishil mes mend pansh pawonsu, chakwel ayimanyin apanyina michim yau yawonsu kudi ndiy.” (2 Jinsangu 16:9) Nzamb wakin, Yehova, ukweta usu nakash kumusutamu Satan, ukukuchidij anch Wamuchingejin.
Mulong wa kwikal ni diking dia Yehova, ufanyidin kwilej yom yimusangareshina ni kuyisadin. Chilakej, mu mivu chitot ya kusambish, in Kristu a mu musumb wa Efes akumangeja ma buku mau ma maji ni amosha. (Midimu 19:19, 20) Chilik chimwing, anch ukimbin wikala ni diking dia Nzamb, ufanyidin kudjibul, mwon ya nkau, ulaj, ma buku ma maji, yom ya “kwiking nich”, ni yom yawonsu yidia mu umwing ni ayilembil.
Ijik Uyakin Piur pa Rufu
13 Anch ukwetap kashinsh piur pa chishankur ap chisal kanang, mulembila Yehova, it nich ritiy manangu mend. (Tang Jakobu 1:5.) Kupwa kimbijol mu mikand yetu chakwel umatan manangu minam. Anch chidi cha usey, yimana amakurump a chikumangen chey. Kakukukwatinap mupak, pakwez akutwish kukulej mbil ja Bibil mudi jisambidinau mu mutu wa mulong winou. Anch wasal yom yiney, ufumbin ‘usu wey wa kutong,’ ni usu winou ukukukwash “kwauril kuwap ni kuyip.”—Heb. 5:14.
“Nikendil mu Uyakin Wey”
12 Yishankur ni yaku yakad kumusangaresh Nzamb. Antu a mu dijuku, ambay a mudimu, ni arund a ku shikol akutwish kutubachik chakwel tubombakan nau mu misambu yau. Yom ik yikutwisha kutukwash kujijamen chibachikin cha kwiyandjik mu yishankur ni mu machuku ma misambu makad kumusangaresh Yehova? Tufanyidin kwijik nawamp mayingishin masadina anch Yehova alika kwitiyij machuku minam ma misambu. Tufanyidin kukimbijol mu yichap yetu ni kuvurik mutapu wasambisha machuku mamwing ma misambu. Anch twatongijokin pa mayingishin makwatijadina ni Mifund masadina anch tulik kusal nau misambu yiney, tukat kwikal nich kashinsh anch twendididin mwi njil yikata “kumusangaresh Nsalejetu.” (Efes 5:10) Anch twachingejin mudiay Yehova ni Dizu diend, tukwovap wom piur pa yom yikutwishau kutong antu.—Jinswir 29:25.
Mapit ma mu Spiritu
En akadivar Ansand—Ikalany in Kristu Aswila
5 Kudish ni “lam . . . Manangu makin.” (Jnsw. 3:21) Ikundj ukweta manangu ukata kushinshikin yom yida kurutu kwend ni kubabal kurutu ayisala. Sal usu wa kukudish manangu makin ni kumalam. Mulong wak? Mulong mangand minam mizwil ni ansand akat kukwat mipak yimedina pa yitongijok ni pa yovil yau. (Jnsw. 7:7; 29:11) Yom yilondinau ku televizion, ku ma internet ni yom yikwau ya kupalangesh nich jinsangu yikutwish kuyipish mutapu wey wa kutong ni wa kusal yom yikwau. Pakwez, mutapu ik ukutwisha kwikal ni ukaliweny wa kutong nawamp? Sambish kwilej mbil ja Bibil ni kujitongijokin mutapu jikutwisha kukuletin yiyukish. Kupwa sadin mbil jikutwisha kukukwash kukwat mipak yikutwisha kumusangaresh Yehova. (Tang Kuseng 119:9.) Anch wakudish ukaliweny winou wa usey, ukukukwash kwikal ikundj mwin Kristu uswila. (Jnsw. 2:11, 12; Heb. 5:14) Shinshikin mutapu ukutwisha ukaliweny winou wa kutong kukukwash mu yom yaad ey: (1) piur pa urund nau anambaz (2) mu kukwat mipak piur pa kudjal ni mutapu umekena.
RUBING RA 8-14 NGOND WA 9
YOM YA USEY YIDA MU DIZU DA NZAMB JINSWIR 30
“Kangal Wanginkish Uzwendj ap Wimpich”
Rukat ra Mutapu ik Rikata Kulet Musangar Wakin?
10 Chakin kamu, etu awonsu tukwet kuswir kwa nfalang. Mulong jikutwish kutuking. (Mulej 7:12) Pakwez, ov, tukutwish kwikal ni musangar anch tukwet nfalang jiwanyidina mulong wa maswir metu? Mwaning! (Tang Mulej 5:12.) Agur mwan wa Jake wafunda anch: “Kangal wanginkish uzwendj ap wimpich. Ndisha nich yakudia niswiridina.” Komb chiswapel kwijik mulong wak muntu winou kakatap kwikal kazwendj nakash. Walonda anch mulong kakatap anch amwoza chakwel iya, mulong kwiy kwafanyina kumuletin Yehova kapipej. Pakwez mulong wak kakatap anch ikala mpich? Wafunda anch: “Ap chamwamu nez nakutun pinikwikuta ni kulond anch: “Ov, [Yehova] udi nany?”” (Jinswir 30:8, 9) Niyey pamwing ap wij muntu uchingejidina mapit pa ndond pa kumuchingejin Nzamb.
11 Muntu ukatina nfalang kakumusangareshangap Nzamb. Yesu walonda anch: “Kwikil muntu ukutwisha kuyisadil ansalejend aad nawamp. Ukumukis umwing, chad wamukat mukwau, ap ukumulimish umwing, chad wamudiul mukwau. Kiukutwishanyap kusadil kapamp kamwing Nzamb ni mapit ma pa mangand.” Walonda kand anch: “Kangal wikumangejinany mapit ma pansh pa mangand, padia musu, ni ankal akat kushesh, ni ij akata kwandam ni kwiy. Pakwez kumangejinany mapit men mwiur mwakad musu ni ankal akata kushesh, ap ij akata kwandam ni kwiy.”—Mateu 6:19, 20, 24.
12 Atushalapol avud a Yehova asadin usu wa kupipej mwom wau. Atanin anch kusal mwamu kuyinkishin chisu chivud cha kumusadin Yehova ni kuyiletidin musangar. Jack, ushicha mu États-Unis, walandisha chikumbu chend chijim ni yom yend yadingay nich ya kwisak chakwel asala mudimu wa uchibol ni mukajend. Urumburil anch: “Chadingap chiswapela kulandish chikumbu chetu chiwamp ni yom yetu twadinga nich mwi ngand.” Pakwez mu mivu yivud wachirikang ku chikumbu waziyang kal mulong wa milong ya mudimu. Ulondin anch: “Mukajam chibol wa rawonsu, wading chisu chawonsu nich musangar. Mukajend walonda anch, ‘nimukwet kamu mukurump wa mudimu upandakena kujimb!’ Katat niyam nisadin mudimu wa uchibol, etu awonsu aad tumusadidin Muntu umwing, Yehova.”
w17 5 paj 25-26 par. 15-17
‘Ov, Ey Winkatil Am Kupandakan Inay?’
15 Antu avud nlel atongin anch afanyidin kwikal ni masun ma katat, ma telefon, ma ordinater, ni yom yikwau. Akwatiken nakash ni yom ya ku mujimbu, mashakam ma mwom mamekeshina anch yom ya ku mujimbu ni nfalang yawiy yikweta usey kusutamu chom chikwau. Mudi mwin Kristu, chom ik chidia cha usey nakash kudi ey? Iyipula anch: ‘Ov, nikat kusutish chisu chivud mulong wa kutong piur pa motak yibudikina katat ap yom yibudikina katat kusutamu chisu nikata kusutish mulong wa kurijek yikumangan? Nikwatiken nakash ni midimu ya dichuku ni dichuku ni kusutish chisu chikemp mu kulembil ni kutang Bibil?’ Anch tubabelap, rukat mulong wa yom ya ku mujimbu rikutwish kwikal ra usey nakash kusutamu rukat retu mulong wa Kristu. Tufanyidin kutong piur pa mazu ma Yesu malondina anch: “Likany ris ra mitapu yawonsu.” (Luka 12:15) Mulong wak walonday mwamu?
16 Yesu walonda anch “kwikil muntu ukutwisha kuyisadil ansalejend aad nawamp.” Wawejaku anch: “Kiukutwishanyap kusadil kapamp kamwing Nzamb ni mapit ma pa mangand.” Chiswapelap kumwinkish Yehova yom yetu ya usey ni mu chisu chawiy chimwing twashinshikin kand pa yom ya ku mujimbu. Yesu warumburila anch “ukumukis umwing, chad wamukat mukwau” ap “ukumulimish umwing, chad wamudiul mukwau.” (Mateu 6:24) Mulong tudi antu akad kuwanyin, tufanyidin kudandamen kurish mulong wa “maku metu ma wuntu,” kuwejaku ni kukat yom ya ku mujimbu.—Efes 2:3.
17 Antu avud ashinshikidin nakash pa maku mau ni kwisangaresh, chawiy chimenau anch chikasiken kwikal ni chitongijok chiwamp piur pa yom ya ku mujimbu. (Tang 1 Korint 2:14.) Mulong katonginap nawamp, chikutwish kuyikasiken kwauril yom yidia yiwamp ni yiyimp. (Hebereu 5:11-14) Maku mau ma yom ya ku mujimbu makutwish kwikal makash nakash. Ni anch ikal ni yom yivud, akukat kand kwikal ni yivud nakash. (Mulej 5:10) Pakwez kudi chom tufanyidina kusal mulong wa kurishish kutong kwa mutapu winou. Kutang Dizu dia Nzamb pakad kujing kukutukasikesh chakwel tujijamena rukat ra yom ya ku mujimbu. (1 Pita 2:2) Yesu watongijokinang pa manangu ma Yehova, ni chinech chamukwasha kujijamen yoziu ya Djabul. (Mateu 4:8-10) Nlel kand, anch tukatin kujijamen rukat ra yom ya ku mujimbu, tufanyidin kusadin manangu ma Yehova mu mwom wetu. Chinech chikumekesh kudi Yesu anch tumukatin nakash kusutamu yom ya ku mujimbu.
w11 1/6 paj 10 par. 4
Mutapu wa Kushakam Kukwatijan ni Yom Tukweta
Tongijok mutapu wa kusadin nfalang nawamp kurutu kwa kuland chom. Ap anch kutong kurutu kwa kuland chom kukutwish kumekan mud chaku cha pakur nakash, pakwez kud kusal kwa manang kukutwisha kukukwash kwipuk kuwil mu milong ya kuburen nfalang. Wawiy mutapu ukata kuyikwash antu kwipuk mabaz, diyazukesh divud dikata kusal anch usey tulandina nich yom ukaninik. Mu Bibil, nsongany amulejen anch ukwet “manangu” mulong ukat kukumangej “yakuda yend pa chirungu chau ni kwangul mu chirungu cha kwangul” mulong wa kuyisadin mu machuku ma kurutu.—Jinswir 6:6-8; 30:24, 25.
Dandamen Kwikal Ngendj wa Yehova Chikupu ni Chikupu!
18 Etu awonsu tufanyidin kushinshikin mutapu tukata kuman nfalang. Tufanyidin kwiyipul anch: ‘Ov, nikat kutongin chisu chawonsu piur pa nfalang ni piur pa yom nikutwisha kuland? Anch nasondam nfalang, ov, nikat kulab pa kujichirish ni kutong anch muntu wansondjikangaj kajiswirikedinap kwend pa chisu chinech? Ov, kwikal ni nfalang kukat kusal anch niyov anch nikwet usey nakash kuyisutamu antu akwau ni kusal anch chinkasiken kwikal mwin kupan? Ov, nikat kuyirumburish akadivar ni anambaz ni kuman anch akatin yom ya ku mujimbu nakash mulong akwet nfalang? Ov, nikatining kwikal mu urund ching nau antu ada ampich pakwez atuzwendj bwat?’ Tukwet dilau dijim da kwikal angendj a Yehova. Tukutwish kuchidij dilau dined kusutin kulik kukat dikut nakash. Anch twasal mwamu, Yehova kakutulikap ap pakemp!—Tang Hebereu 13:5.
Mapit ma mu Spiritu
w09 1/4 paj 19 par. 11-13
Yitang Yijingunishin Manangu Ma Yehova
11 Chibatat (mulad wa ansej) udi pakach pa kachitang kakemp kakutwisha kutulej malejan majim nakash. (Tang Jinswir 30:26.) Chisu chimwing udingaku mujim mudi katwiy pakwez ukwet matu miswimp ni mend miswimp. Kannam kinak kakemp kashiching ching mu jindond ja mayal. Kuman kuwamp kwa chibatat kwawiy kumukwashininga ikinga, ni mu mabuku madia mu mayal mwawiy mulelingay ni makat kumuchidij palemp ni annam ayidiany. Chibatat amutanga chakwel ashakamang ching mu chisak chidia mu uumwing, chawiy chikata kuyikwashang kwiking ni kwov chirungul palelau pamwing pa chirung cha mashik.
12 Chom ik tukutwisha kwilejin kudiay chibatat? Cha kusambish, ijikany anch nnam winou kakatap kwend amwinend chamwamu akumukwat. Pakwez, ukat kusal usu wend wa kuman kulemp nakash chakwel ayimena annam ayidiany kulemp, ni ushiching ching piswimp ni mabuku ni ku mayal kukutwishay kwandam chakwel ikinga. Chawiy chimwing, tufanyidin twikala nich usu ukash wa muspiritu wa kuman yom chakwel tutwisha kujingunin ubaj udia mu mangand ma Satan. Kambuy Pita wayibabesha in Kristu anch: “Ilamany ayinen, babalany! Mukankuny nen, Sakudimban ukat kuzomb mudi ntambu wonyina ukata kukimb nany ukudiay.” (1 Pita 5:8, MM) Padingay panap pansh, Yesu walama, pantaliken nich yoziu yawonsu ya Satan ya kusot kushesh kushinshaman Kwend. (Mat. 4:1-11) Yesu wayishila in kwilej end chilakej chiwamp!
13 Njil yimwing yitukutwisha kwilam yidi kusutil ku kwisotil diking dia muspiritu diletinay Yehova. Kitufanyidinap twadiul Kwilej Dizu dia Nzamb ni kukumangan ku yikumangan ya Ukristu. (Luka 4:4; Heb. 10:24, 25) Chikwau, mudi mushichingay chibatat mu chisak chidia mu uumwing, tuswirikedin tushakama mu uumwing ni ambay netu in Kristu chakwel tusangera ‘kwongojijan ku ritiy retu’ muntu umwing ni mukwau. (Rome 1:12) Anch twasal yitukutwisha kusal chakwel twisakina diking dia Yehova, tukumekesh anch twitiyijin yalonday nfund kuseng David anch: “Nzamb wam; udi diyal diam; nikwikangil kudiay Ndiy; udi rikibu ram, ni musengu wa dipandish diam.”—Kus. 18:2.
RUBING RA 15-21 NGOND WA 9
YOM YA USEY YIDA MU DIZU DA NZAMB JINSWIR 31
Malejan Twilejidina ku Yiyul ya Rukat Yikatay Kupan Maku Kud Mwanend
w11 1/3 paj 20 par. 7-8
Yileja Aney Yany ya Mashakamin
Lejan uyakin wawonsu piur pa kumanijan kwa ikundj ni mband. Kubabesh kudi kwa usey. (1 Korint 6:18; Jakob 1:14, 15) Pakwez, Bibil umekeshin cha kusambish anch kumanijan kwa ikundj ni mband chidi chipan cha Nzamb, udiap mupit wa Satan bwat. (Jinswir 5:18, 19; Muminy 1:2) Kuyilej aney ching kusu piur pa ubaj kukutwish kuyinenganesh, ni kwikal nich yitongijok yakad kukwatijan nich Bibil. Mband umwing udia mu France utazukinau anch Corrina ulondin anch: “Anvaj am ading akat kukasikeshin nakash piur pa masandj ni asala anch nikala ni chitongijok chiyimp piur pa kumanijan kwa ikundj ni mband.”
Ikal nich kashinsh anch aney ateshin uyakin wawonsu piur pa kumanijan kwa ikundj ni mband. Maku umwing udia mu Mexique utazukinau anch Nadia ulondin anch: “Nasala usu wa kuyilej an a dikum dia mivu anch kumanijan kwa ikundj ni mband kudi kuwamp ni kwa chivadik, ni Yehova Nzamb wayinkisha antu chakwel asangara. Pakwez, kukwet ndond yaku ching kusu mu uruw. kukutwish kutuletin musangar ap mar, kulondulijan ni mutapu tukutwisha kukusadil.”
ijwhf mutu wa mulong wa 4 par. 11-13
Isamba nau aney piur pa maar
Irijeka chakwel wambamb nau piur pa mulong winou. Mark, nvaj uda mu Grande-Bretagne, ulondin anch: “Yisu yivud an kijingap kwau yom yivud piur pa maar. Namwipula mwanam ukweta mivu chinan mulong wa kwijik anch kud ndiy chiwapin ap bwat kuna maar. Twambamba nawamp, mud nvaj ni mwan, chawiy chamuswapela kulond yom yading yitonginay.”
Mwaney ukukwat nich usey yom umulejina anch wikal ni chaku cha kwambamb nend piur pa maar. Kukwatijan ni mivu yikwetay, ukutwish kwambamb nend piur pa mulong winou pamwing ni yikwau kand ya usey, mud mutapu wa kwichidij mwi njil ni milong ya kulalijan.
Ikal chilakej chiwamp. An ad mud shifon—akat kupwit yom yiyinyingumukina—ni kukimbijol kumwing kumekeshin anch anvaj awiy akweta yibachikin nakash pa anau. Chinech chirumburikin anch, anch kud ey mutapu wa kupwish milong ap kwiyov nawamp chitin kuna maar, mwaney niyend ukuman anch komb chitin kuna maar mulong wa kupwish yakamish. Chawiy komb ikal chilakej chiwamp. Sal usu wa kwikal ni kashinsh anch unil maar mu mutapu uwamp.
g17.6 paj 9 par. 5
Yifundisha Aney Kwikal Ikepishina
Yikasikesha kwikal in kupan. Mukwasha mwaney kuman anch “musangar wa kupan upandakenamu wa kutambul.” (Mid. 20:35) Mutapu ik? Sal nend pamwing list wa antu akweta kuswir kwa ukwash, chilakej, kuyilandin yom, kuyikwash mudimu, ap kuyitwal kwi ndond kanang. Kupwa musenda chisu uyila kuyikwash antu inay. Mukwasha mwaney kuman musangar ukata kwov chisu uyikwashina antu akwau. Winou wawiy mutapu uwamp nakash wa kumufundish mwaney kwikepish—kusutin yisal.—Mbil ya Bibil: Luka 6:38.
Mapit ma mu Spiritu
w23 05 paj 22 par. 6
Salany Anch ‘Muzuzu wa [Yah]’ Udandamena Kwak
6 Mariy wading ni urund wa pakampwil ni Yehova; ritiy rend radingap rimedina pa yom yasalangay Josef. Wading wij nawamp Mifund. (Luka 1:46.) Wishilang kand chisu cha kutongijokin pa Mifund. (Luka 2:19, 51) Chakin kamu, urund wa Mariy ni Yehova wamwikadisha mband muwamp nakash. Nlel unou, angachik avud asadin usu wa kusal yom mud mwasalay Mariy. Chilakej, nambaz utazukinau anch Emiko ulondin anch: “Pinading mujich, nading ni chaku cham cha mu spiritu. Pakwez kupwa kwa kwingat, najingunina anch, mulong nfumwam ndiy walembilang ni kutakel difukwil dia mu dijuku, ritiy ram rading rimedin pa yom yasalangay. Najingunina anch nading ni kuswir kwa kwitekin chisu cha kukasikesh urund wam ni Yehova. Chawiy nasambisha kwishil chisu cha kusutish pamwing ni Nzamb wam kusutin kulembil, kutang Bibil, ni kutongijokin pa yom nitangina.” (Gal. 6:5) Angachik, anch wadandamenany kukasikesh urund wen ni Yehova, anfumwen akwikal ni mayingishin ma kukushimekany ni kukukatany.—Jnsw. 31:30.
RUBING RA 22-28 NGOND WA 9
YOM YA USEY YIDA MU DIZU DA NZAMB MULEJ 1-2
Dandamen Kuyifumb Antu a Chirung Chikuswinkana
w17.01 paj 26-7 par. 3-4
“Yom Yiney Yilejana Kudi Amakundj Ashinshamena”
3 Tukatining kumusadin Yehova ni kusanger yisend yetu tukweta. Avud pakach petu asangaredining mudimu wetu nakash chakwel twikala ni ruchingej ra kudandamen kuusal pachitwishikina. Pakwez cha ushon anch antu apam, kakutwishangap kand kusal mudimu mudi mwasalangau padingau achidi ansand. (Mulej 1:4) Chom chinech chiyiletidining antu a Yehova milong nakash. Nlel, mudimu wa kulejan udandamedin kuya kurutu, ni dirijek dia Yehova disadidin teknoloji wa katat mulong wa kuyilej antu avud rusangu ruwamp. Pakwez yisu yimwing chikutwish kukasikan kudi antu apamina kal kwilej mitapu yiney yisu ya kusadin yom yiney. (Luka 5:39) Chikwau kand, chiding chakin kudi antu kushadish usu umwing ni ukash wa mujimbu anch apam. (Jinswir 20:29) Chawiy, chidi cha rukat ni cha ukwash anch antu apamina kal ayifumb ansand chakwel ikala ni yisend mu dirijek dia Yehova.—Tang Kuseng 71:18.
4 Chiswapelingap chisu chawonsu kudi antu akweta wintakel kupan midimu kudi ansand. Chikutwish kuyovish akadivar ushon mulong wa kushadish yisend yau yikatinau nakash. Chikutwish kuyisal nayimp mulong wa kulik kusal mudimu wa pakampwil usangaredinau. Ap akutwish kwakam ang anch awiy katakedinap mudimu, kakuusalap nawamp. Pamwing ap akutwish kwiyov anch kakwetap chisu cha kuyifumb akadivar akwau. Chisu chawiy chimwing, ansand afanyidin kushimpish michim anch kayinkishinap yisend yivud.
Mapit ma mu Spiritu
En Ansand, Sakatang Wen Ukatin Anch Wikalany Nich Musangar
Salomon, wading mpich nakash ni muntu ukweta ulabu nakash wajingunina chom chimwing. Walonda anch: ‘El bil nisangar chakwel nimana uwamp udiamu.’ (Mulej 2:1-10) Chawiy, Salomon watunga yikumbu ya ufun, wadima yir yiwamp ni wading ni mapark mawamp ni wasalang yom yawonsu yading yikatinay kusal. Ov, wikala ni musangar? Patalay Salomon yom yawonsu yasalay, walonda anch: “Namana anch, yawonsu yidi kwau yamwamu.” Walonda kand anch: “Kwikil chom chinatanamu ku midimu yawonsu yinasala.” (Mulej 2:11) Ov, ukutwish kwilejin ku yom yajinguninay Salomon?
RUBING RA 29 NGOND WA 9–5 NGOND WA 10
YOM YA USEY YIDA MU DIZU DA NZAMB MULEJ 3-4
Kasikeshany Mwoj Wen wa Chibab
hf chikunku 2 paj 7
Tek Uruw Wey pa Ndond ya Kusambish
CHILEJENAY BIBIL: “Kujingunin yom yipandakena kuwap.” (Filip 1:10) Uruw chidi chom chimwing chipandakena usey mu mwom wey. Ufanyidin kwikal pa ndond ya kusambish.
Yehova usotin ey ushinshikidina pa mbay ney wa uruw ni ‘kusanger mwom’ pamwing. (Mulej 9:9) Ndiy umekeshin patok anch ey ufanyidinap kumuvuramen mbay ney wa uruw, pakwez en awonsu aad ufanyidinany kukimb mitapu ya kwisangaresh umwing ni mukwau. (1 Korint 10:24) Sal usu chakwel mbay ney wa uruw iyova kwikal uswiridikena ni umusangaredina.
CHIUKUTWISHA KUSAL:
Ikal nich kashinsh anch usutishiningany chisu pamwing ni kubangin nakash mbay ney wa uruw. Tongin padi “etu” pa ndond pa “am”.
Salany Anch ‘Muzuzu wa [Yah]’ Udandamena Kwak
12 Mutapu ik ukutwishau ambay a uruw kumwimburij Akila ni Prisil? Tongijokin piur pa yom ufanyidina kusal pamwing ni mukajey. Ov, ukutwishany kusal yom yiney pamwing pandond pa kuyisal muntu ni muntu panrend? Chilakej, Akila ni Prisil alejanang pamwing. Ov, niyen mwamu ukata kusalany yisu yivud? Akila ni Prisil asalang kand mudimu pamwing. Pamwing ap ey ni mukajey ukwetanyap mudimu umwing, pakwez ov, ukutwishanyap kusal midimu ya kuchikumbu pamwing? (Mul. 4:9) Anch wakwashijanany kuwanyish chisend kanang, ukwiyovany anch usadinany chisak, ni ukwikalany ni mutapu wa kwambamb. Robert ni Linda atijana kwasutin kal mivu 50 ni kusut. Robert ulondin anch: “Kulond uyakin, tukwetingap chisu chivud cha kusutish pamwing mulong wa kwipuwangej. Pakwez anch nikat kowish malong ni mukajam ukat kumakuswon, ap anch nikat kusiy pol ni ndiy wez wasambish kusal nam pamwing, nikat kwov musangar nakash. Kusal mudimu pamwing kukat kutusejish pamwing. Rukat retu rikat kudandamen kupam.”
13 Pakwez vurik anch, kusutish chisu pamwing kukutwishap kukasikesh chisu chawonsu uumwing. Mband umwing wa mu Brezil ulondin anch: “Nlel tukwet yom yivud yin kutuletin kampuw, chawiy tukutwish kuwil mu mupit wa kutong anch tusutishining chisu pamwing ni mbay netu mulong tushich nend chikumbu chimwing. Najingunina anch chitin kusal yom yivud kusutamu kwau kwikal pamwing. Chitin kand kuta matu kudiay mukajey.” Shinshikin yom yasalay Bruno ni mukajend Tays, mulong wa kwikal nich kashinsh anch muntu ni muntu util matu kud mukwau. Bruno ulondin anch: “Pitukata kusutish chisu pamwing, tukat kutul matelefon metu ni kusanger chisu tusutishina pamwing.”
14 Pakwez, chid nchik anch ey ni mbay ney wa uruw ukatininganyap kusutish chisu pamwing? Pamwing ap ukatiningany yom yishalijadina, ni ukat kujimeshijanangany umwing ni mukwau. Yom ik ukutwishanya kusal? Shinshikin kand chilakej cha dijuku dia kasu twisambinang kwiur oku. Kasu kakatap kamu kuyem kwinsambishin. Chitin kukakundakesh ni nkuny pakemp pakemp. Chilik chimwing, niyen ukutwish bil kusambishan kusutish pamwing kachisu kakemp kakemp dichuku diawonsu? Salany yom yiukatinanya en awonsu, kangal kusal yom yikutwisha kusal anch upwitamijanany. (Jak. 3:18) Anch wasambishany kusal mwamu, pakemp pakemp rukat ren rikuzubuk kand.
Salany Anch ‘Muzuzu wa [Yah]’ Udandamena Kwak
3 Mulong wa kusal anch ‘Muzuzu wa [Yah]’ udandamena kwak, ikundj ni mband afanyidin kusal usu pamwing wa kukasikesh rukat rau ni Yehova. Kusal mwamu kukutwish kuyikwash mutapu ik mu uruw wau? Anch ambay a uruw akwat nich usey urund wau ni Tatukwau wa mwiur, chisu chawonsu akusambish kusadin yiyul yend. Kusal mwamu kukuyikwash kwipuk ni kupandakan milong yikutwisha kusal anch rukat ra umwing ni mukwau risambisha kutalal. (Tang Mulej 4:12.) Antu akweta urund ukash ni Yehova akat kusal usu wa kumwimburij ni kukudish mikadil yiwamp mud kudimuk, kushimpish muchim, ni kulikishin. (Efes 4:32–5:1) Ambay a uruw amekeshina mikadil mud yiney, akat kusal anch rukat rau ridandamen kupam. Nambaz Lena watau kwasut kal mivu 25 ulondin anch, “Chiswapeling kumukat ni kumulimish muntu umukatina Yehova.”
Mapit ma mu Spiritu
Dandamen Kumwifukwil Yehova ap Anch Akangesh Difukwil Dietu
14 Babal piur pa yom wisambina ni antu akwau. Anch akangesh difukwil dietu tufanyidin kwijik anch kudi “chisu chimwing cha kunenet.” (Mul. 3:7) Tufanyidin kulam nsangu ja ujindj, mudi kulejan majin ma akadivar nau anambaz netu, ndond tukumangedina, mutapu tusadina mudimu wetu wa kulejan ni mutapu tutambwila yakudia ya mu spiritu. Tufanyidinap kulejan yom yiney kudi antakel a ngand, kudi arund netu, kudi anamakwetu adia mwi ngand yetu ap mu jingand jikwau. Anch twalejan yom yiney, tukuyitek akadivar netu mu ubaj.—Tang Kuseng 39:2.
RUBING RA 6-12 NGOND WA 10
YOM YA USEY YIDA MU DIZU DA NZAMB MULEJ 5-6
Mutapu Tukutwisha Kumekesh Anch Tumulimishin Nakash Nzamb Wetu Mujim
w08 15/8 paj 15-16 par. 17-18
Mutumbishany Yehova Nich Kalimish
17 Kubabel kukwau kufanyidin kukumekesh ni kalimish pa tumwifukwidila Yehova. “Babalany pa kwandam mu Chikumbu cha [Nzamb],” mwamu mulondilay Mulej 5:1. Moses nend Yoshua awonsu aad ayileja kudiosh yilat yau chisu chadingau pa ndond yitumbila. (Kub. 3:5; Yosh. 5:15) Asala yiney mud chisal cha kalimish ap wom. In kupesh a in Isarel ayileja kudjal linen chisu chezinau kupesh “chakwel ajindjikang nich winzikis.” (Kub. 28:42, 43) Chinech chakwashanga mulong wa kulik kudjal nayimp chisu chisadinau ku chintamb. Muntu win mwawonsu wa mu muchid wa in kupesh wading ufanyidin kulam mupak wa Nzamb nich kalimish.
18 Kalimish mu difukwil, yitin ntumb ni kalimish. Kwikal ni dikand mulong wa ntumb ni kalimish, tufanyidin kusadil ni kulimishang. Kalimish tukumekesha kafanyidin kuya kamu kurutu kumekan mudi diswin dietu dia kutwijikin. Kafanyidin kamu kumekan ku mes kwa antu mudi ku mes kwa Nzamb kand—ku michim yetu. (1 Sam. 16:7, NW; Jinsw. 21:2) Kalimish kafanyidin kamu kwikal chikunku chetu ni kin kutusadish, mwikadil wetu, urund na akwatu, ni mutapu twimening ni mutapu twiyoviling. Pa chinech, kalimish kafanyidin kukamekeshang chisu chawonsu mu kulond mwetu ap mu yisal yetu. Mulong wa mwikadil wetu, yovil yetu, kwipent kwetu, tufanyidin kulam ku muchim mazu ma mupostol Paul: “Kitusotilap kumupwakesh muntu mu chom chimwing chakwel kakutanip kurumbuk mu mudimu wetu; pakwez mu yom yawonsu tusotil kwimekesh mudi in mudimu a Nzamb.” (2 Kor. 6:3, 4) “Chakwel alimisha dilejan dia Nzamb.”—Titus 2:10.
w09 1/11 paj 18 par. 21
Wapishany Malembil Men Kusutil Ku Kwilej Bibil
21 Yesu wadinga ni kulembil ni kalimish kakurikina ni ritiy rikash. Chilakej, kurutu kwa kumuvumbul Lazar, “Yesu wazambula mes mend mwiur, walond anch: Tatuku, nakujikitish chiukata kwingov am. Am nij anch ukat kwingovang machuku mawonsu.” (Yoh. 11:41, 42) Malembil men mamekeshining kalimish kinak kakurikina ni ritiy? Ilejany malembil ma chilakej ma Yesu ma kalimish kakurikina, ni ukumanany anch yom ya pakampwil yidia mu malembil minam yidi kutumbish dijin dia Yehova, kwez kwa Want wend ni kuwanyin kwa rusot rend. (Mat. 6:9, 10) Tongijokin pa malembil mey amwiney. Makat kumekesh kusanger kwey kujim Want wa Yehova, kusutil ku kusal rusot rend ni ku kutumbish dijin diend ditumbila? Mwamu mafanyidina kwikal.
w17.04 paj 7 par. 12
‘Wanyish Yom Yiwachipa’
12 Piwatambula dibatish washilamu kudi Yehova anch ukusadin mwom wey mulong wa kumusadin ndiy ni kusal yawonsu ukutwisha mulong wa kulondul mbil jend. Pakwez dibatish didi kwau nsambishil. Pasutina chisu, etu awonsu tufanyidin kwishinshikin ayinetu. Tukutwish kwiyipul anch: ‘Kudiosh natambwila dibatish kushik ni nlel mutapu ik uyila kurutu urund wam ni Yehova? Ov, nidandamedin kumusadin nich muchim wam wawonsu? (Kolosay 3:23) Nikat kulembil chisu chawonsu? Nikat kutang Bibil dichuku diawonsu? Nikat kukumangan chisu chawonsu? Nikat kwipan mu kusal mudimu wa kulejan chisu chawonsu mudi muchifanyidina? Ap nashadishin kal musangar wam mulong wa midimu yiney?’ Kambuy Pita watubabesha anch kudi ubaj anch twaziy kusal mudimu wetu mulong wa Yehova. Tukutwish kwiyep yom yiney anch twakimb anch tusala mudimu nakash mulong wa kupam mu ritiy, kwikal ni ronganyin, ni kwipan kwa winzamb.—Tang 2 Pita 1:5-8.
Mapit ma mu Spiritu
Yipul Ya In Kutang
Mulej 5:8 wisambidin piur pa ntakel wakad kutentam uyimeshina atuzwendj mar. Ntakel winou ufanyidin kuvurik anch, kudi muntu udia piur nakash, ukweta ulabu upandakena kumusutamu ndiy, umena yom yawonsu yisadinay. Ufanyidin kand kwijik anch kudi anyikel akwau akweta ulabu kumusutamu ndiy. Cha ushon, mu mant ma antu, antakel awonsu inay chiswapel kuyikatul milamu, ni antu akat kuman mar mulong wa kuburen kutentam kwinoku.
Pakwez, ap anch chimeken mudi kwikil ruchingej, tukutwish kutan rongoj kusutil kwijik anch, Yehova uyimen, ap antakel akweta ndond ja piur mu mant. Tukutwish kumwit Nzamb ukwash ni kumudjubwil yisend yetu. (Kus. 55:22; Fil. 4:6, 7) Twij anch “[Yehova] wendishil mes mend pansh pawonsu, chakwel ayimanyin apanyina michim yau yawonsu kudi ndiy.”—2 Jsng. 16:9.
Chawiy, mukand wa Mulej 5:8 umekeshin mutapu udiau anyikel atutakedila mu mangand minam; kupwa, umekeshin kand anch kudi muntu udia wa piur nakash, ukweta ulabu upandikena kuyisutamu anyikel awonsu a chiwuntu. Pakwez cha usey nakash, verse winou utuvurishin anch Yehova ndiy udia wa piur nakash, ndiy ukweta ulabu upandikena kuyisutamu antakel awonsu. Katat uyikedil kusutil Mwanend Yesu Kristu wadishinay kal Want. Mwin Dikand Diawonsu ukata kuman yom yawonsu ni antu awonsu, uding chisu chawonsu utentamina, ni wawiy mutapu udingay kamu Mwanend.
RUBING RA 13-19 NGOND WA 10
YOM YA USEY YIDA MU DIZU DA NZAMB MULEJ 7-8
‘Yang ku chikumbu cha chidil’
Yom Tukutwisha Kwilejin ku Kudil kwa Yesu
Yongoja antu anenganena. Yesu kimenap kwend kusu pa kudil pamwing ni Mart ni Mariy, pakwez wayitesha kand ni kuyilej mazu makasikeshina. Tukutwish niyetu kuyisadin antu anenganena mutapu winou. Mukadivar Dan, mukurump wa chikumangen ushicha mu Ostrali, ulondin anch: “Kupwa kwa mukajam kufa, nikala ni kuswir kwa rongoj. Kwezang ambay a uruw kushalijan muten ni uchuku mulong wa kwintesh. Kankangeshap kuyirumburil ushon nading nich ni kovap kuyip pinadilang. Ankwasha kand yom yivud mud kowish motak, kuland yakudia, ni kwisuk, chisu novang anch nikutwishap kusal midimu yiney. Ni yisu yivud alembilang nam pamwing. Amekesha kamu anch ad arund ni akadivar akin adia kwaku ‘mulong wa kukwash mu yirung yikash.’”—Jnsw. 17:17.
Yikwasha Antu Akwau Kurish ni Yakamish
15 William wafisha mband mu mivu yasutina ey ulondin anch: “Nikatining nakash anch antu akwau asambish kwinlej piur pa yom yiwamp yivurikinau piur pa mukajam; chinech chikat kwinginkish kashinsh anch ading amukatin ni amulimishin. Anch antu asal mwamu chikat kwinkwash nakash. Mazu mau makat kwinkasikesh nakash, mulong mukajam wading wa usey nakash kudi am ni nading nijidin kal nend nakash.” Mwadiamufu utazukinau anch Bianca ulondin anch: “Chikat kwinkasikesh nakash anch antu akwau alembil pamwing niyam ni anch twatang nau pamwing verse umwing ap maad. Chikat kwinkwash nakash anch asambish kwambamb piur pa nfumwam ni anch antesh chisu chiniyilejina piur pend.”
w17.07 paj 13 par. 16
‘Dilany Nau Antu Adidina’
16 Malembil metu makutwish kuyikwash akadivar nau anambaz netu anenganena. Tukutwish kuyilembil ap kulembil nau pamwing. Ap anch chikutwish kukukasiken kusal mwamu mulong utongin anch ukudil, malembil mey madiokila ku muchim makutwish kwongoj nakash . Dalene uvurikin anch: “Yisu yimwing pezangau anambaz mulong wa kwingongoj, nayipulang anch akatin kulembil pamwing niyamam. Asambisha kulembil, kwinsambishin amamatang, pakwez yisu yivud mu mazu makemp dizu diau diakasikana ni alembila malembil madiokila ku muchim. Ritiy rau rikash, rukat rau, ni kwibangin kwau kwakasikesha ritiy ram nakash.”
w17.07 paj 13-14 par. 17-19
‘Dilany Nau Antu Adidina’
17 Chikasiken kwijik kamu nawamp chisu chikudandamenay muntu kwikal ni ushon. Anch muntu ukatina wafa, kwisambishin arund ni anamakwey akutwish kwikalaku mulong wa kukongoj. Pakwez kupwa kwa antu kuchirik kwol kwau, antu akweta runeng akudandamen kwikal ni kuswir kwa rongoj. Chawiy irijeka mulong wa kuyikwash. ‘Murund muwamp ukat kumekesh rukat machuku mawonsu. Udi mwanamaku wavadika mulong wa kukwash mu yisu ya mar.’ (Jinswir 17:17) Tufanyidin kuyongoj antu akweta ushon mu chisu chikwetau kuswir kwetwetu.—Tang 1 Tesalonik 3:7.
18 Vurik anch muntu ukweta ushon ukusambish kwov runeng chisu chawonsu. Chinech chikutwish kwikal mulong wa kuvurik machuku kanang, mizik yimwing, yipich, midimu, ap res ra chom kanang, dizu ap chirung kanang cha muvu. Anch mufir ap mwadia mufu wasal chom kanang kapamp ka kusambish amwinend, mudi kukumangan ku chitentam ap ku Chivurikish, chikutwish chamunenganesh nakash. Mukadivar umwing ulondin anch: “Nachingejina anch kuvurik kapamp ka kusambish dichuku twatijana kupwa kwa rufu ra mukajam kwafanyina kwinsal nayimp nakash ni chadingap chiswapela. Pakwez akadivar akemp nau anambaz atenchika mulong wa kukumangan pamwing nau arund a piswimp chakwel kangal niyov anch nidi amwinam.”
19 Vurik anch antu akweta ushon akwet kuswir kwa kuyikasikesh kadiap kwau ching mu yisu ya pakampwil. Junia urumburil anch: “Ukwash ni urund wa chisu chawonsu udi wa ukwash nakash kusutamu kwau ukwash upaninau pa chisu cha kuvurik dichuku diasadika chom kanang. Yisu mudi yakad kutongin yidi ya usey nakash ni yikat kulet rongoj nakash.” Chidi chakin anch tukutwishap kupwish ushon wau ap yovil ya kwikal ayinau, pakwez tukutwish kuyikasikesh antu akweta ushon ni runeng pa kusal yom mudi yiney. (1 Yohan 3:18) Gaby ulondin anch: “Nimujikitishin Yehova nakash mulong wa amakurump a rukat ezang kwintal mulong wa mar mawonsu manshikena. Asala niyova anch nidi mu makas ma rukat ma Yehova.”
Mapit ma mu Spiritu
“Ku Chinech Kwawiy Kukwijikinau Antu Awonsu Anch En Udiany in Kwilej Amam”
18 Yisu yimwing anch mbay netu mwin Kristu waturumbukin, tukutwish pamwing ap kwov ja kwambamb nend pa mulong winou. Pakwez chakusambish, tufanyidin kwiyipul yipul mud: ‘Ov, nikwet kamu uman wawonsu piur pa yom yasadikang?’ (Jnsw. 18:13) ‘Ov, wanrumbukinang kamu kwa kwisotin?’ (Mul. 7:20) ‘Ov, niyam narumbukinap kal mwamu?’ (Mul. 7:21, 22) ‘Anch napakish kwisamb nend, ov, nikujimbishap kand mulong pandond pa kuupwish?’ (Tang Jinswir 26:20.) Anch twitekin chisu cha kutongijokin pa yipul mud yiney, rukat tukweta mulong wa mukadivar netu rikutwish kutubachik kudiul kwau.
RUBING RA 20-26 NGOND WA 10
YOM YA USEY YIDA MU DIZU DA NZAMB MULEJ 9-10
Dandamen Kulam Chitongijok Chiwamp Chisu Urishina ni Yikokujol
w13 1/8 paj 17 par. 20-21
Kangal ‘Wamujimen Yehova’
20 Kimbany kudiokila milong. Mulong wak tufanyidin kusal mwamu? Chakin, tukutwish kwikal nich chisend pa milong yetu yimwing. Anch twij anch yetwa, tufanyidin kwitiyij chinech. (Gal. 6:7) Kangal twapakish kumufish nich Yehova pa milong yiney. Ov, mulong wak kusal mwamu kudi kwa usup? Shinshikin chilakej ech: Motak ukutwish kuya mau nakash. Tong bil anch mwin kwendish uyil mau nakash kupandakenamu chipim cha mau chatekau mulong wa kusut mu kanyingumuk, ni wawa. Ov, mwin kusal mwotak ukutwish kwikal ni mulong piur pa aksident winou? Bwat kwau! Chilik chimwing, Yehova watutanga ni want ipau. Pakwez ndiy watwinkisha kand yany piur pa kukwat mipak ya manangu. Chawiy lel, ov, mulong wak tukumufish nich Sakatang wetu mulong wa uyimp wetwetu ayinetu?
21 Chakin kamu, milong yetu yawonsu yidiokilap ku uyimp ap ku yisal yetwetu ayinetu. Yom yikwau yikutwish kushiken mulong wa ‘chisu cha mar chikata kushiken.’ (Mul. 9:11) Chawiy lel, kangal twavuramen anch Satan Djabul ndiy udia musul wa kusambish wa uyimp. (1 Yoh. 5:19; Kuj. 12:9) Ndiy udia mukankuny—pikil Yehova!—1 Pita 5:8.
Yehova Uyikwatin Nich Usey Atushalapol End Ikepishina
10 Kwikepish kukat kuwapish mashakamin metu. Chakin kamu, yisu yimwing yom tutongina anch yidi yakad kutentam yikutwish kutushiken. Mwant Salomon, ikundj wading ni manangu nakash walonda anch: “Namana kand aswik akat kwendil pa atubar, ni ant akat kwend pansh mudi aswik.” (Mul. 10:7) Antu akweting ukaliweny nakash kakatap kutambul ntumb chisu chawonsu. Pakwez yisu yimwing antu akweting ukaliweny ukemp akat kwikal ni ntumb nakash ni antu akat kuyishinshikin. Ap mwamu, Salomon wajingunina anch tufanyidin kwitiyij mashakamin mutapu madia pa ndond pa kujiman piur pa mutapu usadikina yom mu mashakamin metu. (Mul. 6:9) Anch twikepishin, chikutuswapel kwitiyij mutapu udia mashakamin metu—ap anch madiap mutapu tukatina.
w11 1/10 paj 10 par. 1-2
Ov, Kwipuwangesh Kwey Kudi Kwa Ukwash?
MU BIBIL, mudi mazu malejena anch Yehova usotin anch twikala aom ni tusangera mwom wetu. Chawiy lel, Kuseng 104:14, 15 ulejen anch Yehova usadil anch “divu dibudisha yakudia yau, ni nviny ya kusangarish michim ya antu, many ma kuwapish mpal yau, ni mabot ma kukasikesh michim yau.” Chikwau kand, Yehova ukudishin mbut mulong wa kusend mabuj, kudiosh many, ni nviny mulong wa kutukwash. Pakwez nviny niyawiy ‘yikat kulet kuzangijal.’ Yidi yom yilondwila yom yidia ya usey nakash mulong wa mwom ni musangar wetu. (Mul. 9:7; 10:19) Mwaning, Yehova usotin anch twikala nich musangar, ni twizwisha michim yetu nich “musangar.”—Mid. 14:16, 17.
2 Pakwez, kwikil diyingish dia kwifish nich anch twitekina kapamp kamwing chisu cha ‘kutal atujil a mwisuku’ ni “yisalamb ya mu masuku mutapu uyidia” ap kusanger mijikit yikwau yitusangareshina ni yikasikeshina mwom wetu. (Mat. 6:26, 28; Kus. 8:3, 4) Mwom uwamp udi ‘kupan kwa Nzamb.’ (Mul. 3:12, 13) Kuman chisu cha kupim mudi chikunku cha chipan kukez kutubachik chakwel tuusadila mu mutapu wa kwel anch tumusangaresha mwin Kupan.
Mapit ma mu Spiritu
Yom ik Yikata Kushikenang Anch Muntu Wafa?
1. Yom ik yikata kushikenang anch muntu wafa?
Yesu wafanakesha rufu ni tul tukash. Anch muntu widjibulang kal mu tul tukash, kakatap kand kwijik yom yisadikina bwat. Rufu rifanaken mutapu ik ni tul? Anch muntu wafa, kakutwishap kand kwov kusansan. Kakutwishap kand kwiyov anch ud diamwinend ap anch wad uyikatin nakash arund nend ni anamakwend kurutu kwa kufa. Bibil ulondin anch: “Afu kijap chom.”—Tang Mulej 9:5
RUBING RA 27 NGOND WA 10–2 NGOND WA 11
YOM YA USEY YIDA MU DIZU DA NZAMB MULEJ 11-12
Ikal ni Ukash wa Mujmbu Uwamp, ni Sanger Mwom
Sadin Yitang Mulong wa Kuyifundish Aney Piur pa Yehova
16 Yitang ya Yehova yikutwish kand kukwash majuku kwipuwangej ni kusangar pamwing, ni chinech chikutwish kukasikesh uumwing pakach pau. Bibil ulondin anch “kudi chisu chikwau cha kusip” ni “kudi chisu chikwau cha kuja maj.” (Mul. 3:1, 4) Kusutin yitang yend, Yehova watwinkishin kal jindond jiwamp nakash mu tukutwisha kwipuwangejin. Majuku mavud makatining kusutish chisu pamwing mu masuku, ku mikandu, ap ku kawit. An avud akatining kusengan mu park, kutal annam, ap kwisay ku kawit, ku dijiy dijim, ap kand ku karung. Tukwet mitapu yivud ya kwipuwangej nich yitang ya Yehova!
Kwat Nich Usey Chipan Chatwinkishay Nzamb—Mwom
6 Ap anch Bibil kadiap buku wa chimwingang ap ulejena yom tufanyidina kudia ni yitufanyidina kwipuk, pakwez utukwashin kwijik chitongijok cha Yehova pa milong yiney. Chilakej, utuyudin ‘kwiyep yom ya ubaj’ yikutwisha kushesh mujimbu wetu. (Mul. 11:10) Bibil ukangeshin wimpumb a kudia ni kuleu, yaku yitekina mwom mu ubaj. (Jnsw. 23:20) Yehova ukatin anch twilam mu yom tutondina kudia ni kuna, ni uvud way.—1 Kor. 6:12; 9:25.
7 Tukutwish kukwat mipak yimekeshina anch tukwatin nich usey nakash mwom, chipan cha Nzamb, kusutin kusadin ukaliweny wetu wa kutong. (Kus. 119:99, 100; tang Jinswir 2:11.) Chilakej, tukat kwikal isikena mu yom tudila. Anch tukatin yakudia kanang pakwez twij anch ang twayidia yikat kutuyedishang, chid cha usey kuyipuk. Tukat kumekesh kand anch tud in manangu kusutil kulal mu chisu chiwanyidina, kwiyijidish chisu chawonsu, kwikal inangina chisu chawonsu ni kwikal ni chaku cha kwinangish mu chikumbu chetu.
‘Twikalany in Kusadin Dizu da Nzamb’
2 Tukwet musangar mulong tud atushalapol a Yehova. Mulong wak? Tukwet mayingishin mavud, pakwez kud diyingishin dimwing dida da usey nakash: tukat kutang Dizu da Nzamb pakad kujing ni tukat kusadin yom twilejina.—Tang Jakobu 1:22-25.
3 Anch ‘twikal in kusadin dizu da Nzamb,’ tukutaninamu mu mitapu yivud. Chilakej, anch twasadin yom twilejina mu Bibil tukat kumusangaresh Yehova, kupwa niyetu tukat kwikal kand ni musangar. (Mul. 12:13) Chikwau kand, anch twasadin yom twilejina mu dizu da Nzamb tukat kuwapish urund wetu ni antu a mu dijuku detu pamwing kand ni akadivar nau anambaz netu. Pamwing ap yom yiney yakushikedinap kal mu mwom wey. Cha usey nakash, tukat kwipuk milong yivud yikwetau antu akad kuziyin kwi mbil ja Yehova. Yawiy kamu yom yalonday Mwant David. Mu muminy wend umwing, kupwa kwa kujimbul chijil, yijidik, ni dirumburish da Yehova, walonda anch: “Muntu mwawonsu ukata kuyila ukuman kuwap kujim.”—Kus. 19:8-12.
Mapit ma mu Spiritu
Kwat Nich Usey Chipan Chatwinkishay Nzamb—Mwom
6 Ap anch Bibil kadiap buku wa chimwingang ap ulejena yom tufanyidina kudia ni yitufanyidina kwipuk, pakwez utukwashin kwijik chitongijok cha Yehova pa milong yiney. Chilakej, utuyudin ‘kwiyep yom ya ubaj’ yikutwisha kushesh mujimbu wetu. (Mul. 11:10) Bibil ukangeshin wimpumb a kudia ni kuleu, yaku yitekina mwom mu ubaj. (Jnsw. 23:20) Yehova ukatin anch twilam mu yom tutondina kudia ni kuna, ni uvud way.—1 Kor. 6:12; 9:25.