Machip mad mud nkal ulamina uruw wey mu yisu ya rinkind mukash
YITADINA AMBAY A URUW
1 Machip
KURUMBURIK
Amakundj ni amband akata kulimish machip mau ma uruw akat kumaman mud uumwing udandamedina ni chinech chikat kusal anch iyova anch ad mu diking. Mbay wa uruw mwawonsu ukat kwikal nich kashinsh anch mukwau ukulamat kand ku uruw wau, ap mu yisu yikash.
Ambay a uruw amwing akat kuman anch afanyidin ching kushakam pamwing mulong ayishindidil kusal mwamu kud antu ayinyingumukina ap kud antu a mu majuku mau. Pakwez, machip mafanyidin kwimen pa rukat ni kalimish ka ambay a uruw.
MBIL YA BIBIL: “Ikundj kafanyidinap kulikijan nend mukajend.”—1 Korint 7:11.
“Anch ulimishin machip mey ma uruw, ukujimanap ap ukutwishap kusal nayimp anch akurumbukin. Ukwikal mwin kulikishin swa ni ukwit kand dilikishin pakad kulab. Ukuman anch milong yid kwau yom yikata kushiken, yidiap mayingishin ma kujip nich uruw.”—Micah.
MULONG WAK CHID CHA USEY
Anch kwalank milong, ambay a uruw akad kulimish machip mau akat kushikenang kapamp kamwing ku kulond anch: ‘Tutanijadinap, katutangap kwetu mulong wa kushakam pamwing’ ni akat kukimb chad mitapu ya kujip kwau uruw.
“Antu avud akat kwatan ap kwachik nich chitongijok cha kwel anch ang yakasikan akwet kwau ‘mutapu uwamp wa kupwish milong’—kujip uruw. Anch muntu watan ap wachik nich chitongijok chinech kurutu kwa chisu, kwawiy kulond anch akwatin kwau machip nich usweral kudiosh kwisambishil.”—Jean.
YOM UKUTWISHA KUSAL
ISHINSHIKINA
Chisu utendina ni mbay ney wa uruw . . .
Ov, ukat kunenganan amwiney mulong wamwata ap wachika?
Ov, ukat kutong kwey kwikal ni ikundj ap ni mband mukwau?
Ov, ukat kulond yom mud ey: “Nikukulik” ap “Nikukimb mukwen mukwau ukutwisha kwinkwat nich usey”?
Anch wakul anch mwaning ku chipul chimwing ap ku yipul yawonsu yiney, chinech chawiy chisu cha kukasikesh machip mey ma uruw wasala.
AMBAMB NI MBAY NEY WA URUW
Ov, machip twasala pakwatijan tumakwatin kamu nich usey? Anch bwat, mulong wak?
Yom ik tukutwisha kusal kamu katat mulong wa kukasikesh machip metu?
YIYUL
Yisu ni yisu, mufundinap nfumwey ap mukajey kamukand ka rukat
Mekesh anch ulimishin machip mey mu kutek yipich ya mbay ney wa uruw pa biro wey ku mudimu
Mutazuka nfumwey ap mukajey ku telefon chisu ni chisu anch ud ku mudimu ap ndond yikwau
MBIL YA BIBIL: “Muntu kafanyidinap kwauril antu abombakeshay Nzamb.”—Mateu 19:6.