Mazu ma kalimish mad mud ulaaj uungina pamwing uruw wen
YITADINA AMBAY A URUW
3 Kalimish
KURUMBURIK
Ikundj ni mband alimishijadina akat kubangijadin umwing ni mukwau ap anch kwovijadinap piur pa mulong kanang. Buku umwing Yiyul Dikum Mulong wa Kuswimp Uruw wey (mu Inglish) ulondin anch: “Ambay a uruw inay kakatap kulamat ching ku yom yitonginau. Pakwez akat kudandamen kwambamb umwing ni mukwau piur pa milong yau. Akat kutesh nich kalimish yitongijok ya mbay nau wa uruw ni kukimb mitapu ya kupwish milong yikuyikwasha awonsu aad.”
MBIL YA BIBIL: “Rukat rikatap . . . kwitong.”—1 Korint 13:4, 5.
“Nimekeshin anch nimulimishin mukajam mu kusanger yom yikwatinay nich usey ni kwipuk kusal chom chin chawonsu chikutwisha kumwovish nayimp ap kuyipish uruw wetu.”—Micah.
MULONG WAK CHID CHA USEY
Pakad kalimish, mambamb mading pakach pa ikundj ni mband makutwish kwikal maburedina kamu kalimish, ma masaal ap kand ma kapipej—in kukimbijol alondin anch yom mud yiney yid yijingidij yimekeshina anch uruw ukimbin kufa.
“Mases, kulond yom yiburedina kalimish ap kusal maswimb mayimp piur pa mukajey kukusal iyova anch ud muntu wa chamwamu, kukumubachik kulik kukuchingejin ni kukutwish kujip uruw wen.”—Brian.
YOM UKUTWISHA KUSAL
ISHINSHIKINA
Shinshikin nakash mambamb mey ni yisal yey mu rubing rumwing. Kupwa iyipula anch:
‘Tupamp twinch namulondang nfumwam ap mukajam nayimp, ni tupamp twinch namujikitishang?’
‘Mu mitapu ik yimwing yimekena patok namekeshang anch nimulimishin mbay nam wa uruw?’
AMBAMB NI MBAY NEY WA URUW
Yisal ik ni mazu ik makumukwasha muntu ni muntu kwiyov anch mukwau umulimishin?
Yisal ik ni mazu ik masadining muntu ni muntu iyova anch kamulimishinap kud mukwau?
YIYUL
Fund pa ndond kanang mitapu yisatu ukatina anch akumekeshin kalimish. Muleja nfumwey ap mukajey niyend afunda mwamu. Kupwa swimpijanany ma list minam, ni salany usu wa kusadin yom wafundanganya pa ma list minam.
Fund pa dipaper mikadil ya nfumwey ap ya mukajey ukata kusanger nakash. Kupwa mulejamu mulong wak ukat kusangerang mikadil yiney.
“Nimekeshin anch nimulimishin nfumwam mu yisal yam kusutil kusanger yom yikwatinay nich usey ni nisotin anch ikala nich musangar. Kalimish karumburikinap kwau kusal yom yijim; yisu yimwing yom yikemp yikemp yikatay muntu kusal chisu chawonsu yimekeshin kalimish kakin.”—Megan.
Cha nsudiel, chitinap kwau kwiman amwiney anch udi muntu ukata kumekesh kalimish ap bwat; cha usey chid kwijik anch mukwen wiyovil kamu anch udi muntu ulimishinau.
MBIL YA BIBIL: “Chawiy djalany riy, ni kudimuk, ni kwishikumwish, ni kuwap, ni kushimpish kwa muchim.”—Kolosay 3:12.