Kusal pamwing mu kwovijan mu uruw kurumburikin anch udiany mud muntu wendishina aviyon ni nkwash wend ayila ndond yimwing
YITADINA AMBAY A URUW
2 Kusal Pamwing
KURUMBURIK
Anch ikundj ni mband asadin pamwing, ad mud muntu wendishina aviyon ni nkwash wend ayila ndond yimwing. Ap anch kwalank milong, mbay wa uruw mwawonsu ukat kulond anch “etu” pa ndond pa kulond anch “am.”
MBIL YA BIBIL: “Awiy kadiap kand antu aad, pakwez ikal kal muntu umwing.”—Mateu 19:6.
“Uruw udiap mud ngam ya kubul kud muntu umwing. Ikundj ni mband afanyidin kusal pamwing chakwel uruw wau wikala usangareshina.”—Christopher.
MULONG WAK CHID CHA USEY
Anch kwalank milong, ikundj ni mband akad kusal pamwing akwikal ni chaku cha kurish umwing ni mukwau pa ndond pa kurish ni mulong ukwetau. Tumilong tukemp tukemp kwau tukukarumuk chad kwikal milong yijim.
“Kusal pamwing kud kwa usey nakash mu uruw. Anch am ni nfumwam tusadinap pamwing, ing tud mud antu aad ashicha mu chikumbu chimwing pa ndond pa kwikal ikundj ni mband—antu aad ashicha kwau pamwing pakwez akad kwikal mu uumwing chisu cha kukwat mipak yijim.”—Alexandra.
YOM UKUTWISHA KUSAL
ISHINSHIKINA
Ov, nikat kuman anch nfalang jikatau kwinfut ku mudimu “jawonsu jid jaman amwinam”?
Ov, nifanyidin kwikal kulemp ni mbay nam wa uruw mulong wa kwiyovaku pee?
Ov, nikat kuyipuk anamakwend a nfumwam ap a mukajam, ap anch ndiy ud nau piswimp nakash?
AMBAMB NI MBAY NEY WA URUW
Mu jinjil ik tusadina kamu pamwing mu kwovijan mu uruw wetu?
Mu mitapu ik tukutwisha kuwapish?
Yom ik tukutwisha kusal mulong wa kurijek mutapu tusadina pamwing?
YIYUL
Kangal wamuman mbay ney wa uruw mud muntu udia mu chisak chikwau chisu ubudinanya ndundu. Pa ndond pa kwikal mwamu, yom ik yimwing ya ukwash ukutwisha kusal chakwel en awonsu usenganany mu chisak chimwing ni mbay ney wa uruw?
Pa ndond pa kutong anch: ‘Mutapu ik nikutwisha kuwin?’ tong anch: ‘Mutapu ik tukutwisha etu awonsu aad kuwin?’
“Kangal kukimb kwijik nany uyingina nich ni nany ufila nich. Chisambu ni uumwing yawiy yom ya usey nakash mu uruw wen.”—Ethan.
MBIL YA BIBIL: “Chifanyidin muntu ni muntu atala ku yom ya mwom wa mukwau, wakad kutal nawamp ching ku yom ya mwom wend amwinend.”—Filip 2:3, 4.