Shapitre Wa Dikum Ni Yinying
Mutapu ik Utakedilay Yehova Dirijek Diend?
1. Ov Baibel ulejen rusangu ik piur pa dirijek dia Yehova, ni mulong wak ridia ra usey nakash kud etu?
OV NZAMB ukwet dirijek? Mifund yipepidilau yitulejin anch ukwet dirijek. Mu Dizu diend, ndiy utwinkishin chitongijok chikemp piur pa chikunku chishimokishina cha dirijek didia mwiur. (Ezekiel 1:1, 4-14; Daniel 7:9, 10, 13, 14) Ap anch tukutwishap kuman chikunku chinech chakad kumekan, chidi ni yibudikin yijim nakash kud in kwifukwil akin nlel. (2 Ant 6:15-17, NW) Dirijek dia Yehova dikwet kand chikunku chimekena pa divu. Baibel utukwashin kwijik kurumburik kwa dirijek dined ni mutapu uditakedilay Yehova.
Kujingunin Chikunku Chimekena
2. Chikumangen ik chikwau chasalay Nzamb?
2 Mu chirung cha mivu 1545, muchid wa Isarel wading chikumangen cha Nzamb. (Midimu 7:38) Pakwez Isarel wakanganya kulam yijil ya Nzamb ni wamulika Mwanend. Yehova ni yend walika chikumangen chinech ni kuchidjibulang kamu. Yesu wayileja in Yuda anch: “Chawiy katat chikumbu chen chikez kushal chamwamu.” (Mateu 23:38) Kupwa Nzamb wasala chikumangen chikwau chisu, chawiy chasukay nich manswik masu. Chikumangen chinech chading chifanyidin kwikal ni antu 144 000 atondau kud Nzamb chakwel kwikal mu uumwing ni Mwanend mwiur.—Kujingunik 14:1-4.
3. Ov chom ik chasadika pa dichuku dia Pentekot mu 33 C.C. mud uman wa patok anch katat Nzamb usadidil chikumangen chisu?
3 Antu a kusambish mu chikumangen chinech chisu ayizizila many nich spiritu utumbila wa Yehova pa dichuku dia Pentekot mu muvu wa 33 C.C. Tutangin piur pa chinship chinech chijim, anch: “Chidiashika dichuku dia musambu wa Pentekot, in kwitiyij awonsu akumangena ndond yimwing, kukashimuk, kweza chidjimin chadiokala mwiur, chovakana mudi chonyin cha rinkind watuta nakash, chidjimin chinech chizwila chikumbu chawonsu mwadingau ashich. Chad amana chom mudi mizwizu ya kasu. Mizwizu yiney yading yifanaken mudi jindim, jauroka, chad rudim ni rudim rawila pa muntu ni muntu, chawiy antu awonsu awanyina. Awiy awonsu izula ni [spiritu utumbila NW].” (Midimu 2:1-4) Mwamu spiritu wa Nzamb wapana uman wa patok anch chinech chading chisak cha antu akusadilay Nzamb chakwel kuwanyish rutong rend mwishin mwa umutakel wa Yesu Kristu mwiur.
4. Ov anany asadila nlel dirijek dimekena dia Yehova?
4 Nlel, ching kusu atushal a 144 000 awiy adia pa divu. Pakwez mu kuwanyin kwa uprofet wa Baibel, “chisak chipandikena kujimb” cha “amikoku akwau,” mamiliyon ma antu, adi mu urund ni chisak cha kashal uzizidilau many. Yesu, Kafung Muwamp, wanungin kal amikoku akwau inay ni chisak cha kashal chakwel kuyisal awonsu diyind dimwing mwishin mwend mud Kafung wau umwing. (Kujingunik 7:9; Yohan 10:11, 16) Awonsu asadil chikumangen chimwing chidia mu uumwing, dirijek dimekena dia Yehova.
Dirijek Ditakedilau kud Nzamb
5. Ov nany utakedila dirijek dia Nzamb, ni mutapu ik uditakedilay?
5 Dizu dia Mifund ‘chikumangen cha Nzamb mwom’ dimekeshin patok muntu ukata kuchitakel. Dirijek dined aditakedil kud Nzamb, ap anch, Nzamb ndiy uditakedila. Yehova uyitakedil antwend kusutin kud Yesu, muntu watonday kwikal Mutu wakad kumekan wa chikumangen, ni kusutin ku Dizu Diend dipepidilau, Baibel.—1 Timote 3:14, 15; Efes 1:22, 23; 2 Timote 3:16, 17.
6. (a) Ov mutapu ik wamekana umutakel wa mwiur mu chikumangen mu mivu chitot ya kusambish? (b) Ov chom ik chimekeshina anch Yesu ndiy udia Mutu wa chikumangen djat ni katat?
6 Umutakel winou wamekana kamu patok pa dichuku dia Pentekot. (Midimu 2:14-18, 32, 33) Wamekana kamu patok patakelay mwangel wa Yehova kupalangesh kwa rusangu ruwamp djat ni mu Afrik, dizu dia Yesu pidiatakela kukarumuk kwa Saul wa ku Tarsis, ni pasambishay Pita mudimu wa kulejan pakach pa Akamichid. (Midimu 8:26, 27; 9:3-7; 10:9-16, 19-22) Pakwez, mu kusut kwa chisu, kwikalap kand kutesh kwa mazu madiokila mwiur, kwikalap kand angel adinga ni kumekan, kwikalap kand yipan ya muspiritu ya kusal yilay. Chikalap nchik mwamu, Yesu washilamu anch: “Chawiy am nikez kwikal ni yenen machuku mawonsu, djat ni kwisudiel kwa mangand.” (Mateu 28:20; 1 Korint 13:8) Nlel, Atuman’a Yehova itiyijin umutakel wa Yesu. Pakad umutakel winou, kulejan kwa uruu wa Want pa chirung chinech chikweta rupompat rijim kwelang kwikal kukash nakash.
7. (a) Ov anany asadila chisak cha “kashalapol wakin ukweta manangu,” ni mulong wak? (b) Mudimu ik wamwinkishau “kashalapol” winou?
7 Chisu chikemp kurutu kwa rufu rend, Yesu wayileja in kwilejend piur pa “kashalapol wakin ukweta manangu” anch ndiy chidiay Mwant ukumwinkish chisend cha pakampwil. “Kashalapol” winou wela kwikalaku pa chisu chayay Mwant mwiur ni ufanyidin kwikalaku kand uchisadila mudimu ukash mu chirung cha kuchirik kwakad kumekan kwa Kristu mu ulabu wa Want. Kushimunin mud kwinoku kukasiken nakash anch kwambatana nich muntu umwing kusu, pakwez kwambaten kamu nakash nich chikumangen cha Kristu chizizidilau many. Chachilanday nich mash mend, Yesu wading ni kuchisambin mud “kashalapol” wend. Ndiy wayinkisha yid ya chisak chinech mudimu wa kwikadish in kwilej ni kuyidish pakemp pakemp, “kuyangen yakudia [ya muspiritu] pa chisu chiwanyidina.”—Mateu 24:45-47; 28:19; Isay 43:10, NW; Luka 12:42; 1 Pita 4:10.
8. (a) Ov chisak cha kashalapol chikwet yisend ik katat? (b) Mulong wak kwitiy kwetu malejan ma Nzamb kusutil njil yiney kudi kwa usey nakash?
8 Mulong chisak cha kashalapol chading ni kusal mudimu wa Nsalejau nich kushinshaman pa chisu cha kuchirik kwend kwakad kumekan mu 1914, kudi uman wa kwel anch chisak chinech achinkisha kand yisend yikwau yijim mu 1919. Mivu yasutinap kal ey yadinga chisu cha kupan uman wa Want pa divu diawonsu, ni akat kukumangej chisak chipandikena kujimb cha in kwifukwil akwau a Yehova mulong wa dipandish diau kusutin mu mar majim. (Mateu 24:14, 21, 22; Kujingunik 7:9, 10) Ni yawiy akwet kuswir kwa yakudia ya muspiritu, ni akat kuyinkish yakudia yiney kud chisak cha kashalapol. Chakwel anch tumusangaresha Yehova, tufanyidin komb kwitiy malejan mapaninay kusutil njil yiney ni kumasadil.
9, 10. (a) Mu mivu chitot ya kusambish, ov kwadinga yitenchik ik chakwel kupwish yipul piur pa mafundish ni kupan umutakel wa kulejan rusangu ruwamp? (b) Ov yitenchik ik yidiaku nlel mulong wa kutakel mijikit ya antu a Yehova?
9 Yisu yimwing, kukat kubudikinang yipul piur pa mafundish ni mutapu wa kutakel. Ov chom ik chifanyidina kusal? Midimu shapitre wa 15 utulejin mutapu wapwishau chipul piur pa Akamichid akarumuka. Mulong winou autwala kurutu kwa apostol ni amakurump adinga ku Yerusalem, antu adinga ni kusal mud chisak chitakedila. Amakundj inay kadingap antu awanyidina, pakwez Nzamb wayisadila. Awiy ashinshikina yilondina mifund piur pa chipul chinech ni kupwa kand ashinshikina uman wa kusal kwa spiritu wa Nzamb mu kwazuril chingand cha Akamichid. Kupwa awiy akwata lel mupak. Nzamb wayukisha ditenchik dined. (Midimu 15:1-29; 16:4, 5) Kudiokal ku chisak chinech chitakedila, awiy atonda antu chakwel kuyitum kuya ni kupalangesh mudimu wa kulejan Want.
10 Pa chirung chetu Chisak Chitakedila dirijek dimekena dia Yehova achisadil kud akadivar azizidilau many nich spiritu adiokila mwi ngand kushalijan ni chidi ku biro mujim wa mangand mawonsu wa Atuman’a Yehova. Mwishin mwa umutakel wa Yesu Kristu, Chisak Chitakedila chikat kuyish kurutu difukwil dishitwila mwi ngand ni ngand, chitakedil mijikit ya kulejan ya Atuman’a Yehova mu tunan twa yikumangen. Antu adia mu Chisak Chitakedila akwet chitongijok mud chadingay nich mupostol Paul, muntu wayifundina ambayend in Kristu anch: “Kichidip mulong etu tudi ant piur pa ritiy ren; pakwez tudi in mudimu nen ku musangar wen; mulong en wiminyany mu ritiy ren.”—2 Korint 1:24, TMK.
11. (a) Mutapu ik ukatau kuyitond amakurump ni ankwash’a mudimu? (b) Mulong wak tufanyidina kusadil pamwing ni antu atondinauu?
11 Atuman’a Yehova mu mangand mawonsu atadil ku Chisak Chitakedila chakwel kutond akadivar awanyishinau nawamp inkinau ni yawiy mbil ya kutond amakurump ni ankwash’a midimu mulong wa kulam yikumangen. Yiyitinau antu inay atondinau yidi mu Baibel ni ufanyidin kwijik anch amakundj inay kadiap antu awanyidina ni yawiy akat kurumbukang. Amakurump akata kupan yiyul ni kutakel akwet chisend chimwing chijim kurutu kwa Nzamb. (1 Timote 3:1-10, 12, 13; Titus 1:5-9) Chawiy lel, akat kulembilang mulong wa kutambul ukwash wa spiritu wa Nzamb ni kukimb umutakel wa Dizu diend dipepidilau. (Midimu 6:2-4, 6; 14:23) Tumekeshany kusanger kwetu mulong wa ‘amakundj inay mud yipan,’ akata kutukwash chakwel kushiken ku “uumwing mu ritiy.”—Efes 4:8, 11-16.
12. Mutapu ik ukatay Yehova kuyisadil amband mu ditenchik dia uteokras?
12 Mifund yilejen anch chisend cha ukafung mu chikumangen chifanyidin kwikal cha amakundj. Winou udiap mutapu wa kuyipipesh amband bwat, mulong amwing pakach pau adi answan a Want wa mwiur, ni yawiy akat kusal yivud nakash mu mudimu wa kulejan. (Kuseng 68:11) Chikwau kand, palaminau nawamp yisend yau ya mu dijuku, amband akat kuwejin ku katumb kawamp ka chikumangen. (Titus 2:3-5) Pakwez kufundish mu chikumangen chidi chisend cha amakundj atondinau.—1 Timote 2:12, 13.
13. (a) Ov yitongijok ik yikasikeshidinay Baibel yifanyidinau kwikal nich amakurump piur pa mudimu wau ? (b) Ov dilau ik tukweta etu awonsu?
13 Mu mangand, muntu udia kapit amumening mud muntu umwing mujim nakash, pakwez mu dirijek dia Nzamb mbil yidi anch: “Muntu upandakenamu kukep pakach penen, ndiy upandakenamu kujimb.” (Luka 9:46-48; 22:24-26) Mifund yikat kuyiyul amakurump kubabal palemp ez asambisha kutakel mud ant piur pa antu adia uswan wa Nzamb, pakwez ikala yilikej kud amikoku. (1 Pita 5:2, 3) Chidiap kusu antu akemp atondinau, pakwez Atuman’a Yehova awonsu, amakundj nau amband, akwet chisend cha kwikal antimesh a Mwin mangand mawonsu, akat kulond nich kwikepish mu dijin diend ni kuyifundish antu ndond yawonsu yidiau piur pa Want wend.
14. Nich kusadil mifund yijimbwilau, isambina yipul yidia kwisudiel kwa paragraf.
14 Tuwapidil kwiyipul anch: ‘Ov nikat kusanger chakin kamu mutapu ukatay Yehova kutakel dirijek diend dimekena? Ov chimeken mu yitongijok yam, mu kulond kwam, ni mu yisalijok yam?’ Kutongijokin pa manans malondwilaku am kukutwish kutukwash muntu ni muntu kwishinshikin:
Anch namuziyil chakin Kristu mud Mutu wa chikumangen, mutapu muchilejenau mu mifund yilondwila ey, ov yom ik nifanyidina kudandamen kusalang? (Mateu 24:14; 28:19, 20; Yohan 13:34, 35)
Anch nitiy nich kujikitish yakudia ya muspiritu yezina kusutil ku chisak cha kashalapol ni Chisak chend Chitakedila, ov nikat kumekesh kalimish kud nany? (Luka 10:16)
Mutapu ik ufanyidinay muntu ni muntu mu chikumangen, nakash kamu amakurump, kuyiman antu akwau? (Rom 12:10)
15 Yehova ukat kututakel nlel kusutin dirijek diend dimekena mwishin mwa Kristu. Mwikadil wetu wa manangu pantaliken nich ditenchik dined umekeshin mutapu tukata kutong piur pa chipul cha ukaleng wa mangand mawonsu. (Hebereu 13:17) Satan ukat kutadik anch kubangin kwetu kudi kusu kwa choy. Pakwez ang tukat kusadil mwi njil yawonsu yiswiridikina ni kwipuk yom yikutwisha kupwitin manangu padi ayinetu, tukumekesh anch Djabul udi mwin makasu. Ang tuyikatin ni kuyilimish antu atakelidila pakach petu ni kulik ‘mazu ma rilemb kudi antu mulong wa kuchingejin kutambul chom kanang,’ tukumusangaresh Yehova. (Yud 16; Hebereu 13:7) Anch twikal ashinshamena ku dirijek dia Yehova, tukat kumekesh patok anch Yehova udi Nzamb wetu ni tudi mu uumwing mu kumwifukwil ndiy.—1 Korint 15:58.
Misamb ya Kuchirikin
• Ov disu didia nlel dirijek dimekena dia Yehova? Dikwet rutong ik?
• Nany utondinau mud Mutu wa chikumangen, ni kusutin yitenchik ik yimekena kukatay kupanin umutakel wa rukat kud etu?
• Mikadil ik yiwamp ya manangu tufanyidina kukudish pantaliken nau antu adia mu dirijek dia Yehova?
15. (a) Ov chom ik tukata kumekesh nich mwikadil wetu wa manangu pantaliken nich dirijek dia Yehova? (b) Ov yisu ik tukweta chakwel kumekesh anch Djabul udi mwin makasu ni kusangaresh muchim wa Yehova?
[Chipich chidia pa paj wa 133]
Yehova ututakedil kusutin dirijek diend dimekena mwishin mwa Kristu