Dijuku Dia Yesu Diyil Ku Yerusalem

Chading chisu cha kapepil. Chawiy chisu chafanyina dijuku dia Josef, arund nend ni anamakwend kusal weny usadiningau muvu wawonsu mulong wa kuya ku Yerusalem. Ayangang kwinikwa mulong wa kusal musambu wa Pasak, mudi mwalondau mu Chijil. (Kuvurik Yijil 16:16) Kudiokal ku Nazaret mulong wa kushik ku Yerusalem, weny winou wading wa makilometre 120. Chading chisu chikwatakenau ni chisangareshina payangau mu weny winou. Padingay Yesu ni mivu 12, wading usangaredin chisu chinicha cha kuya kusal musambu mulong chading kand chisu cha kuya ku tempel.

Yesu ni dijuku diau, kamanangap musambu wa Pasak mudi musambu wa dichuku dimwing kwau. Kupwa kwa musambu wa Pasak asambishang kusal musambu wa Mabot Makad Chivish mu machuku sambwad. (Marko 14:1) Musambu winou wading chikunku cha Pasak. Weny wa kudiokal ku Nazaret mulong wa kuya ku Yerusalem kusal musambu kupwa kuchirik, weny winou wafanyina kusal mbing jaad. Pakwez, muvu winiwa, mulong wa yom yamushikena Yesu asala machuku mavud. Padingau pachirikinau ku Yerusalem kwashikena mulong kanang.

Padingau mu weny wa kuchirik, Josef ni Mariy ading ij anch Yesu wading pakach pa antu akwau, anamakwend ni arund nend ayau nau mu weny pamwing. Pakwez, pimanau uchuku anvaj end kamumanap Yesu. Chawiy, aya kumukimb pakach pa arund nend pakwez kamumanap. Mwanau ikundj washadika! Josef ni Mariy achirika mau mu Yerusalem mulong wa kumukimb.

Amukimba dichuku dia kabuj pakwez kamumanap. Amukimba kand dichuku dia kaad kamumanap. Kupwa, dichuku dia kasatu amutana mwanau ikundj ushich mu kapalikany kamwing ka tempel. Amumana Yesu ushich pakach pa alej in Yuda. Wading uyiteshin, uyipwil ni alej inay ashimoka nakash mutapu wend wa kutesh yom.

Mariy wamwipula anch: “Ov, mwanam, mulong wak watusala mwamu? Am ni tatukwey twakamang nakash mulong wa kukukimb ey.”—Luka 2:48.

Yesu wayakula anvaj end anch kadingap afanyidina kwijik ndond yadingay. Ndiy wakula anch: “Ov, mulong wak wankimbangany? Ov, kiwadianyap wijany anch, nifanyidin kwikal mu Chikumbu cha Tatukwam?”—Luka 2:49.

Pamumanau kal, Yesu wachirika pamwing ni Josef ni Mariy mu Nazaret ni wadandamena kuyiziyin anvaj end. Wapama mu manangu ni ku mujimbu. Kudiosh ku wanikanch wend, Yesu witapila dilau kurutu kwa Nzamb ni kwa antu. Kudiosh ku wanikanch wend kand, Yesu kashap ching kusu chilakej chiwamp cha kushinshikin yom ya muspiritu pakwez wading ni kuyiziyin anvaj end.