“Kwikil Muntu Walondap Kal Mudi Muntu Winou”

Yesu uchidi mu Yerusalem mulong wa Musambu wa Minkand (ap, wa ankunku). Usanger mulong “antu avud mu chisak amwitiyijin.” Pakwez, antakel a chirelijon kasangerap. Awiy atuma amasalay adinga ampurish a chirelijon mulong amukwata Yesu. (Yohan 7:31, 32) Pakwez, Yesu kajingamap.

Chawiy, Yesu wadandamena kulejan patok mu Yerusalem anch: “Am nikushakam ni yenen machuku makemp, chad nikez kuchirik kudi ndiy wantuma. En ukez kwinkimbany, pakwez kiukez kwinmananyap, mulong kiukutwishanyap kuya kwi ndond kunikeza kuya am.” (Yohan 7:33, 34) In Yuda kateshap kurumburik kwa mazu minam, chawiy asambisha kununganijan anch: “Ov, kwisu kukuyay kwakad etu kutwish kumuman? Ov, ukuya mu misumb yau in Grek mupalangedinau in Yuda mulong wa kuyilej in [Grek]? Ndiy ulondil anch: ‘En ukez kwinkimbany, pakwez kiukez kwinmananyap, mulong en kiukutwishanyap kuya kwi ndond kunikeza kuya am.’ Ov, mazu minam marumburikin ik?” (Yohan 7:35, 36) Pakwez, Yesu wading wisambidin piur pa rufu rend ni kuvumbuk kwend mulong wa kuya mwiur, chawiy akankuny end kakutwishap kumulondul.

Dichuku dia sambwad dia musambu diawanyina. Dichuku diawonsu diasadikang musambu, pamanch, mwin kupesh wavitang mem mu Dijiy dia Silowe mulong wa kuya kwichil kuns kwa chintamb chadinga mu tempel. Chimeken anch Yesu wayivurisha antu chisal chinech palonday anch: “Muntu mwawonsu ukweta impu, ufanyidin kwez kudi am, ana. Mukand wa Nzamb ulondil anch: ‘Muntu mwawonsu ukwingitiyija am, mikwaku ya mem makata kulet mwom yikez kubudik mu muchim wend.’”—Yohan 7:37, 38.

Yesu wisambina piur pa yom yikushikena anch in kwilejend ayizizil many nich spiritu utumbila mulong wa kuya mwiur. Kuzizil many kwinoku kwasadika kupwa kwa rufu ra Yesu. Kusambishin pa dichuku dia Pentekot wa muvu walondulaku, mikwaku ya mem makata kulet mwom yasambisha payizizilau in kwilej many nich spiritu utumbila ni pasambishau kulejan uyakin kudi antu akwau.

Antu amwing pateshau malejan ma Yesu alonda anch: “Chakin, muntu winou udi kamu [Muprofet],” chimeken anch antu inay isambina piur pa muprofet mujim umupandakena Moses. Antu akwau alonda anch: “Ndiy udi Kristu” Pakwez akwau alonda anch: “Kristu kakez kwikalap mwin Galalia. Mukand wa Nzamb ulondil anch, Kristu ukez kwikal umwing wa a majuku ma mwant David. Ukez kuvadikin mu Betlehem, mwawiy kamu mu ul mwashakamay David?”—Yohan 7:40-42.

Chawiy, chisak cha antu chaurika. Antu amwing pakach pau akimba kumukwat Yesu, pakwez akwau kakatap. Pachirikau amasalay kudi antakel a chirelijon pakad kumukwat Yesu, in kupesh ajim nau Afaris ayipula anch: “Ov, mulong wak kiwezilanyap nend Yesu?” Amasalay akula anch: “Kwikil muntu walondap kal mudi muntu winou.” Antakel a chirelijon ajimana nakash, ayisaala ni ayilonda anch: “Ov, wakudimbangany kwen niyenen? Ov, umwijanyap umwing wa amakurump etu, ap umwing wetwetu Afaris umwitiyijina ndiy? Chisak chinicha cha antu kijap kwau Yijil ya Moses, chawiy Nzamb ukez kuyiyindamish.”—Yohan 7:45-49.

Pa chisu chinicha, Nikodem, Mufaris wading mu chisak cha Sanedrin walonda yom yiwamp piur pa Yesu. Kupwa kwa mivu yaad ni chikunku, Nikodem waya uchuku kudi Yesu ni wamekesha ritiy rend mudiay Yesu. Chawiy, Nikodem walonda anch: “Mu Yijil yetu kitukutwishap kumufish nich muntu wakad kal kumutesh, ni kujingunin yom yasadilay?” Antu ading mu chisak cha Afaris nau a Sanedrin amwakula anch: “Akwetu, ov, komb niyey udi mwin Galalia? Tang nawamp Mukand wa Nzamb, chad ukwijik anch, [muprofet] wa Nzamb kakwikalap mwin Galalia.”—Yohan 7:51, 52.

Bibil kalondap patok anch muprofet ukwez kudiokal mu Galalia. Chikwau kand, Dizu dia Nzamb dilondinap kand anch Kristu ukudiokal mu Galalia; pakwez diasambela kubwak anch “kutok kujim” kukez kumekan “mwi ngand ya Galalia mushichau in michid.” (Isay 9:1, 2; Mateu 4:13-17) Mudi mwasambelau kubwak, Yesu wavadikina mu Betlehem ni wading wa mu dijuku dia David. Ap anch Afaris ading ij nawamp uprofet winou, pakwez chimeken anch awiy apalangesha jinsangu jivud ja makasu kudi antu piur pa Yesu.