Ov, Ukez Kwend Pamwing ni Nzamb?

“Ikal mwin kwikepish mu kwend pamwing ni Nzamb wey.” —MIKE 6:8, NW.

1, 2. Mutapu ik tukutwisha kwisikej yovil ya Yehova padi etu ni ya nvaj umufundishina mwan kwend?

MWAN, wasambisha kal kwiman ntet, ni kutampul kapamp kend ka kusambish ukwatining ku makas ma nvaj wend. Chinech chikutwish kumekan mud chom chakad usey, pakwez kudiay maku ni tatuku, chidi chinship chimwing chijim mu kukul kwa mwan, chisu chizwila too nich ruchingej mulong wa machuku ma kurutu. Anvaj achingejining kamu nakash kwend pamwing ni mwanau, chikas ku chikas, mu angond ni mu mivu yikulondula. Mu milad yivud, achingejining kumutakel mwan ni kumukwash djat ni ku machuku ma kurutu.

² Yehova Nzamb ukwet yovil ya chilik chimwing piur pa anend adia pa divu. Dichuku dimwing walonda piur pa antu end in Isarel, ap Efirayim anch: “Yam namuleja Isarel [Efirayim] mutapu wa kwend. Yam nayikwata antwam, nayizambul mu makas mam, . . . Nayipwitila kudi am nich muchim wa rukat.” (Ozey 11:3, 4) Yehova umeken pinap mud nvaj mwin rukat umufundishina mwan nich kushimpish kwend, pamwing ap wamuzambul mu makas Mend anch wawa. Yehova, Nvaj mujim, usotil kamu kutufundish mutapu wa kwend. Usanger kand kutubachikij chitudandamedina kuya kurutu. Mud muchimekeshina mufund pimedina mutu wetu wa mulong, tukutwish kwend pamwing ni Nzamb! (Mike 6:8) Pakwez kwend pamwing ni Nzamb kurumburikin ik? Ov, mulong wak tuswiridina kusal mwamu? Mutapu ik chitwishikina? Kwend pamwing ni Nzamb kukwet yiyukish ik? El tushinshikin yipul yiney yinying chimwing ku chimwing.

Kwend Pamwing ni Nzamb Kurumburikin Ik?

3, 4. (a) Yom ik yidia ya pakampwil piur pa dizu disambidina kwend pamwing ni Nzamb? (b) Kwend pamwing ni Nzamb kurumburikin ik?

³ Chakin, muntu ukweta mujimbu wa mbij ni mash kakutwishap kamu kwend pamwing ni Nzamb, muntu udia wa muspiritu, mu mutapu umekena ku mes. (Kubudik 33:20; Yohan 4:24) Chawiy Bibil pisambidinay antu endina pamwing ni Nzamb, chidi mu kulond kwa chirumbidij. Bibil usadidil dizu dimwing dia pakampwil, dizu dipandakenamu kulemp mimbu ya ngand, yinshakuru ni disadil pa chirung chawonsu. Chakin, kwisu ap muten ik tukutwisha kutan antu akad kutwish kutesh nawamp chitongijok cha muntu wendina pamwing ni mukwau? Dizu dined dirumburil mwikadil wa chirungil ni wa piswimp nakash, ov, kimwawiyap? Yovil mud yiney yitukwashin kutesh nawamp kamu chirumburikina kwend pamwing ni Nzamb. Pakwez, el turumburila kamu nawamp.

⁴ Vurik amakundj ashishamena, Enok ni Nowa. Ov, mulong wak uyilejenau anch enda pamwing ni Nzamb? (Disambishil 5:24; 6:9) Mu Bibil, dizu “kwend” dirumburikining chisu chivud kulondul mulad kanang wa chisal. Enok ni Nowa atonda mu mwom wau njil yadinga yambatena nich rusot ra Yehova Nzamb. Chadingau ashalijadina nau antu adinga mu mangand mayombilamu, awiy akarumukina kud Yehova chakwel ayitakela ni aziyila ku umutakel wend. Ateka ruchingej rau mwi ndiy. Ov, chinech chirumburikin anch Yehova ndiy wayikwatina mipak? Bwat. Yehova wayinkisha kal antu want ipau, ni usotil anch etu tusadila want ipau wetu pamwing ni ‘ukaliweny wetu wa kutong.’ (Rom 12:1) Pakwez, chisu tukwatina mipak, nich kwishikumwish, tukat kushil ukaliweny wetu wa kutong chakwel wikala utakedilau nich manangu ma Yehova mapandakena mawonsu. (Jinswir 3:5, 6; Isay 55:8, 9) Inge, chitwendina mu mwom wetu wawonsu, tukasil weny winou pamwing ni Yehova.

5. Mulong wak Yesu wisambina kuwejaku kwa kachilik ku mwom wa muntu?

⁵ Chisu chivud Bibil ukat kwisikej mwom ni weny ap kwend. Yisu yimwing, kwisikej kwinoku kuding kamu zenzal, pakwez yisu yikwau, kuding kwa mu chirumbidij. Chilakej, Yesu walonda anch: “Nany wa pakach pen ukata kwitong ukutwish kwanzukesh kachilik kununguku ku mwom wend?” (Mateu 6:27) Mazu minam makutwish makukasiken kutesh. Mulong wak Yesu wisambina kwanzukesh “kachilik,” chilik chidia cha chintampu, ku “mwom” wa muntu, mwom ukatau kwilik nich chintampu cha mivu?a Yesu wadinga ni kwisambin mwom mud weny. Inge, ndiy wafundisha anch kwitong kukezap kukukwash kuwejaku ap kusu kachintampu kakemp ku weny wa mwom wey. Chawiy lel, ov, tufanyidin kulond anch kwikil chom ap chimwing tukutwisha kusal piur pa kulep kwa weny winou? Chakapuk chaya mwa! Chinech chitushikijin ku chipul cha kaad, Mulong wak tuswiridina kwend pamwing ni Nzamb?

Mulong wak Tuswiridina Kwend Pamwing ni Nzamb?

6, 7. Yom ik yiswiridinau kamu nakash antu akad kuwanyin, ni mulong wak tuwapidila kukarumukin kud Yehova mulong wa kuwanyish maswir minam?

⁶ Diyingish dimwing piur pa mulong wak tuswiridina kwend pamwing ni Yehova Nzamb adirumburil ku Jeremiy 10:23, NW anch: “A Yehova, nij nawamp anch njil ya muntu udiokila ku rufunfut yidiap kudiay ndiy. Kwikil muntu ukutwisha kutakel nzau jend amwinend.” Chawiy lel, etu antu tukwetap ulabu ap mbil ya kutakel mwom wetu ayinetu. Tuswiridin kamu nakash umutakel. Antu asotila kudandamen kwitakel kamu ayinau, pakad kumubang Nzamb, akat kurumbuk mud mwarumbukau Adam ni Eve. Antu aad a kusambish ikwatina mbil ya kwijik ayinau yidia yiwamp ni yidia yiyimp. (Disambishil 3:1-6) Mbil yiney ‘tuyikwetap bwat.’

⁷ Ov, wiyovilap anch uswiridin umutakel mu weny wa mwom? Dichuku ni dichuku, tukwatining mipak yikemp ni yijim. Yimwing ya mipak yiney yiding yikash ni yikutwish kwikal ni usu pa mwom wetu wa kurutu—ni wa akatish netu. Pakwez, tongap bil anch muntu mukurump nakash ni ukweta manangu nakash kutupandakanamu usanger kututakel nich rukat mu kukwat mipak yiney! Cha ushon, ilel unou antu avud asotil kuchingejin manangu mau ayinau ni kutakel nzau jau ayinau. Akat kuvuramen uyakin ulondilau mu Jinswir 28:26 anch: “Muntu ukata kwichingejin amwinend udi chisup, pakwez ndiy ukata kwendil mu manangu akez kamukamunin.” Yehova usotil anch twiyepa ku mar makash makata kudiokal ku kuchingejin muchim wa rubabek wa muntu. (Jeremiy 17:9) Usotil anch twendila mu manangu, tumuchingejina mud Mutakel wetu mwin manangu ni Mulej. Anch twasal mwamu, weny wetu wa mwom ukwikal nich diking, usangareshina, ni uwanyidina.

8. Chitil ni kuburen kuwanyin kuyitwadining antu ndond ik, pakwez yom ik yitusotidilay Yehova?

⁸ Diyingish dikwau piur pa mulong wak tuswiridina kwend pamwing ni Nzamb diambaten nich kulep kwa weny tusotila kusal. Bibil ulondil uyakin umwing ukasikena kutesh. Mu mulad kanang, antu awonsu akad kuwanyin ayil ndond yimwing. Parumburilay yoziu yezininga nich upal, Mulej 12:5, NW ulondil anch: “Muntu uyil ku chikumbu chend cha chikupu ni in kudil akurumukin mu mukombil.” Ov, ‘chikumbu chinech cha chikupu’ chom ik? Nzay, mukata kututwal chitil ni kuburen kuwanyin kwetu. (Rom 6:23) Pakwez, Yehova utusotidin yivud kupandakanamu kusu weny wiswimp, wizwila sens nich mar kudiosh ku kuvadik djat kwi nzay. (Job 14:1) Ching kusu anch tukat kwend pamwing ni Nzamb chawiy tukutwisha kuchingej kwend nend mud chatusotilay—chikupu ni chikupu. Ov, kimwawiyap usotila? Choviken komb anch, uswiridin kwend pamwing ni Tatukwey.

Mutapu ik Tukutwisha Kwend Pamwing ni Nzamb?

9. Mulong wak Yehova kadingap ni kumekan kud antu end yisu yimwing, pakwez dikasikesh ik diapanay kwambatan nich Isay 30:20?

⁹ Chipul cha kasatu tukushinshikina chifanyidin kamu anch tutekaku muchim nakash. Chipul chawiy ech, Mutapu ik tukutwisha kwend pamwing ni Nzamb? Tutanin chakul ku Isay 30:20, 21, NW: “Mulej wen Mujim ukez kumusurabanyap kand, ni mes men makez kuman Mulej wen Mujim. Ni matu men makez kutesh dizu kwinyim anch: ‘Njil ya kuya yawiy ey. Yangany mwinimwa,’ anch ufanyidinany kuya ku mutambu wa katatuku ap wa kamaku.” Mu mufund winou ukasikeshina, mazu ma Yehova mafundilau mu verse wa 20 chitwishikin mayivurisha antu end anch pamubwambwilau, ndiy wadinga mwin kujingam kud awiy. (Isay 1:15; 59:2) Chawiy lel, pinap, Yehova amumekeshin, chidiap mud ujingamina, pakwez mud wiminya kamu patok kurutu kwa antu end ashishamena. Tukutwish kutongin mulej wiminya kurutu kwa in kwilejend, uyilejina yisotilay anch awiy ileja.

10. Mwi njil ik ukutwisha “kutesh dizu kwinyim kwey” didiokila kud Mulej wey Mujim?

¹⁰ Mu verse wa 21, isambidin dizu dikwau. Amumekeshin Yehova mud wendina kwinyim kwa antu end, ukat kuyilej njil yitentamina mwa kwendin. Angang-a-Bibil arumburila anch dizu dined chitwishikin diengamidin pa mutapu wadingay kafung ni kuyilondul amikoku end yisu yimwing, wayibing lel ni kuyikangesh kuya mwi njil yiyimp. Dizu dined ditukwatin nchik etu? Inge, pitukarumukidina ku Dizu dia Nzamb chakwel ditutakel, tukat kutang mazu mafundau tunan twa mivu pakur. Makat kwez kwinyim kwetu, mud kamu chamafundau, mu kusut kwa yirung. Pakwez, makwet usey ilel mud kamu pa dichuku diamafundau. Yiyul ya Bibil yikutwish kututakel mu mipak tukata kukwat pichuku-pichuku, ni yikutwish kutukwash kutongin yitukusala mu mwom wetu mu machuku ma kurutu. (Kuseng 119:105) Anch twakimb kamu nich kashinsh yiyul yiney ni kuyisadil, Yehova udi lel Ntakel wetu. Tukat kwend pamwing ni Nzamb.

11. Kwambatan nich Jeremiy 6:16, mazu ik masangareshina marumburilay Yehova kud antu end, pakwez mutapu ik wakulau?

¹¹ Ov, tukat kulikidil chakin Dizu dia Nzamb chakwel ditutakel kamu? Chiwapidil kwiman yisu yimwing ni kwishinshikin ayinetu nich ukinakin. Tal verse ukeza kutukwash kusal mwamu: “[Yehova] wayileja antu end anch: ‘Imanany pa mansang ma njil, utalany. Ipulany njil yikur, ushinshikany njil yiwamp yidi kwisu. Endilanyamu, chad ukez kashakamany nich chisambu!’” (Jeremiy 6:16) Mazu minam matuvurishin muntu udia mu weny washikena kal pa mansang wipwila njil ya kuya. Mu kulond kwa muspiritu, antu in kumubwambwil Yehova mu Isarel aswirikena kusal chom chimwing chifanikena nich chinech. Aswirikena kuchirikin mwi “njil yikur” mwadingau ni kwendin. “Njil yiwamp” yiney yadinga mutapu mwendinau angakau ashishamena, njil yashadishau kud in muchid winou mu usup. Cha ushon, Isarel wabwambwila ku chivurish chinech cha rukat cha Yehova. Verse ndiy umwing udandamedin anch: “Pakwez awiy alond anch: ‘Bwat, etu kitukutwishap kwitiy!’” Pakwez, mu yisu ya katat, antu a Nzamb akwil mutapu windjing ku yiyul yiney.

12, 13. (a) In kwilej azizidilau many a Kristu akwil mutapu ik ku chiyul cha Jeremiy 6:16? (b) Mutapu ik tukutwisha kwishinshikin ayinetu mutapu twendila ilel?

¹² Kudiosh kamu kwisudiel kwa chitot cha 19 cha mivu, in kwilej a Kristu azizidilau many akat kusadil chiyul cha Jeremiy 6:16 padiau ayinau. Chidiau chisak, abodil kal njil ya kuchirik nich muchim wawonsu mwi “njil yikur” mwadingau ni kwendin. Chinyim ni Kristendom mwin kupumbok, alamatin dang ku “chilik cha mazu makin” malejanay Yesu Kristu ni malamau kud in kwilej ashishamena a mu mivu chitot ya kusambish C.C. (2 Timote 1:13) Djat ni ilel unou, in Kristu azizidilau many akwashijadin umwing ni mukwau pamwing nau ambay nau “amikoku akwau” kulondul mwom wakin ni wa musangar walikay kal Kristendom.—Yohan 10:16.

¹³ Chipaninay yakudia ya muspiritu ya pa chisu chau, chisak cha kashalapol ushishamena chakwashin kal mamiliyon ma antu kutan “njil yikur” ni kwend pamwing ni Nzamb. (Mateu 24:45-47) Ov, udi umwing wa mamiliyon ma antu inay? Ang mwawiy, chom ik ukutwisha kusal chakwel kwipuk kupumbuk, ni kusambish kulondul njil yey amwiney? Chidi cha manangu, kwiman chisu ni chisu ni kushinshikin mutapu wendina mu mwom wey. Anch ukat kutang nich kashinsh Bibil ni mikand yengamidina pa Bibil ni kukumangan ku program wa malejan urijekinau kud in Kristu azizidilau many ilel, chawiy lel akat kukufumb komb kwend pamwing ni Nzamb. Ni chisu usadidila yiyul yikwinkinau nich kwishikumwish, wendin chakin kamu pamwing ni Nzamb, ukat kulondul “njil yikur.”

End “Mudi Muntu Ukata Kumuman Nzamb Wakad Kumekan ku Mes”

14. Anch Yehova udi kamu wakin kud etu, mutapu ik chikumekana mu mipak tukwatina?

¹⁴ Chakwel twenda pamwing ni Yehova, ndiy ufanyidin kwikal wakin kud etu. Vurik, Yehova wayileja patok antu adinga ashishamena mu Isarel wa pakur anch kadingap ujingamina kud awiy. Ilel, chilik chawiy chimwing, wimekeshin kud antu end mud Mulej Mujim. Ov, Yehova udi kamu wakin kud ey, mud muntu wiminya kurutu kwey mulong wa kukulej? Wawiy mulad wa ritiy tufanyidina kwikal nich anch tusotil kwend pamwing ni Nzamb. Moses wadinga nich ritiy mud riner, “mulong ndiy wakasikesha mudi muntu ukata kumuman Nzamb wakad kumekan ku mes.” (Hebereu 11:27) Ang Yehova udi kamu wakin kud etu, tukez kushinshikin komb yitongijok yend chisu tukwatina mipak. Chilakej, tukutwishap ap pakemp kusal yom yiyimp ni kupakij kujindjik yitil yetu kud amakurump in Kristu ap yid ya dijuku dietu. Pakwez, tukat kwikasikesh kwend pamwing ni Nzamb ap mu chisu tudia kwa ayinetu pakad muntu ukutwisha kutuman. Mud Mwant David pasak, tukwatin mupak anch: “Nikendil mu kashinsh ka uyakin wa muchim wam mu chikumbu cham.”—Kuseng 101:2.

15. Kukumangan kwetu pamwing nau akadivar nau anambaz in Kristu kukez kutukwash nchik kumuman Yehova mud wakin kud etu?

¹⁵ Yehova wij anch tudi antu akad kuwanyin, tudi yitang yikweta mujimbu wa mbij ni chikutwish kutukasiken yisu yimwing kwitiyij yom twakad etu kutwish kuman. (Kuseng 103:14) Usadin yivud chakwel kutukwash kupandakan kuziy mud kwinoku. Chilakej, wayikumangejin kal “antu mulong wa dijin diend” kudiokal mu michid yawonsu ya pa divu. (Midimu 15:14) Chitumusadidila pamwing mu uumwing, tukat kukasikeshijan umwing ni mukwau. Kutesh mutapu Yehova wamukwashay mukadivar ap nambaz kupandakan kuziy kanang ap kujijaman ku kupakiu kukash kumwikadishin Nzamb wetu muntu wakin kamu nakash kud etu.—1 Pita 5:9.

16. Kwilej piur pa Yesu kukez kutukwash nchik kwend pamwing ni Nzamb?

¹⁶ Kupandakan yawonsu, Yehova watwinkisha chilakej cha Mwanend. Yesu walonda anch: “Yam njil ni uyakin ni mwom; kwikil ukwiyezila kudi Tatuku ching kudi am.” (Yohan 14:6) Kwilej mwom wa Yesu wa panap pansh yidi yimwing ya jinjil jipandakena kuwap ja kumuman Yehova mud wakin kamu kud etu. Yom yawonsu yalonday Yesu ap kusal yadinga kamu chimekesh chiwanyidina cha untu ni jinjil ja Tatukwend wa mwiur. (Yohan 14:9) Pitukwatina mipak, tufanyidin kutongin kamu nawamp mutapu welangay Yesu kusal mulong wa kupwish milong. Mipak yetu anch yimekeshin yitongijok mud yiney yiwamp ni yakin, chawiy lel tukat kulondul nzau ja Kristu. (1 Pita 2:21) Mud chibudikin, tukat kwend pamwing ni Nzamb.

Yiyukish ik Yikubudikinaku?

17. Anch twendin mwi njil ya Yehova, “chisambu” ik tukwikala nich mulong wa mipim yetu?

¹⁷ Kwend pamwing ni Yehova Nzamb kutwadin ku mwom umwing wa musangar nakash. Vurik yayikanay Yehova antu end piur pa kukimb “njil yiwamp.” Ndiy walonda anch: “Endilanyamu, chad ukez kashakamany nich chisambu.” (Jeremiy 6:16) “Chisambu” chinech chirumburikin ik? Ov, udi mwom wizwila too nich misangar ni mapit mavud? Bwat. Yehova upanin chom chimwing chipandakena kuwap, chom chikangena kwikal ni mpich mujim nakash pakach pa antu. Kutan chisambu mulong wa mupim wey kudi kutan chisambu cha mukach, musangar, mazang, ni kuwanyish kwa yom ya muspiritu. Chisambu mud chinech chirumburikin anch ukutwish kwikal nich ruchingej anch watondin kal njil yipandakena kuwap mu mwom. Chisambu cha manangu mud chinech chidi chiyukish chimwing cha pa chipatu mu mangand minam makweta milong yivud-yivud!

18. Chiyukish ik chisotilay Yehova kukwinkish, ni mupak ik ufanyidina kukwat?

¹⁸ Chakin, mwom awinau udi chiyukish chijim nakash. Ap kusu weny wiswimp udi uwamp kupandakanamu kuburen kwend. Pakwez, Yehova kand kal alondap anch weny wey udi kwau kusu wiswimp kudiosh ku usand djat ku mar ma upal. Bwat, Yehova usotil anch ey wikala nich chiyukish chijim nakash. Usotil anch ey wenda nend pamwing chikupu ni chikupu! Chinech achilejen kamu nawamp ku Mike 4:5, NW, anch: “Antu a michid yawonsu, akez kwendin muntu ni muntu mu dijin dia nzamb wend; pakwez etu, ku mutambu wetu, tukez kwendin mu dijin dia Yehova Nzamb wetu chikupu ni chikupu.” Ov, ukez kukwat nich makas maad chiyukish chinech? Ov, usotil kuman nich mes mey chitazukinay Yehova nich musangar anch ‘mwom wakin’? (1 Timote 6:19) Chawiy lel, ikwatina mupak wa kwend pamwing ni Yehova ilel, diamashik, ni dichuku ni dichuku djat ni chikupu!

[Mazu madia kwishin kwa paj]

Ov, Mutapu ik Ukwakula?

• Kwend pamwing ni Nzamb kurumburikin ik?

• Mulong wak tuswiridina kwend pamwing ni Nzamb?

• Chom ik chikeza kukukwash kwend pamwing ni Nzamb?

• Yiyukish ik yikatau kutambul antu endina pamwing ni Nzamb?

[Chipich chidia pa paj wa 29]

Kusutil ku Bibil, tuteshin dizu dia Yehova kwinyim kwetu anch, “Yiney yawiy njil”

[Chipich chidia pa paj wa 31]

Ku yikumangan, tukat kutambul yakudia ya pa chisu chifanyidina