Kukimb Kutentam Kukez Kutuchidij

‘Sambilany bil kukimb . . . kutentam [kwa Nzamb].’—MATEU 6:33.

1, 2. Mupak ik wakwatay changadim mwin Kristu, ni mulong wak wakwatay mupak winou?

CHANGADIM mwin Kristu umwing mu Aziy wasala mud kalerik mu biro wa guvernema. Wadinga wij, wapana wakusambish rapor wa mudimu ni kadingap ni kuzuwol ku mudimu wend. Pakwez, mulong ndond yend yadingap ya rawonsu, chisu cha kupakiu chashika. Mukurump wa departema wamuleja changadim anch ukutwish kumusend mud mwin kusal mudimu wa rawonsu ni ap kumwinkish ndond ya piur, ching anch wasal nend masandj. Changadim walika ni muchim umwing, ap anch kulik kwinoku kwadinga kufanyidin kumushadishin mudimu wend.

² Ov, nambaz changadim mwin Kristu winou wading nich manangu mayimp? Bwat, ndiy walondula piswimp kamu mazu ma Yesu malondila anch: “sambilany bil kusurib . . . kutentam [kwa Nzamb].” (Mateu 6:33) Kudi ndiy, kusadil yijil yitentamina kwadinga kujim nakash kupandakanamu kwak ukwash kusutil ku kusal masandj.—1 Korint 6:18.

Usey wa Kutentam

3. Kutentam chom ik?

³ Mu “kutentam” mudi ngikadil ya kushinshaman mu manangu ni ya win kashinsh. Mu Bibil, dizu dia Ugrek ni dia Hebereu dikwet chitong cha “kwonik zenzal” ap “zwang.” Kudiap kutentam kwirumburish amwiney kulondulijan nich yijil yeyey amwiney. (Luka 16:15) Kudi kwonik zenzal kukwatijadina nich yijil ya Yehova. Kudi kutentam kwa Nzamb.—Rom 1:17; 3:21.

4. Ov, mulong wak kutentam kudi kwa usey ujim kud mwin Kristu?

⁴ Ov, mulong wak kutentam kudi kwa usey? Chidi mulong anch Yehova, “Nzamb wa kutentam,” uyikatin antwend chisu chisadidilau kutentam. (Kuseng 4:1; Jinswir 2:20-22; Abakuk 1:13) Muntu win mwawonsu usadidila kuburen kutentam kakutwishap kwikal nich urund wa piswimp ni Nzamb. (Jinswir 15:8) Wawiy mulong wamukasikeshinay kambuy Paul Timote anch: “Chawiy chin maku ma usand, ulondul kutentam,” pamwing nich ngikadil yikwau ya usey. (2 Timote 2:22) Chawiy kand chawejay Paul anch “djalany rikibu ra kutentam pa ntul.” patekay dipang dia yikunku kushalijan ya yom yetu ya njit ja muspiritu.—Efes 6:14.

5. Mutapu ik yitang yakad kuwanyin yikata kusurib kutentam?

⁵ Chakin kamu, kwikil muntu utentamina mu kurumburik kwawonsu. Awonsu aswana kuburen kuwanyin kwadiokala kud Adam, ni awonsu adi akayitil, akad kutentam, kudiosh ku kuvadik. Chikwau kand, Yesu walonda anch tufanyidin kusurib kutentam. Ov, chitwishikin mutapu ik? Pa chinech Yesu wapana mwom wend uwanyidina mud difut mulong wetwetu, ni anch twatek ritiy mu chakupesh chinech, Yehova udi tayad kutulikishin yitil yetu. (Mateu 20:28; Yohan 3:16; Rom 5:8, 9, 12, 18) Pa dishin dined, pitwilejina yijil yitentamina ya Yehova ni kusal usu wetu wawonsu chakwel kuyiziyil—kulembil chakwel kutan ukwash wa kupandakan kuziy kwetu—Yehova witiyijin difukwil dietu. (Kuseng 1:6; Rom 7:19-25; Kujingunik 7:9, 14) Chidi cha kukasikesh mud ik!

Atentamina mu Mangand Makad Kutentam

6. Ov, mulong wak mangand madinga ndond ya ubaj kud in Kristu a kusambish?

⁶ Patambulau in kwilej a Yesu mudimu wa kwikal atuman end “ni kwisudiel kwa mangand,” awiy arisha nich mwikadil ukash. (Midimu 1:8) Materitwar mau mayinkishau mawonsu madinga “mu chikas cha [muyimp],” Satan. (1 Yohan 5:19) Mangand madinga makwachikin nich spiritu muyimp wapalangeshay, ni in Kristu ela kwitek patok ku kukwachik nich usu wa mangand minam. (Efes 2:2) Kud awiy, mangand madinga ndond ya ubaj. Ching kusu ku kusurib bil kutentam kwa Nzamb kwawiy kwelau kujijamen ni kulam kushinshaman kwau. Avud au ajijamen, pakwez akwau adiokala mwi ‘njil yitentamina.’—Jinswir 12:28; 2 Timote 4:10.

7. Yisend ik yitina anch mwin Kristu ajijamana ku yipwichik yijondila?

⁷ Ov, mangand madi ma chisambu kud in Kristu ilel? Chakapuk chaya mwa! Mijondin kal kupandakanamu mumadinga mu mivu chitot ya kusambish. Chikwau kand, Satan amudjibwidil kal piswimp ni divu ni wasin njit jikash pantaliken nau in Kristu azizidilau many, “amwing a mwi mbut ya mband, awiy akata kulam yijidik ya Nzamb ni kusend uman wa Yesu Kristu.” (Kujingunik 12:12, 17) Ndiy ukat kumurishish kand muntu win mwawonsu ukwashina “mbut” yiney. Chikwau kand, in Kristu kakutwishap kujingam kudiokal mu mangand. Ap anch kadiap chikunku cha mangand, pakwez mwawiy mushichau. (Yohan 17:15, 16) Ni chiyifanyidin kulejan mu mangand mulong wa kuyikimb antu adia mu mwikadil ufanyidina ni kuyilej ikal in kwilej a Kristu. (Mateu 24:14; 28:19, 20) Chawiy lel, mulong in Kristu kakutwishap kwiyep yipwichik yawonsu yijondila ya mu mangand minam, awiy afanyidin kujijaman ku yipwichik yiney. El tushinshikina yinying ya yipwichik yiney.

Mupit wa Masandj

8. Ov, mulong wak in Isarel akarumuka ni kuyifukwil anzamb a in Mowab?

⁸ Kwisudiel kwa weny wau wa mivu 40 wa mwi mpay, in Isarel avud alika njil yitentamina. Imena ayinau yisal yivud ya dipandish kud Yehova, ni piswimp kamu ni kwandam mwi Ngand ya Kushilamu. Pakwez, pa chisu chinech chikash, awiy asambisha kuyisadil anzamb a in Mowab. Ov, mulong wak? Awila mu “maku ma mujimbu wa mbij.” (1 Yohan 2:16) Rusangu rilondil anch: “Antu asambisha kwiyandjik mu kusotan pamwing nau ayangadim a Mowab.”

9, 10. Chisal ik ilel chisadila chikal cha usey kulam mu manangu usu wa kujondish wa maku mayimp ma mujimbu wa mbij?

⁹ Rusangu riner rilejen mutapu maku mayimp ma mujimbu wa mbij makutwisha kuyijondish antu akad kubabal. Tufanyidin kwilejin kusutil ku chinech, pakampwil mulong masandj mikadil kal mulad wa mwom witiyikina mu mangand mawonsu. (1 Korint 10:6, 8) Rapor umwing kudiokal mu États-Unis ulondil anch: “Djat piswimp muvu wa 1970, kushakam pamwing [kwa mband ni ikundj pakad kwatijan] kwadinga kujiril chijil mu jingand jawonsu ja Amerik. Katat, chikadil kal chaku. Ambay a uruw 50 pa chitot mawonsu andamina mu uruw kapamp ka kusambish ashakama pamwing kurutu kwa kwatijan.” Kushakam pamwing kwinoku ni yisal yikwau ya ngikadil ya masandj yidiap kwau ching mwi ngand yimwing kusu. Yidi kunyingumuk mu mangand mawonsu, ni cha ushon, in Kristu amwing alondula chaku chinech—ap kand kushadish ndond yau mu chikumangen cha Ukristu.—1 Korint 5:11.

¹⁰ Chikwau kand, rubil ra kuyibachik antu ku masandj rimeken kwikal kwawonsu. Mafilim ni maprogram ma televizion mayudil anch chidi chifanyidina kwitiyik kud ansand kusal masandj kurutu kwa uruw. Utum aulejen mud uwamp. Ni avud alejen nakash yisal ya masandj mu mutapu ujim ni patok. Chiswapel nakash kusutil ku Internet kutan yipich ya yisal ya masandj. Chilakej, kabamb-a-sang umwing mwin kufund jurnal walonda anch mwanend ikundj wa mivu sambwad weza ku chikumbu kudiokal ku shikol, nich ujim wamuleja tatukwend anch mbay nend wa shikol wamen kapend ka Internet kalejena amband adia kanzikis asadila yisal ya masandj. Tatuku wova wom, mulong an avud nakash atadil mu tupend twinetu pakad kuyijikish anvajau. Chikwau kand, anvaj avud kijap yom yidia mu masengan ma video makatau kusengan anau. Masengan mavud mapalangena makwet yisal yakad kufanyin ya masandj, pamwing ni udemon ni chisum.

11. Ov, mutapu ik ukutwisha dijuku kwichidij ku masandj ma mangand?

¹¹ Ov, mutapu ik ukutwisha dijuku kujijaman ku “kwipwish usweral” kuyimp mud kwinoku? Kusutil ku kusurib bil kutentam kwa Nzamb, chifanyidin kulik kwandam mu chisal ap chisu cha masandj. (2 Korint 6:14; Efes 5:3) Anvaj akata kushinshikin nawamp mijikit ya anau ni kukun mu anau rukat ra Yehova ni yijil yend yitentamina akat kuyikasikesh kwiyep pornografi, masengan ma pornografi ma video, mafilim ma masandj, ni ku yoziu yikwau yakad kutentam.—Kuvurik Yijil 6:4-9.a

Ubaj wa Chibachikin cha Chisak

12. Mulong ik walanka mu mivu chitot ya kusambish?

¹² Padingay Paul ku Listre mu Aziy Mukemp, wasala chilay cha kumwok ikundj umwing. Rusangu rilondil anch: ‘Chisak cha antu chamanau yom yasalay Paul, alond mu rudim ra in Likawoniy anch: Anzamb ez kal kudi etu, akwet yifu mudi antu. Amupila Barnaba anch Zeus, ni Paul anch Herimes, mulong ndiy wading mwin kulond.’ (Midimu 14:11, 12) Kwinyim yisak yawiy yimwing yasota kumujip Paul ni Barnabas. (Midimu 14:19) Chakin kamu, antu inay adinga in kulondul nakash chibachikin cha chisak. Chimeken anch pezau antu kudiokal ku teritwar winou kwikal in Kristu, awiy adandamena kulamat ku yitongijok ya yishankur yau. Mu mukand wend wayifundilay in Kristu a ku Kolosay, Paul wayibabesha chakwel kulik “kwifukwil angel.”—Kolosay 2:18.

13. Yisu yimwing ya yishankur yifanyidina kwipukay mwin Kristu, ni mutapu ik ukutwishay kutan usu wa kusal mwamu?

¹³ Ilel, chawiy chimwing in Kristu akin aswiridin kwipuk yishankur yitiyikina kud antu avud yengamidina pa yitongijok ya relijon wa makasu ujirila yijil ya Ukristu. Chilakej, mu jingand jimwing, misambu yivud ya yishankur piur pa kuvadik ni rufu yengamidin pa makasu malondila anch tukweting spiritu ukata kupand ku rufu. (Mulej 9:5, 10) Kudi jingand mudinga chaku cha kuyikatul ayangadim yikunku ya ku wimband wau.b Chidi chisum, chisal chimwing chakad usey chakad kwambatan nich kubangin kwa rukat kufanyidinau anvaj in Kristu kuyimekeshin anau. (Kuvurik Yijil 6:6, 7; Efes 6:4) Mutapu ik ukutwishau in Kristu kujijaman ku yibachikin ya chisak ni kulik yisal yiney? Chidi kusutil ku kumuchingejin Yehova muchifanyidina. (Kuseng 31:6) Nzamb utentamina ukez kuyikasikesh ni kuyibangin antu amwedila ndiy nich michim yau anch: “Dipat diam ni kwikang kwam, Nzamb wam, mwawiy munikungamedina.”—Kuseng 91:2; Jinswir 29:25.

Kangal Kumuvuramen Yehova

14. Dibabesh ik diamwinkishau Isarel kud Yehova kachisu kakemp kurutu kwa kwandam mwi Ngand ya Kushilamu?

¹⁴ Kachisu kakemp kurutu kwa in Isarel kwandam mwi Ngand ya Kushilamu, Yehova wayibabesha chakwel kangal amuvuramen. Ndiy walonda anch: “Babalany, kangal wamuvuramenany [Yehova] Nzamb wen, pa kulik kulam yijil yend, ni malejan mend, ni yijidik yend, yinakulejany ilel unou. Piukez kudiany ni kwikut, ni piukez kutungany yikumbu yiwamp, washakamanyamu, Piukez kumanany angomb en ni amikoku en avulijan, ap anch utad wen wa argent, ni utad wen wa or yavulijan, ni mapit men mawonsu anch mavulijan, Chad michim yen kangal yez yibaz! Kangal wez wamuvuramenany [Yehova] Nzamb wen.”—Kuvurik Yijil 8:11-14.

15. Mutapu ik tukutwisha kwishinshikin ni kuman anch tumuvuramedinap Yehova?

¹⁵ Ov, chom chinech chikutwish kushiken ilel? Inge, anch tukwet ntong jiyimp. Anch twasurib bil kutentam kwa Nzamb, difukwil dishitwila dikez kwikal chom chijim nakash mu mwom wetu. Tukez, mud mwatukasikeshay Paul, ‘kulam yisu ya muten’ ni kwikal nich chitongijok cha kuswakal mu mujikit wetu. (Kolosay 4:5; 2 Timote 4:2) Pakwez anch, kukumangan ku yikumangan ni mudimu wa chingand yikal yakad usey kud etu kupandakanamu kwipuwangesh ap kusot mitapu ya kwisangaresh, tukez kumuvuramen Yehova charumburik anch kumuman mud udi pa ndond ya kaad mu mwom wetu. Paul walonda anch mu machuku ma kwisudiel, antu akez kwikal “akwisangarish ayinau, Nzamb bwat.” (2 Timote 3:4) In Kristu akashinsh akat kwishinshikin ayinau pa chisu chawonsu chakwel kushinshikin anch kadiap apwichikina nich yitongijok yiney.—2 Korint 13:5.

Babel Spiritu wa Want Ipau

16. Spiritu ik muyimp wamekeshay Eve ni antu amwing a pa dichuku dia Paul?

¹⁶ Mu Eden, Satan wapandakana mu kusadil maku ma choy ma Eve mulong wa want ipau. Eve wasota ikwatinang mipak yend amwinend piur pa chidia chiwamp ni chiyimp. (Disambishil 3:1-6) Mu mivu chitot ya kusambish, amwing mu chikumangen cha Ukristu adinga nich spiritu wa want ipau wa chilik chimwing. Awiy atonga anch adinga ij yivud kumupandakanamu Paul, ni ndiy wayitazuka mu mutapu wa kuyisip anch atwimbuy apandikena kujimb.— 2 Korint 11:3-5; 1 Timote 6:3-5.

17. Ov, mutapu ik tukutwisha kwipuk kukudish spiritu wa want ipetu?

¹⁷ Mu mangand ilel, antu avud adi “in kwitutul, kwitong, in kubwambwil,” ni in Kristu amwing akwachikin kal nich mutapu winou wa kutong. Amwing ikadil kal akankuny a uyakin. (2 Timote 3:4; Filip 3:18) Pa milong yitadila difukwil dishitwila, chidi cha usey anch tukarumukina kud Yehova mulong atwinkish umutakel ni kusadil pamwing nend “kashalapol ushishamena ni kubabal” ni amakurump a chikumangen. Yawiy njil ya kusurab kutentam, ni yituchidijin kudiokal ku kukudish spiritu wa want ipau. (Mateu 24:45-47; Kuseng 25:9, 10; Isay 30:21) Chikumangen cha azizidilau many chidi “dinguj dia diyal dikash dia uyakin.” Yehova utekin chikumangen chinech chakwel kutuchidij ni kututakel (1 Timote 3:15) Kwijik mudimu wach wa usey kukutukwash ‘kulik kusal yom ya kwitumbish nich’ mud mutuziyidila ku rusot ritentamina ra Yehova.—Filip 2:2-4; Jinswir 3:4-6.

Twikalany in Kumwilakej Yesu

18. Mu jinjil ik mutukasikeshidinau kumwilakej Yesu?

¹⁸ Chakin kamu, Bibil ulondil mu mazu ma uprofet anch: ‘Ey wakata kutentam, wakis kupengam.’ (Kuseng 45:7; Hebereu 1:9) Mwikadil wa manangu uwamp mud ik wa kwilakej! (1 Korint 11:1) Yesu kimanyinap kusu pa kwijik yijil yitentamina ya Yehova; pakwez wayikata. Chawiy papakishay Satan kumwoz mwi mpay, Yesu kidjidjekap ni wajijaman mu kulik kupumbuk kudiokal “mwinjil yitentamina.”Jinswir 8:20; Mateu 4:3-11.

19, 20. Yisu yibudikin yiwamp ya kusurab kutentam?

¹⁹ Chakin, maku mayimp ma mujimbu wa mbij makutwish kwikal makash. (Rom 7:19, 20) Pakwez, anch kutentam kudi kwa usey kud etu, kukez kutukasikesh kwipuk uyimp. (Kuseng 119:165) Kukat nakash kutentam kukez kutuchidij pitukurisha nich uyimp. (Jinswir 4:4-6) Vurikany, chisu chawonsu tukuwila mu kupakiwu, tumwinkishin Satan kuwin. Chipandiken kuwap mud ik kujijaman ni kumwinkish Yehova kuwin!—Jinswir 27:11; Jakobu 4:7, 8.

²⁰ Mulong awiy akat kusurib kutentam, in Kristu akin “[izwil] nich mabuj ma kutentam madia mu Yesu Kristu, ku uyaj ni kushiman kwa Nzamb.” (Filip 1:10, 11) Awiy “[amudjadil] muntu musu [watangau] mu chifu cha Nzamb mu kutentam ni mu kutumb kwakin.” (Efes 4:24) Adi ayen a Yehova ni ashich mulong wa kumusadil, chidiap mulong wa kwisangaresh ayinau. (Rom 14:8; 1 Pita 4:2) Chawiy chitakedina yitong ni yisal yau. Asangareshining mud ik muchim wa Tatukwau wa mwiur!—Jinswir 23:24.

[Mazu madia kwishin kwa paj]

Ov, Ukutwish Kurumburil?

• Ov, mulong wak chidi cha usey kusurab kutentam?

• Mutapu ik ukutwishay mwin Kristu wakad kuwanyin kusurib kutentam?

• Yisu yimwing ya yom yidia mu mangand yifanyidinay mwin Kristu kwipuk?

• Mutapu ik kusurib kutentam kutuchidijin?

[Chipich chidia pa paj wa 28]

Kud in kwilej a Yesu, mangand madinga ndond ya ubaj

[Chipich chidia pa paj wa 29]

An alejinau kumukat Yehova akez kuyikasikesh kwipuk masandj

[Chipich chidia pa paj wa 30]

In Isarel amwing amuvuramena Yehova pikalau ampich mwi Ngand ya Kushilamu

[Chipich chidia pa paj wa 31]

Mud Yesu, in Kristu akisil kuburen kutentam