Kangal Wamushil Djabul Ndond
‘Kangal wamushil Djabul ndond.’—EFES 4:27.
1. Ov, mulong wak ukatau kutadik antu avud piur pa kwikalaku kwa Satan?
MU YITOT ya mivu antu avud adinga ni kutong anch Djabul ukweting misengu, yikwazabal, udjit yidjal yisuz, ukat kusadin mpand mulong wa kuyidjibwil antu ayimp mu karung ka misiny ka kasu. Bibil kafundishinap yitongijok yiney. Pakwez, yitongijok yiney ya makasu yaleta ntad kud avud piur pa kwikalaku kwa Djabul ap kutong anch dizu Djabul didi kwau chany cha uyimp.
2. Bibil ulondil yom ik piur pa Djabul?
2 Bibil utwinkishin uman ni ronganyin ruwamp anch Djabul udi kwaku. Yesu Kristu wamumana mwiur mwi ndond ya muspiritu, wisamba nend panap pansh. (Job 1:6; Mateu 4:4-11) Ap anch Bibil kalejanap dijin dia kusambish dia chitang chinech cha muspiritu, umupidil anch Djabul (dirumburikina anch “Mwin kafukej”) mulong walonda makasu piur pa Nzamb. Wamupila kand anch Satan (ap “Mwin kubwambwil”), mulong wamubwambwila Yehova. Bibil wisambidin Satan Djabul mud “nnak mukur,” mulong wasadila nnak pa kumudimb Eve. (Kujingunik 12:9; 1 Timote 2:14) Wijiken kand mud “muyimp.”—Mateu 6:13.
3. Chipul ik tukwisambina?
3 Chitudia atushalapol a Yehova, tufanyidinap mwi njil ata yimwing kumwimburij Satan, mukankuny mujim wa Nzamb umwing kusu wakin. Chad, tufanyidin kulondul chiyul cha kambuy Paul: “Kangal wamushil Satan ndond.” (Efes 4:27) Ov, ngikadil ik kampand ya Satan yitufanyidina kulik kulondul?
Kangal Walondul Chilik cha Mwin Kafukej Mujim
4. Mutapu ik “muyimp” wa mufukejinay Nzamb?
4 “Muyimp” chifanyidin kumupil anch Djabul mulong udi mwin kafukej. Kafukej didi dizu dia makasu, mayimp, ni ma masaal piur pa muntu mukwau. Nzamb wamwijikisha Adam anch: “Pakwez dibuj dia mutond ou wa ronganyin ra kuwap ni kuyip kangal kudidia. Mulong dichuku diukeza kudidia, chakin ukez kufa.” (Disambishil 2:17) Eve wading wij chijidik chinech, chad kusutil kud nnak, Djabul wamuleja anch: “Kiukufanyap kwen, bwat. Mulong [Nzamb] wij anch dichuku diukez kudiany mabuj minima, mes men makez kuburik, niyen ukez kwikalany mudi Nzamb, in kwijik kuwap ni kuyip.” (Disambishil 3:4, 5) Kading kamu kafukej kayimp piur pa Yehova Nzamb!
5. Ov, mulong wak Diotref wading ufanyidin kupan kuchind mulong wa kafukej kend?
5 In Isarel atambula chijidik anch: “Kangal kutambitamb ni kupalangesh makasu pakach pa akwen, ap kangal kwiman pa uman wa makasu.” (In Levi 19:16) Kambuy Yohan walonda piur pa mwin kafukej wading mu dichuku diend anch: “Nafunda mukand wiswimp ku chikumbu cha Nzamb, pakwez Diotref, ukatila kwikal mukurump wau, walika kutubangaku. Chawiy anch nashik kwinaku, nikez kumekesh patok yisalijok yend, ndiy ukat kupalangesh mboj mulong wetwetu nich mazu mayimp.” (3 Yohan 9, 10) Diotref wading ni kufukej piur pa Yohan ni wading ufanyidin kupan kuchind mulong wa yisalijok yend. Ov, mwin Kristu ik mwin kuziyil ukutwisha kusot kwikal mud Diotref ni kulondul chilik cha Satan, mwin kafukej mujim?
6, 7. Mulong wak tusotin kulik kumufukejin muntu?
6 Mazu ma kafukej ni ma kufundan mu mutapu wa makasu ading chisu ni chisu kumalondol nich chisum pantaliken ni atushalapol a Yehova. “In kupesh ajim ni in kufund imana, amufukejila kwakumufishol nich [Yesu].” (Luka 23:10) Paul amufunda kwa makasu kud Mwin Kupesh Mujim Ananias ni akwau. (Midimu 24:1-8) Bibil ulondil piur pa Satan mud “mwin kuyifund anamakwetu . . ., ku mes kwa Nzamb wetu muten ni uchuku.” (Kujingunik 12:10) Akadivar inay afundinau kwa makasu adi in Kristu azizidilau many adia panap pansh mu machuku minam ma kwisudiel.
7 Mwin Kristu kafanyidinap kumufukejin muntu ap umwing ap kufundan kwa makasu. Chikwau kand, yiney yikutwish kutushiken anch tukwetap jinsangu jawonsu kurutu kwa kupan uman piur pa muntu kanang. Mu Chijil cha Moses, kupan uman wa makasu kwading nich chibudikin cha rufu kud mwin kufundan. (Kubudik 20:16; Kuvurik Yijil 19:15-19) Chikwau kand, pakach pa yom yikisinay Yehova padi “kaman wa makasu ukata kulond ya makasu.” (Jinswir 6:16-19) Chakin kamu, tusotin kulik kulondul chilakej cha mwin kafukej mujim ni mwin kufundan kwa makasu.
Djibwil Kulemp Jinjil ja Mwin Kujipan wa Kusambish
8. Mutapu ik wasambishay Djabul kwikal “mwin kujipan kudiokal ku disambishil”?
8 Djabul udi mwin kujipan. Yesu walonda anch: “Kudiokal ku disambishil kamu ndiy wading mwin kujipan.” (Yohan 8:44) Chasambishay nich chisal chend cha kuyidiosh Adam ni Eve kudiay Nzamb, Satan wading mwin kujipan. Waleta rufu pad antu aad a kusambish ni anau. (Rom 5:12) Chinech chimekeshin anch chisalijok chinech chifanyidin kudiokal kud muntu, chidiokilap ku chany cha uyimp.
9. Mud muchilejenau ku 1 Yohan 3:15, mutapu ik tukutwisha kwikal in kujipan?
9 Chimwing cha Yijil Dikum yayinkishau in Isarel, chilondil anch: “Kangal wajipan.” (Kuvurik Yijil 5:17) Padingay ni kulond kud in Kristu, kambuy Pita wafunda anch: ‘Kangal muntu ap umwing wa pakach pen amana mar mulong udi mwin kujipan.’ (1 Pita 4:15) Chawiy lel, chitudia atushalapol a Nzamb kitukezap kujip muntu. Chikwau kand, tukutwish kwikal ni chitil ku mes ma Nzamb anch twamukis mbay netu mwin Kristu ni kusot kumujip. Kambuy Yohan wafunda anch: “Muntu mwawonsu umukisina mwanamakwend udi kabaaj [ap, “mwin kujipan”], chawiy en wijany nawamp anch, kabaaj mwin kujipan kakwetap mwom wa chikupu.” (1 Yohan 3:15) In Isarel ayinkisha chijil chinech anch: “Kangal wez wamutekil mwanamakwey rukuny mu muchim wey.” (In Levi 19:17) Tuswapalany amboku kupwish mulong win wawonsu ukutwisha kwikal pakach petu ni mbay netu mu ritiy, chakwel anch Satan mwin kujipan kangal washesh uumwing wetu wa Ukristu.—Luka 17:3, 4.
Iman Dang mu Kurish ni Sakudimban
10, 11. Yom ik tufanyidina kusal chakwel kwiman dang mu kurish ni Sakudimban, Satan?
10 Djabul udi mukamakasu. Yesu walond anch: “Pakat kulonday makasu, ukat kusalang ching mud mudiay amwinend mulong ndiy udi mwin kudimban, ndiy kamu tatuku wa makasu mawonsu.” (Yohan 8:44) Satan wamudimba Ev, pakwez Yesu ndiy weza mu mangand mulong wa kulejan uyakin. (Yohan 18:37) Anch tusotin kwiman dang mu kurish ni Djabul mud in kwilej a Kristu, tukutwishap kusadil makasu ap kudimban. Tufanyidin “kulond uyakin.” (Zakariy 8:16; Efes 4:25) “[ Yehova] Nzamb wa uyakin” ukat kuyiyukish ching kusu atuman end akata kulond uyakin. Muntu muyimp kakutwishap kwikal muruu nend.—Kuseng 31:5; 50:16; Isay 43:10.
11 Anch twakwat nich usey kukwolik kwetu kwa muspiritu kudiokal mu makasu ma Satan, tukez kulamat dang ku Ukristu, “njil yakin.” (2 Pita 2:2; Yohan 8:32) Malejan mawonsu ma Ukristu madi “uyakin wa rusangu ruwamp.” (Galate 2:5, 14) Kupand kwetu kwin kwengamidin pa ‘kwendil kwetu mu uyakin’—kuwitiyij ni kwiman dang mu kurish ni “tatuku wa makasu.”—3 Yohan 3, 4, 8.
Rish ni Mwin Kupumbwok Mujim
12, 13. Mutapu ik tufanyidina kuyiman in kupumbwok?
12 Chitang cha muspiritu cheza kwikal Djabul chadinga mu uyakin pasak. Pakwez Yesu walonda anch: ‘Ndiy kand kal ikalap ku mutambu wa uyakin, mulong uyakin kiudiap mwi ndiy.’ (Yohan 8:44) Mwin kupumbwok mujim winou wadandamena ku kurish kwend ni “Nzamb wa uyakin.” In Kristu amwing a mivu chitot ya kusambish awila mu “mupit wa Djabul,” asambisha kwikal angambat end mulong ndiy wayidimba ni kuyidiosh mwi njil ya uyakin. Chawiy lel Paul wamukasikesha mbay nend wa mudimu Timote kuyifundish nich kwitudish chakwel achirikina ku yom ya muspiritu ni kudiokal mu mupit wa Satan. (2 Timote 2:23-26) Chakin kamu, chiwapin nakash kulamat dang ku uyakin ni kulik kuwil mu mupit wa yitongijok ya mwin kupumbwok.
13 Mulong amutesha Djabul ni kwitiy makasu mend, antu aad a kusambish apumbuka. Chawiy lel, ov, tufanyidin kuyitesh in kupumbwok, kutang mikand yau, ap kushinshikin jinsangu jau pa Internet? Anch tumukatin Nzamb ni uyakin, tukezap kusal mwamu. Tufanyidinap kulikidil in kupumbwok andama mu yikumbu yetu ap kuyilangwish, mulong yisalijok mud yiney yikutwish kutushikij ku ‘kwibomb nau mu midimu yiyimp.’ (2 Yohan 9-11) Kangal twawil amboku mu mupit wa Djabul ni kusha “njil yakin” ya Ukristu chakwel kulondul alej a makasu akata kukimb “kulond mazu mayimp” ni kupakij ‘kutwiy nich mazu ma rilemb.’—2 Pita 2:1-3.
14, 15. Kubabesh ik kwapanay Paul kud amakurump a mu Efes ni kud mbay nend wa mudimu Timote?
14 Paul wayileja amakurump in Kristu a mu Efes anch: “Babalany ayinen, ni kudi chisak chawonsu cha amikoku mwakuswanishilanyau en atufung a kulam kudi [s]piritu [u]tumbila, kuyidish in chikumbu cha Mwant chalanday nich mash mend amwinend. Am nij kal anch, anch nadiokal, atwingol ayidiany akez kandam mukach mwen, akez kashesh chisak cha amikoku; ni mukach mwen ayinen mukez kalank antu ni kulond yom ya kurumbwish, kuyikakil in kwilej kwinyim kwau.” (Midimu 20:28-30) Mu yisu yimwing ni yikwau, in kupumbwok inay akutwish “kulond yom ya makasu.”
15 Piswimp mu muvu wa 65 C.C., kambuy wamukasikesha Timote ‘kulejan mazu ma uyakin mu kutentam.’ Paul wafunda anch: ‘Pakwez, iyepa mambamb ma usup, mulong mambamb minam makat kuyitwalang antu ku kuyip ni kuyip, ni mazu mau makez kuyidia mud chitat cha makwalong. Himeney nend Filet, awiy antu aad a pakach pa antu alejena yom yiney. Awiy apumbukin kal kudiokal mwi njil ya uyakin, akat kufa mu kan anch, divumbuk diasutil kal, mwamu akat kuyirumbul antu amwing ku ritiy rau.’ Kupumbwok kwasambisha! Paul wawejaku kand anch: “Dishin diatekay Nzamb didandamedin dang.”—2 Timote 2:15-19, M.M.
16. Kwikalap nchik mipit ya mwin kupumbwok mujim, mulong wak tushishamen kud Nzamb ni Dizu diend?
16 Satan usadidin in kupumbwok mulong wa kupakij kujondish difukwil diakin, pakwez katwishinap. Piswimp muvu wa 1868, Charles Taze Russell wasambisha kushinshikin piswimp nakash mafundish ma yikumbu ya Nzamb ya Kristendom madingau ni kwitiyij ni watana “yitenchik ya kurumburil kuyimp kwa Bibil.” Russell ni antu akwau akemp adinga ni kukimb uyakin asala chisak cha in kwilej Bibil mu Pittsburgh, mu Pennsylvanie, mu États-Unis. Pasut kal piswimp mivu 140 kudiosh pinipa, atushalapol a Yehova ayil kurutu mu ronganyin ni mu rukat ra Nzamb ni Dizu diend. Kwikalap nchik mipit ya mwin kupumbwok mujim, kudimuk kwa chisak cha kashalapol wakin ni ukweta manangu kutukwashin kushal ashishamena kud Yehova ni Dizu diend.—Mateu 24:45.
Kangal Kumushil Ntakel wa Mangand Ndond ya Kwikal ni Usu Padi Ey
17-19. Misu Mangand madia mu chikas cha Djabul, ni mulong wak tufanyidinap kumakat?
17 Njil yikwau yikatay kusadil Satan mulong wa kutwoz mu mupit wend yidi yoziu ya kutubachikin ku rukat ra mangand minam—chisak cha antu akad kutentam chidia kulemp ni Nzamb. Yesu wamutazuka Djabul anch “mwin kutakel wa mangand” ni kulond anch: “Kakwetap kwend ukash wa kwinsal am chom.” (Yohan 14:30) Kangal amboku Satan ikala ni usu padi etu! Chakin kamu, twij kal anch “ngand ya kabuj yidi mu chikas cha Satan.” (1 Yohan 5:19) Chawiy lel Djabul watwisha kumwinkish Yesu “mant mawonsu ma mangand” mulong kusu wa chisal chimwing cha kupumbuk mu kumwifukwil—chom chalikay kamu Mwan a Nzamb patok ni pakad ap kwidjidjek. (Mateu 4:8-10) Mangand matakedinay Satan mayikisin in kwilej a Kristu. (Yohan 15:18-21) Chidiap cha kushimok anch kambuy Yohan utubabeshin kulik kukat mangand!
18 Yohan wafunda anch: “Kangal wakatany mangand ap yom yau yidiamu. Anch muntu wakat mangand, rukat ra Nzamb Tatuku kirishichap mu muchim wend. Mulong yom yawonsu yidia mu mangand, chirumburik anch, maku mayimp ma akayitil, ni ris ra yom yikat kumanau nich mes mau, ni kwibaz kwa yom yikwetau ni kwa yom yisadilau, yom yiney yawonsu kiyidiokilap kudi Nzamb Tatuku, pakwez yidiokil ku mangand. Mangand mayil ni kujiy pamwing ni yom yawonsu yikwetau nich antu ris, pakwez muntu mwawonsu ukata kusal rusot ra Nzamb ukez kupand chikupu.” (1 Yohan 2:15-17) Tufanyidinap kukat mangand, mulong ngikadil ya mangand yikasikeshidin chitil cha mujimbu ni yishalijadin kamu nakash nich yijidik ya Yehova Nzamb.
19 Ov, tukusal nchik anch tukwet rukat ra mangand mu muchim wetu? Tumwitany Nzamb ukwash wa kupandakan rukat riner ni yisotijol ya mujimbu yidiokila ku mangand. (Galatia 5:16-21) Chakin kamu tukusal usu wa kwilam ayinetu “wakad kwijond nich yom yiyimp ya mu mangand” anch twalam mu manangu anch ‘aspiritu ayimp akweta ukash’ adi “ant a mangand” akad kumekan ayikedila chisak chinech cha antu ayimp.—Yakob 1:27; Efes 6:11, 12; 2 Korint 4:4.
20. Mulong wak tukutwisha kulond anch “tudiap a mangand”?
20 Mulong wa in kwilej end, Yesu walonda anch: “Awiy kadiap a mangand, mudi am kinidip wa mangand.” (Yohan 17:16) In Kristu azizidilau many ni ambay au ipanina akat kusal usu wa kulam kwishitul mu manangu ni muspiritu, ku kwaurik ni mangand minam. (Yohan 15:19; 17:14; Yakob 4:4) Mangand minam mayimp matukisin mulong tudandamedin kwaurik nam, ni tudi ‘alej a kutentam.’ (2 Pita 2:5) Chakin kamu, tushich mu chisak cha antu, mudia in kusotan, in makaj, ambwitan, in kwifukwil akish, aij, akamakasu, ni in kukwachik maar. (1 Korint 5:9-11; 6:9-11; Kujingunik 21:8) Pakwez tukatap kupim “chiyul cha mangand,” mulong tudiap abachikinau nich usu winou wa chitil.—1 Korint 2:12.
Kangal Wamushil Djabul Ndond
21, 22. Mutapu ik ukutwisha kusadil chiyul cha Paul chifundinau ku Efes 4:26, 27?
21 Pa ndond pa kulondul “chiyul cha mangand,” spiritu wa Nzamb ututakedil, ni usongishin mudi etu ngikadil mud rukat ni kwilam. (Galatia 5:22, 23) Yiney yitukwashin kurish nich njit ja Djabul mulong wa ritiy retu. Ndiy usotil anch etu twikala ‘iswidioshina mulong wa kusal yom yiyimp,’ pakwez spiritu wa Nzamb utukwashin ‘kwikuchik ku kuswej, ni kulik ujim.’ (Kuseng 37:8) Chakin, tukutwish yisu yimwing ni yikwau kwikal nich diyingishil dia kujiman, pakwez Paul utuyudil anch: “Anch wajimanany, babalany, chakwel kangal ujim wakusadikish chitil. Kangal wajingany nich ujim dichuku diakabuj. Kangal wamushilany Sakudimban chisu.”—Efes 4:26, 27.
22 Ujim wetu ukutwish wabudish chitil anch twashal mu mwikadil wa ujim. Kushal kwetu ajimena kukutwish kumwinkish Djabul chisu cha kulet kwaurik mu chikumangen ap kutubachikin ku yisalijok yiyimp. Chawiy lel, tufanyidin kupwish swa milong tukweta ni antu akwau mu mutapu umwing witiyijinay Nzamb. (In Levi 19:17, 18; Mateu 5:23, 24; 18:15, 16) Chawiy lel, el spiritu wa Nzamb atutakela, mu kwiyijidish kwilam ni kulik kushil ap pakemp ujim wovikena utushikija ku kutembijan, ku kuyip, ni rukis.
23. Yipul ik tukwisambina mu mutu wa mulong ukulondula?
23 Twisambin kal ngikadil yimwing ya Djabul yitufanyidina kulik kulondul. Pakwez in kutang amwing akutwish kwiyipul anch: Ov, tufanyidin kumwov Satan wom? Ov, mulong wak ukat kutenchikish kuzengol kwa in Kristu? Ni mutapu ik tukutwisha kumukangesh Djabul kutupandakan?
Mutapu ik Ukwakula?
• Mulong wak tufanyidinap ap pakemp kumufukejin muntu?
• Anch twalondul 1 Yohan 3:15, mutapu ik tukutwisha kwipuk kwikal in kujipan?
• Mutapu ik tufanyidina kuyiman in kupumbwok, ni mulong wak?
• Mulong wak tufanyidinap kukat mangand?
[Mazu madia kwishin kwa paj]
Tal amboku chibur cha Chinong cha Kalam cha Français, cha Kalang 15, 2005, “Ov, Djabul Udi Kwaku Chakin?”
[Chipich chidia pa paj wa 5]
Kangal twamushil Djabul ndond chakwel ashesha uumwing wetu wa Ukristu
[Chipich chidia pa paj wa 7]
Mulong wak Yohan utukasikeshin kulik kukat mangand?