Kutesh Bibil Kukukuletin Musangar

BIBIL ukwet uyakin wa usey udiokila kud Nzamb. Utulejin rutong ra mwom, mulong wak umenau antu mar, ni machuku ma kurutu ma antu. Bibil utufundishin mutapu wa kwikal ni musangar, mutapu wa kwikal nau arund, ni mutapu wa kupwish milong. Chidia kand cha usey, chidi anch twilejin piur pa Sakatang wetu ni Tatukwetu udia mwiur, Yehova. Ronganyin ra mutapu winou rikat kutuletin musangar ni kupan kurumburik ku mwom wetu.

Bibil wisikejin kwilej ronganyin ra Nzamb nich kudia yakudia. Yesu walonda anch: “Muntu kakutwishap kwikal mwom mulong wa yakudia kusu, pakwez ukwet kuswir kwa mazu mawonsu makat kulonday Nzamb.” (Mateu 4:4, Manswik Masu; Hebereu 5:12-14) Mud kamu mutapu chidinga cha usey kudia yakudia yifanyidina dichuku ni dichuku mulong wa kwikal ni mwom, mwamu kand chidia cha usey kud etu kutang dichuku ni dichuku Dizu dia Nzamb chakwel kutambul mwom wa chikupu ukaninay Nzamb.

Tukweting musangar wa kudia mulong Nzamb watutanga mu mutapu wa kwel anch tusangera kudia ni mulong kudia kukat kuwanyish maswir ma usey. Pakwez, tukwet maswir makwau mitufanyidina kushinshikin anch tusotin kwikal ni musangar. Yesu walonda anch: “Ayuk kwau antu ija anch tukwet kuswir kwa yom ya Nzamb mu michim.” (Mateu 5:3) Tukutwish kwikal ni musangar mulong maswir minam ma yom ya Nzamb tukutwish kumawanish nich kutesh kwa Dizu dia Nzamb.

Antu amwing amening anch chikasiken kutesh Bibil. Chilakej, ukutwish kuswiriken ukwash chakwel kutesh maverse misambidina yaku yiwakad ey kwijik ap maverse makasikena kutesh. Chikwau kand, kudi uprofet uvud ufundinau mu yijingidij ukutwisha kutesh ching kusu anch wasadil maverse makwau ma Bibil misambidina mutu wa mulong wa chilik chimwing. (Daniel 7:1-7; Kujingunik 13:1, 2) Ap mwamu, ukutwish chakin kamu kutesh Bibil. Mutapu ik ukutwisha kwijik anch chitwishikin kutesh Bibil?

Kutesh Bibil Kuyiletidin Antu Awonsu Musangar

Bibil udi Dizu dia Nzamb. Mu Bibil mwawiy mumekeshidinay Nzamb rusot rend kud etu. Ov, komb Nzamb ukutwish walet buku umwing ukasikena kutesh ap ukutwishau kusu kutesh kud antu ileja nakash? Bwat, Yehova kakutwishap kusal mwamu, mulong Yehova udi Nzamb wa rukat. Yesu Kristu walonda anch: “Ov kudi umwing wenen atatuku anch mwanend wamwit insh, ndiy ukumwinkish nnak? Ap anch mwanend wamwit diy, ov, ndiy ukumwinkishay kapambamb? Anch en udianyap nchik ayimp, ukat kupanany yom yiwamp kudi anen. Chawiy Tatukwen udia mwiur ukez kupandakeshamu kupan [M]wiku [U]tumbila kudi awonsu akata kwit.” Chawiy lel, ukutwish kwijik anch niyey ukutwish kutesh Bibil, anch wamwit Nzamb nich muchim umwing, ndiy ukukukwash kutesh Dizu diend. Chakin kamu, ap anikanch akutwish kutesh mafundish ma usey madia mu Bibil!—2 Timote 3:15.

Ap anch kutesh Bibil kwitin kwikasikesh, kukutwish kwikal ni usu ukasikeshina padi etu. Kupwa kwa kuvumbuk kwend, Yesu wamekana kud in kwilejend aad ni wambambina uprofet wa Bibil. Rusangu rifundinau ku Luka rilondil anch: “Chawiy Yesu wayirumburila yom yawonsu kudiokal ku mikand ya Moses, djat ni ku mikand yafundau aruu awonsu a Nzamb.” Ov, yom ik yashikena kupwa kwa yom yiney? Dichuku dinidia kamu urel, chadingau ni kutongin yateshau, in kwilej anunganijana anch: “Ov, michim yetu kiyaswanangap mwivumu padingay ni kuturumburil mwi njil mazu ma Mikand ya Nzamb?” (Luka 24:13-32) Kutesh Dizu dia Nzamb kwayiletina in kwilej inay musangar mulong kwakasikesha ritiy rau mu kushilamu kwa Nzamb ni kuyinkish yitongijok yiwamp ya machuku ma kurutu.

Kutesh Dizu dia Nzamb, chidiap chisend chilimina, pakwez chidi chom chimwing chisangareshina ni cha ukwash, mud kamu kudia yakudia yifanyidina. Ov, yom ik ufanyidina kusal chakwel kutesh Bibil? Mutu wa mulong ulondwilaku ou ulejen mutapu ukutwisha kusanger “ronganyin ra Nzamb.”—Jinswir 2:1-5.

[Chipich chidia pa paj wa 4]

Mud tatuku mwin rukat, Yehova utwinkin mwiku utumbila chakwel kutukwash kutesh Bibil