Yehova Ukat Kumukamunin Chimana Mar

“Mwin kutentam ukwet yakamish yivud, pakwez [Yehova] ukat kumudioshamu mu yawonsu.”—KUSENG 34:19.

1, 2. Mulong ik warishay nich mwin Kristu umwing ushinshamena, ni mulong wak yovil mud yiney yikutwish yatukwat ni yetu?

CHANGADIM upidilau dia Keikoa wasadil kal mivu 20 ni kusut kudiosh pikadilay Kaman wa Yehova. Pa chisu chimwing, wikala chibol wa rawonsu, katwambwil wa Want wa chisu chawonsu. Wakata nakash chisend chinech. Pakwez, pakad kusal mivu yivud, Keiko wakwachika nich yitongijok yivud ni muchim wamulima yipu nich yovil ya kuburen ruchingej ni kwiyov mud udi kusu amwinend. Walonda anch: “Nading ching ni kudil chisu chawonsu.” Chakwel arisha nich yovil yend yiyimp, Keiko wipana nakash mu kwilej amwinend. Ulondil anch: “Chikalap nchik mwamu, kinatwishap kuswimp yitongijok yam. Nashikena mu chilik chimwing chakwel anch nasota kufa.”

² Ov, warishap kal nich yovil mud yiney ya kushadish ruchingej? Mud umwing wa Atuman a Yehova, ukwet muruzu wa mayingish ma kusangar mulong kwipan kud Nzamb “[kukwet] kushilimu kwa mwom udiaku katat ni usotila kwez.” (1 Timoteu 4:8) Kusambish katat udi mu paradis wa muspiritu! Ov, chinech chirumburikin anch udi ukanginau ku mar mawonsu? Chakin kamu bwat! Bibil ulondil anch: “Mwin kutentam ukwet yakamish yivud.” (Kuseng 34:19) Chinech chidiap cha kukashimuk, mulong “ngand ya kabuj yidi mu chikas cha Satan.” (1 Yohan 5:19) Mwi njil yimwing, etu awonsu tukwachikin ku yibudikin ya kuyikel kwa Djabul pa mangand.—Efesus 6:12.

Yibudikin ya Mar

3. Let yilakej yidia mu Bibil ya atushalapol a Nzamb amana mar makash.

³ Mar ma chirung chilemp makutwish kutushadishin kuman kwet kwa yom ya kurutu. (Jinswir 15:15) Tumushinshikinany ikundj utentamina Yob. Padingay mu mar makash, Yob walonda anch: “Antu awonsu akwet mwom wa mivu yikemp, pakwez yizwil sens nich mar.” (Yob 14:1) Musangar wawonsu wa Yob washeshika. Chisu chimwing, Yob watonga anch Yehova wamulikin kal. (Yob 29:1-5) Yob kadiap kusu kashalapol wa Nzamb wamana mar makash mwamu. Bibil utulejin anch Hana wadinga nich “mupim usansena” mulong wa kuburen kwend kuval. (1 Samwel 1:9-11, NW) Pamanay mar mulong wa mwikadil wa dijuku diend, Rebeka walonda anch: “Mwamu am nishakamin kand ik mwom?” (Disambishil 27:46) Patonginay pa kurumbuk kwend, David walonda anch: “Nend niya ni kwishimokin muten wawonsu.” (Kuseng 38:6) Yilakej yiney yikemp yovikeshin patok anch amakundj ni amband adinga kumwov Nzamb wom a kurutu kwa chirung cha Ukristu ajijamana mu yirung ya mar makash.

4. Ov, mulong wak chidiap cha kushimok anch kwikal ilel “ayikwop” mukach mwa in Kristu?

⁴ Ov, chidi nchik ku mutambu wa in Kristu? Kambuy Paul wachimana anch chidi cha usey kuyilej in Tesalonika anch “kasikeshany ayikwop.” (1 Tesalonika 5:14) Buku umwing ulondil anch dizu dia Ugrek dikarumwinau anch “ayikwop” dikutwish disambin piur pa “antu akutwisha kwikal mu mar ma mwom mu chirung kanang.” Mazu ma Paul malejen anch antu amwing azizidilau many a mu chikumangen chinech cha Tesalonika ashadisha musangar wau. Ilel unou kudi kand ayikwop mukach mwa in Kristu. Ov, mulong wak ukopaminau? El tushinshikinany mayingish majim masatu.

Kuburen Kuwanyin Kwetu Kukutwish Kwatukopamish

5, 6. Rongoj ik tukutwisha kutan mu Rome 7:22-25?

⁵ Pakad kwikal mud antu ayimp ‘ashadisha kal michim,’ in Kristu akin akat kuman mar ma chivadik chau cha akayitil. (Efesus 4:19) Akutwish iyov mud mwovay Paul, pafunday anch: “Mu muchim wam nikat kusangar mulong wa yijil ya Nzamb. Pakwez mu mujimbu wam mudi yom yikwau yikata kurish nich yom yinikatila nich manangu mam. Ukash wa yom yiney ya yitil yidia mu mujimbu wam yikat kwinkas mudi muntu wa rukan.” Kupwa Paul walonda anch: “Yowo, nayindam!”—Rome 7:22-24, MM.

⁶ Ov, wiyovap kal mud mwiyovay Paul? Chiyipinap anch wijik nawamp kuburen kuwanyin kwey, mulong ronganyin riner rikutwish kukwijikish usu ukweta chitil padi ey ni kukutwish kukasikesh chiyul chey cha kuchin kusal uyimp. Pakwez, chikufanyidinap chisu chawonsu kwinanin nakash pa kurumbuk mu tuyom tukemp-tukemp. Paul walondina mu mazu ma minan yend, ni wawejaku anch: “Namujikitish Nzamb mulong wa Yesu Kristu.” (Rome 7:25, MM) Mwaning, Paul wadinga ni ruchingej mu mash michilay Yesu anch ma kumukol mu chitil chaswanay.—Rome 5:18.

7. Chom ik chikutwisha kumukwash muntu alik kukopam mulong wa ngikadil yend ya chivadikin ya chitil?

⁷ Anch wovil anch ukopamin mulong wa chivadikin chey cha chitil, tambul rongoj ridia mu mazu ma kambuy Yohan, wafunda anch: “Anch kudi muntu wasala kal chitil, tumukwet kal mwin kutulondil nend tatuku, Yesu Kristu utentamin. Ndiy udi yakupesh ya yitil yetu; ni kadip ya yitil yetwetu kusu, pakwez kand ni ya mangand mawonsu.” (1 Yohan 2:1, 2) Anch ukopamin mulong ya ngikadil yey ya chitil, vurik chisu chawonsu anch Yesu wafa mulong wa akayitil, kayifilap antu awanyidina. Chakin kamu, “antu awonsu asala yitil, kawanyidinip ku uyaj wa Nzamb.”—Rome 3:23.

8, 9. Ov, mulong wak tufanyidin kwiyep yitongijok ya kwifish nich?

⁸ Pakwez, tulond anch wasala chitil chijim pakur. Pakad chinshilend, wamuleja Yehova milong yiney mu malembil, pamwing tupamp tuvud. Amakurump in Kristu akwinkisha ukwash wa muspiritu. (Yakob 5:14, 15) Wakarumuka chakin kamu ni chawiy wikala chid cha chikumangen. Pamwing ap wadiokala mu dirijek dia Nzamb mu chisu kanang, kupwa wakarumuka ni wikala nich mwikadil wishitwila. Mu mwikadil ukwau, chitil wasala pakur chikutwish chakwez mu manangu ni chakukopamish. Anch mwamu chidia, vurik anch Yehova ukat kuyilikishin antu akarumukina chakin kamu “mu mutapu ujim.” (Isay 55:7) Chikwau kand, kasotilap anch ey wiyova kwikal ufishinau nich ni wakad ruchingej. Ang chikal mwamu chikez kusadil rutong ra Satan. (2 Korint 2:7, 10, 11) Djabul akez kamushesh mulong chawiy chimufanyidina, chad usotil anch niyey wiyova mud niyey ufanyidin dirumburish dia mutapu dimwing. (Kuburik 20:10) Kangal wamushil Satan ndond ya kupandakan mu rutong rend ra kushesh ritiy rey. (Efesus 6:11) Pakwez, “rishany nend” pa mulong winou, mud muukata kusal mu jinjil jikwau.—1 Pita 5:9, MM.

⁹ Mu Kuburik 12:10, amutazukin Satan anch “mwin kuyifund anamakwetu”—in Kristu azizidilau many. Ndiy ukat “kuyifund ku mes kwa Nzamb wetu muten ni uchuku.” Kutongijokin pa verse winou kukutwish kukukwash chakwel uman anch Satan, mwin kushitakan wa makasu, ukez kusangar anch ey wasambish kwishitak ni kwifish nich amwiney, ap anch Yehova kakushitakinap ni kukufish nich. (1 Yohan 3:19-22) Ov, mulong wak kudandamen kulengumwok piur pa kurumbuk kwey mu chilik mud chinech ni kwiyov mud anch ulika kwey? Kangal kumushil Satan ndond chakwel ashesha urund wey ni Nzamb. Kangal kumulikin Djabul akupuputisha manangu mu chilik cheyey kuburen kujingunin anch Yehova udi “wa ranaken ni mwin riy, wakad kwovang ujim swa, wizwila sens nich rukat ni uyakin.”—Kubudik 34:6.

Mimbu Yetu Yikutwish Kutuziyish

10. Mutapu ik ukutwisha kutuziyish mimbu yetu?

¹⁰ In Kristu amwing aziya mulong wa usu wa mimbu yau piur pa mudimu wau ukatau kumusadil Nzamb. Ov, mwamu chidia ku mutambu wey? Chitwishikin anch mayej makash, upal, ap mikadil yikwau yikukangesha kusal chisu chilemp mu mujikit mud muwadinga ni kusal kwisambishil. Chakin, akat kuyikasikesh in Kristu kulam chisu cha muten mulong wa kusal mudimu wa Nzamb. (Efesus 5:15, 16) Chad chikwikal nchik anch kudi mimbu yakin yikukangeshina kusal yivud mu mujikit ni kwikal musul wa kuziy kwey?

11. Mutapu ik tukutwisha kutanin mu chiyul chafunday Paul mu Galatia 6:4?

¹¹ Bibil utukasikeshin anch kangal twikal in usweral pakwez twikal “in kuyilakej awiy akata kudandamen mu ritiy ni kuswan kushilimu.” (Hebreu 6:12) Tukutwish kusal mwamu ching anch twashinshikin chilakej chau chiwamp ni kusot kwilakej ritiy rau. Pakwez, tukezap kutaninamu anch twiyisikesh ayinetu chakad kufanyin ni antu akwau nich kutong anch kwikil chitusadila chidia chiwamp. Chawiy lel, tuwapidil kusadil chiyul cha Paul chilondila anch: “Chifanyidin muntu mwawonsu kwirumburish amwinend. Anch yisalijok yend yidi yiwamp, ndiy ukutwish kwibaz amwinend wakad kwiyilikej ni yisalijok ya muntu mukwau.”—Galatia 6:4, MM.

12. Ov, mulong wak tutwisha kwibaz mulong wa mujikit utukata kumusadil Yehova?

¹² In Kristu akwet diyingish diwamp dia kwibaz, ap anch akwet mipak yidiokila ku milong yikash ya ukash wa mujimbu. Bibil utushinshikidin anch: “Nzamb kadip wakad kutentam wa kuvuramen mudimu wen ni rukat riukata kumekeshilany mu dijin diend.” (Hebreu 6:10) Chitwishikin anch mikadil yakad kutwish kuyikel yisala anch ukangany kusal mu mujikit mud muwadinga kusal pasak. Pakwez, nich ukwash wa Yehova, ukutwish kwipan nakash mu mitapu yikwau ya mujikit wa Ukristu, mud kupan uman kusutil mu mond ni ku kufund mikand. Ukutwish kwikal nich kashinsh anch Yehova Nzamb ukez kakuyukish mulong wa mudimu usadila nich mupim wey wawonsu ni mulong wa rukat umekeshina mulong wendendiy ni mulong wa ambay.—Mateu 22:36-40.

‘Machuku ma Mar Nakash’ Makutwish Kutuziyish

13, 14. (a) Mutapu ik tukwachikina ni ‘machuku minam makash’? (b) Mutapu ik umekena patok chisum mu machuku metu?

¹³ Ap anch tuchingedin kurutu oku kutambul mwom mu mangand masu matentamina ma Nzamb, pakwez, djat ni ilel unou tushich mu ‘machuku . . . ma mar nakash.’ (2 Timoteu 3:1) Tukat kutan rongoj mu ronganyin ritulejina yishiken ya mar yimekeshina kusejin piswimp kwa kukolik kwetu. Pakwez, tuchikwachikin ni katat nich mikadil yitwombilamu. Chilakej, mutapu ik ukwachikina anch ukwetap mudimu? Chitwishikin anch chikasiken kuman mudimu, ni mu kusut kwa angond, ukutwish kwiyipul anch Yehova umen mar mey ap anch uteshin malembil mey. Ap pamwing ap akusadil chisal cha kasolikany ap mulad ukwau wa chisal cha mafef. Ap anch kutang mitu ya milong ya majurnal kukutwish kukwovish mud mwiyovay Lot muntu wadinga utentamina, “wanenganananga” nakash (‘wakama’) mulong wa masandj masalangau antu adinga amwombilamu.—2 Pita 2:7, MM.

¹⁴ Kudi mulad wa pakampwil wa machuku ma kwisudiel utufanyidina kulik kuvuramen. Bibil wasambela kulond anch antu avud “akwikal in chisum.” (2 Timoteu 3:3) Rukat ra dijuku riburedin nakash mu majuku mavud. Chakin kamu, buku Family Violence ulondil anch: “Uman ulejen anch akat kuyijip antu nakash, kuyitap yitat ku mujimbu, ap ya ku muchim ap kusal masandj kwa kushindil kud yid yikwau ya dijuku kupandakanamu chisadilau antu indjing. Ndond mwadinga mufanyidinau antu kwiyov anch ayikatin ni kwikal mu diking, kud amakurump amwing ni anikanch, yikadil kal ndond ya ubaj nakash.” Antu ashicha mu murungul wa uyimp winou akez kuman mu kusut kwa mivu kwiyakamish ni kushadish ruchingej. Ov, chikwikal nchik anch mwamu chidia ku mutambu wey?

15. Rukat ra Yehova ripandikenamu nchik rukat ra muntu ap wisu?

¹⁵ Nfund a kuseng David wawanga anch: “Tatukwam ni makwam anch anlik, chawiy [Yehova] ukwitambul.” (Kuseng 27:10) Chitwongojin mud ik kwijik anch rukat ra Yehova ripandiken ra anvajetu! Ap anch anvaj atudjibul, twaman mar ni kusansan, chinech chikwetap usu pa mutapu ukukulamau kud Yehova. (Rome 8:38, 39) Vurik anch Nzamb ukat kuyisejin antu akatilay. (Yohan 3:16; 6:44) Chikalap nchik mutapu wakusadilau kud anvaj, Tatukwey wa mwiur ukukatin nakash!

Yom ya Kusal Chakwel Kupwish Minan

16, 17. Parishinay nich minan, chom ik chifanyidinay muntu kusal chakwel alama usu wend wa muspiritu?

¹⁶ Ukutwish kusal yom kanang chakwel kurish nich minan. Chilakej, itenchikina program muwamp wa mijikit ya Ukristu. Kutongijokin pa Dizu dia Nzamb, pakampwil anch kuziy kwasambish kukukwat. Nfund a kuseng wawang anch: “Pinatonga am anch, ‘Mwend wam ukasirubuk,’ rukat rey, A [Yehova], rukankwash. Mu kuvul kwa minan mu muchim wam kwongoj kwey kwatokish kal ku muchim wam to.” (Kuseng 94:18, 19) Kutang Bibil kwakad kujing kukez kukwash kwizwish manangu nich mazu ma rongoj ni yitongijok yiwamp.

¹⁷ Malembil ni mawiy madi ma usey nakash. Ap anch ukutwishap kumekesh nawamp win kamu mu mazu yovil yey, Yehova wij yiusotila kulond. (Rome 8:26, 27) Nfund a kuseng waleta kashinsh kanak anch: “Tek chisend chey kudi Nzamb, Ndiy ukukutuliku; Ndiy kakumulikip mwin kutentam kushemunik, ap pakemp kusu.”—Kuseng 55:22.

18. Nzau ik jifanyidina jimufanyidina muntu winanina kusal?

¹⁸ Antu amwing akat kushadishang ruchingej mulong wa mayej ma manangu.b Anch mawiy mayej uyedila, pakish kushinshikin manangu mey pa mangand masu ma Nzamb ni pa chisu kukezap kwikal “muntu ap kusu umwing ukeza kulond anch ‘Niyedil.’” (Isay 33:24, NW) Pakwez, anch yovil yey yiyimp yasambish kuvulijan nakash ni kusambish kukuziyish, chikwikal chiwamp kukimb mutapu wa kwiyokish. (Mateu 9:12) Chidi kand cha usey ujim anch wilamina amwiney ukash wa mujimbu wey. Yakudia yiletina ukash wa mujimbu ni kwiyonanaku mujimbu kukutwish kwikal kwa usey. Shinshik kand anch ukat kulal mud muchifanyidina. Kangal washakam shakame-e-e mulong wa kutalang televizion, ni ipuk milad ya kwipuwangesh yikutwisha kukuziyish nakash mujimbu ni manangu. Cha kusambish, iyandjika nakash mu mijikit ya Nzamb! Ap anch chisu chikezay Yehova “kayikuswol mansoj mawonsu” kand kal chiwanyina, ndiy ukukukwash kujijaman.—Kuburik 21:4; 1 Korint 10:13.

Shakamany “Mwishin mwa Chikas cha Usu wa Nzamb”

19. Chom ik chiyikaninau antu amena mar kud Yehova?

¹⁹ Bibil utwinkishin kashinsh anch ap anch mwin kutentam ukwet yakamish yivud, pakwez “[Yehova] ukat kumudioshamu mu yawonsu.” (Kuseng 34:19) Mutapu ik usadilangay Nzamb mwamu? Chisu chalembilay kambuy Pita tupamp ni tupamp mulong amukamunina ku “muy [wadinga] mu mujimbu wa mbij,” Yehova wamwakula anch: “Usu wamam ukuwanyishil mu kuziy.” (2 Korint 12:7-9) Chom ik chamukanau Paul kud Yehova, ni chom ik chikukaninay niyey? Chidiap kukwok katat, pakwez ukukwinkish usu wa kujijaman.

20. Yikalap nchik yoziu yetu, kashinsh ik katwinkishinau mu 1 Pita 5:6, 7?

²⁰ Kambuy Pita wafunda anch: “Ikepishany ayinen mwishin mwa chikas cha usu wa Nzamb, chakwel ndiy ez akuzambulany en pa muten watonday kal. Tekany minan yawonsu padiay ndiy, mulong ndiy ukat kukulamany en.” (1 Pita 5:6, 7) Mulong Yehova ukat kukubangin, kakezap kakulik. Ukez kukukwash yikalap nchik yoziu yey. Ijik anch in Kristu ashinshamena adi “mwishin mwa chikas cha usu wa Nzamb.” Pitumusadidila Yehova, ndiy ukat kutwinkish usu wa kujijaman. Anch twashinshaman kud ndiy, kwikil chom chikeza kutushesh chikupu mwom wetu muspiritu. Chawiy lel, tushinshamanany etu awonsu kud Yehova chakwel anch tutwisha kutambul mwom wa chikupu mu mangand mend masu mashilayimu ni kuman dichuku dikezay chakin kamu kumukol chikupu chimana mar!

[Mazu madia kwishin kwa paj]

Ov, Uchivurikin?

• Ov, mulong wak mar makat kuyikwat ap atushalapol a Yehova?

• Yom ik yimwing yikutwisha kusal anch antu a Yehova inana?

• Mutapu ik ukatay kutukwash Yehova chakwel turisha nich yakamish yetu?

• Mutapu ik tudia “mwishin mwa chikas cha usu wa Nzamb”?

[Chipich chidia pa paj wa 18]

Antu a Yehova akwet diyingish dia kusangar, kwikalap nchik yoziu