Tutonginany pa Uwamp wa Dirijek Dia Yehova
“Tukikut ni kuyuk kwa mu chikumbu chey.”—KUSENG 65:4.
1, 2. (a) Yitenchik ya dizang yadinga nich usu ik padiau antu a Nzamb? (b) Yitenchik ik yasalay David mulong wa kutung dizang?
DAVID udi umwing wa antu wa pakur isambidinau nakash mu Mifund ya Hebreu. Kafung winou, wadinga kand mwin kuwang, muprofet, ni mwant wamuchingejina nakash Yehova Nzamb. Urund wa piswimp nakash wadingay nich David ni Yehova wamulangwishina maku ma kumutungin Nzamb chikumbu. Chikumbu chinech, ap anch dizang, chafanyidina kwikal ndond ya kusambish ya difukwil diakin mu Isarel. David wadinga wij anch yitenchik yikwatijadina nich dizang ni midimu yadinga ni kusadikamu yikez kuyiletin antu a Nzamb musangar ni yiyukish. Chawiy David wawanga anch: “Wayuk muntu utondila Ey [Yehova], ni ukokojila Ey, chakwel ukashakam mu dibur dia chikumbu chey. Tukikut ni kuyuk kwa mu chikumbu chey, mu dizang diey ditumbila.”—Kuseng 65:4.
2 David kamwinkishap mbil ya kwimen mudimu wa kutung chikumbu cha Yehova. Pakwez, chisend chinech cha pakampwil amwinkishach mwanend Salomon. David kinanap anch mulong amwinkish kal muntu windjing chisend chadinga chikatinay kamu nakash. Chom chadinga cha usey kud ndiy chadinga anch dizang aditunga. Nich muchim wend wawonsu David wakwasha rutong riner, ndiy wamwinkisha Salomon maplan ma rutung mamwinkishau kud Yehova. Chikwau kand, David watenchika tunan ni tunan twa in Levi mu yirund ya mudimu ni wapana mulambu ujim wa or ni argent mulong wa kutung nich dizang.—1 Jinsangu 17:1, 4, 11, 12; 23:3-6; 28:11, 12; 29:1-5.
3. Yitongijok ik yikwetingau atushalapol a Nzamb piur pa yitenchik ya difukwil diakin?
3 In Isarel ashinshamena akwasha yitenchik yasalau mulong wa difukwil diakin dia ku chikumbu cha Nzamb. Mud atushalapol a Yehova ilel unou, niyetu tukat kukwash yitenchik ya difukwil mu chikunku cha pa divu cha dirijek dia Yehova. Wawiy mutapu tukata kumekesh anch tukwet manangu mud madingay nich David. Kitufanyidinap kwikal nich manangu ma kwinan. Pakwez, tukat kutongin pa uwamp wa dirijek dia Nzamb. Ov, watonginap kal pa yom yivud yiwamp yitukutwisha chakin kamu kusanger? El tushinshikinany yom yimwing.
Kujikitish Mulong wa Antu Atakedila
4, 5. (a) Ov, mutapu ik uwanyishinay “kashalapol ushishamena ni kubabal” mudimu wamwinkishau? (b) Mutapu ik wiyovau Atuman amwing piur pa yakudia ya muspiritu yikatau kutambul?
4 Tukwet mayingish mawamp ma kumujikitishin “kashalapol ushishamena ni kubabal” watonday Yesu Kristu wamutek piur pa yom yend yidia pansh. Chisak cha kashalapol cha in Kristu azizidilau many chitakedil mudimu wa kulejan rusangu ruwamp, chikat kutenchik yikumangan mulong wa difukwil, ni chikat kupalangesh mabuku mengamidina pa Bibil mu jindim 400 ni kusut. Mamiliyon ma antu adia mu mangand adil nich musangar ‘yakudia yiney ya muspiritu pa chisu chau.’ (Mateu 24:45-47) Kwikil diyingish dia kwinan pa mulong winou.
5 Mu kusut kwa mivu yivud, Elfi, Kaman wa Yehova umwing ipal watana rongoj ni ukwash kusutil ku kusadil yiyul ya Bibil yidia mu mikand ya chisak cha kashalapol. Kusanger kukash kwamushikija Elfi ku kufund anch: “Chom ik nela kusal pakad dirijek dia Yehova?” Peter ni Irmgard ni yawiy adi atushapol a Nzamb asala kal mivu yivud. Irmgard wamekesha kusanger mulong wa mikand yawonsu yisadilau kud “dirijek dia rukat ni dia ukwash dia Yehova.” Pa mikand yiney padi yimwing yirijekinau mulong wa antu akweta maswir ma pakampwil, mud antu akweta mayej ma mes ni akad kuteshang nawamp.
6, 7. (a) Mutapu ik utakedilau mijikit mu yikumangen yidia pa mangand mawonsu? (b) Mutapu ik walondau antu amwing yovilau piur pa chikunku cha dirijek dia Yehova chidia pansh?
6 Chisak Chitakedila cha Atuman a Yehova chidi ntimesh wa ‘chisak cha kashalapol’, chidi kachisak kakemp ka amakundj azizidilau many asadidila ku biro mujim wa Atuman a Yehova udia ku Brooklyn, New York. Chisak Chitakedila chikat kuyitond atushapol a Yehova ija yom yivud mulong asadila ku mabiro ma mitiy matakedila mijikit yisadikina mu yikumangen 98 000 yidia pa mangand mawonsu. Akat kuyitond amakundj awanyishina yitina Bibil kwikal amakurump ni ankwash a mudimu mu yikumangen yiney. (1 Timoteu 3:1-9, 12, 13) Amakurump akat kutakel ni kuyilam amikoku ayinkishau kud Nzamb nich rukat. Kudi kwitapil dilau mud ik dia kwikal umwing wa chisak chinech cha amikoku ni kuman rukat ni uumwing udia mukach mwa “divar”!—1 Pita 2:17; 5:2, 3.
7 Pa ndond pa kwinan, chisu chivud antu akat kujikitish mulong wa umutakel wa muspiritu wa rukat ukatau kuyitakel kud amakurump. Chilakej, tal bil yilondilay Birgit, mband mwin Kristu udia mu reng ra mivu 30. Padingay uchidi mu dikum dia mivu, wikala ni arund ayimp ni wasala chitil. Pakwez, yiyul yiwamp ya amakurump ni ukwash wa ambay akaritiy yamukwasha kudiokal mu mwikadil wa ubaj wadinga pamwing ap umuchingedin kurutu. Mutapu ik wovilay Birgit katat? Ulondil anch: “Nijikitishin nakash anch nichidi ni katat mu dirijek dipandikena kuwap dia Yehova.” Nsand Andreas ukweta mivu 17 ulondil anch: “Chakin kamu dined diawiy dirijek dia Yehova, dirijek dipandikenamu kuwap mu mangand.” Ov, kitufanyidinap kujikitish mulong wa kuwap kwa chikunku cha dirijek dia Yehova chidia pansh?
Antu Atakedila Adi Akayitil
8, 9. Yisal ik yasalau antu amwing adinga pa chirung cha David, ni mutapu ik wasalay David pa kuman yisal yiniya?
8 Mwawiy, antu atondinau mulong wa kutakel mu difukwil diakin adi akayitil. Awonsu akat kurumbuk, ni amwing akweting ulim udandamedina urishinau nich mulong wa kuupandakan. Ov, tufanyidin kujiman mulong wa chom chinech? Bwat. Ap antu inkishau yisend yijim mu Isarel wa pasak arumbuka chipandikena. Chilakej, padingay David uchidi nsand, amwita kwikal mwin kuwang mulong wa kumutudish Mwant Saul wadinga urumbangena. Kupwa, Saul wasota kumujip David, chawiy chamufanyina kuchin mulong wa kuchidij mwom wend.—1 Samwel 16:14-23; 18:10-12; 19:18; 20:32, 33; 22:1-5, Les Saintes Écritures — Traduction du monde nouveau.
9 In Isarel akwau adinga in matung. Chilakej, Yowab kalam wa amasalay a David wamujipa Abiner mwanamakwend a Saul. Abisalom wamupungana tatukwend, David, mulong wa want. Ni Akitofel mwin kumuyul David, wamutungana matung. (2 Samwel 3:22-30; 15:1-17, 31; 16:15, 21, NW) Chikalap nchik mwamu, David kikalap mwin kwinan ukweta rukuny; ni kalikap difukwil diakin. Pakwez, David wasala yom mu mutapu uwamp. Mar mamukwasha David kulamat dang kud Yehova ni kulam manangu mawamp madingay nich chisu chamuchinay Saul. Pa chisu chinicha, David wawang anch: “Ngovilap riy Nzamb, ngovilap riy; mupim wam ukat kuchinin kudi Ey, inge nikuchinin mwishin mwa jimpur jey chikupu ni pakusutila mar mam mawonsu.”—Kuseng 57:1.
10, 11. Chom ik chamanay Gertrud padingay uchid changadim, ni chom ik chalonday piur pa kurumbuk kwa ambay akaritiy?
10 Tukwetap diyingish dia kwinan piur pa matung madia mu dirijek dia Yehova ilel unou. Mulong Yehova, angel end ap atufung kakatap kusanger anch mu chikumangen cha Ukristu mwikala matung, ni antu ayimp. Pakwez, etu awonsu tukat kurish ni kuburen kuwanyin kwa chiuntu—kwetwetu ayinetu ni kwa atushalapol akwau a Nzamb.
11 Padingay Gertrud, mwin kumwifukwil Yehova, uchidi changadim, amudimbena anch udi mukamakasu ni anch kadingap katwambil wa Want wa chisu chawonsu. Chom ik chasalay? Ov, Gertrud winana mulong amulonda mwamu? Bwat kwau. Pashikenay piswimp ni kufa mu muvu wa 2003 pa reng ra mivu 91, wavurika ya kwinyim ya mu mwom wend ni walonda anch: “Uman winou wa mu mwom wam wanleja anch kwikalap nchik kurumbuk kwa antu, Yehova utakedil mudimu wend ujim, mu mutapu ukatay kutusadil etu antu akayitil.” Chisu chadingay ni kurish nich kurumbuk kwa atushalapol akwau a Nzamb, Gertrud wadinga ni kumulembil Yehova.
12. (a) Chilakej ik chiyimp chashau in Kristu amwing a mu mivu chitot ya kusambish? (b) Pisu tufanyidina kwimikin yitongijok yetu?
12 Ap anch in Kristu ashinshamena ni kwipan nakash adi akayitil, anch kashalapol watondau warumbuk, tudandamenany amboku kusal “yom yawonsu wakad kwinan.” (Filipoi 2:14) Chikwikal cha ushon mud ik anch twalondul chilakej chiyimp cha antu amwing adinga mu chikumangen cha Ukristu cha mu mivu chitot ya kusambish! Kukwatijan ni mwin kwilej Yuda, alej a makasu a pa chirung chinicha adinga ni “kudiul ulabu wa Nzamb ni kuyisal masaal in uyaj a mwiur.” Chikwau kand, antu inang in kusal yitil adinga “kununganijan, akat kufundijan muntu ni muntu mukwau.” (Yuda 8, 16, Manswik Masu) Twipukany amboku mwikadil wa mwom walondulau in kwinan akata kununganijan ni kwimikin yitongijok yetu pa yom yiwamp yitwinkishinau kud ‘chisak cha kashalapol.’ Tusangerany uwamp wa dirijek dia Yehova ni tudandamenany kusal “yom yawonsu wakad kwinan.”
“Mazu Minam Makasiken”
13. Chom ik chasalau amwing pateshau malejan ma Yesu Kristu?
13 Ap anch antu amwing a mu mivu chitot ya kusambish inana piur pa atushalapol atondau, akwau inana mulong wa malejan ma Yesu. Mud muchifundilau mu Yohan 6:48-69, Yesu walonda anch: “Mwin kudia ku mabot minam ukez kashakam chikupu.” Pateshau kal mazu minam, “in kwilej end avud . . . alond anch: ‘Mazu minam makasiken; nany ukutwisha kumov?’” Yesu wijika anch “in kwilej end akat kununganijan ku dizu diend.” Chikwau kand, “in kwilej avud achirika panyim, kendap kand nend.” Pakwez kadiap in kwilej awonsu anunganijana. Tushinshikinany chashikena pa chisu chayipulau atwimbuy 12 kud Yesu anch: “Ni yen kand usotilany kuya?” Kambuy Pita wamwakula anch: “Mwant, tukuya kudi nany? Ey yey ukweta mazu ma mwom wa chikupu; Ni yetu twitiya kal, twij anch ey yey Umwing Utumbila wa Nzamb.”
14, 15. (a) Ov, mulong wak ukatau antu amwing kujiman pa mitapu kanang ya malejan ma Ukristu? (b) Yom ik tukutwisha kwilejin ku yom yamushikena Emanuel?
14 Mu yisu ya katat, antu akemp adia mukach mwa antu a Nzamb ajimana mulong wa mulad kanang wa malejan ma Ukristu ni inana piur pa chikunku cha pansh cha dirijek dia Yehova. Ov, mulong wak chom chinech chashikena? Minan yiney chisu chivud yidiokiling ku kuburen kov kurumburik kwa mutapu ukatay Nzamb kusal yom. Sakatang ukat kuyijingunin antwend uyakin pakemp-pakemp. Chawiy lel, yisu yimwing chikat kwikal chiswirikena kutenchikiril kutesh kwetu kwa Bibil. Antu avud a Yehova akat kusangerang yitenchikiril yiney. Akemp kusu adinga ‘apandakena kutentam’ ni akisining kuswimp. (Mulej 7:16) Chitwishikin anch mulong wa chibud, avud akat kuwil mu mupit wa yitongijok yau ayinau. Dikalap nchik diyingish, kwinan kukwet ubaj, mulong kukutwish kutuchirish kwinyim mu mangand ni mu jinjil ja mangand.
15 Chilakej, Emanuel, wadinga Kaman umwing wadinga ni kunyinyit mulong wa yom yatangay mu mikand ya “kashalapol ushishamena ni kubabal.” (Mateu 24:45) Walika kutang mikand yetu ya Ukristu ni kupwa wayileja amakurump a chikumangen chau anch kasotilap kand kwikal Kaman wa Yehova. Pakwez, mu kachisu kakemp, Emanuel washikena mu kujingunin anch malejan ma dirijek dia Yehova madinga kamu makin. Wachirikina kand kud Atuman, witiyila kurumbuk kwend, ni amuchirisha kand mud Kaman wa Yehova. Ndiy wikala kand ikundj mwin musangar.
16. Chom ik chikutwisha kutukwash kupandakan kwidjidjek piur pa malejan mamwing ma Ukristu?
16 Ov, chikwikal nchik anch tukat kusot kwinan mulong tukat kwidjidjek piur pa malejan mamwing mitiyijinau antu awonsu a Yehova? Chawiy kangal twajiman. Pamwing ap ‘chisak cha kashalapol’ chikez kupalangesh chom chimwing chakwila ku yipul yetu ni kudiosh kwidjidjek kwetu kwawonsu. Chidi cha manangu kukimb ukwash wa amakurump in Kristu. (Yuda 22, 23) Malembil, dilejan dia muntu ipend, ni kuta urund ni ambay akaritiy akweta manangu ma muspiritu kukutwish kutukwash kudiosh kwidjidjek ni kusambish kusanger nakash uyakin wa Bibil ukasikeshina ritiy utwileja mwi njil yikatay kusadil Yehova mulong wa kupan malejan.
Twikalany ni Yitongijok Yikasikeshina
17, 18. Pa ndond pa kwinan, yitongijok ya mutapu ik tufanyidina kwikal nich, ni mulong wak?
17 Chakin kamu, antu akayitil akwet chibachikin cha chivadik cha kusal yitil, ni amwing akweting chaku cha kwinan nakash. (Disambishil 8:21; Rome 5:12) Chad anch twikal in kwinanang nakash, tukez kutek urund wetu ni Yehova Nzamb mu chak. Chawiy lel, tufanyidin kujingunin ni kwipuk chaku chin chawonsu cha kwinan.
18 Pa ndond pa kwinan piur pa yom mu chikumangen, tuwapidil kwikal nich yitongijok yikasikeshina ni kwitekin program wa kusal midimu yivud, kwikal mwin musangar, mwin kalimish, wisikena, ni mukash mu ritiy. (1 Korint 15:58; Titus 2:1-5) Yehova umen kachom ni kachom kasadikina mu dirijek diend, ni Yesu wij yisadikina mu chikumangen ni chikumangen, mud mwijikay yom yasadika mu mivu chitot ya kusambish. (Kuburik 1:10, 11) Shimpish ni muchingela Nzamb ni Kristu, mutu wa chikumbu cha Nzamb. Akutwish ayisadil atufung akweta chisend mulong wa kutenchik yom yifanyidina kutenchik.—Kuseng 43:5; Kolosai 1:18; Titus 1:5.
19. Djat ni piukeza Want kuyikel yom yawonsu ya antu, pisu pitufanyidina kwasin nakash yitongijok yetu?
19 Katat kamu ak ditenchik dia yom dined diyimp dikupwa, ni Want wa Mesia ukez kuyikel milong yawonsu ya antu. Pituchingedina chisu chinicha, chidi cha usey anch umwing ni umwing wetu ikala nich yitongijok yikasikeshina! Chinech chikez kutukwash kujingunin usey wa ambay netu akaritiy, pa ndond pa kwasin ching pa kurumbuk kwau. Kushinshikin ngikadil yiwamp ya untu wau kukez kutwikadish in musangar. Pa ndond pa kwifit mu manangu nich minan, tukez kwikal akasikeshinau ni akash muspiritu.
20. Yitongijok yiwamp yikez kutukwash kutambul yiyukish ik?
20 Yitongijok yiwamp yikez kutukwash kand kuvurik yiyukish yivud yitusangaredina mulong wa kwinung kwetu ni chikunku cha pansh cha dirijek dia Yehova. Diawiy kusu dirijek dimwing mu mangand dishinshamena kud Mukaleng wa mangand. Ov, wovil nchik piur pa uyakin winou ni piur pa dilau dia kumwifukwil Nzamb umwing kusu wakin, Yehova? El yitongijok yey yikal mud ya David, muntu wawanga anch: “Mbij jawonsu jikez kudi . . ., Ey ukat kutesh kulembil. Wayuk muntu utondila Ey, ni ukokojila Ey, chakwel ukashakam mu dibur dia chikumbu chey. Tukikut ni kuyuk kwa mu chikumbu chey, mu dizang diey ditumbila.”—Kuseng 65:2, 4.
Ov, Uvurikin?
• Ov, mulong wak tufanyidin kuyijikitish antu atakedila chikumangen?
• Chom ik tufanyidina kusal anch akadivar akweta yisend arumbuk?
• Mutapu ik tufanyidina kuman yitenchik mu kutesh kwetu kwa Bibil?
• Chom ik chikutwisha kumukwash mwin Kristu kupandakan kwidjidjek?
[Chipich chidia pa paj wa 14]
David wamwinkisha Salomon maplan ma dizang ni wakwasha difukwil diakin ni muchim wawonsu
[Chipich chidia pa paj wa 17]
Amakurump in Kristu akat kupan ukwash wa muspiritu nich musangar