Londany Yakin Kudi Muntu Ni Mukwau

“Djibulany makasu, londany yakin kudi muntu ni mukwau.” —EFES 4:25.

1, 2. Antu avud amening nchik uyakin?

ANTU akat kutadikijan nakash piur pa uyakin mu yitot ya mivu. Mu chitot cha musamban cha mivu, K.C.C., mwin kufund Alcaeus wa mu Grèce walonda anch: “Uyakin udi mu maar.” Mazu minam marumburikin anch, ang muntu wana maar waleu ukulond uyakin ni ukwikal ukapukina kuulond. Nyikel Pontius Pilate wa in Rome, wadingaku mu mivu chitot ya kusambish, wamekesha niyend anch wadinga nich chitongijok chiyimp piur pa uyakin pamwipulay Yesu nich maswimbu anch: “Uyakin, winau yom ik?”—Yoh. 18:38.

² Ilel kudi yitongijok yivud yipwitijadina piur pa uyakin. Antu avud alondin anch, dizu “uyakin” dirumburikin mu mitapu kushalijan ap anch uyakin ulondulijadin kudi muntu ni muntu. Antu amwing alondining uyakin ching anch akutaninamu. Buku L’importance de mentir (mu Inglish) ulondil anch: “Ukinakin udi chom chiwamp, pakwez kiukwetingap usey mu mwom ni mu kurish nich rufu mulong wa kushakam aom ni zoong. Muntu kakwetap cha kusal pa mulong winou—ching wadimban chakwel ikal mwom.”

3. Mulong wak Yesu wadinga chilakej chiwamp nakash cha kulond uyakin?

³ Chidi nchik ku mutambu wa in kwilej a Kristu! Yesu kadingap nich chitongijok cha filozofi piur pa uyakin. Wadinga ni kulond chisu chawonsu ching uyakin. Ap akankuny end itiyija mwamu: “Mulej, etu twij anch ey udi wakin, ukat kulejan njil ya Nzamb mu yakin.” (Mat. 22:16) Chawiy chimwing kand ni ilel, in Kristu akin alondwil chilakej cha Yesu. Kidjidjekiningap kulond uyakin. Itiyijining ni muchim wawonsu yalonday kambuy Paul, muntu wayiyula ambay nend akaritiy anch: “Djibulany makasu, londany yakin kudi muntu ni mukwau; mulong tudi yid kudi muntu ni mukwau.” (Efes 4:25) El tushinshikinany yom yisatu yidia mu mazu minam ma Paul. Cha kusambish, nany mukwetu muntu? Cha kaad, kulond uyakin chirumburikin ik? Ni cha kasatu, mutapu ik tukutwisha kuusadil mu mwom wetu?

Nany Mukwetu Muntu?

4. Pakad kwikal mudi antakel a in Yuda a mu mivu chitot ya kusambish, mutapu ik wamekeshay Yesu chitongijok cha Yehova piur pa mukwetu muntu?

⁴ Mu mivu chitot ya kusambish C.C., antakel amwing a in Yuda adinga ni kulejan anch ching kusu ambay netu in Yuda ap arund nau awiy adinga afanyidina kuyitazuk anch ‘mukwetu muntu.’ Pakwez, Yesu, wamekesha mu mutapu ufanyidina untu ni yitongijok ya Tatukwend. (Yoh. 14:9) Choviken kamu anch, ndiy wayileja in kwilejend anch Nzamb kakatiningap ching kusu mulong wa ulombu wa chikit ap mulong wa muchid wa muntu. (Yoh. 4:5-26) Chikwau, mwiku utumbila wamuleja kambuy Pita anch: “Nzamb kakwetingip kasolikany ka muntu; pakwez ukat kwitiyij kwend kudi wa muchid wawonsu ukata kumwov ndiy wom, ni kusal midimu ya kutentam.” (Mid. 10:28, 34, 35) Chawiy lel, tufanyidin kuyikwat antu awonsu mudi akwetu antu, pamwing ni kuyikat antu atusadininga yom mudi akankuny.—Mat. 5:43-45.

5. Chirumburikin ik kumulej mukwetu muntu uyakin?

⁵ Mwaning, chom ik chasotay Paul kulond, palonday anch tufanyidin tuyileja akwetu antu uyakin? Mu kulond uyakin mudi kulejan jinsangu jakin, jakad kwikal ja makasu ap pakemp. In Kristu akin kakatap kukarumun yom mulong wa kuyidimb antu akwau. Akisining “yiyimp” ni alamatining “ku yiwamp.” (Rome 12:9) Pitumwimburijina “Nzamb wa uyakin,” tufanyidin tusala usu twikala antu akin ni atentamina mu yisal ni mu mazu metu mawonsu. (Kus. 15:1, 2; 31:5) Anch twashinshikin nawamp mazu metu, tukutwish twapwish nawamp mikadil yikash ya ushon pakad kusot kudimban ap pakemp.—Tang Kolosay 3:9, 10.

6, 7. (a) Ov, kuyilej antu akwau uyakin chirumburikin anch tufanyidin kumulej kachom ni kachom muntu win mwawonsu utwipwila chipul? Rumburil. (b) Ov, nany tufanyidina kulej uyakin?

⁶ Ov, kuyilej antu akwau uyakin chirumburikin anch tufanyidin kumulej kachom ni kachom muntu win mwawonsu utwipwila chipul? Bwat. Padingay pansh, Yesu wamekesha anch chifanyidin kuyakul patok antu amwing ni kuyilej patok jinsangu kanang. Pamwipulau kudi antakel in rubabek a relijon anch chadinga ku usu ik ap ku ulabu ik wadingay ni kusal nich yilay, Yesu wakula anch: “Nisotil kukwipulany chom chimwing, anch en wangakulany, niyam nikukulejany kwisu kudiokila ulabu unisadila nich yom yiney.” Palikau in kufund ni amakurump kumwakul, Yesu walonda anch: “Niyam kinikukulejanyap nany wintumina kusal yom yiney.” (Marko 11:27-33, MM) Kayakulap mulong wa yisal yau yijondila ni kuburen kwau ritiy. (Mat. 12:10-13; 23:27, 28) Chawiy chimwing kand ilel unou, antu a Yehova afanyidin kuyidimukin antu apumbuka kal ni antu akwau ayimp akata kusadinang kandimbadimb mulong wa jintong jau ja choy.—Mat. 10:16; Efes 4:14.

⁷ Paul ni yend walejana anch kichifanyidinap kuyakulang antu in awonsu. Ndiy walonda anch: “In mboj, ni kwichik pa milong yayen, ni kulondol yom yakad kufanyin awiy kulond.” (1 Tim. 5:13, MM) Mwaning, antu akata kwiyandjik mu milong yayen ap akad kwikal akuchingejin anch akutwish alam ujindj, akuman anch antu akwau akat kwidjidjek kuyilej jinsangu jau. Chidi cha manangu kutesh chiyul chinech chapepilau cha Paul chilondila anch: “Kimbany mutapu wa kushakamany zong, kangal wichikany pa milong ya antu akwau.” (1 Tes. 4:11, MM) Pakwez, pa yisu yimwing amakurump a chikumangen akutwish amwipul muntu yipul piur pa milong yend pasotinau kusal midimu yau. Pa chinech, kusal kwetu mu kovijan nau pamwing nich kuyilej uyakin akat kukusanger nakash ni kuding kwa ukwash.—1 Pita 5:2.

Londany Uyakin mu Milong ya mu Dijuku

8. Kulond uyakin kuyikadishining nchik yid ya dijuku piswimp piswimp?

⁸ Chakin kamu tukweting urund wa piswimp nakash mu dijuku. Chakwel anch tukasikesha urund winou, chidi cha usey anch tulondang uyakin umwing ni mukwau. Milong ni kupwitijan kuvud yikutwish yakep anch tukat kulond patok, nich kashinsh, ni kwisamb nawamp. Chilakej, ang twarumbuk, ov, tukat kwidjidjek pa kwitiyijin kurumbuk kwetu kudiay mbay netu a uruw, kudi an etu, ap kudi yid yikwau ya piswimp ya dijuku? Kwitang dilikishin diakin kukwashining kulet chisambu ni uumwing mu dijuku.—Tang 1 Pita 3:8-10.

9. Ov, mulong wak kulond kwetu uyakin kudiap diyingishin dia kuburen kalimish?

⁹ Kulond uyakin kurumburikinap anch tufanyidin kuburen kalimish. Kuburen kalimish kukatap kuwejin usey ni usu wa uyakin. Paul walonda anch: “Mazu mawonsu maridil ni ujim, ni kuswej, ni jinkuny, ni kuchirilan, ayidosh kudi en, ni dizaz diawonsu; ikalany antu adimukina kudi muntu ni mukwau, likishijadinany mudi chikat kunilikishilau en kudi Nzamb mu Kristu.” (Efes 4:31, 32) Anch twalond mu mutapu wa kalimish, uruu wetu ukwikal ni usu ni ukumekesh anch tuyilimishin antu tulejina.—Mat. 23:12.

Londany Uyakin mu Milong ya mu Chikumangen

10. Chom ik chikutwishau amakurump in Kristu kwilejin ku chilakej chiwamp cha Yesu mu kulond uyakin?

¹⁰ Yesu wisamba nau in kwilejend mu mutapu wa zwang ni uswapela. Chiyul chend chadinga cha rukat pakwez kadingap ni kushirish usey wa uyakin mulong wa kuyisangaresh in kumutesh. (Yoh. 15:9-12) Chilakej, padingau atwimbuy end ni kutadikijan ayinau chisu ni chisu piur pa kusot kwijik nany wadinga mujim pakach pau, nich kujijaman ni kushimpish muchim Yesu wayikwasha chakwel atesha usey wa kwikepish. (Marko 9:33-37; Luka 9:46-48; 22:24-27; Yoh. 13:14) Chawiy chimwing, ap anch ading ajijamena mulong wa kutentam, amakurump in Kristu ilel kakatap kuyiyikel amikoku a Nzamb. (Marko 10:42-44) Akat kumwimburij Kristu, chakwel ikala “adimukina kudi muntu ni mukwau” ni ‘kulikishijadin’ mu kuyisadilang antu akwau.

11. Kuyikat kwetu akadivar kukutubachik tusala yom ik mu mutapu tusadidina rudim retu?

¹¹ Anch twayilejang akadivar uyakin pakad kupandikesh, tukutwish twalond yidia mu muchim wetu pakad kuyovish kuyip. Chakin, kitukusotap anch rudim retu rikal ‘ritwila mudi diyemb,’ kudisadil mulong wa kuyitap antu akwau nich kulond kuyimp kusansena. (Kus. 52:2; Jinsw. 12:18) Kuyikat kwetu akadivar kukutubachik tulama “rudim [retu] ku kuyip ni mulamu [wetu] ku kulond ya rubabek.” (Kus. 34:13) Mwinjil yiney, tukat kumulimish Nzamb ni kulet uumwing mu chikumangen.

12. Chisu ik chitininga kusal komite mulong wa makasu? Rumburil.

¹² Amakurump asadiling mudimu ukash mulong wa kuchidij chikumangen palemp ni antu akamakasu. (Tang Yakob 3:14-16.) Makasu akat kumalond nich rutong riyimp piur pa muntu kanang; rutong riding ra kumumesh muntu mar mu mutapu kanang. Kupandakenamu nakash kulond mazu ma makasu ap kupandakesh yom muyidia. Chakin, makasu mawonsu mading mayimp, pakwez kimadiap makasu mawonsu mitininga komite. Chawiy lel, amakurump afanyidin kwikal isikena, akweta manangu mawamp, ni kutesh kuwamp chisu chitadinau anch muntu walondin makasu anch wadi umatenchikin, makasu makutwisha kwit kusal komite. Ap anch, akumwinkish chiyul kusu cha Mifund nich kujijaman?

Londany Uyakin mu Milong ya Kwisak

13, 14. (a) Mutapu ik ukangeningau antu amwing kwikal akin kudi mukurump wau wa mudimu? (b) Chibudikin ik chiwamp chikutwisha kwikalaku anch twikal in kashinsh ni akin ku mudimu?

¹³ Tushich mu chirung chiburedina win yakin nakash, chawiy chikutwish chikal chikash kwikal muntu wakin pantaliken nend mukurump wa mudimu. Pitufundina fomu wa kwitin mudimu, antu avud adimbening. Chilakej, akutwish apandakesh piur pa shikol yilejau ap piur pa yom yasalau kal mulong wa kusot kutan mudimu uwamp wa nfalang. Chisu chikwau, antu in kusal mudimu alondining anch asadil mudimu pa chisu chisadilau chakin kamu yom yau ayinau, ap anch kusal mwamu chidi chinyim nich yijil ya mudimu. Akutwish pamwingap atang yom yakad kukwatijan nich mudimu, kutazwok kwau ku matelefone, kutumolang uruu ap kutangol pa Internet.

¹⁴ Kudi in Kristu akin, kwikal muntu wakin ni mwin kulond uyakin kudiap kwau chom cha kusal anch wakat. (Tang Jinswir 6:16-19.) Paul walonda anch: “Tukat kusot kushakam ni kashinsh mu yom yawonsu.” (Heb. 13:18) Chawiy lel, in Kristu akat kusal chakin kamu mudimu pichuku pichuku mulong wa difut difanyidina pichuku pichuku. (Efes 6:5-8) Kwikal mwin kusal mudimu muwamp kukutwish kand kwamuletin Tatukwetu wa mwiur ntumb. (1 Pita 2:12) Chilakej, mukurump wa mudimu wa Roberto udinga mu Espagne, wamujikitisha mulong wa kashinsh kend ni kusal kwend mudimu nawamp. Mudi chibudikin cha mwikadil uwamp wenday Roberto, ayandjika Atuman avud ku mudimu ku chapu chinech. Atuman inay ni awiy adinga ayifuvu mu kusal mudimu. Mu kusut kwa mivu, Roberto watwisha kuyandjikish akadivar 23 ababatishau kal pamwing ni antu 8 adinga ni kwilej Bibil!

15. Mutapu ik ukutwishay mwin Kristu ukata kwisak kumekesh anch ulondil uyakin?

¹⁵ Anch twisakin ayinetu, ov, tukat kusadil uyakin mu yawonsu tusadila, ap anch tukat kukangany pa yisu yimwing kumulej uyakin mukwetu muntu? Mwin Kristu umwing ngend-a-mushing kakutwishap washadish usey wa chom mulong achilanda swa, ap kakutwishap wakatul milamu ap kwitiyij anch ni yend amukatula milamu. Tusotin tuyisadila antu akwau mudi mutusotininga anch atusadila niyetu.—Jinsw. 11:1; Luka 6:31.

Yilejany Anyikel Uyakin

16. Yom ik yipaniningau in Kristu kudi (a) anyikel? (b) Yehova?

¹⁶ Yesu walonda anch: “Chawiy [panany] kudi Kaisar yom ya Kaisar; ni kudi Nzamb yom yidia ya Nzamb.” (Mat. 22:21) “Yom” ik tumwinkishininga Kaisar, charumburik, anyikel? Palonday Yesu mazu minam, adinga ni kwisambin piur pa yitad. Komb chakwel twikala nich kom katok ku mes kwa Nzamb ni kwa antu, in Kristu akat kuziyil ku yijil ya ngand, pamwing nich yijil yitina kulambul yitad. (Rome 13:5, 6) Pakwez twij anch Yehova udi Mukaleng Mwant, Nzamb umwing kusu wakin, utukatina ni muchim wawonsu, mupim wawonsu, manangu mawonsu ni usu wawonsu. (Marko 12:30; Kubur. 4:11) Chawiy tukata kumuziyil Yehova pakad kushaku chom.—Tang Kus. 86:11, 12.

17. Antu a Yehova amening nchik kutambul ukwash uyinkishinau antu awonsu?

¹⁷ Mu jingand jivud muding maprogram ni yitenchik ya kuyikwash atuzwendj. Kichiyipinap kudiay mwin Kristu kutambul ukwash winou anch uwanyishin yitinau. Kumulejang uyakin mukwetu muntu kukutusal twipuka kuyidimb anyikel chakwel atukwasha.

Yiyukish Yidiokilinga ku Kulond Uyakin

18-20. Yiyukish ik yidingaku anch tukat kuyilej akwetu antu uyakin?

¹⁸ Kuding yiyukish yivud yidiokilinga ku kulond uyakin. Tukwikal nich kom katok, kakutwinkisha chisambu ni kushakam zoong mu muchim. (Jinsw. 14:30; Filip. 4:6, 7) Kwikal nich kom katok kudi kwa usey kudi Nzamb. Ni anch tulondining uyakin mu yom yawonsu, tukwiyakamishap anch dichuku dimwing akez kutusaul.—1 Tim. 5:24.

¹⁹ Tushinshikinany chiyukish chikwau. Paul walonda anch: “Mu yom yawonsu tusotil kwimekesh mudi in mudimu a Nzamb, . . . ni mu mazu makin.” (2 Kor. 6:4, 7) Mwamu chasadika kudiay Kaman udinga mu Grande-Bretagne. Wasota kulandish motak wend, wamuleja muntu wadia usotina kuuland tuyom twawonsu tufilaku ni yiwamp yidiaku, pamwing ni yakadiay ndiy kuman. Kupwa kwa kuupim, mwin kuuland wamwipula mukadivar anch udi Kaman wa Yehova. Ov, mulong wak watongay mwamu? Ikundj winou wamana kashinsh ka mukadivar ni kudjal kwend kuwamp. Minsambu yiney yashikija ku kumulej uman.

²⁰ Ov, niyetu tukat kumutumbish Sakatang wetu kusutil ku kwikal antu akin ni kulond uyakin? Paul walonda anch: “Etu twalik[a] yom ya ujindj yikwatishena usany, kitukat kwendip ni kwidimwosh.” (2 Kor. 4:2) Chawiy lel, tusalany usu wetu wawonsu tuyilejany akwetu antu uyakin. Anch twasal mwamu, tukumutumbish Tatukwetu wa mwiur ni antwend.

Ov, Ukwakul Nchik?

• Nany mukwetu muntu?

• Chirumburikin ik kumulej uyakin mukwetu muntu?

• Kwikal in kulond uyakin kukat kumutumbish Nzamb mu mutapu ik?

• Yiyukish ik yidingaku ku kulond uyakin?

[Chipich chidia pa paj wa 23]

Ov, uswakeling kujingunin tuyilim tukemp tukemp?

[Chipich chidia pa paj wa 24]

Ov, ulondining uyakin piukata kwizwish fomu wa kusot mudimu?