Dandamenany Kukasikesh Chikumangen

“Kasikeshijanany mu ritiy muntu ni mukwau, kwashijanany.”​—1 TES. 5:11.

1. Ov, yiyukish ik yidiokila ku kushakam mu chikumangen cha in Kristu, pakwez yikokujol ik yikutwisha kumekan kand?

KWIKAL chid cha chikumangen cha in Kristu chidi chiyukish chijim. Mulong ukwet urund uwamp ni Yehova. Ruchingej rey piur pa Dizu diend rikutakedil ni rikulamin chakwel wipuka yibudikin yiyimp ya mashakamin ma antu akad kwikal in Kristu. Udi mukach mwa arund akashinsh asotina chakwel usala yom yiwamp. Chakin kamu, yiyukish yidi yivud. Pakwez, in Kristu amwing arishin nich milong ya mutapu umwing ni ukwau. Amwing akutwish kuswir kutesh yom yikash ya Dizu dia Nzamb. Antu akwau ayedin ap anenganen, ap chitwishikin amen mar mulong wa mipak yakwatau pakad manangu. Etu awonsu tushich mu mangand mayimp.

2. Ov, chom ik chitufanyidina kusal anch mar mayishiken akadivar netu, ni mulong wak?

² Kwikil muntu pakach petu ukutwisha kusot kumuman mbay nend mwin Kristu mu mar. Kambuy Paul wilikeja chikumangen nich mujimbu kupwa walonda anch “anch chid chimwing chaman mar, yid yawonsu yaman kal mar pamwing.” (1 Kor. 12:12, 26, MN) Mu mikadil yiney, tufanyidin kusal usu wa kuyikwash akadivar ni anambaz netu. Mu Bibil mudi jinsangu jivud jilejena mutapu wayikwashau antu akwau kupwish yikokujol kudi yidi ya chikumangen. Pitushinshikidina katat kachom pa kachom, tongin pa mutapu ukutwisha kupan ukwash mu mitapu yifanikena ni yilejenau. Ov, mutapu ik ukutwisha kuyikwash antu akwau muspiritu ni kukasikesh mwamu chikumangen cha Yehova?

“Amutazuka Kwol Kwau”

3, 4. Ov, mutapu ik mwamukwashau Apolo kudi Akila ni Prisil?

³ Pashakamay Apolo ku Efes, ndiy wading wikala kal mwin kulejan wa mushiku. Mukand wa midimu ulejen anch: “Ndiy warumburilanga mazu ma Nzamb nich mushiku, walejananga kand yom yakin ya Yesu. Pakwez ndiy wading wij ching kusu dibatish dia Yohan.” Apolo kadingap wija dibatish “mu dijin dia Tatuku ni dia Mwan ni dia Spiritu Utumbila” chirumburikin anch ndiy watambula pamwingap uman kudi atwimbuy enday Yohan Mubabatish ap kusutil in kulejan in Kristu adingaku kurutu kwa Pantekot wa muvu wa 33 C.C. Ap anch Apolo wadinga ni mushiku, ndiy wadinga kandikal atesha yom kanang ya usey. Ov, urund wend ni ambay in ritiy wamukwashin mutapu ik?​—Mid. 1:4, 5; 18:25; Mat. 28:19.

⁴ Ambay aad in Kristu Akila ni Prisil amutesha Apolo ulondin nich mushiku mu sinagog, amutazuka kwol kwau, ni amurumburil yom yikwau. (Tang Midimu 18:24-26.) Chom chinech chasalau chadinga cha rukat. Chakin kamu, Akila ni Prisil amutazuka Apolo nich nkeu ni mu mutapu wa kumukwash, pakad kumubachik ku kutong anch ading ni kumulondin kuns. Kadingap wija kwend rusangu ra chikumangen cha in Kristu cha kusambish. Chimeken anch anch Apolo wayijikitisha arund nend inay mulong isamba nend kachom pa kachom pa milong yiney ya usey. Pateshay nawamp jinsangu jinej, Apolo “wayikwasha nakash” akadivar nend in Akey ni wapana uman ukash.​—Mid. 18:27, 28.

5. Ov, ukwash ik wa rukat upaninau kudi tunan twa in kulejan a Want, ni chibudikin ik chidiaku?

⁵ Antu avud mu chikumangen cha in Kristu nlel unou, ayijikitishin nakash antu ayikwasha chakwel atesha Bibil. Urund uvud ujijamena wakwatijana pakach pa in kwilej ni alej au. Yisu yivud, kuyikwash antu chakwel atesha uyakin kwitin kwitekin program wa kwambamb nau pakad kujing pa chirung cha angond avud. Pakwez, in kulejan Want asotining kwipan kwa mutapu winou mulong ij anch udi mulong wa mwom ni rufu. (Yoh. 17:3) Chidi chom chisangareshina nakash pa kuyiman antu akat kwitiyij uyakin, kushakam kulondulijan nich uyakin, ni kusadil mwom wau chakwel kusal rusot ra Yehova!

“Ndiy Wading ni Katumb Kawamp”

6, 7. (a) Ov, mulong wak Paul wamutonda Timote chakwel ikala murund wa kwend nend? (b) Ov, amukwasha Timote kuya kurutu mu chilik ik?

⁶ Payau Paul ni Silas ku Lista pa weny wakaad wa umishoner, atana kwinikwa nsand umwing dijin diend Timote, wadinga pamwing ap ni mivu piswimp ni 20. “Ndiy wading ni katumb kawamp kudi akadivar adinga ku Lista ni ku Ikonium.” Yunis makwend a Timote, ni ngakend mband Loyis adinga in Kristu ipanina kal, pakwez tatukwend kadingap mwin kwitiyij bwat. (2 Tim. 1:5) Paul wijikijana pamwingap ni dijuku dined payay ku Lista kapamp kend kakusambish kuyendil ambay amwing a uruw mu mivu yasuta. Pakwez, kambuy umekeshin katat anch umusangaredin Timote mulong ndiy wamekana anch udi nsand wa pakampwil. Chawiy lel, pamwitiyau kudi chisak cha amakurump cha pol pau, Timote wikala nkwash wa Paul mu mujikit wa umishoner.​—Tang Midimu 16:1-3.

⁷ Timote wileja yom yivud kudi murund nend mukurump. Pakwez ndiy wileja mu chilik chakwel anch, pasuta mivu, Paul wamutuma Timote chakwel endila yikumangen ni kwikal muruw wend. Mu mivu 15 yashakamay Timote mu urund ni Paul, nsand winou wakad kwijik yom yivud ni wakad kulondang nakash wapama mu spiritu ni kushiken ku kwikal kalam muwamp nakash.​—Fil. 2:19-22; 1 Tim. 1:3.

8, 9. Ov, yid ya chikumangen yikutwish kuyikasikesh nchik ansand? Let chilakej.

⁸ Nlel unou, ansand ni ayangadim avud adia mu chikumangen cha in Kristu akwet ukaliweny ukash. Anch ayikasikesh ni kuyilam nawamp kudi arund aswila mu spiritu, ansand inay akutwish kuya kurutu ni kwitiy yisend yijim pakach pa antu a Yehova. Tal amboku mu chikumangen chey! Ov, uyimen ansand asotina kwipan, mudi mwipanay Timote? Nich ukwash wey ni dikasikesh, akutwish kwikal ayibol, yid ya Betel, amishoner, atulam in kwendangan. Ov, chom ik ukutwisha kusal chakwel uyikwasha kuwanyish ntong mudi jinej?

⁹ Martin, wadinga chid cha dijuku dia Betel mu mivu 20, uvurikin nich kujikitish pa mutapu wamubanginau kudi kalam wa munyimuku umwing pasutin kal mivu 30 padingau awonsu aad mu mudimu wa chingand. Kalam wamuleja nich chirungul piur pa mudimu wasalay ku Betel padingay nsand. Ndiy wamukasikesha Martin chakwel ashinshikina piur pa mutapu ukutwishay kwipan niyend mu chilik chimwing mu dirijek dia Yehova. Martin wamana anch mambamb minam ma usey makad kuvuramen mamubachika nakash mu kutond kwatonday kwinyim kwa mivu. Nany wija yom yiwamp ukutwisha ey kuyisadil arund ansand kusutil ku kwisambin nau piur pa jintong ja uteokrat.

‘Yikasikeshany Aburedina Musangar’

10. Ov, Epafrodit wova nchik, ni mulong wak?

¹⁰ Epafrodit wakasa weny ulemp ni uziyishena wa kudiokal ku Filip ni kuya ku Rom mulong wa kumutal Paul, watekau mu rikan mulong wa ritiy rend. Mwin kukas weny winou wikala mudi ntimesh wa in Filip. Kamusendinap kusu kambuy Paul yipan yau pakwez watenchika yom chakwel ashala nend ni kusal yawonsu yatwishay kusal mulong wa kumukwash Paul mu mwikadil wend ukash. Pakwez, pashikay mu Rom, Epafrodit wayela ni washika “piswimp ni kufa.” Pamanay anch wakangany kusal yezinay, Epafrodit washadisha musangar nakash.​—Fil. 2:25-27.

11. (a) Mulong wak tufanyidinap kukashimuk anch antu amwing adia mu chikumangen ashadish musangar? (b) Ov, chiyul ik chapanay Paul piur pa Epafrodit?

¹¹ Nlel unou, yikokujol yishalijadina yikutwish kuyisal antu ashadisha musangar nlel. Kulondulijan ni Organisation mondiale de la santé muntu 1 pakach pa antu 5 ukutwish kuman mar madiokila ku kushadish musangar pa chisu chimwing mu mwom wend. Antu a Yehova niyawiy ashadishining musangar. Milong ya kuwanyish maswir ma dijuku, mayej, kuziy mulong wa kukangany chom kanang, ap yom yikwau yikutwish kusal anch muntu anenganana. Ov, yik yelau kusal in Filip chakwel amukwasha Epafrodit? Paul wafunda anch: “Umwakany nich musangar ujim mudi mwanamakwetu mwi Nsalejetu. Chifanyidin kuyilimish antu awonsu a mutapu winou, mulong ndiy wading mu ubaj wa rufu mulong wa kwambat mudimu wa Kristu. Ndiy wipana amwinend kwinkwash am pa ndond yenen.”​—Fil. 2:29, 30.

12. Ov, chom ik chikutwisha kwikal musul wa dikasikesh kudi antu ashadishina musangar?

¹² Niyetu tufanyidin kuyikasikesh akadivar aziyina ni ashadishina musangar. Pakad kwidjidjek, kudi yom yiwamp tukutwisha kwisambin piur pa mudimu wau umusadidilau Yehova. Pamwingap, akarumuka nakash mu mwom wau chakwel ikala in Kristu ap chakwel asala mudimu wa chisu chawonsu. Tukutwish kusanger piur pa usu usadilau, ni tukutwish kuyikasikesh anch Yehova ni ndiy usangaredin usu usadilau. Anch upal ap mayej mayikangeshin antu amwing ashinshamena kusal yom yawonsu yelau kusal, ap mwamu tufanyidin kuyilimish mulong wa uvud wa mivu yau yasalau mu mudimu. Chikalap nchik, Yehova uyilejin antu end awonsu ashinshamena anch: “Kasikeshany ayikwop, kwashany aziyila, shimpishany michim kudi antu awonsu.”​—1 Tes. 5:14.

“Kumulikishin ni Kumwongoj”

13, 14. (a) Ov, chikumangen cha Korint chasala chom ik cha usey, ni mulong wak? (b) Ov, kumwopat muntu winou kwadinga ni chibudikin ik?

¹³ Chikumangen cha mu chitot cha mivu chakusambish cha in Korint charisha nich mwikadil wa muntu umwing wasala masandj ni walika kukarumuk. Chaku chend chayipisha mwikadil wa muspiritu wa chikumangen ni waleta usany ap pakach pa antu akad ritiy. Chawiy lel, Paul watakela kapamp kamwing chakwel kumwopat muntu winou mu chikumangen.—1 Kor. 5:1, 7, 11-13.

¹⁴ Kupup kwinoku kwadinga ni yibudikin yiwamp. Chikumangen achikinga ku chibachikin chijondila, ni amubachika muntu wasala chitil ku kwitiy anch wasala kamu nayimp ni ku kukarumuk kwakin. Mulong wa midimu yiwamp ya kukarumuk ya muntu winou, Paul walejana mu mukand wend wa kaad watumay ku chikumangen chinech anch muntu winou afanyidin kumuchirish. Pakwez, chadingap chawonsu chafanyinau kusal. Paul wayileja kand anch “chifanyidin en kumulikishin ni kumwongoj [mwin chitil wita dilikishin] chakwel kangal wov ushon nakash ap wez washadish ruchingej.”​—Tang 2 Korint 2:5-8.

15. Ov, mutapu ik tufanyidina kuyiman antu asala yitil akarumuka kupwa ayichirish mu chikumangen?

¹⁵ Ov, chom ik twileja kal kusutil ku rusangu riner? Chitwovishining ushon pakatau kuyopat antu. Chitwishikin anch ayipisha kalimish pa dijin dia Nzamb ni kuswingish chikumangen. Chitwishikin pamwingap atusadila chitil. Chikwau lel, anch amakurump atondilau mulong wa kushinshikin mulong wend akwat chiyul, nich umutakel wa Yehova, anch mwin kusal chitil ukarumukin ni amuchirish mu chikumangen, chinech chimekeshin anch amulikishin kal kudi Yehova. (Mat. 18:17-20) Ov, tufanyidinap kumwilikej Yehova? Chikwau kand, chikutwish kumekan mudi turishin ni Yehova anch twaburen riy ni twalik kumulikishin. Chakwel tuleta chisambu ni uumwing mu chikumangen cha Nzamb ni kwitapil dilau dia Yehova, ov, tufanyidinap ‘kumumekeshin rukat’ muntu wasala chitil kupwa wakarumuk chakin ni amuchirish?​—Mat. 6:14, 15; Luka 15:7.

“Ndiy Ukutwisha Kwinkwash”

16. Ov, mulong wak Paul wova ujim mulong wa Marko?

¹⁶ Rusangu rukwau ra Bibil rilejen anch tufanyidinap kuyilamin antu atusadidila uyimp yovil yiyimp. Chilakej, Yohan wading utazukinau anch Marko, wamusadina kambuy Paul chom chiyimp. Mulong wak? Payau Paul nenday Barnabas mu weny wau wa kusambish wa umishoner, Marko waya nau pamwing mulong wa kuyikwash. Pakwez, pashikau ndond yimwing mu weny wau Yohan wading utazukinau anch Marko, wayisha arund nend mulong wa milong yakad kurumburil nawamp, ni wachirika ku chikumbu. Paul wova ujim mulong wa mupak winou wakwatay chawiy lel pasambishay kutenchik yom chakwel akasa weny wa kaad, ndiy wapwitijana ni Barnabas piur pa Marko anch ukutwish kuyitwalaku kand ap bwat. Kukwatijan nich yom yashikena pa weny wa kusambish, Paul walika anch Marko kafanyidinap kuyitwalaku.​—Tang Midimu 13:1-5, 13; 15:37, 38.

17, 18. Ov, Kupwitijan pakach pa Paul ni Marko kwapwil mutapu ik, ni chom ik chitukutwisha kwilejin ku chinech?

¹⁷ Chimeken patok anch, Marko kaziyap mulong Paul wamulika, pakwez ndiy wadandamena mu mujikit wend wa umishoner mu jindond kushalijan pamwing nenday Barnabas. (Mid. 15:39) Chimekeshin anch ndiy wadinga ushinshamena ni wa kuchingejin, achilejen mu mazu mafunday Paul piur pend kwinyim kwa mivu yikemp. Katat padiay Paul mu rukan mu Rom, wamukasikesha Timote kusutil ku mukand wamufundilay. Mu mukand winou, Paul walonda anch: “Musenda Marko weza nend pamwing, mulong ndiy ukutwisha kwinkwash ku mudimu.” (2 Tim. 4:11) Mwaning, Paul witiya katat anch Marko waswil kal muspiritu.

¹⁸ Pinap pad kand dilejan ditufanyidin kwilej. Marko wakudisha mikadil ya kwikal mishoner muwamp. Ndiy kipwakalap muspiritu pamulikau kudi Paul kapamp ka kusambish. Awonsu aad ndiy ni Paul ading antu a muspiritu, ni kilaminap rukuny pakach pau. Pakwez, pikwasuta machuku Paul witiya anch Marko ukutwish kwikal nkwash wa usey. Chawiy lel anch akadivar apwish yikokujol ni milong ya pasak, chom chiwamp chifanyidinau kusal chidi kuya ni kudandamen kuyikwash antu akwau chakwel aya kurutu muspiritu. Kwitiy yiwamp yisadinau antu akwau kukasikeshining chikumangen.

Chikumangen ni Ey

19. Ov, ukwash ik ukutwishau kupan kudi yid yawonsu yidia mu chikumangen cha in Kristu kudi umwing ni mukwau?

¹⁹ Mu “machuku” minam “makash,” ufanyidin kuyikwash akadivar ney ni anambaz adia mu chikumangen, ni aswiridin ukwash wey. (2 Tim. 3:1) Mwin Kristu kakutwishap kwijik chisu chawonsu chom chifanyidina kusal mulong wa kupwish nawamp milong yimushikedina, pakwez Yehova wij. Ni ukutwish kuyisadil yid kushalijan yidia mu chikumangen​—ni ey—chakwel kuyikwash antu akwau alondula njil yiwamp. (Isay 30:20, 21; 32:1, 2) Chawiy lel, lam mu muchim dibabesh dined dia Paul! Dandamenany “kukasikeshany mu ritiy muntu ni mukwau, kwashijanany kand mudi mu ukata kusalanya.”​—1 Tes. 5:11.

Ov Ukwakul Mutapu ik?

• Mulong wak chifanyidin kukasikeshijan umwing ni mukwau mu chikumangen cha in Kristu?

• Ov, yikokujol ya mutapu ik yiukutwisha kuyikwash antu akwau kupwish?

• Mulong wak tufanyidin kuyikwash antu akwau mu chikumangen chetu?