Ov, Wandamin Kal​—Mu Kwiswedish Kwa Nzamb?

“Dizu dia Nzamb dikwet mwom dikwet kand ukash.”​—HEB. 4:12.

1. Ov, njil ik yimwing tukutwisha kwandamin mu kwiswedish kwa Nzamb nlel unou, pakwez mulong wak chitwishikin kulond pa ndond pa kusal?

MU MUTU wa mulong wasutina, twamen anch tukutwish kwandam mu kwiswedish kwa Nzamb kusutil ku kusal mudimu nich kuziyil pamwing nich rutong rend. Chinech chikutwish kuswapal kulond pa ndond pa kusal. Pitwilejina anch Yehova ukisin yom tusotininga kusal, chilakej, tukutwish kwikal nich chibachikin cha kubwambwil. Chinech chimekeshin anch tuswiridin kuya kurutu nich rutong ra “kwovijan.” (Jak. 3:17) Mu mutu wa mulong winou, tukez kuchirikin mikadil yikemp yikutwisha kupak rusot retu ra kulondul rutong ra Nzamb​— ra kuziyil nich muchim wetu.

2, 3. Ov, usu ik tufanyidina kudandamen kusal chakwel twikala ni usey ku mes kwa Yehova?

² Ov, usadining usu wa kwitiyij chiyul chidiokila mu Bibil? Mukand wa Nzamb utulejin anch Nzamb amwinend usotin kukumangej “mapit [ma michid yawonsu].” (Hag. 2:7) Chakin kamu, antu avud pakach petu ading kulemp ni mapit chisu chilejau pa kusambish uyakin. Pakwez, rukat ra Nzamb ni ra Mwanend mukatish ratukasikesha kuswimp nakash mwikadil ni yaku yetu chakwel tumusangaresha nakash Nzamb. Chad, kupwa kwa kulembil nakash ni kusal usu ukash, dichuku dia chiyukish diashika pa chisu twatwisha kwipan ayinetu mulong wa dibatish dia in Kristu.​—Tang Kolosay 1:9, 10.

³ Pakwez, njit ja kura nich kuburen kuwanyin jikutwishap kupwa nich dibatish dietu. Njit jinej jikez kudandamen pitudia akad kuwanyin. Tukwet ruchingej anch, ap anch tudandamedin kurish ni tusadin usu wa kwikal nich usey nakash ku mes kwa Nzamb, Yehova ukez kuyukish usu wetu.

Paswiridinau Chiyul

4. Ov, mu mitapu ik yisatu tukutwisha kutambul chiyul chidiokila mu Mukand wa Nzamb?

⁴ Kurutu tusambisha kwisambin piur pa kuburen kuwanyin kwetu, tufanyidin kwijik mutapu kudinga. Diskur dishikina ku muchim ku Chot cha Want ap mutu wa mulong ulangwishina yitongijok yidia mu mikand yetu yikutwish kumekesh anch tufil nich kamu. Chikwau kand, ap anch twashadish dinans dilejenau mu diskur ap twakangany kusadil piur petu chiyul chifundinau, Yehova ukutwish kumusadil mbay umwing mwin Kristu chakwel apwitina uyimp wetu ku manangu metu.​—Tang Galatia 6:1.

5. Lejan yom yimwing yiyimp tukutwisha kusal patwinkishinau chiyul, ni rumburil mulong wak atufung in Kristu afanyidin kudandamen kusal usu wa kutukwash.

⁵ Chiswapelap kwitiyij chiyul chidiokila kudi muntu wakad kuwanyin, ap anch chiyul chinech achiletin nich kalimish ni rukat. Chikwau kand, mudi mulejenay Galatia 6:1 Yehova uyitin antu awanyishinau mu muspiritu chakwel ‘apakisha’ kutukand nich “michim yidimukina.” Anch twitiyij ku yiyul yiney tukez kwikal nich usey nakash ku mes kwa Nzamb. Chishimokishina chidi anch, pitukata kulembil, tukat kwitiy anch tudi akad kuwanyin. Pakwez, anch mutu kanang wapakish kupwitin yitongijok yetu pa uyimp kanang, tupakishining kwilondin ayinetu, kupipesh mulong, kutadik piur pa chibachikin cha muntu ukata kutuyul, ap kutadik piur pa mutapu uletinay chiyul chinech. (2 Ant 5:11) Kupwa anch chiyul chitadina pakampwil pa mwikadil ukash​—yisal ya chid cha dijuku dietu, piur pa kudjal ni kwileng kwetu, kwinang kwetu ap mutapu wa kwiswedish tusotina pakwez ukisinau kudi Yehova​—tukutwish kulik kwitiyij, mu kushimok ayinetu ni kumuziyish mwin kutuyul! Pakwez, pitukeza kuninet, tukez kujingunin anch chiyul chading chiwanyidina.

6. Ov, dizu dia Nzamb dikat kujingunin “yitongijok ni rutong ra mu muchim” mutapu ik?

⁶ Mazu madia kwishin kwa chipich chidia pa mutu wa mulong winou matuvurishin anch dizu dia Nzamb “dikwet ukash.” Mwaning, dizu dia Nzamb dikwet usu wa kukarumun mwom wa antu. Dikat kutukwash chakin kamu kukarumun mwom wetu kupwa kwa dibatish dietu anch twasambish bil kukwat mupak ayinetu. Mu mukand wend wayifundinay in Hebereu, Paul wafunda kand anch Dizu dia Nzamb “dikat kubuz djat ni pasankedina mwom ni mwiku, djat kand ni pasankedina mafup ni usongisong, dikat kujingunin yitongijok ni rutong ra mu muchim wa muntu.” (Heb. 4:12) Mu mutapu ukwau, anch twatesh patok rutong ra Nzamb piur petu, mutapu twakwila umekeshin mutapu tudia mu muchim wetu. Ov, kudi yisu yimwing kushalijan pakach pa chimekena kwikal (“mupim”) ni udia chakin kamu (“spiritu”)? (Tang Mateu 23:27, 28.) Tal mutapu ukeza kusal mu mikadil yiney yilondwila.

Endany Pamwing ni Ditenchik dia Yehova

7, 8. (a) Ov, chom ik chayibachika in Yuda amwing in Kristu chakwel adandamena kusadin yijil yimwing ya Chijil cha Moses? (b) Ov, mutapu ik usu wau wambatana nich rutong ra Yehova riyila kurutu?

⁷ Antu avud pakach petu akutwish kuvurik mu manangu Jinswir 4:18: “Njil ya in kutentam yidi mudi kutok kumunyikina, yikat kuzaz jinsis ni kushik kamu muten pakach.” Chinech chirumburikin anch mwikadil wetu ni kutesh kwetu kwa rutong ra Nzamb kukez kuya kurutu.

⁸ Mudi mutwisambina mu mutu wa mulong wasutina, kupwa kwa rufu ra Yesu chading chiyikasikedin in Yuda avud in Kristu kujiril Chijil cha Moses. (Mid. 21:20) Ap anch Paul walejana nich ukaliweny anch in Kristu kadingap kand mwishin mwa Chijil, antu amwing alika kutesh chitongijok chinech chafunday nich spiritu utumbila. (Kol. 2:13-15) Atonga pamwing ap anch ang adandamena kulam Yijil yiney, awiy ela kwipuk kuyizengol. Chikwau kand, Paul wayifundina in Kristu in Hebereu ni wayileja anch awiy kelap kutwish kwandam mu kwiswedish kwa Nzamb padingau ni kulik kusal yom kwambatan nich rusot rend riwanyidina.a (Heb. 4:1, 2, 6; tang Hebreu 4:11.) Chakwel atambula dilau dia Yehova, awiy ela kwitiyij anch ndiy wading uyitakedila antwend mwinjil yishalijadina.

9. Ov, mwikadil ik tufanyidina kwikal nich pakatau kutenchik mutapu wetu wa milong yidiokila mu Mukand wa Nzamb?

⁹ Mu chirung chetu, kwasadika yitenchik yimwing mu ronganyin retu ra malejan mamwing ma Bibil. Chinech chifanyidinap kutwakamish; chifanyidin kukasikesh ruchingej retu mu chisak cha kashalapol ushinshamena ni kubabal. Anch yidi yitakedila chisak cha “kashalapol” ya jingunin anch chitongijok chetu piur pa dinans kanang dia uyakin chifanyidin kuchitokish ap kuchirijek, awiy kakatap kulik kutenchik. Chisak cha kashalapol chikwet musangar wa kusal pamwing nich rusot riwanyidina ra Nzamb pa ndond pa kwinan amwinend piur pa kutenchik kanang kwa mutapu wa kutesh. Ov, ukusal nchik anch atenchik mu mutapu wetu wa kutesh Mukand wa Nzamb?​—Tang Luka 5:39.

10, 11. Ov, malejan ik tukutwisha kwilej kusutil ku yasalau antu amwing pasambishau mudimu wa kulejan rusangu ruwamp?

¹⁰ Shinshikinany amboku chilakej chikwau. Kwinsudiel kwa chitot cha mivu cha 19 ni kwinsambishil kwa chitot cha mivu cha 20, in Kwilej Bibil amwing adinga in kulejan patok nawamp atonga anch awiy ela kuwanyish nawamp chisend cha kulejan kusutil ku kupan ma diskur marijekau nawamp chakwel antu asangera. Awiy asangera kulejan patok, ni antu amwing pakach pau ading ni kusanger mu kuyishiman kwa chirungul kwa in kuyitesh. Pakwez, chamekana patok anch Yehova usotin anch antwend ipana nakash mu midimu kushalijan ya kulejan, kuwejaku ni wa kulejan ku chikumbu ni chikumbu. Antu amwing ading asadina ma diskur ma patok ading akat kulik kupakish kulondul chom ap chimwing chisu. Ku mes, awiy ading ameken mudi antu a muspiritu, ipanina kal nakash kudi Mwant. Pakwez, pamanau uman wa patok piur pa rutong ra Nzamb ra mudimu wa kulejan, yitongijok yau, rusot ni yibachikin yau yakin yamekana patok. Ov, mutapu ik wovay Yehova piur pau? Ndiy kayiyukishap. Awiy adiokala mu ditenchik.​—Mat. 10:1-6; Mid. 5:42; 20:20.

¹¹ Chinech chirumburikinap anch chading chiswapel kulejan patok kudi antu awonsu ashala ashinshamena mu ditenchik. Antu avud amana anch mudimu winou wading ukasiken, kwinsambishil. Pakwez awiy aziyila. Kupwa, ashikena ku kupandakan yakamish yau, ni Yehova wayiyukisha nakash. Ov, ukusal nchik anch akutazuk chakwel usala mudimu umwing wa kulejan umekeshina anch ukezap kushal mu mashakamin mey mawamp? Ov, ukusot kupakish kusal chom chimwing chisu?

Anch Mukatish Netu Wamulik Yehova

12, 13. (a) Ov, rutong ra Yehova ridi risu piur pa kumwopat muntu ulikina kwit dilikishin? (b) Ov, kupak ik kukatau kurish nich anvaj amwing in Kristu, ni chom ik chisadina anch kupak kwinoku kwikala kukash?

¹² Etwawonsu twijing chakin kamu chany chilejena anch tufanyidin kushakam zwang ku mujimbu, mu manangu, ni mu spiritu chakwel tumusangaresha Nzamb. (Tang Titus 2:14.) Pakwez, kuding yisu yikatau kupakiu kushinshaman kwetu ku mwikadil winou wa rutong ra Nzamb. Chilakej, anch mwan umwing kusu wa ambay amwing a uruw akweta chilakej chiwamp wadiokal mu uyakin. Mulong wa kusot “kusangar mu yitil mu kachisu kakemp” pa ndond pa kwikal mu urund ni Yehova ni anvaj end ashinshamena, nsand winou amwopat kal.​—Heb. 11:25.

¹³ Anvaj akwov ushon nakash! Piur pa antu akatau kwopat, awiy ij chakin kamu anch Bibil ulondin anch “kangal wovijanany nend muntu [mwawonsu] ukata kulond anch nidi mwanamakwey mwin Kristu, anch ndiy udi mwin usund, ap ukwet ris, ap ukat kusaal masaal, ap mwij, kangal wovijanany nend ap kusu kudia nend muntu wa mutapu winou.” (1 Kor. 5:11, 13) Awiy ij anch dizu “muntu [mwawonsu]” didia mu verse winou disambidin yid ya dijuku yakad kushakam nau mu chikumbu chimwing. Pakwez, awiy amukatin nakash mwanau! Yovil yikash yikutwish kuyibachik atonga anch: ‘Ov, mutapu ik tukutwisha kumukwash mwanetu ikundj amuchirikina Yehova anch twitekin mipak yikash mu urund wetu ni ndiy? Ov, ukutwishap kusal yom yikwau chakwel tudandamena kulam urund wetu ni ndiy?’b

14, 15. Ov, mupak ik wakin ufanyidinau kukwat kudi anvaj a mwan wopatau?

¹⁴ Michim yetu yikat kuyovil chakin kamu anvaj inay ushon. Pakwez, mwanau watonda chom chimwing, ni utondin kulondul mashakamin mend makad kwikal ma in Kristu pa ndond pa kwikal mu urund ni anvaj end ni ambay akwau akaritiy. Chikwau kand, anvaj akangeny cha kulond pa mulong winou. Chidiap cha kushimokish pamenau anch aburedin ukwash!

¹⁵ Pakwez chom ik chikezau kusal anvaj inay akatish? Ov, akez kuziyil ku umutakel udia zwang wa Yehova? Ov, akutwish kukwat chiyul anch akutwish kwikal nich urund pamwing ni mwanau wopatau ni kulond anch udi “mulong wa usey mu dijuku”? Pakwatinau mupak wau, awiy kafanyidinap kukangany kushinshikin mutapu wovilay Yehova piur pa yom yisadinau. Rutong rend ridi ra kulam ditenchik diend dikala zwang ni, anch chitwishikin, kuyibachik akayitil akarumuka. Ov, mutapu ik ukutwishau anvaj in Kristu kukasikesh rutong riner?

16, 17. Ov, chom ik tukutwisha kwilej kusutil ku kutongijokin piur pa chilakej cha Aron?

¹⁶ Aron mwanamakwend a Moses warisha nich mwikadil ukash pantaliken ni anend aad. Tongin bil pa mutapu wafanyidinay kwov chisu anend Nadab ni Abihu alambula pakad mbil kudi Yehova ni Wayibula ni kuyijip. Chakin kamu, chinech chapwisha urund win wawonsu welau kwikal nich ni anvajau. Pakwez kudi kand yom yivud. Yehova wayileja Aron ni anend ashinshamena anch: “Kangal walamany nswich jivuzangena, ap kwapol yidjal yen [mu chidil] kumekesh mudi ukwetany rufu, chamwamu ukufany, chad [Yehova] ukuchijimen chisak chawonsu.” (Lev. 10:1-6) Uruw woviken nawamp. Rukat retu mulong wa Yehova rifanyidin kwikal rikash nakash kupandakanamu rukat retu pantaliken ni yid ya dijuku yakad kushinshaman.

¹⁷ Nlel unou, Yehova kakatap kuyijip kapamp kamwing antu akata kujiril yijil yend. Ndiy uyinkishin chisu nich rukat chakwel akarumuka ku yisal yau yiyimp. Pakwez, mutapu ukatay kwiyov Yehova anch anvaj akweta mwan wakad Kumwit dilikishin adandamen kumupak kusutil ku kwikal nich urund wakad usey nich mwanau ikundj ap mband wopatau?

18, 19. Ov, yiyukish ik yikutwishau kutambul yid ya dijuku yilondwila malejan ma Yehova pantaliken ni muntu wopatau?

¹⁸ Antu avud opatau pasak itiyijin nlel unou anch mutapu ulikinau kuta nau urund kudi arund nau a pasak ni yid ya dijuku, chinech chayikwasha kukarumuk. Padingau ni kukwat chiyul cha kumuchirish mwan mband umwing, amakurump afunda anch ndiy watokisha zwang mwom wend “ku mutambu ukwau ndiy wasala mwamu mulong wa mutapu anamakwend alimisha ditenchik dia kwopatan.” Ndiy walonda anch “kulondul kwend kwa malejan ma Mukand wa Nzamb kwamukwasha kuchirik.”

¹⁹ Ov, chom ik tukutwisha kulond mu wiswimp? Tufanyidin kurish nich chibachikin cha muchim wetu uburedina kuwanyin wa kubwambwil ku chiyul cha Mukand wa Nzamb. Tufanyidin kwikal nich kashinsh anch njil ya Nzamb ya kurish nich milong yetu yiding ching yiwamp.

“Dizu dia Nzamb Dikwet Mwom”

20. Ov, mu mitapu ik yaad tukutwisha kusadil Hebereu 4:12? (Tal not.)

²⁰ Pafunday Paul anch “dizu dia Nzamb dikwet mwom,” ndiy kisambinap pakampwil piur pa Dizu dia Nzamb diafundau, Bibil.c Mazu minam malejen anch ndiy wisambina piur pa dizu dia Nzamb dia kushilamu. Paul walejana anch Nzamb kasalap kushilamu ni kupwa wavuramen kukuwanyish. Yehova walejana chinech kusutil muprofet Isay anch: “Mwamu . . . mazu mam, kimakutwishap kukangany . . . mazu mam makez kasal yom yawonsu mudi munalonda.” (Isay 55:11) Chawiy lel, tufanyidinap kushadish ruchingej anch yom yisadikinap swaa mu mutapu twasota anch yisadika. Yehova ‘ukat kusalang mudimu yisu yawonsu’ nich rutong ra kuwanyish nawamp rutong rend.​—Yoh. 5:17.

21. Ov, mutapu ik ukutwishay Hebereu 4:12 kuyikasikesh yid yishinshamena ya amapal a mu “chisak chipandikena kujimb”?

²¹ Yid yishinshamena ya amapal adia mu “chisak chipandikena kujimb” ya musadila Yehova mu makum ma mivu. (Kuj. 7:9, TMK) Avud pakach pau kadingap ni kuchingejin anch akez kunanap mu ditenchik dined dia yom. Pakwez, awiy kaziyap. (Kus. 92:14) Awiy ij anch dizu dia Nzamb dia kushilamu kwend dikezap kuburen kuwanyin​—ndiy udi mwom, ni Yehova usadin usu mulong wa kuwanyish dizu diend. Mulong rutong ra Nzamb ridi ra usey nakash mu muchim wend, tukat kumusangaresh anch twadandamen kulam rutong riner pa ndond ya kusambish mu manangu metu. Pa dichuku dined dia sambwad, Yehova ukat kwiswedish, ulamin ronganyin rend rakwel anch rutong rend rikez kuwanyin, ni antwend asadin mu umwing mulong wa kurikasikesh. Ov, chidi nchik kud ey? Ov, wandamin kal mu kwiswedish kwa Nzamb?

[Mazu madia kwishin kwa paj]

Kangal Washadish Rutong

• Ov, chom ik tuswiridina chakwel twandama mu kwiswedish kwa Nzamb nlel unou?

• Ov, kukwatijan ik kudia pakach pa rutong ra Nzamb ni rusot retu ra kwitiyij chiyul cha Mukand wa Nzamb?

• Ov, mu mitapu ik chikutwisha kukasikan kwitiyij ku malejan ma Mukand wa Nzamb, pakwez mulong wak chidia cha usey kudi etu kuziyil?

• Ov, mu mitapu ik yaad tukutwisha kusadil Hebereu 4:12?

[Chipich chidia pa paj wa 31]

Anvaj akat kwov ushon!