Iman Daang ni Ipuk Mipit ya Satan!

“Ukwimanany daang pakurish ni yom yawonsu yitenchikinay Sakudimban.”—EFES 6:11.

OV, MUTAPU IK UKUTWISHA KWAKUL?

Ov, mutapu ik kashalapol wa Yehova ukutwisha kwipuk kuwil mu mupit wa rukat ya yom ya ku mujimbu?

Ov, chom ik chikutwisha kuyikwash angatan ap angachik in Kristu chakwel ipuka kuwil mu mupit wa masandj?

Ov, mulong wak witiyijin anch chidi cha usey kwiman daang ni kwipuk rukat ya yom ya ku mujimbu ni masandj?

1, 2. (a) Ov, mulong wak Satan kakatap kuyovil azizidilau many riy ni “amikoku akwau”? (b) Ov, mipit ik ya Satan tukeza kwisambin mu mutu wa mulong winou?

SATAN DJABUL kakatap kuyovilang antu riy bwat, pakampwil antu amusadidila Yehova. Mwaning, ukat kurish njit nau ashal a azizidilau many. (Kuj. 12:17) In Kristu inay ashinshamena atakela mudimu wa kulejan Want pa chirung chetu ni amumekesha Satan mudi mwin kuyikel wa mangand minam. Djabul kakatinap kand “amikoku akwau,” ayikwashina azizidilau many ni akeza kutambul mwom wa chikupu—mulong Satan kakwetap ruchingej riner. (Yoh. 10:16) Chishimokishinap anch ukwet ujim! Chikalap nchik ruchingej ra kuya mwiur ap ra kushakam pa divud, kasangerap anch tudandamena kurish njit jetu. Rutong rend ridi ra kutukwat.—1 Pita 5:8.

² Chakwel awanyisha rutong rend, Satan utekining mipit kushalejan. Mulong ‘wabwikin kal manangu ma antu’ akad kwitiyij, awiy alikin kwitiyij ku rusangu ruwamp ni kakutwishap kuman mipit yiney. Pakwez, Djabul utekin kand mipit yend kudi antu amwing itiyija rusangu ra Want. (2 Kor. 4:3, 4) Mutu wa mulong wasutina wamekesha mutapu ik tukutwisha kwipuk mipit yiney yisatu ya Satan: (1) mazu mayimp, (2) wom ni rupompat, ni (3) yovil ya kuburen kuwanyin. Shinshikinany katat mutapu ik tukutwisha kwiman daang ku mipit yikwau yaad ya Satan—rukat ra yom ya ku mujimbu ni choziu cha kuwil mu masandj.

RUKAT RA YOM YA KU MUJIMBU —MUPIT UKAT KUSHESH

3, 4. Ov, mutapu ik yakamish ya ditenchik dined dia yom yikat kutwal ku rukat ra yom ya ku mujimbu?

³ Mu chilakej chimwing pakach pa yilakej yaletay, Yesu wisambina piur pa mbut jakunay mukach mwa miy. Ndiy walejana anch muntu ukutwish kutesh dizu, “pakwez yakamish ya mwom wa mangand ni rukat ra mapit yikat kushesh dizu dia Nzamb. Chad kakutwishap kusong mabuj.” (Mat. 13:22) Mwaning, rukat ra yom ya ku mujimbu udi umwing wa mipit yisadidinau kudi mukankuny netu Satan.

⁴ Mu kuyitek pamwing, kudi yom yaad yikat kushesh dizu. Chom chimwing chidi “yakamish ya mwom wa mangand.” Mu “machuku [minam] ma mar nakash,” kudi yom yivud yikutwisha kukwakamish. (2 Tim. 3:1) Nich mashakamin makasikena nakash ni kuburen midimu, yikutwish kusal anch ukanganya kuwanyish maswir ma dijuku ngond ni ngond. Ukutwish kand kwakam piur pa machuku ma kurutu ni kushimok anch, ‘Ov, nikwikal kand ni nfalang jiwanyidina pakeza mudimu kupwa?’ Mulong wa yakamish yiney, antu amwing asambisha kukimbijol mapit, ni kutong anch nfalang jikez kuyiking.

5. Ov, mutapu ik “rukat ra mapit” rikat kudimban?

⁵ Yesu wisambina kand piur pa chom chikwau—“rukat ra mapit.” Chinech kuwejaku ni yakamish yikutwish kushesh dizu. Bibil witiyijin anch “manangu makat kukwash mudi nfalang.” (Mul. 7:12) Pakwez, kusot nakash mapit ma ku mujimbu kudiap kwa manangu. Antu avud amana anch pasadilau usu wa kwikal ampich, akat kuwil mu mupit wa kukat yom ya ku mujimbu. Antu amwing ikala ap aswik a mapit.—Mat. 6:24.

6, 7. (a) Ov, mutapu ik rukat ra yom ya ku mujimbu rikutwish kwikal ubaj ku mudimu? (b) Chom ik chifanyidinay kutongin mwin Kristu anch watan mudimu umusendina chisu chawonsu?

⁶ Rusot ra mapit rikutwish kusambish pakemp-pakemp. Chilakej, shinshikin bil mwikadil winou. Mukurump wey wa mudimu wa kushejin, ni walond anch: “Nikwet rusangu ruwamp! Chapu chatan kal mudimu ukash. Pa chinech, chimekeshin anch chifanyidin kusal midimu yisu yilemp mu angond inay akemp alondwilaku. Pakwez nikutwish kukwinkish kashinsh anch akez kukufut nfalang jivud anch wikasikesh.” Ov, ukusal nchik anch watan mudimu wa mutapu winou? Chakin kamu, kuswir kwa kuwanyish maswir ma dijuku diey chidi chisend cha usey nakash, pakwez chidiap chisend chimwing kusu ukweta. (1 Tim. 5:8) Kudi kand yom yikwau yivud ufanyidina kutongin. Ov, yisu yinch ukeza kusal? Ov, mudimu wey wa ku mujimbu ukat kukangesh mijikit yey ya muspiritu, kuwejaku ni yikumangan ya chikumangen ni urel wey wa Kwifukwil mu Dijuku?

⁷ Mu kushinshikin pa mupak wey, chom ik ufanyidina kuman anch chidi cha usey—ov, mutapu ik kuvulijan kwa mudimu wey kukutwish kwikal nich usu pa nfalang jey jidia mu bank ap kwikal nich usu pa mwikadil wey wa muspiritu? Ov, usu usadila chakwel wikala ni nfalang jivud ukat kukukangesh kutek yisakin ya Want pa ndond ya kusambish mu mwom? Ov, ukutwish kuman mutapu rukat ra yom ya ku mujimbu kukutwish kwikal nich usu piur pey anch ukwatinap nich usey ukash wey wa muspiritu ni wa dijuku diey? Anch chinech chakushiken katat, mutapu ik ukutwisha kwiman daang ni kwipuk kusheshik mulong wa rukat ra yom ya ku mujimbu?—Tang 1 Timote 6:9, 10.

8. Ov, kushinshikin yilakej ik ya Bibil kukutwisha kutukwash kutongin chisu ni chisu pa mashakamin metu?

⁸ Chakwel wipuka kuwil mu rukat ra yom ya ku mujimbu, sambish kutongin chisu ni chisu piur pa mashakamin mey. Kangal wasot kwikal Esau, wamekesha kusutil ku yisal yend anch kasotap yom ya muspiritu! (Dis. 25:34; Heb. 12:16) Chikwau kand, ufanyidinap kwikal mudi mpich walejau anch aya akalandisha yom yawonsu yikwetay, kupwa apana nfalang jinej kudi atuzwendj, ni amulondula Yesu. Pa ndond pa kusal mwamu, muntu winou “waya nich ushon mulong wading mpich nakash.” (Mat. 19:21, 22) Kuwil mu mupit wa mapit, kwasala anch muntu winou ashadisha chisend chimwing chijim—cha kutwish kumulondul muntu mujim nakash wadinga pa divu! Babal chakwel kangal washadish chisend cha kwikal mwin kwilej wa Yesu Kristu.

9, 10. Ov, chom ik ukutwisha kulond anch chidi chitongijok cha Bibil piur pa yom ya ku mujimbu?

⁹ Mulong wa kurish nich wom upandakena piur pa yom ya ku mujimbu, Yesu wapana chiyul ech anch: “Chawiy kangal wiyakamishany anch: ‘Ov, tukudia yom ik? Ov, tukuna yom ik? Ov, tukudjal yom ik?’ In mangand akat kukimb yom yiney yisu yawonsu. Pakwez en, Tatukwen udia mwiur wij kal anch, ukwetany kuswir kwa yom yiney yawonsu.”—Mat. 6:31, 32; Luka 21:34, 35.

¹⁰ Pa ndond pa kuwil chibachikin cha kudimban ya mapit, salany usu wa kwikal nich chitongijok cha nfund a Bibil Agur, walonda anch: “Kangal wangikish uzwendj ap wimpich. Ndisha nich yakudia niswiridina.” (Jinsw. 30:8) Chimeken anch, anch Agur wamana anch nfalang jikat kulam muntu ni mapit makwet usu wa kudimban. Washikena ku kuman anch yakamish ya ditenchik dined ni usu wa kudimban wa mapit yikutwish kuyipish ukash wa muspiritu. Wom upandakena piur pa yom ya ku mujimbu ukutwish kusend chisu chey chawonsu, kupwish usu wey, ni kukusal anch uburena kwikal nich chibachikin cha kukimb yisakin ya Want. Chawiy lel, sal usu wey wawonsu chakwel kangal uwila mu mupit wa Satan wa rukat ra yom ya ku mujimbu!—Tang Hebereu 13:5.

MASANDJ—DIBUK DIJINDJIKINAU NICH MANANGU

11, 12. Ov, mutapu ik mwin Kristu ukutwisha kuwil mu masandj pa ndond yend ya mudimu?

¹¹ Ayibind asotina kumukwat nnam mukash akutwish kupund dibuk mwinjil mukatau kusutin annam yisu yivud. Abwikining yisu yivud tumitond tukemp-tukemp pa dibuk dined ni kutekapu divu. Choziu chimwing chidia pakach pa yoziu yikash ya Satan chifanikening nich mupit winou. Chidi chitil cha masandj. (Jinsw. 22:14; 23:27) In Kristu avud awila mu dibuk dined kusutil ku kwiyandjik ayinau mu mwikadil usadila anch chiswapela kuwa. Angatan amwing in Kristu asala masandj mulong wa kudandamen kuta urund wa piswimp ni muntu wakad kwikal mbay wau wa uruw.

¹² Kuta urund wa piswimp ni muntu wakad kwikal mbay wa uruw kukutwish kwikalaku pa ndond yey ya mudimu. Chawiy lel, malejan mamwing mamekesha anch chikunku cha amband asala masandj ni kusut ni piswimp ni amakundj 3 ap 4 awila mu masandj ading mu urund wa piswimp ni mbay nau wa mudimu wakad kwikal mbay wau wa uruw. Ov, mudimu wey witin anch wikal mu urund ni yid ya mujimbu windjing? Anch chidi mwamu, ov urund wa mutapu ik ukweta nau? Ov, ukwet mipak pakach pa kusal mudimu ni kulik kusal yom yikwau? Chilakej, kupwa kwa kwambamb yisu yivud ni mbay nend wa mudimu ikundj, nambaz mwin Kristu ukutwish kusambish kumulej yom yend ya ujindj, ni kumulej kand milong yidia mu dijuku diend. Chisu chikwau, kupwa kwa kwikal murund wa mbay nend wa mudimu udia mband, ikundj mwin Kristu ukutwish kutong anch: “Ndiy ukwatin nich usey yitongijok yam ni uteshin chakin kamu yinikata kumulej. Ni winsangaredin kamu. Nitongin anch ukez kwisadil yom yiwamp mwamu ku chikumbu!” Ov, ukutwish kuman mutapu ik in Kristu akutwish kuwil swaa mu masandj mu mikadil yiney?

13. Ov, mutapu ik kuta urund wa piswimp ni muntu wakad kwikal mbay wa uruw kukutwish kulank mu chikumangen?

¹³ Kuta urund wa piswimp ni muntu wakad kwikal mbay wa uruw kukutwish kulank mu chikumangen. Shinshikin chilakej cha yom yashikena. Daniel ni mukajend, Sarah,a ading ayibol a rawonsu. Daniel wading kand “mukurump wakad kulikang yisend.” Ndiy wading ukat kwitiyij yisend yawonsu yadingau ni kumwinkish. Mu mudimu wend wa kulejan, Daniel wading ni malejan ma Bibil matan madingay ni kwilej ni ansand—asatu pakach pau atambula dibatish. Akadivar inay asu abatishau adinga nich kuswir kwa kuyikwash. Padingay Daniel nich yom yivud ya kusal mu yisend kushalijan ya uteokras, Sarah wasambisha kuyikwash ansand inay. Kupwa chaku chinech chadandamena: Mwin kwilej wa pasak wa Daniel wikala nich kuswir kwa kutambul ukwash kanang mu yovil yend, ni Sarah wasambisha kumukwash. Sarah ni ndiy wadinga nich kuswir kwa kumubangin, ni in kwilej a Daniel asambisha niyawiy kumukwash. Kupwa wawila mu mupit uyimp. Daniel ulejen anch: “Angond ipanay mukajam amwinend amuziyisha muspiritu ni mu yovil, kuwejaku ni mutapu navuramena kumubangin, chinech chamushikija ku uyimp. Mukajam wasala masandj ni umwing wa in kwilej am a pasak. Ndiy waziya muspiritu, kupwa nasambisha kutongin pa yisend yam yawonsu anch niyiwanyishin kand nawamp.” Mutapu ik ukutwisha kwipuk chom chinech chiyimp?

14, 15. Ov, yom ik yikutwisha kuyikwash angatan in Kristu chakwel ipuka dibuku dia masandj?

¹⁴ Chakwel wipuka kuwil mu dibuk dia masandj, tongin bil pa kurumburik kwa machip ma uruw. Yesu walonda anch: “Muntu kafanyidinap kwauril antu abombakeshay Nzamb.” (Mat. 19:6) Kangal watong anch yisend yey ya uteokras yidi ya usey nakash kupandakanamu mukajey. Chikwau kand, ufanyidin kubabal mulong kusutish chisu yisu yawonsu kulemp ni mbay ney wa uruw mu mijikit yakad usey kukutwish kumekesh kuziy kwa uruw wey ni kukutwish kutwal ku choziu ni pamwing ap ku chitil chikash.

¹⁵ Anch udi mukurump, ov chikwikal nchik piur pa chisak cha amikoku? Kambuy Pita wafunda anch: “Yilamany yisak ya amikoku a Nzamb akwinkishanyau, kangal wasalany mulong wakukushindilany, pakwez salany mudi mudia rusot ra Nzamb. Kangal wasalany kusu mulong wa kupit nfalang, pakwez salany nich mushiku.” (1 Pita 5:2) Ufanyidinap chakin kamu kuyivuramen yid yidia mu chikumangen yiufanyidina kulam. Pakwez, ufanyidinap kuwanyish mudimu wey wa kuyilam amikoku ni kuvuramen chisend chey mudi ikundj. Chikutwish kwikal chakad usey—ap ubaj—anch washinshikin manangu mey “ufil nzal” ku chikumbu. Daniel walonda anch: “Kudi yom yivud tufanyidina kusal mu mwom wetu pa ndond pa kusal usu wa kulam yisend ni kuvuramen dijuku dietu.”

16, 17. (a) Ov, mipak ik ya usey yifanyidinau kukwat in Kristu pa ndond ya mudimu chakwel alejana patok anch kakwetap kuswir ni kuta urund wa piswimp ni muntu wa mujimbu windjing? (b) Let chilakej cha mukand wapalangeshau ukutwisha kuyikwash in Kristu chakwel ipuka kusal masandj.

¹⁶ Yiyul yivud yiwamp yamekana mu Chinong cha Kalam ni mu Réveillez-vous ! mulong wa kuyikwash angatan in Kristu chakwel ipuka kuwil mu mupit pa masandj. Chikwau kand, Chinong cha Kalam cha Minkind 1, 2006, chalejana anch: “Ku mudimu, babal mulong wa mikadil yikutwisha kukudish urund wa piswimp. Chilakej, kusutish yisu yikwau yivud ku biro mulong wa kusal mudimu pamwing ni muntu wa mujimbu windjing kukutwish kwashikij ku yoziu. Chiudia ngatan ap ngachik, ufanyidin kumekesh patok mu mazu mey ni mu ngikadil yey anch usotinap kukatijan nakash ni muntu wakad kwikal mbay ney a uruw. Mulong udi muntu wa Nzamb, chakin anch ukwipuk kumuladikij ikundj ap mband ni kubudok nend pamwing ap kudjal ni kwileng nayimp. . . . Chakwel tusambisha kuvurik ni kuyivurish antu akwau yom tutekina pa ndond ya kusambish tufanyidin kutek mafoto ma mbay netu a uruw ni ma anetu mu biro ni kumatek pa ndond yimekena. Kwat mupak wa kulik kukasikesh dichuku ap dimwing—ap kulikidil—kukudish rukat ripandakena ni muntu wakad kwikal mbay ney a uruw.”

¹⁷ Mutu wa mulong udia mu Réveillez-vous ! wa Ndol 2009 ulondin anch “ La fidélité conjugale: que signifie-t-elle vraiment ? ” wababesha piur pa yitongijok yiyimp ya kumanijan ni muntu wakad kwikal mbay wa uruw. Mutu wa mulong winou wamekesha anch kwipan mu yitongijok yiyimp ya kumanijan ni muntu mukwau ukutwish kusal anch ushikena ku kusal masandj. (Jak. 1:14, 15) Anch udi ngatan, chidi cha manangu anch ey ni mukajey wasambishany kuchirikin pamwing malejan minam chisu ni chisu. Uruw udi dirijek diatenchikau kudi Yehova amwinend, ni chidi chom chitumbila. Kutek chisu cha kwisamb ni mukajey piur pa uruw wey udi mutapu uwamp wa kumekesh anch ukwatin nich usey yom yitumbila.—Dis. 2:21-24.

18, 19. (a) Ov, yisu yibudikin ya masandj? (b) Ov, kushinshaman mu uruw kukwet yiyukish ik?

¹⁸ Anch wawil amwiney mu choziu cha kukudish kuta urund wa piswimp ni muntu wakad kwikal mbay ney wa uruw, tongijokin pa yibudikin yiyimp ya kusotijan ni ya masandj. (Jinsw. 7:22, 23; Gal. 6:7) Antu asadila masandj kakatap kumusangaresh Yehova ni akat kuyovish kuyip ambay nau a uruw ni ayinau. (Tang Malakiy 2:13, 14.) Pakwez, tongin amboku pa yiyukish yikata kuyishiken antu alamina yaku yidia zwang. Kakwetap ching kusu ruchingej ra kushakam chikupu pakwez asangaredin mwom uwamp katat, ni kom kishitwila.—Tang Jinswir 3:1, 2.

¹⁹ Nfund a Kuseng wawanga anch: “Awiy akatil yijil yey akwet chisambu chijim, kakwetip mulong wa kwipwakal.” (Kus. 119:165) Chawiy lel, katany uyakin ni “babalany ku yaku yen. Kangal wikalany nich yaku ya antu ayisup, pakwez ikalany antu ababela” mu chirung chinech chiyimp. (Efes 5:15, 16) Mu jinjil twendila mwizwil mipit yatekau kudi Satan mulong wa kuyikwat in kwifukwil akin. Pakwez atwinkishin kal yom ya kwilam nich ayinetu. Yehova watwinkisha yom tuswiridina chakwel ‘twimana daang’ ni “[tutwisha] kujimish nich jinseu ja kasu jawonsu jikwasay Sakudimban”!—Efes 6:11, 16.

[Dizu didia Kwishin kwa paj]

[Chipich chidia pa paj wa 29]

Rukat ra yom ya ku mujimbu rikutwish kumuyipish muntu muspiritu. Kangal walikidil chakwel chinech chikushikena

[Chipich chidia pa paj wa 32]

Kuta urund wa piswimp ni mband ap ikundj wakad weyey—ap kuwil mu mupit winou—kukutwish kukushikij ku kusal masandj