Babel Mipit ya Djabul!

“Akez . . . kusurik mu mupit wa [Djabul].”—2 TIM. 2:26.

MUTAPU IK UKUTWISHA KWAKUL?

Ov, yipul ik ufanyidina kwiyipul anch ukwet chibachikin cha kuyiswingish antu akwau?

Ov, chom ik ukutwisha kwilej piur pa kuwil mu wom ni mu rupompat kusutil ku yilakej ya Pilat ni ya Pita?

Mutapu ik ukutwisha kwipuk kudandamen kwiyov wakad kuwanyin?

1, 2. Ov, mipit ik ya Djabul tukeza kwisambin mu mutu wa mulong winou?

DJABUL uyipompatining atushalapol a Yehova. Rutong rend ridap ching kusu ra kuyishesh, mudi mukatau kuyijip anam kudi chibind mukash. Pakwez, rusot ra Djabul ridi ra kuyikwat aom ni kuyisadil mudi musotinay.—Tang 2 Timote 2:24-26.

² Mulong wa kuyikwat anam aom, mwin kuta mipit ukutwish kusadil mipit ya mitapu kushalijan. Ndiy ukutwish kusal usu chakwel nam andamina ku chis kukutwishay kumukwatin mu mupit. Ap ukutwish kusadil mupit wakad kumekan ukata kusabuk ni kumukwat nnam kwa kumukashimwish. Djabul ukat kusadil mipit ya chilik chimwing chakwel ayikwata atushalapol a Nzamb aom. Anch tusotin kwipuk kuwil mu mipit yend, tufanyidin kubabal ni kutesh kubabesh kwa yijingidij yimekeshina anch mipit yimwing ya Satan yidi piswimp. Mutu wa mulong winou ukez kwisambin mutapu ik tukutwisha kwilam pantaliken nich mipit yisatu yikatay Djabul kusadil chakwel ayikwata antu. Kudi (1) mazu mayimp, (2) wom ni rupompat, ni (3) yovil ya kuburen kuwanyin. Mutu wa mulong ulondwilaku ukez kwisambin pa mipit yikwau yaad ya Satan.

JIMISH KASU KA MAZU MAYIMP

3, 4. Ov, kukangany kuyikel rudim retu kukutwish kwikal nich chibudikin ik? Let chilakej.

³ Mulong wa kuyidiosh annam mwi ndond yau ya kujingamin, chibind ukutwish kutek kasu ku chikunku chimwing cha masuk, ni kuyikwash annam asotina kuchin. Mu chifanikesh, Djabul ukusot kutek kasu ku chikumangen cha in Kristu. Anch watwish kusal mwamu, ukutwish kuyitek yid ya chikumangen kulemp nich ndond ya diking ni kusambish kuyiyikel. Ov, mutapu ik tukutwisha kuta urund nend pakad kwijik ni kuwil mu mupit wend?

⁴ Kambuy Jakobu wilikeja rudim nich kasu. (Tang Jakobu 3:6-8.) Anch twakangany kuyikel rudim retu, tukutwish kusambish kutek kasu ka chifanikesh mu chikumangen. Ov, mutapu ik chikutwisha chinech kushiken? Shinshikin bil chilakej ech: Alejana ku chikumangen anch, nambaz umwing wikal kal chibol wa rawonsu. Kupwa kwa chikumangan, in kulejan aad asambish kwisambin piur pa chijikish chinech. Umwing umekeshin musangar ni usotin anch chibol musu aya kurutu. Pakwez mukwau ukat kwidjidjek piur pa yibachikin ya chibol winou musu ni ulejen anch ndiy wasambish kal mudimu wa uchibol mulong wa kwikal nich katumb mu chikumangen. Ov, nany pakach pa in kulejan inay aad uwanyidina kwikal murund ney? Chikasikenap kujingunin nany pakach pa antu inay usotina kutek kasu ku chikumangen kusutil ku mazu mend.

5. Mulong wa kujimish kasu ka mazu mayimp, ov, chiwapidil kwishinshikin nchik piur pa chaku chetu?

⁵ Mutapu ik tukutwisha kujimbish kasu ka rudim rakad kuyikel? Yesu walonda anch: “Kan ka muntu kakat kubudish yom yizwila mu muchim wend.” (Mat. 12:34) Chawiy lel, jinzau ja kusambish jidi kushinshikin muchim wetu ayinetu. Ov, tukat kwipuk yovil yiyimp yikata kulet mazu mayimp? Chilakej, anch watesh anch mukadivar umwing wikal kal nich chisend chimwing cha mudimu, ov, ukwitiy anch yibachikin yend yidi yishitwila, ap ukutong anch, ukimbin yisakin yend amwinend? Anch tukwet chibachikin cha kuswing, chifanyidin kuvurik anch Djabul waswingisha yibachikin ya Job kashalapol ushinshamena wa Nzamb. (Job 1:9-11) Pa ndond pa kumutongin mukadivar netu uyimp, chiwapidil kushinshikin mulong wak tusotin kumuswingish. Ov, tukwet chakin kamu mayingish mawamp ma kusal mwamu? Ov, muchim wetu auyipishin kudi spiritu wakad rukat upalangena mu machuku minam mansudiel?—2 Tim. 3:1-4.

6, 7. (a) Ov, yom ik yimwing yisadina tusambisha kuyiswingish antu akwau? (b) Mutapu ik tufanyidina kwakul anch atusal masaal?

⁶ Shinshikin mayingish makwau masadila anch tusambisha kuyiswingish antu akwau. Dimwing dikutwish kwikal rusot ra kusal anch yom tusadila ayinetu yimekana kudi antu. Chikwau kand, tukutwish kupakish kwitek piur nakash ni kuyishirish akwau pansh. Ap tukutwish kupakish kulikishin uyimp wetu ayinetu chakwel tusala yom yiwamp. Chikalap nchik chibud, ris, ap kuburen chisambu kukata kututakel, chibudikin chiyipining nakash.

⁷ Chikutwish kumekan anch tukat kwiyingish kusutil ku kumuswingish muntu mukwau. Pamwing ap ndiy watulonda nayimp. Anch chidi mwamu, chiwapinap kuchirish uyimp. Kusal mwamu kukat kuwej kasu ni midimu yambatena nich rusot ra Djabul, ra Nzamb bwat. (2 Tim. 2:26) Chiwapidil kumwimburij Yesu pa chinech. Pamusalau masaal, “ndiy kayichirishinap.” Pakwez, “ndiy wamuchingeja Nzamb Nkalansambu utentamina.” (1 Pita 2:21-23) Yesu wading ni ruchingej anch Yehova ukez kusal yom mu mutapu usotinay ni pa chisu chatekay. Tufanyidin kwikal nich ruchingej riner rimwing mudiay Nzamb. Pitukata kusadil mazu metu mulong wa kwok, tukasikeshin “chisambu chikukasinany en awonsu pamwing” mu chikumangen chetu.—Tang Efes 4:1-3.

DIOKAL MU MUPIT WA WOM NI WA RUPOMPAT

8, 9. Ov, mulong wak Pilat wamufisha nich Yesu?

⁸ Nnam ukwatinau mu mupit kakutwishap kand kwikal nich want ipau wa kusal yawonsu yisotinay. Chilik chimwing, muntu uwidila mu wom ni mu rupompat ukukangany kutakel mwom wend. (Tang Jinswir 29:25.) Shinshikinany amboku yilakej ya antu aad ashalijadina nakash awila mu rupompat ni mu wom ni talany yitukutwisha kwilej kusutil ku yom yayishikena.

⁹ Nyikel mwin Rom Pons Pilat wading wija anch Yesu wading muntu wakad mulong ni chamekana anch kasotap kumusal uyimp. Chawiy lel, Pilat walejana piur pa Yesu anch “kasadilap chom cha kumujipin.” Pakwez, Pilat wamufisha nich chakwel afa. Mulong wak? Mulong Pilat wawila mu rupompat ra chisak cha antu. (Luka 23:15, 21-25) Akankuny inay alonda ni dizu dia piur anch: “Anch ey wamulikishaku, charumburik anch, ey kiudiap murund wa Sezar,” awiy amupompata chakwel alondula yisal yau. (Yoh. 19:12) Pilat wova wom wa kushadish ndond yend—ap mwom wend—anch wikal ku mutambu wa Kristu. Chawiy chamubachika ku kusal rusot ra Djabul.

10. Ov, chom ik chamubachika Pita kumutun Kristu?

¹⁰ Kambuy Pita wading murund wa Yesu wa piswimp nakash. Ndiy walonda patok anch Yesu wading Mesia. (Mat. 16:16) Pita washala ushinshamena pakanganyau in kwilej akwau kutesh kurumburik kwa yom yalonday Yesu ni amulika. (Yoh. 6:66-69) Ni pezau akankuny chakwel amukwata Yesu, Pita wasadila mpak ya musamun chakwel arisha mulong wa Mwant wend. (Yoh. 18:10, 11) Kupwa, Pita wawila mu wom ni watadika anch kamwijap Yesu Kristu. Mu chisu chikemp, kambuy wawila mu mupit wa wom wa muntu ni wasala anch wom winou umukangesha kujijaman.—Mat. 26:74, 75.

11. Ov, yibachikin ik yiyimp tufanyidina kuchin?

¹¹ Pitudia in Kristu, tukwet kuswir kwa kurish nich rupompat ra kusal yom yikeza kumwovish Nzamb kuyip. Amakurump a mudimu ap antu akwau akutwish kupakish kutupompat chakwel tusadila makasu ap akutwish kupakish kutwandjik mu mwikadil wa masandj. In kwilej akutwish kurish nich rupompat ra arund asadila usu wa kuyibachik chakwel iya ku ekzamen, atala ma filim ma pornografi, ana ruwand, asadila damb, ni ipana mu masandj. Chawiy lel, chom ik chikutwisha kutukwash chakwel twipuka kuwil mu mupit wa wom wa kusal yom yakad kumusangaresh Yehova?

12. Ov, malejan ik tukutwisha kwilejin kudiay Pilat ni Pita?

¹² Talany amboku yitukutwisha kwilej kusutil ku yilakej ya Pilat nenday Pita. Pilat kadingap wija yom yivud piur pa Kristu. Pakwez, wading wij anch Yesu kadingap ni mulong ni kadingap muntu wa chamwamu. Pakwez, Pilat waburena kwitudish ni rukat pantaliken ni Nzamb wakin. Djabul wamukwata mwom mu mupit wend. Pita ndiy wading ni ronganyin ni umukatina Nzamb. Pakwez waburena kwitudish, wova wom ni wawila mu rupompat. Kurutu kwa kumukwat Yesu, Pita walonda nich kwitutul anch: “Ap anch akwetu awonsu akuchin, am kinikutwishap kusal mwamu, bwat!” (Mar. 14:29) Kambuy wela kwikal tayad mulong wa kurish nich yoziu yela kushiken kurutu ni kusal chilik chimwing ni nfund a kuseng wateka ruchingej rend mudi Nzamb ni wawanga anch: “[Yehova] udi wam, kinikwovip kwam wom. Antu akutwish kusal ik kudi am?” (Kus. 118:6) Pa uchuku wa nsudiel wa mwom wend wa pa divu, Yesu wamusenda Pita ni atwimbuy akwau aad waya nau mukach mwa chir cha Getiseman. Pa ndond pa kucha ku mes, Pita ni arund nend alala tul. Yesu wayilangwisha ni kuyilej anch: “Chishany ku mes, chad lembilany chakwel kangal wawany mu yoziu.” (Mar. 14:38) Pakwez Pita walala kand ni kupwa wawila mu wom ni mu rupompat.

13. Mutapu ik tukutwisha kurish nich chibachikin cha kusal uyimp?

¹³ Yilakej ya Pilat ni Pita yikutwish kutulej kand dilejan dikwau dia usey: Kupandakan rupompat kwitin kwikal nich ronganyin, kwitudish, kwikepish, kumukat Nzamb, ni kumwov Yehova wom, muntu bwat. Anch ritiy retu aritungin pa ronganyin rakin, tukez kulond nich mushiku piur pa yitiyij yetu nich kashinsh. Chinech chikez kutukwash kurish nich rupompat ni kupandakan wom wa muntu. Chakin kamu, tufanyidinap kupipesh usu wetu dichuku ap dimwing. Pakwez, tufanyidin kwitiyij nich kwitudish anch tuswiridin usu wa Nzamb chakwel turisha nich rupompat. Tufanyidin kumulembil chakwel tutambula spiritu wa Yehova ni kusal anch rukat retu pantaliken ni ndiy ritubachika kukasikesh dijin ni yany yend. Chikwau kand, tufanyidin kwirijek mulong wa rupompat kurutu kwa kurish nich choziu. Chawiy lel, kutakel kwirijek pamwing ni malembil kukat kuyikwash anetu chakwel apandakana choziu anch arund nau apakish kuyipompat chakwel asala chom chimwing chiyimp.—2 Kor. 13:7.a

KWIPUK MUPIT UKATA KUCHANY—KWIYOV WAKAD KUWANYIN NAKASH

14. Ov, chom ik chisotinay Djabul anch tutonga piur pa kurumbuk kwetu kwa pasak?

¹⁴ Yisu yimwing mupit wa nnam akat kuusalang nich chom chilimina ap diyal ditekinau kwiur pa njil jikatau kusutin annam. Nnam wakad kubabal ukwikwal ku moj ukwatina chom chilimina ap diyal ni chinech chikez kuwa, ni kumuchany nnam. Kwiyov wakad kuwanyin kukutwish kwikal mudi chom chilimina chikata kumuchany muntu. Anch twatongin pa kurumburik kwetu kwa pasak, tukutwish kulond anch “nalimin kal nakash.” (Tang Kuseng 38:3-5, 8.) Satan usotin anch tulonda anch Yehova kakutwishap kutwovil riy ni tukutwishap kuwanyish yitiyij Yend.

15, 16. Mutapu ik ukutwisha kwipuk mupit wa kuwil mu kwiyov wakad kuwanyin?

¹⁵ Mutapu ik tukutwisha kwipuk mupit winou ukata kuchany? Anch wasal chitil chikash, sal usu katat chakwel urijeka urund wey ni Yehova. Kimb amakurump ni yileja chakwel akukwasha. (Jak. 5:14-16) Sal usu wey wawonsu chakwel utenchika yom. (2 Kor. 7:11) Anch akukand, ufanyidinap kov kuyip. Mulong dipup didi chom chimekeshina anch Yehova ukukatin. (Heb. 12:6) Sal usu wa kwipuk kuchirikin mu yom yasala anch uwila mu chitil, ni sal usu wa kusal mwamu. Kupwa kwa kukarumuk ni kulik yisal yiyimp, kwikal nich ritiy mu difut dia yakupesh ya Yesu Kristu kukutwish kudiosh chakin kamu yitil yey.—1 Yoh. 4:9, 14.

¹⁶ Antu amwing adandamedin kwiyov akad kuwanyin mulong wa yitil yayilikishinau kal. Anch chidi chakin kudi ey, vurik anch Yehova wamulikishina Pita ni atwimbuy akwau pamulikau Mwanend mukatish Yesu pa chisu chikash chadingay mu mar. Yehova wamulikishina muntu wopatau mu chikumangen cha in Korint wasala masandj kupwa wakarumuk. (1 Kor. 5:1-5; 2 Kor. 2:6-8) Dizu dia Nzamb dikat kwisambin piur pa antu asala yitil yikash akarumuka ni ayilikishina kudi Nzamb.—2 Jnsg. 33:2, 10-13; 1 Kor. 6:9-11.

17. Ov, chom ik chikutwisha difut kutusadil etu?

¹⁷ Yehova ukez kukulikishin ni kuvuramen yitil yey wasala pasak anch wakarumuk chakin kamu ni witiyij riy rend. Kangal wiyov anch yakupesh ya difut dia Yesu yikutwishap kudiosh yitil yey. Anch wasal mwamu ukuwil mu mupit umwing wa Satan. Chikalap nchik chisotinay Djabul anch twitiyija, difut dikutwish kudiosh yitil ya antu awonsu arumbuka kupwa akarumuk. (Jinsw. 24:16) Ritiy mu difut rikutwish kudiosh chisend chilimina cha kwiyov wakad kuwanyin pa makij metu ni rikutwish kukwinkish usu wa kumusadil Nzamb nich muchim wey wawonsu, ni manangu mey mawonsu, ni mupim wey wawonsu.—Mat. 22:37.

TWIJ NAWAMP YOM YITENCHIKINAY SATAN

18. Ov, mutapu ik tukutwisha kwipuk mipit ya Djabul?

¹⁸ Satan kakatap kutond mupit wisu ukutukwatay nich, pakwez rusot rend ridi ra kutukwat kamu. Mulong twij nawamp yom yitenchikinay Satan, tukutwish kwipuk kuwil mu mipit ya Djabul. (2 Kor. 2:10, 11) Tukutwishap kuwil mu mipit yend anch twalembil chakwel tutambula manangu ma kurish nich yoziu yetu. Jakobu wafunda anch: “Anch umwing wenen waburen manangu, amwita Nzamb, chad ndiy ukumwinkish, mulong ukat kupan kudi awonsu wakad katond.” (Jak. 1:5) Tufanyidin kusal yom kwambatan nich malembil metu mu kwipan mu dilejan dia muntu ipend pakad kujing ni kusutil ku kusadil Dizu dia Nzamb. Mikand yikwashina kwilej Bibil yafundau kudi chisak cha kashalapol ushinshamena ni ukweta manangu yalejana patok piur pa mipit ya Djabul ni yitukwashin kuyipuk.

19, 20. Ov, mulong wak tufanyidin kukis yom yiyimp?

¹⁹ Malembil ni dilejan dia Bibil yisadil anch twikala antu akatina yom yiwamp. Pakwez chidi kand cha usey kudi etu anch twakis uyimp. (Kus. 97:10) Kutongijokin pa yibudikin ya kulondul maku metu ayinetu kukutwish kutukwash kwipuk kusal uyimp. (Jak. 1:14, 15) Pitukata kwilej kukis uyimp ni kukat chakin kamu uwamp, chom chitekinay Satan mu mupit wend chikutwovish kuyip; ni chikutwishap kupwit yitongijok yetu.

²⁰ Tujikitishin mud ik anch Nzamb utukwashin chakwel kangal atupandakan kudi Satan! Kusutil ku spiritu Wend, Dizu diend, ni dirijek diend, Yehova ukat kutukamunin “ku kuyip.” (Mat. 6:13) Mu mutu wa mulong ulondwilaku, tukez kwilej mutapu wa kwipuk mipit yikwau yaad yamanay Djabul anch yidi yikash mulong wa kuyikwat aom atushalapol a Nzamb.

[Dizu didia Kwishin kwa paj]

[Chipich chidia pa paj wa 24]

Mazu mayimp makutwish kwosh chikumangen nich milong

[Chipich chidia pa paj wa 27]

Ukutwish kudiosh chisend cha kwiyov wakad kuwanyin