Shakamany Kukwatijan ni Malembil ma Chilakej​—Chikunku cha II

1-3. Ov, mulong wak nambaz umwing wikala ni kashinsh anch Yehova wading wij maswir mend?

LANA udia chibol wa rawonsu kavaramenap yom yamanay chisu chayay ni kwendangan mwi ngand ya Allemagne mu muvu wa 2012. Wamana anch malembil mend maad amakula. Pasalay malembil mend ma kusambish mu train wamutwalang ku chiwandj cha avion. Wamulembila Yehova chakwel amukwasha amana mutapu wa kupan uman. Kupwa kwa kushik ku chiwandj cha avion, walembila kand ni amuleja anch avion kakuyap nlel, ukuya ching diamashik. Lana wamwita kand Yehova chakwel amukwash mulong washesha kand nfalang jend jivud ni wasota ndond ya kulal uchuku winiwa.

² Papwishay Lana malembil mend, watesha muntu wamutazuk ni wamwel anch, “Lana, chom ik usadina pinap?” Nsand winou wamwipula wading murund nend wilejay nend ku shikol yimwing. Nsand winou wading pamwing ni makwend ni ngakend mband, amuleta ku chiwandj cha avion chakwel aya mu Afrik du Sud. Payilejay Lana mutapu wendinay, anvaj a nsand winou amusenda chakwel aya nend ku chikumbu chau. Amwipula yipul yivud piur pa yitiyij yend ni pa mudimu wa uchibol.

³ Chikwacha pamanch, kupwa kwa kudia yisakol Lana wakula ku yipul yivud yamwipulau piur pa Bibil. Lana wayileja chakwel akimba Kaman umwing ukutwisha kudandamen kwakul ku yipul yau. Wajingunina anch muntu ukata “kwakul kulembil kwetu” watesha malembil mend ni wamukwasha.​—Kus. 65:2.

4. Ov, maswir ik tukushinshikina?

⁴ Anch turishin ni yakamish, chidi cha usey kumwit Yehova chakwel atukwash, ni ukwet musangar wa kutesh malembil metu. (Kus. 34:15; Jinsw. 15:8) Pakwez anch twatongijokin pa malembil ma chilakej, tukutwish kujingunin anch kudi kand yom yikwau tufanyidina kwit mu malembil metu. Chilakej, anch twashinshikin pa maswir metu ma muspiritu tukuman yom yidia mu malembil minam ma chilakej. Chawiy lel, ov, umenap anch tufanyidin kusal usu wa kushakam kukwatijan ni yom yinying yidia mu malembil minam, malondina piur pa kwit yakudia ya pichuku pichuku?​—Tang Mateu 6:11-13.

“ITWINKISHA ILEL UNOU YAKUDIA YETU YA PICHUKU PICHUKU”

5, 6. Ov, mulong wak malembil metu piur pa kwit yakudia yetu ya pichuku pichuku kudi kwa usey ap anch tukwet yom ya kumujimbu yivud?

⁵ Yesu watuleja kulembil mulong wa kwit “yakudia yetu” pa ndond pa kulond anch “yakudia yam” pichuku pichuku. Victor udia kalam wa munyingumuku mu Afrik urumburil anch: “Nikat kumujikitish Yehova nakash mulong am ni mukajam tukatap kwiyakamish mulong wa kwijik anch yakudia ya diamashik yikudiokal kwisu ap kwiyakamish anch tukufut chikumbu nchik. Akadivar netu akat kutubanginang kamu dichuku diawonsu. Pakwez nalembila anch antu atukwashina inay asala usu wa kujijamen yakamish yau.”

⁶ Anch ukwetany yakudia yivud, ufanyidinany kuyitongin kand akadivar aburedina ap amena mar mulong wa mar ma chitangil. Tufanyidinap ching kulembil mulong wa awiy, pakwez tufanyidin kusal kukwatijan ni malembil metu. Chilakej, tukutwish kuyinkaku akadivar netu adia mu maswir yom tukweta. Tukutwish kand chisu chawonsu kupan ukwash ku mudimu usadikina pa mangand mawonsu, ni kwijik anch yipan yiney yidiaku mulong wa kuyikwash akadivar aburedina.​—1 Yoh. 3:17.

7. Ov, mulong wak Yesu wafundisha anch “kangal wiyakamishany mulong wa diamashik”?

⁷ Palonday piur pa yakudia ya pichuku pichuku, Yesu walonda piur pa maswir metu ma dichuku. Walonda anch, ang Yehova ukat kubangin masuku: “Ov, yidjal yikupanay Nzamb kudi en, kiyikupandakanap ufun wa masuku? kangal wiyakamishany anch, . . . Ov, tukudjal yom ik?’” Walonda kand anch: “kangal wiyakamishany mulong wa diamashik.” (Mat. 6:30-34) Chinech chimekeshin anch tufanyidinap kwiyakamish piur pa yom ya kumujimbu, pakwez tufanyidin kusanger kuwanyish maswir metu ma dichuku. Pakach pa maswir minam padi, kwikal ni chikumbu, kusal midimu mulong wa kudish dijuku diey, ni manangu mulong wa kukwat mipak yiwamp piur pa ukash wa mujimbu. Anch tulembiling kwetu mulong wa kwit yom ya kumujimbu, chikutwish kumekan anch tukwetap chitongijok chiwamp. Maswir ma muspiritu mawiy makweta usey nakash kudi etu.

8. Ov, chom ik chituvurishina mazu ma Yesu ma yakudia yetu ya pichuku pichuku piur pa yom yikweta usey kudi etu? (Tal chipich cha kwinsambishil.)

⁸ Mazu ma Yesu piur pa yakudia yetu ya pichuku pichuku matuvurishin maswir metu ma yakudia ya muspiritu. Walonda anch: “Muntu kakutwishap kwikal mwom mulong wa yakudia kusu, pakwez ukwet kuswir kwa mazu mawonsu makat kulonday Nzamb.” (Mat. 4:4) Chawiy lel, tufanyidin kudandamen kulembil anch Yehova atudisha muspiritu pa chisu chiwanyidina.

“TULIKISHINA YITIL YETU”

9. Ov, mulong wak yitil yetu yidi mudi “yikal”?

⁹ Ov, mulong wak Yesu wasadina dizu “yikal,” kupwa walond kand anch “yitil”? (Mat. 6:12; Luka 11:4) Walonda mwamu mulong yitil yetu yidi mudi yikal. Mu muvu wa 1951, Chinong cha Kalam charumburila anch chisu tukata kusal chitil, chidi mudi twikal kal ni chikal kudiay Yehova. Tufanyidin kumekesh rukat ni kumuziyil Yehova. Chawiy lel, anch twamusadin Nzamb chitil, chidi mudi twakangany kal kumwink Nzamb yitwadia tufanyidin kumwink. Anch wakat, Yehova ukutwish kwend wajip urund wetu. Gazet winou ulondin kand anch kusal chitil kudi kuburen rukat ra Nzamb.”​—1 Yoh. 5:3.

10. Ov, mulong wak Yehova ukat kutulikishin yitil yetu, ni mutapu ik tufanyidina kwiyov pa mulong winou?

¹⁰ Musangar mudi ik pa kwijik anch Yehova wamupana Yesu mudi chakupesh cha difut mulong wa yitil yetu! Tukweting kuswir anch Yehova atulikishina dichuku diawonsu. Yesu wafa mulong wetwetu kwasutin kal mivu 2 000, pakwez tudandamedin kamu kutaninamu kushik ni nlel. Tufanyidin chisu chawonsu kumujikitish Yehova mulong wa chipan chinech. Kwikil muntu ap umwing wa pakach petu wafanyina kufut difut dined dia usey chakwel atukwola ku chitil ni ku rufu. (Tang Kuseng 49:7-9; 1 Pita 1:18, 19.) Mazu madia mu malembil ma chilakej minam malondina anch “tulikishina yitil yetu,” matuvurishin anch mudi mutukweta kuswir kwa difut dia Yesu, akadivar ni anambaz akwet kand niyawiy kuswir kwa kuyilikishin. Yehova utwitin kand tutongina piur pau ni piur pa urund wau ni ndiy. Chirumburikin kuyilikishin pakad kulab anch aturumbukin. Kuyilikishin ap anch yidi kwau yitil yikemp chidi kumekesh anch tuyikatin. Tumekeshin kand anch tusangeridin dilikishin dia Yehova padi etu.​—Kol. 3:13.

11. Ov, mulong wak chidi cha usey kwikal ni chaku cha kuyilikishin antu akwau?

¹¹ Cha ushon, mulong tudi akad kuwanyin, chikutwish kukasikan yisu yimwing kuyilikishin antu akata kuturumbukin. (Lev. 19:18) Anch twasambish kulond piur pa yom yatusalau, antu akwau akutwish niyawiy kwandam mu milong yiney ni yikutwish kuyipish uumwing wa chikumangen. Anch twalik yom yiney yadandamen, chikutwish kumekan anch tukwatinap nich usey chipan cha difut chapanay Nzamb ni tukutaninamwap. Anch twalik kuyilikishin akwet, Yehova ni ndiy kakutulikishinap. (Mat. 18:35) Yesu walonda pa mulong winou pafundishay malembil ma chilakej. (Tang Mateu 6:14, 15.) Kupwa, anch tusotin anch Yehova atulikishina yitil yetu, tufanyidin kwiyep kusal yitil yikash.​—1 John 3:4, 6.

“KANGAL WATUTWAL KU YOZIY”

12, 13. (a) Ov, chom ik chamushikena Yesu mu machuku makemp kupwa kwa dibatish diend? (b) Ov, mulong wak tufanyidin kusal usu wa kulank anch twawil mu choziu? (c) Ov, chom ik chamekeshay Yesu pashalay ushinshamena djat ni ku rufu?

¹² Kushinshikin kwa yom yamushikena Yesu mu machuku makemp kupwa kwa dibatish diend kukutwish kwatukwash kwijik kurumburik kwa malembil minam: “Kangal watutwal ku yoziu.” Yesu amutwala mwi mpay kudi mwiku wa Nzamb. Ov, mulong wak? ‘Chakwel amwoza kudi Sakudimban.’ (Mat. 4:1; 6:13) Ov, chinech chikutwish kutukashimwish? Bwat, tukutwishap kukashimuk anch twajingunin chamutuminau Yesu pa divu. Chading mulong wa kupwish mulong walanka pabwambwilau Adam ni Ev ku ukaleng wa Nzamb. Pafanyina kusut chisu chilemp mulong wa kupwish mulong winou. Chilakej, Ov, kwading chom chiyimp mu mutapu wamutangau muntu kudi Nzamb? Ov, muntu uwanyidina wela kutwish kukasikesh ukaleng wa Nzamb chikalap nchik yipwichik ya “muyimp”? Ov, antu ela kwikal ni musangar pakad umutakel wa Nzamb, mudi mwalonday Satan? (Dis. 3:4, 5) Kwakul ku yipul yiney kwitin chisu pakwez, kukez kumekesh anch ukaleng wa Yehova uyiyikedil yitang yawonsu ya manangu mulong wa kutaninamu kwau.

¹³ Yehova udi utumbila ni kakatap kumwozang muntu ap umwing chakwel asala uyimp. Pakwez, Djabul, ndiy udia “Sakudimban.” (Mat. 4:3) Djabul ndiy ukutwisha kulet yoziu. Chikwau kand, muntu amwinend ndiy ukutwisha kwilikidil chakwel awila mu yoziu ap bwat. (Tang Jakobu 1:13-15.) Ku mutambu wend, Yesu walika kapamp kamwing kwitiy kuwil mu yoziu pasadinay Dizu dia Nzamb. Chawiy lel, Yesu wakasikesha mbil ya Nzamb ya kuyikel. Pakwez, Satan kamulikap kumwoz. Ndiy wachingela kand “chisu chikwau.” (Luka 4:13) Yesu wadandamena kujijaman ku yoziu yawonsu yaletay Satan mulong wa kuyipish kushinshaman kwend. Kristu wakasikesha mbil ya kuyikel ya Yehova ni wamekesha anch muntu uwanyidina ukutwish kwikal ushinshamena chikalap nchik yoziu yikash. Pakwez, Satan uyozining kand kuyoz in kwilej a Yesu, kuwejinaku niyeyey.

14. Ov, chom ik tufanyidina kusal chakwel twipuka kuwil mu yoziu?

¹⁴ Mulong wa kwakul ku yipul yimedina pa ukaleng wa Nzamb, Yehova ukat kulik anch Sakudimban asadila mangand chakwel atwoza. Nzamb kakatap kutwoz. Pakwez, utuchingejidin ni usotin kutukwash. Mulong wa kulimish want ipau wetu, Yehova kakatap kutulikishang kapamp kamwing kuwil mu yoziu. Tukwet yom yaad ya kusal​—kucha ku mes muspiritu ni kujijaman mu malembil. Ov, mutapu ik ukatay Yehova kwakul malembil metu?

15, 16. (a) Ov, yoziu ya mutapu ik tufanyidina kurish nich? (b) Ov, nany ukweta chisend anch muntu wawil mu yoziu yiney?

¹⁵ Yehova utwinkishining mwiku wend utumbila chakwel twikala ni usu wa kujijaman mu yoziu. Nzamb utubabeshin kand kusutil ku Dizu diend ni ku chikumangan chend piur pa yom tufanyidina kwipuk, mudi kushesh chisu, nfalang ni usu wetu mulong wa yom ya kumujimbu yakad usey. Espen ni Janne adi mwingand yijim ya Mwimputu. Mu mivu yivud, asala uchibol wa rawonsu mwi ndond yimwing mwadinga kuswir kukash kwa in kulejan. Pavalau mwanau wa kusambish, imika mudimu wau wa uchibol ni katat akwet mwan wa kaad. Espen ulondin anch: “Tukat kumulembilang Yehova chisu chawonsu, chakwel kangal twawil mu yoziu mulong katat tutwishinap kusutish yisu yivud mu mijikit ya uteokras, mudi mu twasala pasak. Tumwitin Yehova chakwel atukwasha kulam mwikadil wetu wa muspiritu ni mushiku wetu mu mudimu wa kulejan.”

¹⁶ Choziu chikwau cha katat chidi cha kutal pornografi. Anch twawil mu choziu chinech, tukutwishap kumufish nich Satan. Ov, mulong wak? Mulong Satan ni mangand mend kakutwishap kutubachik chakwel tusala yom yakad kukwatijan ni rusot retu. Antu amwing awila mu choziu chinech patonginau pa yom yiyimp. Pakwez, tukutwish kurish mudi murishinau tunan twa akadivar netu.​—1 Kor. 10:12, 13.

“TUKAMUNINA KU KUYIP”

17. (a) Ov, mutapu ik tukutwisha kushakam kukwatijan nich malembil metu twitina kutukol ku uyimp? (b) Ov, kwongoj ik tuchingedina piswimp ap?

¹⁷ Mulong wa kushakam kukwatijan nich malembil madia anch “tukamunina ku kuyip,” tufanyidin kusal usu wa ‘kwipuk kwikal mu umwing nau in mangand ma [Satan].’ Tufanyidinap ‘kukat mangand ma [Satan] ap yom yau yidiamu.’ (Yoh. 15:19; 1 Yoh. 2:15-17) Mulong wa kusal mwamu, chifanyidin kudandamen kurish nakash. Chikwikal chongojina mudi ik pakezay Yehova kwakul ku malembil minam pakumudioshau Satan ni yom yawonsu yiyimp yidia mu mangand! Pakwez, tufanyidin kuvurik anch pamudjibulau Satan pansh, wijika anch chisu chend chashal kal chikemp nakash. Nich ujim ukash, usadin usu wend wawonsu chakwel ayipisha kushinshaman kwetu. Tufanyidin kudandamen kulembil chakwel atukamunina kudiay muyimp.​—Kuj. 12:12, 17.

18. Ov, chom ik tufanyidina kudandamen kusal chakwel tupanda kwinsudiel kwa mangand ma Satan?

¹⁸ Ov, usotin niyey kwikal nich mashakamin mudi minam masangareshina mu ma kurutu? Chawiy lel, dandamen kulembil chakwel Want wa Nzamb utumbisha dijin dia Nzamb ni usala rusot rend pa divu. Dandamen kumuchingejin Yehova chakwel awanyisha maswir mey ma muspiritu ni ma kumujimbu. Mwaning, ikasikesha lel kushakam kukwatijan ni malembil ma chilakej.