Udi Mwin Dikand Diawonsu Pakwez Ukat Kubangin

1, 2. (a) Mutapu ukatay Yehova kuyisadin antu end ushalijadin nchik ni mutapu ukatau kuyisadin antu kudi akwau akwetu ulabu? (b) Yom ik tukwisambina mu mutu wa mulong winou?

YISU yivud antu akweta ulabu akat kuyiyikel antu akwau ap kuyimesh mar. (Mateu 20:25; Mulej 8:9) Pakwez Yehova kakusalangap mwamu! Ap anch udi Mwin Dikand Diawonsu, Muntu ukweta usu nakash mu mangand mawonsu, udi mwin kuyibangin antu akad kuwanyin. Udi muwamp ni mwin kubangin yovil ni maswir metu. Wij anch tudi antu akad kuwanyin ni wij mimbu yetu, chawiy katwitinap kusal yom yivud yitwakad kutwish kusal.—Kuseng 103:13, 14.

² Twilejin mu Bibil mutapu Yehova wayibanginay antu end. El twisambinany yilakej yisatu: Cha kusambish, mutapu Yehova wamukwashay nsand Samwel kupan uruu wa dirumburish kudi Mwin Kupesh Mujim Eli. Cha kaad, mutapu washimpishay Yehova muchim mulong wa Moses chisu chatongay Moses anch kakutwishap kutakel muchid wa Isarel mulong wa kuudiosh mu Idjibit. Ni cha kasatu, mutapu wayibanginau in Isarel kudi Yehova pading padiokilau mu Idjibit. Yom ik twilejina piur pa Yehova kusutin yilakej yiney, ni mutapu ik tukutwisha kumwimburij?

WAMUBANGINA NSAND

3. Chom ik chishimwokishena chamushikena nsand Samwel, ni chipul ik tukutwisha kwiyipul? (Tal chipich cha kwisambishin.)

³ Samwel wasambisha kusadin ku dizang chisu chadingay mwan mukemp nakash. (1 Samwel 3:1) Uchuku umwing payay kulal, kwashikena chom chimwing chishimwokishena nakash.a (Tal mazu ma kwinshin.) (Tang 1 Samwel 3:2-10.) Watesha muntu ukat kumutazuk. Samwel watonga anch wading ipal Mwin Kupesh Mujim Eli. Chawiy waziyina, walanka ni waya kudi Eli ni wamwela anch: “Nez kal mwan, mulong yey wantazukanga.” Pakwez Eli wamuleja anch: “Kiyamap nakutazukanga.” Kupwa amutazuka kand tupamp tukwau twaad, chad Eli wajingunina anch Nzamb ndiy wading umutazukina Samwel. Chawiy Eli wamuleja Samwel yom yifanyidina kulond anch amutazuk kand kapamp kakwau, ni Samwel waziyina. Mulong wak Yehova kamulejap Samwel kapamp ka kusambish anch ndiy wading umutazukina? Bibil kalejenap diyingishin. Pakwez chimeken anch Yehova wasala mwamu mulong wading ubangidin yovil ya Samwel.

4, 5. (a) Yom ik yasalay Samwel pamwinkishau uruu kudi Yehova wa kumulej Eli? (b) Rusangu riner ritufundishin yom ik piur pa Yehova?

⁴ Tang 1 Samwel 3:11-18. Chijil cha Yehova chayileja an akemp kuyilimish antu apamina kal, nakash antu akweta winyikel. (Kubudik 22:28; In Levi 19:32) Chawiy chikasiken kutong anch nsand mudi Samwel atumbuka pamanch, mulong wa kuya kudi Eli ni kumulej nich kutakaman uruu wa dirumburish dikash dia Nzamb. Bibil utulejin anch Samwel “wova wom wa kumulejamu Eli chishimushimu chinech.” Pakwez, Nzamb wasala anch Eli ijik anch Umutazukin Samwel. Mudi chibudikin, Eli wamwela Samwel anch kangal wamujindjikin chom ap chimwing chamulejau kudi Nzamb. Samwel wamuziyina Eli, ni “wamuleja yom yawonsu.”

⁵ Uruu winou wadingap wa kukashimwish, mulong kurutu kwa yiney “muntu umwing wa Nzamb” wamuleja Eli uruu wa mutapu winou. (1 Samwel 2:27-36) Rusangu riner ritufundishin mutapu udiay Yehova mwin kubangin ni mwin manangu.

6. Malejan ik tukutwisha kwilej kusutin mutapu wamukwashau nsand Samwel kudi Nzamb?

⁶ Ov, niyey udi nsand? Anch chidi mwamu, rusangu ra Samwel rimekeshin anch Yehova uteshin milong ni yovil yey. Pamwing ap ukweting usany ap umen anch chikukasikedining kulejan rusangu ruwamp kudi antu amakurump ap kwikal ushalijadina nau antu a mivu yey. Ukutwish kwikal nich kashinsh anch Yehova ukatin kukukwash. Chawiy mulembila ni muleja kamu mutapu wiyovila. (Kuseng 62:8) Tong nakash piur pa yilakej yidia mu Bibil ya ansand ading mudi Samwel. Ni yileja akadivar nau anambaz a mivu yey ap apamina kal atwisha niyau kupandakan milong mudi yiukweta. Akutwish kukulej piur pa yisu yayikwashau kudi Yehova, pamwing ap mu mutapu wakadiau kuchingejin.

WAMUBANGINA MOSES

7, 8. Mutapu ik wamekeshay Yehova anch ubangidin nakash yovil ya Moses?

⁷ Pawanyishay Moses mivu 80, Yehova wamwinka chisend chimwing chikash: Kukwol muchid wa Isarel mu usuk wa Idjibit. (Kubudik 3:10) Chimeken anch chisend chinech chamwakamisha Moses nakash, mulong wading kafung wa amikoku mu Madian mu mivu 40. Moses walonda anch: “Ov, niyam nachadi nany nikutwisha kuya kwa Farao, nikayidiosha in Isarel mu Idjibit?” Yehova wamukasikesha Moses anch: “Am nikez kwikal ney.” (Kubudik 3:11, 12) Yehova wamukana kand anch amakurump a in Isarel afanyina “kutesh dizu” diend. Pakwez Moses walonda anch: “Tal bil, awiy kakez kangitiyap am, bwat, ap kwintesh ku mazu mam.” (Kubudik 3:18; 4:1) Moses wading ulondin anch Yehova ukutwish kudimban! Pakwez Yehova washimpisha muchim mulong wa Moses. Wamwinkisha kand usu wa kusal yilay. Chakin, Moses ndiy wading muntu wa kusambish ulejenau mu Bibil wikala ni usu mudi winou.—Kubudik 4:2-9, 21.

⁸ Ap kupwa kwa yom yiney yawonsu, Moses wading ukimbin mutapu wa kulik. Walonda anch kakutwishangap kulond nawamp. Chawiy Nzamb wamuleja anch: “Am nikez kwikal ku kan kwey, nikakulej yom yiukeza kulond.” Ov, Moses wikala kamu chad nich kashinsh? Bwat, wamuleja Nzamb kutum muntu windj! Kupwa, Yehova wajimana. Pakwez wadandamena kubangin yovil ya Moses, chawiy wamutuma Aron mulong wa kulond pa ndond ya Moses.—Kubudik 4:10-16.

9. Mutapu ik kushimpish muchim ni kuwap kwa Yehova kwamukwasha Moses kwikal ntakel muwamp?

⁹ Rusangu riner ritufundishin ik piur pa Yehova? Mulong Yehova udi Mwin Dikand Diawonsu, wafanyina kusadin usu wend mulong wa kumwovish Moses wom ni kumushindil chakwel aziyin. Pakwez, Yehova wading muwamp ni ushimpishina muchim, ni wamukasikesha kashalapol wend wikepishina ni witudishina anch ukwikal nend. Ov, kusal mwamu kwading ni yibudikin yiwamp? Mwaning! Moses wikala ntakel mujim nakash wa antu a Nzamb. Wasala usu wa kwikal witudishina ni mwin kuyibangin antu akwau, mudi mwasalay Yehova pantaliken nend ndiy.—Kuchind Michid 12:3.

10. Mutapu ik tukutaninamu anch twikal in kuyibangin antu akwau mudi Yehova?

¹⁰ Malejan ik twilejidinaku nlel? Anch udi ikundj, nvaj ap mukurump wa chikumangen, ukwet ulabu kampand piur pa antu akwau. Mulong wa diyingishin dined, chidi cha usey nakash anch wamwimburij Yehova mu kwikal mwin kubangin, muwamp, ni ushimpishina muchim mulong wa mukajey, aney ni antu akwau adia mu chikumangen. (Kolosay 3:19-21; 1 Pita 5:1-3) Anch wamwimburij Yehova Nzamb ni Yesu Kristu, udia Moses Mujim, ukusal anch chiyiswapel antu akwau kwez kudi ey ni kwambamb ney, ni ukwikal mwin kuyikasikesh. (Mateu 11:28, 29) Ukwikal kand chilakej chiwamp kudi awiy.—Hebereu 13:7.

UKWET USU NAKASH PAKWEZ UDI MWIN KUPANDISH UKATA KUBANGIN

11, 12. Mutapu ik wasalay Yehova chakwel in Isarel iyova anch adi mu diking chisu chadiokalau mu Idjibit?

¹¹ Chimeken anch kukutwish kwikal mamiliyon masatu ni kusut ma in Isarel adiokala mu Idjibit mu muvu wa 1513 kurutu kwa Kristu. Mu chisak chinech cha antu mwading an akemp, amapal ni pamwing ap antu ading ayedina ap ayilim. Chisak chijim mudi chinech cha antu chading chikwet kuswir kwa Ntakel mwin kuyilam ni uyiteshina. Ni mwawiy kamu mwadingay Yehova kusutil Moses. Mudi chibudikin, in Isarel iyova anch adi mu diking chisu chadiokalau mwi ndond yimwing kusu yading yijau.—Kuseng 78:52, 53.

¹² Mutapu ik wasalay Yehova chakwel antu end iyova anch adi mu diking? Watenchika muchid wa Isarel mudi ‘arijekinau mulong wa njit’ chisu chadiokalau mu Idjibit. (Kubudik 13:18) Mulong ading arijekinau nawamp pa mulong winou, afanyina kuman nawamp anch Nzamb wau wading ukat kuyishinshikin. Yehova wayinkisha kand “didj muten” ni “kutok kwa kasu” uchuku mulong wa kuyivurish anch wading nau, uyitakedin ni uyichidijin. (Kuseng 78:14) Ni muchid wa Isarel wading nich kuswir kwa kashinsh kinak mulong wa yom yashikena kurutu.

13, 14. (a) Mutapu ik wayilamau in Isarel kudi Yehova ku Karung Musuz? (b) Mutapu ik wamekeshay Yehova anch wading ukwet usu nakash kusutamu in Idjibit?

¹³ Tang Kubudik 14:19-22. Tong bil mudi udi pamwing nau in Isarel. Udiany mu ubaj. Amasalay in Idjibit adi kwinyim kwen ni Karung Musuz udi kurutu kwen. Kupwa Nzamb wasal kal chom chikash. Dinguj dia didj didia kurutu kwen diashemunik kal diachirik kwinyim, dikal kal pakach penen nau in Idjibit. Katat awiy adi mu mididim, chad en udiany mu chitokish chiwamp nakash! Kupwa umen mutapu utandjekinay Moses chikas chend pa karung, ni rinkind mukash udiokila kwingangel, wabaril kal njil yijim djat ni ushad ukwau wa karung. Chawiy ey, dijuku diey ni yivam yey, en awonsu wendidinany mu ulal wa karung mu mutapu uwamp pamwing nau antu akwau awonsu. Chad ukat kushimwok nakash mulong divu dibwatatinap ni disidinap. Diumin ni dikasiken, chawiy chiswapel kwendinap. Mudi chibudikin, ap antu endina pakemp nakash atwishin kushik nawamp ushad ukwau.

¹⁴ Tang Kubudik 14:23, 26-30. Chisu chisadikina yom yiney yawonsu, Farao, mwin chibud ni chisup, wasambish kal kukulondulany ni akwen akwau in Isarel. Kupwa Moses watandjek kal kand chikas chend pa karung, ni jimbumbu jaad ja mem jasankanijan kal. Mem mamubwik kal Farao ni amasalay end. Kwikil ap umwing wau wapanda kal!—Kubudik 15:8-10.

15. Rusangu riner ritufundishin yom ik piur pa Yehova?

¹⁵ Rusangu riner ritufundishin chom chikwau piur pa Yehova. Udi Nzamb wakad kanvundangesh, ni mwikadil winou utukwashin kwiyov anch tudi mu diking. (1 Korint 14:33) Mudi kafung ukatina ni ukata kulam amikoku end, Yehova uyilamin antu end mu mitapu kushalijan. Uyilamin mu diking ni uyichidijin mu makas ma akankuny au. Chinech chitwinkishin kashinsh ni chitukasikeshin nakash pitusejina piswimp ni disudiel dia mangand minam.—Jinswir 1:33.

16. Mutapu ik tukutwisha kutaninamu mu kushinshikin mutapu wayipandishau in Isarel kudi Yehova?

¹⁶ Nlel unou, Yehova udandamedin kuyilam antu end mudi chisak. Uyikwashin kulam urund wau uwamp ni ndiy ni uyichidijin mu makas ma akankuny au. Ni ukudandamen kusal mwamu pa chisu cha mar makash mezina kamu piswimp ap. (Kujingunik 7:9, 10) Chawiy, ikala ansand ap amapal, akweta ukash wa mujimbu uwamp ap ayilim, antu a Nzamb kakwovap wom ap kuzal pa chisu cha mar makash.b (Tal mazu ma kwinshin.) Pakwez, akusal yom yishalijadina! Akuvurik mazu ma Yesu malondina anch: “Imanany piur, zambulany mes, mulong dipandish dien diez kal piswimp.” (Luka 21:28) Ap chisu chikuyirishikishau kudi Gog udia kubombakan kwa michid yikweta usu kusutamu Farao, antu a Nzamb akwikal nich kashinsh anch Yehova ukuyichidij. (Ezekiel 38:2, 14-16) Mulong wak? Mulong ij anch Yehova kakuswimpangap. Ukumekesh kand anch udi mwin Kupandish mwin rukat ni mwin kuyibangin antu end.—Isay 26:3, 20.

17. (a) Mutapu ik tukutwisha kutaninamu anch twilej jinsangu ja Bibil piur pa mutapu ukatay Yehova kuyilam antu end? (b) Yom ik tukwisambina mu mutu wa mulong wambakedinap ou?

¹⁷ Mu mutu wa mulong winou, twilej kal yilakej yimwing yimekeshina mutapu udiay Yehova mwin kubangin ni muwamp chisu chayilamay, kuyitakel ni kuyipandish antu end. Piutongijokidina pa jinsangu mudi jinej, sal usu wa kwilej chom kampand chisu piur pa Yehova mu kujingunin yom yikwau yiwakad kwijik. Piwilejina yom yivud piur pa mikadil yiwamp ya Yehova, rukat rey mulong wendendiy ni ritiy rey yikukasikan. Mu mutu wa mulong wambakedinap ou, tukwilej piur pa mitapu tukutwisha kumwimburij Yehova mu kuyibangin antu a mu dijuku dietu, adia mu chikumangen ni atutanina mu mudimu wa kulejan.