Yilejany Anen

Samwel Wadandamena Kusal Yom Yitentamina

OV, KANDIKAL uyimanap antu akwau asal lel yom yiyimp? —a Samwel niyend wayimana. Ndiy wadinga ushiching kwi ndond yimwing yikutwishap watongin anch antu adingaku akutwish asalaku yom yiyimp. Ndond yiney yadinga dizang dia Nzamb, ap anch kwi ndond ya kwifukwidil, mu musumb wa Silo. El tushinshikinany mutapu wasadika yom yiney, pasutil kal mivu 3 000, dizang dieza kwikal chikumbu kwadinga kushichingay Samwel.

Kurutu Samwel avadika, makwend, Hana, wadinga ni kusot nakash chakwel avala mwan. Payay dichuku dimwing ku dizang, Hana wamwilembila Nzamb pa mulong winou. Walembila nich yovil yikash mu chilik chakwel anch milamu yend yasambisha kuzalizal. Chawiy chamushikija mwin kupesh wa pu muntu, Eli, amutongina anch ukwachikin maar. Pakwez chisu chijikay anch kakwachikinap maar pakwez wadinga unenganen nakash, Eli wamuyukisha, ni walonda anch: “Nzamb wa Isarel atesha malembil mey.”—1 Samwel 1:17, NW.

Kurutu, Samwel wavadika, ni Hana wasangara nakash ni wamuleja nfumwend, Elikana anch: ‘Anch Samwel walik kwamu, nikumutwal ku dizang chakwel akamusadila Nzamb kwinikwa.’ Chawiy chasalay! Pa chisu chinecha, Samwel wadinga ukwet mivu yinying ap yitan.

Eli wadinga wakungin kal, ni anend amakundj, Hofini nenday Fines, kadingap ni kumwifukwil Yehova mu mutapu uwamp. Adinga ni kusal ni masandj pamwing ni amband adinga kuya ni kutal dizang! Ov, utongin chom ik chelay kusal tatukwau?— Mwawiy, wadinga ufanyidin kuyipup ni kuyikoj kangal asala yom yiney yiyimp.

Nsangarum Samwel niyend wadinga uyil mu kupam, ni chakin kamu washikena ku kwijik chaku chiyimp chadingau nich an amakundj enday Eli. Ov, Samwel walondula chilakej chau chiyimp?— Bwat, ndiy wadandamena kusal yom yitentamina, mudi mwamulejau kudi anvaj end kusal. Pakwez, pakad kwidjidjek, Yehova wamwovila Eli ujim. Wamutuma muprofet chakwel akamuleja Eli mutapu ukupupay Yehova dijuku diend, nakash nakash anend amakundj ayimp.—1 Samwel 2:22-36, NW.

Samwel wadandamena kusal pamwing ni Eli ku dizang. Pa uchuku umwing, padingay Samwel ulel, dizu diamutazuka. Chad Samwel wavumbula mau waya kudiay Eli, pakwez Eli wamwela anch kamutazukangap. Chom chinech chasadika kakwau. Chakin kamu, chom chinech chasadika tupamp tusatu, Eli wamuleja Samwel alonda anch: “Lond, Yehova, mulong kashalapol wey uteshin kwend.” Palonday Samwel mwamu, Yehova wamuleja yom. Ov, wij yom yamulejau Samwel udiay Yehova?—

Nzamb wamuleja kand Samwel rutong Rend ra kudipup dijuku dia Eli. Pamanch dichuku dialondulap, Samwel wadinga wovil wom wa kumulej Eli yom yalonday Yehova. Pakwez Eli wamwilembila Samwel anch: “Nilemb amboku, kangal wajindjikinach.” Chawiy, Samwel wamuleja Eli yom yawonsu yalonday Yehova anch yawiy Yikusalay—mudi kamu mwamulejau Eli kudiay muprofet wa Yehova. Eli wakula anch: “[Yehova] asala yawonsu yiwapina ku mes kwend.” Kurutu, Hofini ni Fines ayijipa, ni Eli niyend wafa.—1 Samwel 3:1-18.

Pa chisu chinicha kand, “Samwel wakula, ni Yehova amwinend wadinga pamwing nend.” Ni Samwel wadinga wikadil kal kamu nsand, chirung chimwing cha usey nakash mu mwom wa ansand. Ov, utongin anch chadinga chimuswapedil Samwel chakwel adandamena nich kusal yom yitentam ap anch akwau kadingap ni kuyisal?— Ap anch kichadingap chiswapela, Samwel wamusadila Yehova nich kushinshaman mu mwom wend wawonsu.—1 Samwel 3:19-21, NW.  

Ov, chidi nchik ku mutapu wey? Ov, ukwikal mudi Samwel, piuyila ni kukul? Ov, ukudandamen kusal yom yitentamina? Ov, udandamen kulamat dang ku malejan ma Bibil chakwel usala yom yakulejau kudi anvajey? Anch wasal mwamu, ukumusangaresh Yehova kumwing ni anvajey.

[Mazu madia kwishin kwa paj]

Yipul:

○ Mutapu ik washikenay Samwel ku kusadil mu dizang dia Yehova?

○ Yikokujol ik yadingay nich Samwel kwinikwa?

○ Samwel wayishila ansand chilakej cha mutapu ik?